Isauyedi 12
12
Vemataluana Vesikaqalataqona paipaina
1Tutuyanina me Isileli giladi imiamia Itipita naqeneye, Iave ivesipupu Mosese wete Eloni waidie dede mesaida ivo, 2“Dede wetaki kwaiyatoi diqaba kanawetaki gumegumetana. 3Me Isileli matatabudi waidie kwaivesipupu kwanavo, ‘Dede wetakinina kanakaiata 10 waineye tomoqo tamoqana tamoqana nasipi o nagouti mwanewauna inavesinueni nasusu paipaidi inakani, tamoqana kaisaya vanuqa tamoqana paipaina. 4Kago tomoqo navanuqa kanatomo'otoqavo ge puediqa ge kadisala kaisaya matatabuna inakania, kanasala ediavo taiauda inakani-velautaubama, gumanidiavo vividie imiamia. Kanasala kaisayanina inatuyei tomo'otoqa kadiyoko kanawawa waineye, we tomo'otoqa tamoqana tamoqana kanaketoaveye inakani. 5We kanasala sipi o gouti kwaivesinueni, gumanina lamoqina, vovona giamaina wete kanadiqaba tamoqana. 6Kwavekisabodebodeni kanaketoava dede wetakinina kanakaiata 14, matautauda no kaiatanina waineye valavala inaketoniveni me Isileli matatabudi kaisaya inanigedi. 7Matautauda kaisayanina dayaqina kwaikewai mivanuqavo kabalugu viladie wete tabwadie kwaisabadi, gumanimiavo naqeneye kwaikani. 8No lovananina tamoqana waineye kaisayanina vaiqona kwaigabuni kai tabwaneye we kabalaumaqamaqaila qolaqolana wete beledi ge mekana'isiti taiauda kwaikani.
11“ ‘We kaninina side mesaida kwaikaniedi. Kwaivaiqavu sasala paipaina, kaqeyapayapami kadiumauma kwaisilagaidi wete miutoqana kwaikewadi dimamie. We vedimadimanaeqa kwaikani. Yau Iave gu Vesikaqalataqona Kanakani.
12“ ‘No lovananina tamoqana waineye, ainaqo vanuqa Itipita aikapavivili tomwayai lamoqidiavo ailuvewapadi, tomo'otoqa wete kaisayavo. Tutuyanina waineye me Itipita diyaubadavo aivetupwayapwayadi, beqa inayagovi Yau Iave. 13We mivanuqavo kawadie dayaqa kwaiyatodi kadikiakiaya, no dayaqanina aikiseni gumanina inavevegu komi kaiebei waineye kwamiamia, we tutuyanina aikiseni aivesikaqalataqona. Beqa tutuyanina me Itipita aikaimatavuloqidi, ge tamo saku kapoina inasauyeni waimie.
14“ ‘Dede kaninina kwaivavalabubuni kaiatanina tamoqana waineye diqaba tamoqana tamoqana waidie beqa vakai Yau Iave avalabubuni kwainuavekavinigu. Guloina ge menakabakakava dede mesaida lagata tamoqana tamoqana imaimai kaiata dede kwainuavekavini wete kani dede kwaivavalabubuni.’ ”
Vemataluana Beledi Tutubeabeana Ge Mekana'isiti Kanakani paipaina
15Wete Iave ivesipupu ivo, “Mulineye komi Itipita kwaikiaweni dede Beledi Tutubeabeana Ge Mekana'isiti Kanakani kwaivalabubuni dede mesaida. Kaiata 7 naqedie beledi ge mekana'isiti kwaivalabubuni kwaikani. Kani kanakaiata gumegumetana waineye mivanuqe'eqa isiti matatabudi kwaikewaluguaqetedi kwaitawedi. Dede ketoboda ge tamo aitoi beledi mekana'isiti inakani kaiata kabavelamu waineye inanaqo kanaketoava kaiata 7. Aitoi tamo beledi mekana'isiti inakanikani kaiata 7 dede waidie, inakewaluguaqeteni me Isileli waidie'eqa. 16Kani kanakaiata kabavelamu waineye wete kabavekakava waineye kwaimiakauqa sobwanu paipaina. We no kaiata kailuqanidiavo waidie ge tamo lituqa kwailituqidi, we kaia kamiqa kwaivetavoqa. 17Dede Beledi Tutubeabeana Ge Mekana'isiti Kanakani kwaivalabubuni minuavekavina banikodiqa base no kaiatanina waineye mimanuqavo wete misusuvo Itipitaeqa akedagumetedi isauyedi. Lagata tamoqana tamoqana imaimai dede kani kwaivavalabubuni kaiatanina waineye.”
Vesikaqalataqona gumegumetana
21Matautauda Mosese me Isileli tomoqovo bwaigidi iqolekauqidi we Iave navemataluana ivesipupuyedi ivo, “Kaiata 10 waineye, komi tamoqana tamoqana kwainaqo kaisaya gouti o sipi natuna kwaivesinueni wete kaiata 14 waineye kwailuvewapai beqa misusuvo taiauda kwaikani Vesikaqalataqona paipaina. 22Welavi siaidi kadiwavaqa isopa#12:22 Welavi dede siaina diana tatatalidi we dididie idiadia beqa kanasala divudivu giamaina kivavalabubuni. dimadi kwaisikwagigia kwaimaieni kwaikutuvidi kaisayanina dayaqina kanatakula naqeneye, we mivanuqa kawadi doledie wete tabwadie kwaisabadi. Ge tamo aitoi navanuqe'eqa inasauyeni kanaketoava kawakawai. 23We lovananina waineye Iave Itipita matatabuna inakapavivili, Itipita susu tamoqana tamoqana tomwayai lamoqidiavo inaluvewapadi. We tutuyanina Iave dayaqa inakiseni mivanuqa kawadi doledie wete tabwadie, vanuqanidiavo inavesikaqalataqonidi. Beqa na'anelose toluvewapa ge inatagwaneni mivanuqe inalugu tomwayai lamoqidiavo inaluvewapadi.
24-25“We tutuyanina no pwayapwayanina waineye kwailugu, gumanina Iave ivonadabadaba inavelemi, dede mesaida komi wete tubuleleleqimiavo kwaivalabubunedi, Vesikaqalataqona Kanakani kwaivavalabubuni diqaba tamoqana tamoqana waidie ge menakakava. 26Tutuyanina migwagwamavo inavelautoliemi inavo, ‘Kani dede vakai kananuakawananaqai?’ 27Komi waidie kwaibaivila kwanavo, ‘Dede Vesikaqalataqona kanavelomu davekimatana Iave waineye. Base no lovananina waineye Itipita naqeneye Iave davanuqa ivesikaqalataqonidi we me Itipita tomwayai lamoqidiavo iluvewapadi. We kida datomwayai lamoqidiavo iketoyavudi. Beqa dede mesaida tavalabubunedi.” Tutuyanina Mosese ivesipupu ikakava, matautauda tomo'otoqa Iave waineye isobwanu wete ididigeni. 28Sakunidiavo matatabudi Iave ivesipupuyedi Mosese wete Eloni waidie, Mosese ivesipupuyedi me Isileli waidie we ivalabubunidi.
Tomwayai lamoqidiavo iwapa
29Lovana gamwane Iave me Itipita tomwayai lamoqidiavo matatabudi iluvewapadi. Pelo natomwayai waineye ivelamu iobu inaqo pilisina yomuyomuotoqidi ditomwayai lamoqidiavo waidie. Wete mesaida kaisaya tomwayai lamoqidiavo matatabudi iluvewapadi. 30No lovananina waineye Pelo itovoi, wete natolituqavo bwaigidi wete me Itipita matatabudi itovoi. Vanuqa tamoqana tamoqana waineye tomwayai iwapa, beqa matatabudi bonadi bwaigidieqa itaitaiqa. 31Lovananina waineye Pelo Mosese wete Eloni iqoledi imai waineye we waidie ivesipupu ivo, “Kwanaqo, komi we me Isileli matatabudi! Gupwayapwaya kwakiaweni kwasauyemi kwainaqo Iave waineye kwaisobwasobwanu mesaida kwanuanuanedi. 32Misipivo, migoutivo wete mibulumakauvo kwaikewadi kwaitauya. Kwanaqo, we mi Yaubada kwavelaukuieni inavonavenapwayewegu.”
33Beqa me Itipita me Isileli iveketounaunadi dipwayapwaya waineye'eqa inasauyedi. Ivo, “Kago ge kwainaqo, kima matatabuma kaiwapa.”
37Me Isileli taoni Lamasesieqa kaqedieqa itauya inaqo vikai Sikoti waineye. No waineye tomoqovo kadiyoko 600,000 we vevine wete gwagwama ge mekadiwawa. 38We tupwaidiavo tomo'otoqa ge me Isileli taiauda inaqo wete mesaida puedi sipi, gouti wete bulumakau ikewadi taiauda. 39Tutuyanina me Itipita ikwavinedi vedimadimanaeqa itauya we kadi ge idavalabubuna we kaia pwalawa ge mekana'isiti ikewai. Beqa beledi tutubeabeana gunabei igabuni we pwalawanina ge mekana'isiti taiauda.
40 #
Kaba 15:13
Me Isileli Itipita naqeneye imiamia diqaba 430 mulineye isauyedi.
Vesikaqalataqona Kanakani kanaloinavo
43Iave Mosese wete Eloni ivonedi ivo, “Dede Vesikaqalataqona Kanakani kanaloinavo: ge tamo olaolaga inakani. 44Mitolituqamaimaiqa, gumanidiavo mane beqa kwagimwanedi, kanasala inakani, we naqaida gukiakiaya bunu kanagusu kwaivalabubuni#12:44 Gukiakiaya bunu kanagusu kananuakawananaqai Kabavelamu 17:11, “Beqa komu dukumunina kabasaila matana bununa kugusuya, inavekiakiaya davonadabadaba komu wete Yau taiauda.” waidie. 45Olaolaga, gumanidiavo taiauda kwamiamia tutuya kalakusana wete mitolituqavo kwatututulidi ge inakani. 46Tutuyanina tovetavoqa kaisaya kwainigei luludi ge kwaitutubaidi. We tutuyanina Vesikaqalataqona Kanakani kwaikania kaisaya matatabuna kwaivekakavadi mivanuqa waidie. We vaiqo ge tamo kwaikewai vanuqe'eqa kwailuguaqeteni. 47Beqa me Isileli matatabudi Vesikaqalataqona Kanikaninina inakani.”
S'ha seleccionat:
Isauyedi 12: mzz
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 (Active), Wycliffe Bible Translators, Inc. All rights reserved.