Kabavelamu 25
25
Iso wete Iakobo itubuqa
19Dede Aisake menatunavo vesipusipupudi dede mesaida. Aisake tamana Ebelamo 20we, tutuyanina Aisake kanadiqaba 40, Libeka inaqidi. Libeka Bedueli natuna we Lebani novuna kaniabadi, gumanidiavo me Elami we Mesopotemia pwayapwayana waineye imiamia.
21We Libeka gagalidi ge menatudiavo, beqa Aisake ivelaukui Iave waineye mwanena inakaivaisedi. Iave navelaukui inoqai, beqa Libeka ive'ina'inaqe gamodie gwagwama didilualua. 22We gwagwama iekaibibibina mediveluluna gamodie beqa Libeka inaqo Iave ivelautolieni, “Dede vakai isasauyeni waimeye?”
23Iave ivonedi ivo,
“Gwagwama kadikailuqa gamomie kawaie kabaloina kailuqa inasauyedi.
Komi kawaie yoko kailuqa kwaivenatunedi, we ediavo taiauda inaetalaqa.
Tamo veluvelulunina matautauda iana,
we komi mitomwayai inavetolituqa taina waineye.”
24Tutuyanina Libeka ivetubuqa, mwaqitana didilualua ivetubuqidi. 25Tomwayai itubuqa vovona yamoyamoina we mevutuvutuna, mesaida tupwaidiavo talauma mevutuvutudi, beqa iqoleni Iso.#25:25 Ibeliu bonadieqa, Iso kananuakawananaqai mevutuvutuna. 26Matautauda tamo gwamana itubuqa dimana tatana kaqekedukeduna ikakavikavini, beqa iqoleni Iakobo.#25:26 Ibeliu bonadieqa, Iakobo kananuakawananaqai “iana kaqekedukeduna ikakavikavini.” Vonawakedubala kananuakawananaqai “gumanina ikatupoe.” Tutuyanina Aisake kanadiqaba 60, mwanena gwagwamanidiavo ivetubuqidi.
Iso tomwayai kanakalaqei giamaina Iakobo iveleni
27Mulineye gwagwamanidiavo itaulai, Iso gumanina tamo toveyaoqa giamaiotoqina, we tutuya puena inaqonaqo walakaie. We Iakobo gumanina tomoqo vekwavekwadana, we tutuya puena ukweta waineye imiamia. 28We Aisake wayaqina vaiqo inakanikani Iso iyayaubani, beqa Iso ivenapwayewa-otoqeni, we Libeka Iakobo ivenapwayewa-otoqeni.
29Tamo kaiata Iakobo kemopo#25:29 Dede kemopo tamo bini yamoyamoina Ibeliu bonadieqa “lentil.” Tutuyanina ivetavoqa bwasi taiauda iqoleni “supu,” we kida tavo kemopo. ietavoqa, Iso ivila imai walakaie'eqa, ikabiawa wete ilase-otoqa. 30Beqa ivesipupu Iakobo waineye ivo, “Yau alase-otoqa. Tupwaidiavo kemopo yamoyamoidi kuvelegu sideqoina aikanidi!” Dede mesaida ivesipupuyedi, beqa Iso tamo wavaqa iveleni, Edomu kananuakawananaqai yamoyamoina.
31Matautauda Iakobo ivo, “Komu tomwayai, kamukabeida kalaqei bwaigina tamada naguyo kikewai. Deqoina kivonegu kamukalaqeinina kivelegu, matautauda kemopo dede aivelemu kikani kamukalaqei kanaketopesala.”
32We Iso ivo, “Yau lase ge idayavagu, beqa tomwayai kanakalaqeinina ge kanasala inakaivaisegu! Ee, beqa komu kukewai.”
33Beqa Iakobo ivo, “Deqoina kivonadabadaba no tomwayai kanakalaqei kivelegu.” Beqa Iso ivonadabadaba no tomwayai kanakalaqei matatabuna Iakobo inaveleni.
34Matautauda Iakobo kemopo tupwaidiavo isiobuyedi, Iso iveleni beledi taiauda ikani wete iyemu ikakava itauya. Beqa mesaida, Iso nuana ge idaloloi tomwayai kanakalaqei giamaina paipaina we kaia inuanua nakani paipaina.
S'ha seleccionat:
Kabavelamu 25: mzz
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 (Active), Wycliffe Bible Translators, Inc. All rights reserved.