Ppën 34
34
Klaak ktëbanţën ki bapiiŧuŋ bgah
1 Yawe Nawat Kabuka aji na Moyiŧ : « Fejan klaak ktëb ji kŧeek, dpiiŧ ţi ka ŋţup ŋi mpiiŧuŋ ţi kŧeek ki ifomuŋ. 2Nfa kub manwo kaţënk ibaa, payiin na nfa muŋ du pnkuŋ pi Ŧinayi, inaţ ţi kadun naan ţi pa duuţ. 3Nin ñaaŋ aankpaya na iwi, nin aloŋ aankbi ţi pa, nin unŧaam umpoţi këme uweek uunkbi kafeer kañog ţi pa. »
4Kë Moyiŧ afej klaak ktëb ji kŧeek ; anaţa na nfa apaya du pnkuŋ pi Ŧinayi jibi Nawat Kabuka ajakuluŋ, awo na klaak ktëb ţi iñen. 5Nawat Kabuka kë aşë wala ţi kanfëluŋ anaţ kañoga aţupa katim ki nul aji : « Nji dwooŋ Yawe Nawat Kabuka ». 6Aţëp ţi kadunul aşë ji : « Nji dwooŋ Yawe Nawat Kabuka anjaaŋ añaga, kaŧiink mnţëg, anwooŋ aanŧar udeeb, anjaaŋ aŋal te mnţo abot aji do uko wi ajakuŋ. 7Dji kawul bnuura bi naan, te iwuuŋ iñeen week ŋyaaş iñeen, kabot kamiir bado buţaan, bampataţiiŋ na banjubanuŋ kaşë wo mënji kafaŋan anduknaaniiŋ kabot kakob bañaaŋ banjubanuŋ, babuk baka te bamumiin baka. »
8Wal mënţ kë Moyiŧ aşë ŋup adëman Nawat Kabuka, 9aji : « Ajugun, woli dwinana bnuura ţi këş ki nu, dñehanu iwi Ajugun ido kapoş na un ; dme kë bañaaŋ biki batam ikow, kë nşë kooţu kooţ imiirun ipekadu yi nun, na pjuban pi nun, ibot ijejun ŋwo biki nu. »
Pkakalëş Bhoŋar
10 Yawe Nawat Kabuka aji na Moyiŧ : « Tenan, ddo bhoŋar na an. Ddo ţi pŧoof pi pntaali pi nu bŧi iko iñoŋarënaan inwooŋ iimbaaŋ kawohaara nin du uŧaak uloŋ, nin du pntaali ploŋ. Pntaali pi nu bŧi pawin udo wi nji Nawat Kabuka, kë nşë ţëpna ţi an kado iko iyibanaan. 11Namëbaan bnuura uko wi nji kaţu'anaŋ nţa di pdo. Natenan, ddook ţi kadunan bahamorit, biki Kanaan, bahitit, baperiŧit, bahiwit na bayebuŧit. 12Naţaafaraan kado bhoŋar na bañaaŋ biki ŋŧaak ŋi nakneejuŋ, kawutna kajot ţi kaguuru ki baka. 13Nadoo ţëp ţëp kawat iliit yi mngur yi baka, kawat itu yi baka, kabot kaŧok iduuŋ yi baka. 14Iinwo kaŋup kadëman nin biki bajaaŋ bado başibaţi, ţiki katim ki Nawat Kabuka kawo “Mënji kaţok uko”. Nji dwo Naşibaţi anwooŋ aanji ţok uko.
15« Nawutan keeri kado bhoŋar na banfëţuŋ ţi uŧaak mënţ, bawutna kadu'an nade ŋnŧaam ŋi bajaaŋ bafiŋar biki bajaaŋ bado başibaţi woli bado iko iţop pa baka. 16Nawutan kajej babuk baka baaţ kawul babukan biinţ baniim. Hënk, babuk baka baaţ bahilan woli bado iko iţop pa biki bajaaŋ bado başibaţi, baţu babukan biinţ bado kado iko mënţ kak.
17« Nin iinkyuuyan uko uloŋ kado kado wa Naşibaţi.
18« Nado kado ufeŧtu wi ipoom indaţ, nado ŋnuur paaj na uloŋ kado kade ipoom indaţ ; ţi wal wi njakanaŋ, ţi upën ŋdeey jibi mbiiŋ aţu'an pdo, ţiki wal wi ŋdeey ŋajaaŋ ŋapën wi wi mpënananaŋ du Ejiptu.
19« Bajeen ñiinţ awo i naan jibi ŋbuk ŋkaş ŋŧeek ŋi ŋnŧaam ŋmpoţi na ŋweek ŋakaaŋ awo ŋi naan. 20Aşë wo woli ubuuru wa, naţëţan umpoţi wi wa na umpoţi wi unkaneel këme wi upi, woli naanţëţan wa, nakit wa kaţuţ. Bajeen biinţ bŧi nakak aţëţan baka.
« Naankbi ţi kadun naan iñen ijinţ.
21« Nado kalemp ŋnuur paaj, uţënk paaj na uloŋ nanoorfën, woli udo wo ţi wal wi ijaar, këme ikit.
22« Nado ufeŧtu wi inëm, ufeŧtu wi upën ŋdeey ŋŧeek#34.22 ŋdeey ŋŧeek : ŋdeey mënţ ŋanaam na umaanan. na ufeŧtu wi ikit ţi uba uşubal.
23« Ŋyaaş ŋwajanţ ţi uşubal biinţ bŧi baya du kadun ki nji Ajugan Nawat Kabuka Naşibaţi i Iŧrayel. 24Ddook ŋŧaak ţi kadunan, kahaanan uŧaaku. Wal wi nakyaaŋ ŋyaaş ŋwajanţ ţi uşubal ţi kadun ki Nawat Kabuka Naşibaţi i nan, ddo kë nin ñaaŋ aloŋ aankŋal pyeenk uŧaak wi nan.
25« Wal wi nakfiŋaraanuŋ ŋnŧaam, nawutan kanaakrën pñaak na ipoom innaţiiŋ. Unŧaam unfiŋuŋ pa Ufeŧtu wi Mbuur uunkhankana te nfa.
26« Naţij du katoh ki nji Nawat Kabuka Naşibaţi i nan ŋdeey ŋŧeek ŋannuurnaaniiŋ ŋi mboş mi nan.
« Naankyikan upi umpoţi na mntow mi unin. »
27Kë hënk di Nawat Kabuka akaaŋ aji na Moyiŧ : « Piiŧan ŋţup ŋi ţi ulibra, ţiki ŋul ŋi ŋi nji kadolnuŋ bhoŋar na iwi, na babuk Iŧrayel. »
28Moyiŧ aţo na Nawat Kabuka ŋnuur iñeen ŋbaakër na ŋŧejan iñeen ŋbaakër. Nin aandee, aandaan nin meel. Wal mënţan wuŋ wi wi Nawat Kabuka apiiŧuŋ ţi klaak kanfejuŋ ŋţup ŋi bhoŋar, iko iñeen yi aţuuŋ pdo kaţaş#34.28 iko iñeen yi aţuuŋ pdo kaţaş : natenan ţi Ulibra wi Ppën 20.1-10.
Kaara di Moyiŧ danuur
29Wi ŋnuur ŋuŋ ŋaţëpuŋ kë Moyiŧ aşë wala ţi pnkuŋ pi Ŧinayi, amëban ţi iñeen klaak ktëb kanfejaniiŋ apiiŧ uko wi Yawe Nawat Kabuka aŧiinkaruŋ na biki Iŧrayel. Kë kaara di nul daknuur ţiki aţiini na Nawat Kabuka kë aşë wo aammee. 30Aaron na biki Iŧrayel bŧi bawin jibi kaara di nul daknuuruŋ aşë wo baaññoom pñoga. 31Adu baka, kë Aaron na baweek biki pntaali bŧi baya du a añoga. Kë aşë ţiini na baka. 32Wal mënţ kë biki Iŧrayel bŧi başë ñoga. Aţup baka uko wi Nawat Kabuka ajakuluŋ du pnkuŋ pi Ŧinayi aji bawo i kado.
33Wi Moyiŧ aţiiniiŋ na baka aba, aşë wun kaara na uleenŧ. 34Woli awo du kadun ki Nawat Kabuka aţiini na a, aji pënan uleenŧ te wal wi apënuŋ da. Akakle, aji ţup bañaaŋ uko wi Nawat Kabuka aţuuŋ pdo. 35Biki Iŧrayel baji baten kaara di Moyiŧ kaşë win da danuur aşë wun da na uleenŧ te wal wi akyaaŋ pţiini na Nawat Kabuka.
S'ha seleccionat:
Ppën 34: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal