Rut 1
1
Elimelek na biki katohul du uŧaak wi Mowab
1Ţi wal wi bawayëş bţup bakşihuŋ Iŧrayel, kë ubon uweek uşë wo ţi uŧaak. Uko waŋ ukaaŋ kë ñiinţ aloŋ, anwooŋ i ubeeka wi Betleyem du uŧaak wi Yuda apënna da wal mënţ, ul na aharul na babukul biinţ batëb, aya pyaanţ ŋwal ŋloŋ du uŧaak wi Mowab #1.1 Mowab dawo dko dannëkuŋ danwooŋ ţi pŧaal pi bdëk bankeţuŋ 2Katim ki ñiinţ mënţ kawo Elimelek, ki aharul kë kawo Nowemi, yi babukul kë iwo Mahlon na Kiliyon. Bawo bañaaŋ biki Efrata banwoonuŋ Betleyem du uŧaak wi Yuda. Wi babanuŋ du uŧaak wi Mowab aşë fëţ da.
3Wi bawooŋ da kë Elimelek ayin Nowemi aşë waaŋa, aduka nayoţ na babukul. 4Babukul bukuŋ, kë baduk aniim baaţ biki uŧaak wi Mowab. Aloŋ ţi baaţ mënţan awo katim ki Orpa#1.4 Orpa danaam kaŧiinkare na kambuuŋ uwo wo ji ñaaŋ anjaaŋ aten kafeţ., kë natëbanţën awo Rut#1.4 Rut danaam kaŧiinkare na najoobëţaan, baloŋ baji uwo nanoh, anjaaŋ aţënk.. Baţo da ado uko ji ŋşubal iñeen, 5kë Mahlon na Kiliyon bakak akeţ bukal batëb bŧi, kë Nowemi aduka najinţ, awaaŋ ayinul na babukul batëb.
Pkak pi bi Nowemi na Rut du Betleyem
6Wi wi Nowemi aşaaŋ anaţa abomandër ul na bahar babukul batëb bukuŋ pkak uŧaak wi nul, ţiki wi bawooŋ du uŧaak wi Mowab, aŧiink kë baji Yawe Nawat Kabuka aţënk bayiţul, ado kë ŋdeey ŋaŧumi. 7Ul na bahar babukul kë bapën du dko di bawooŋ, aŧool pkak uŧaak wi Yuda.
Wi bawooŋ ţi bgah, 8kë Nowemi aşë ji na baaţ batëb bukuŋ : « Babuk naan naţiişan, nayaan andoli du uko anin. Dñehan Nawat Kabuka awulan bnuura jibi nayuujuŋ biki ŋkeţandënuŋ, na nji ţi uleef naan, bnuura ! 9Dñehan Nawat Kabuka awulan bnuura du itoh yi bayinan. »
Wi ajakuŋ haŋ, aşë mook baka, kë başë wooni maakan, 10aşë ŧeema aji : « A-a, ŋya na iwi du bayiţu. »
11Kë Nowemi aşë ji : « Babuk naan, naţiişan i ! Nabaa biir we na nji ba ? Dkak ahil kabuk bapoţ bankhilanuŋ kawo bayinan i ? 12Babuk naan naţiişan i, dţaf maakan pkak kaka ñiinţ aloŋ. Woli ddoo haţ haŋ, woli ddoo kaka ñiinţ nţa di, abuk bapoţ biinţ, 13nahilan ppok bniim kayoonk baka badëm i ? Babuk naan, nin, ţi nji di di utamnuŋ, nji i i kañen ki Nawat Kabuka kakobuŋ. »
14Wi Nowemi ajakuŋ haŋ, kë bakak awooni maakan. Kë Orpa aşë mook Nowemi uyaani, kë Rut ul, aşë kuulana ţi ateem. 15Kë Nowemi aşë ji na a : « Tenan, Orpa awuŋ akak du bayiţul, na du ŋnŧoŋ ŋi baka. Ţiişan ji a. »
16Kë aŧeema aji : « Wutan kado na pdookën nţiiş këme pdolën nduku kafeţ, ţiki :
Dko di ikyaaŋ, dul di di nji kayaaŋ ;
dko di ikţooŋ, dul di di nji kaţooŋ.
Bayiţu bakwooŋ bayiţ naan,
Naşibaţi i nu akwooŋ Naşibaţi i naan.
17Dko di ikkeţnuŋ, dul di di nji kakeţnuŋ,
dul di di nji kamoynaaniiŋ.
Nawat Kabuka aţu'ën pwuţan pweek uwole mënţ pkeţ pawayëşuŋ nja ! »
18Wi Nowemi awinuŋ kë Rut aţu kabaţ, aşë ţañan pjaka aţiiş.
19Kë wi wi baaţ batëb bukuŋ bayaaŋ, aban Betleyem. Wi babanuŋ da, kë bañaaŋ bŧi başë ñoŋar, baaţ kë bakŋajar aji : « Woon Nowemi awi i ? »
20Kë aşë ji na baka : « Nawutan kado kadolën Nowemi#1.20 Nowemi uwooŋ plilan, nadoon kadu'ën Mara#1.20 Mara uwooŋ pjooţan, ţiki El Şaday, Naşibaţi Anhiniiŋ iko bŧi ajooţanaan ubida maakan. 21Wi nji kayaaŋ dwo nayok, kë Yawe Nawat Kabuka aşaaŋ akakanaan iñen ijinţ nji wi. Wel ukaaŋ kë nakdolën anlilanuŋ ba ? Nawat Kabuka adekën kafeţ, Anhiniiŋ iko bŧi aţu'ën pwuţan. »
22Kë hënk di Nowemi apënnuŋ Mowab na Rut ahar abukul anwooŋ i uŧaak mënţ. Baban Betleyem ţi wal wi kakit ki ŋdeey ŋŧeek kabaaŋ ajun jun.
S'ha seleccionat:
Rut 1: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal