Bgah 18
18
Udolade ţi uko wi piinţ
1 Yawe Nawat Kabuka aţiini na Moyiŧ aji : 2Ţiiniin na babuk Iŧrayel iji na baka : « Nji dwooŋ Yawe Nawat Kabuka Naşibaţi i nan. 3Naanwo kado iko injaaŋ idolana du uŧaak wi Ejiptu wi nabiiŋ afëţ kë naankdo iko inkdolaniiŋ du uŧaak wi Kanaan wi nji kañooţanaŋ. Naanwo kaţaş idolade yi baka. 4Nawo kado kado iko yi nţu'anaŋ pdo, kabot kaţaş bgah bi naan. Nji dwooŋ Yawe Nawat Kabuka Naşibaţi i nan. 5Nawo kado kaţaş bgah na idolade yi nwulanaŋ : woli ñaaŋ aţaş ya aka ubida. Nji dwooŋ Yawe Nawat Kabuka.
6« Nin ñaaŋ aloŋ ţi an aanwo kapiinţ na ñaaţ anwooŋ ayiţul nañog. Nji dwooŋ Yawe Nawat Kabuka.
7« Nin ñaaŋ aloŋ ţi an aanwo kapiinţ na anin, woli ado haŋ uwo pwin aşin byişu ; awo naan iinwo kapiinţ na a.
8« Iinwo kapiinţ na ahar şaaş, uwo pwin şaaş byişu.
9« Iinwo kapiinţ na ñaaţ, abuk şaaş këme abuk naan. Abukale ţi katoh ki iwooŋ këme du dko dloŋ dmpaţi, iinwo kapiinţ na a.
10« Iinwo kapiinţ na ñaaţ, ababu uwole abuk abuku ñiinţ a këme abuk abuku ñaaţ. Uleefu wi wi iţopanuŋ hënk.
11« Iinwo kapiinţ na abuk ahar şaaş, ţiki ayiţ na şaaş, awo aţa'u.
12« Iinwo kapiinţ na şaaş ñaaţ, ţiki pñaak pi şaaş pa.
13« Iinwo kapiinţ na ñaaţ aţa naan këme naweek naan, ţiki pñaak pi naan pa.
14« Iinwo kawin aţa şaaş byişu, iinwo keeri kapiinţ na ahar aţa şaaş këme ahar naweek şaaş ţiki awo ayiţu.
15« Iinwo kapiinţ na ahar abuku. Awo ayiţu, iinwo kapiinţ na a.
16« Iinwo kapiinţ na ahar aţa'u këme ahar naweeku, ţiki pñaak pi aţa'u këme pi naweeku pa.
17« Iinwo kapiinţ na ñaaţ kabot kapiinţ na abukul ; iinwo kapiinţ na abuk abukul ñiinţ këme ñaaţ. Bawo pñaak pi nul, uwo uko unţopuŋ.
18« Iinwo kaniim ñaaţ kabot kaniim aţa'ul kaţu ţi katoh, iţij bkujar ţi pŧoof pi baka wal wi ikpiinţuŋ na aloŋ wi undu ahumuŋ najeb.
19« Iinwo kapiinţ na ñaaţ wal wi akñowiiŋ, ţiki aji wo naţop.
20« Iinwo kapiinţ na ahar aŧënţu, wi idoluŋ haŋ, iţopi.
21« Iinwo kajej abuku kawul Molek#18.21 Molek dawo katim ki unŧoŋ uloŋ, hënk iinkkar katim ki Naşibaţi i nu. Nji dwooŋ Yawe Nawat Kabuka.
22« Iinwo kapiinţ na ñiinţ jibi ijaaŋ kpiinţ na ñaaţ, uwo uko unţopuŋ maakan.
23« Iinwo kapiinţ na nin unŧaam, wal wi idoluŋ haŋ, iţopi. Ñaaţ aanwo kaya du unŧaam kapiinţ na wa, uwo pţuunk.
24« Nakţopan ŋleefan na iko yaŋ ; yul iţopanuŋ ŋŧaak ŋi nji kadookuŋ ţi kadunan. 25Uŧaak ţi uleef wi wa ukak aţop, kë nşë kob wa kë ugaŧ banfëţuŋ da.
26« Kë an biki Iŧrayel, nawo kado kado iko yi nţu'anaŋ pdo, kabot kaţaş bgah bi naan, naanwo nin kado iko iţop maakan yaŋ uwole an biki Iŧrayel këme nayaanţ anfëţuŋ ţi pŧoofan. 27Bañaaŋ bambiiŋ afëţ ţi uŧaak wi ji nabi nado kafëţ ţi wa bado iko iţop maakan yaŋ ukaaŋ kë uŧaak uţopi. 28Nawutan kaţopan wa kak ji ubi ugaŧan jibi ugaŧuŋ bambiiŋ afëţ da uŧeek. 29Ñaaŋ ankdoluŋ iko iţop maakan yaŋ, dpënana ţi pntaali pi Iŧrayel. 30Namëbaan bnuura iko yi nţu'anaŋ pdo, naţafaraan kaţaş iko iţop maakan imbiiŋ adolana ji nabi nado kabi, nawutna kaţopan ŋleefan wi nakdoluŋ ya. Nji dwooŋ Yawe Nawat Kabuka Naşibaţi i nan. »
S'ha seleccionat:
Bgah 18: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal