Ppën 23
23
1« Iinwo i kaniinkan uţup unwooŋ uunwo manjoonan na dko. Du uruha, wutan kaţënk ñaaŋ nawuţaan kaţup uko unwooŋ uunjoonani pa abuurna.
2« Wutan kaţaş banŧumnuŋ pa pdo buţaan, iinkţok na banŧumnuŋ kadoo kaţu bawayëş uko unwooŋ uunwo uŧool. 3Wutan kaţok na nin aloŋ ţi bankaaŋ uhok, adole wo nawaaŋ.
4« Woli iyit na uwit këme ubuuru wi naşooradu kë ukñaay, kakaan wa du katoh ki nul. 5Woli iwin ubuuru wi anşooriiŋ kë ujot na pkuŋ pi wa, kŋaawşa, yaan iţënka nanaţan wa.
6« Iinkţu bawayëş banwooŋ bawaaŋ ţi an uko unwooŋ uunwo uŧool. 7Lowan iko inwooŋ yi ŋţilan. Kdo bafiŋ ñaaŋ anwooŋ aando nin uko uloŋ këme naŧool. Mënkdinan baji anduknaaniiŋ awo naŧool.
8« Kdinan baţenu iko iloŋ kaguurnu, ţiki uţen wuŋ uji udo ñaaŋ anwooŋ na uşal unuura akak awo aanji win manjoonan kabot kaţu naŧool ŋţilan.
9« Iinkhajan nayaanţ ; an ţi ŋleefan name uko unwooŋ pwo nayaanţ, ţiki nabi wo bayaanţ du Ejiptu. »
Uşubal wi pnoorfën na unuur wi pnoorfën
10« Ido kajaar mboş ŋşubal paaj, kakit uko wi mankwuluŋ ; 11kë işë wut ma manoorfën uşubal uţënk paaj na uloŋ. Bawaaŋ biki uŧaaku bakaana ţi wa uko ude, ŋnŧaam ŋabot ŋade uko wi bakdukuŋ. Nado haŋ kak pa ŋwoorta ŋi nan ŋi mnko mndolni ubiñu na ŋi mnoliwera.
12« Ido kalemp ŋnuur paaj, kë uţënk paaj na uloŋ inoorfën, uwit na ubuuru ŋinu, na balemparu na bayaanţ biki nu bahilna banoorfën.
13« Namëbaan bnuura uko wi njakanaŋ bŧi, nabot nawut katiman itim yi biki bajaaŋ bado Naşibaţi, itim yaŋ iwutan kaŧiinkana ţi itum yi nan. »
Ŋfeŧtu ŋi Iŧrayel
14« Uşubal undoli nado kado ŋfeŧtu ŋwajanţ pa nji. 15Ido ufeŧtu wi ipoom indaţ, ţi wal wi ŋdeey ŋajaaŋ ŋapën, jibi njakiiŋ ido kado. Ido ŋnuur paaj na uloŋ kado kade ipoom inwooŋ iinaţaa, ţiki ţi wal mënţ wi wi mpënaniiŋ du uŧaak wi Ejiptu. Naankbi ţi kadun naan na iñen ijinţ.
16« Ido ufeŧtu wal wi ikkituŋ ŋdeey ŋŧeek ŋi ijaaruŋ. Ido ufeŧtu ţi uba uşubal wi ikpënanuŋ du ŋţeeh uko wi ijaaruŋ.
17« Hënk, ŋyaaş ŋwajanţ ţi uşubal biinţ biki pntaali bŧi baya du kadun ki Yawe Nawat Kabuka Naşibaţi i nu.
18« Wal wi ikfiŋaraanuŋ ŋnŧaam, knaakrën pñaak na ipoom innaţiiŋ ; mniir mi unŧaam wi nafiŋuŋ pa ufeŧtu wi naan maankfër te nfa. 19Iţij du katoh ki Nawat Kabuka Naşibaţi i nu ŋdeey ŋŧeek ŋannuurnaaniiŋ ŋi mboş mi nu. Iinkyikan upi umpoţi na mntow mi unin. »
Kahoŋ na iko yi pdo kaneejna Kanaan
20« Natenan, dyil uwanjuŧ ţi kadunan, udo kayeŋan na bgah kabot kañooţan du uŧaak wi mbomananaŋ. 21Namëbaan ŋleef ţi kadun ki wa, nabot nado kaŧiink wa. Nakdeebaţan wa, uunkmiiran woli najubani, ţiki uko bŧi wi ukdoluŋ udo wa ţi katim ki naan. 22Naşale ŧiink wa bnuura, abot ado uko bŧi wi nji kajakuŋ, kawo naşoor başooran, ankgutuŋ na bankgutuŋ na an. 23Uwanjuŧ ujotan kadun kabot kañooţan du ŋŧaak ŋi bahamorit, bahitit, baperiŧit na biki Kanaan na bahiwit na bayebuŧit bafëţuŋ. Dba na ŋŧaak mënţ. 24Iinkŋup ţi kadun ki biki bajaaŋ bado Naşibaţi abot awo iinkdo kalempar baka. Iinkdo iko yi bañaaŋ biki ŋŧaak mënţ bajaaŋ bado. Iŧok itu yi ŋŧoŋ ŋi baka kabot kaŧok mnlaak mi banaţanuŋ ji mpej. 25Yawe Nawat Kabuka Naşibaţi inan ţañ i i nakdooŋ kadëman nşë nŧuman uko ude na uko udaan wi nu, dlowanan pmaak. 26Nin ñaaţ i uŧaaku aankdo kawuţën woli abuk këme kawo aankhil kabuk, ddo ŋnuur ŋi nan ŋaŧum ţi mboş.
27« Uŧaak wi iktapaaŋ ihoţ, ddo bañaaŋ banşooriiŋ da bado kaţi'u, bañaaŋ bŧi biki ikneejuŋ du uŧaak wi baka, ddo banşoriiŋ da baţi. 28Dţu ţi kadunu ŋndinu ŋweek ŋankdookaruŋ na bahiwit, biki Kanaan na bahitit. 29Kë nşë wo mënkdook baka ţi uşubal uloolan, uŧaak wi bafëţuŋ uwutna kakak pndiiş pi ŋko ŋi uţeeh ŋakŧumuŋ kanooranan. 30Ddo kadook baka ntiinku ntiinku te idoo ibuk ikëşan pniink uŧaak bŧi.
31« Ddo uŧaaku uwoona du bdëk bjeenkal te du bdëk bi bafiliŧteŋ, uwoona du pndiiş pi Ŧinayi te du bdëk bi Ëfrat. Dwulu biki ŋŧaak mënţ idook baka ţi kadunu. 32Iinkneej bhoŋar na baka, iinkdo ba kak na biki bajaaŋ bado Naşibaţi. 33Baankfëţ ţi uŧaaku kaţi badolu ijuban ţi kadun naan, wi ikjotuŋ ţi kaguuru ki biki bajaaŋ bado Naşibaţi kalempar baka. »
S'ha seleccionat:
Ppën 23: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal