Luk 22
22
Bidi me nogi Judas agai Jisas te tuni bidi dabego nogode mabo bodolu mani
(Mat 26:1-5; Mak 14:1-2; Jon 11:45-53)
1Te olo bidibo sogo me pąba yagasaibao. Tama te sogo te Juda dabe augwaligo ‘Te polobadu mu Godigo dago wąį nǫų dabe mu ela soyu, elisąwani sogo da’ weyu, augwaligo te sogo bo disąwai nai bret tubo dao. Te olo bidibo sogo nogi Pasova dao. 2Tama te pris tuni bidi dabe me, te Juda dabego bomo yai po koneai bidi dabe me, augwaligo te Jisas elabo sunumi gegali. Tama augwali te we bidigo suidali weyu, wi yali. Tama tibaso, te we bidi suidali weyu, augwali te po geme miani.
3Te dwai haubo noma bidi Satan agai te bidi me nogi Judas aga homu tomoba pai. Te Judas aga te Keriot bulu bidi dao. Tama Judas te Jisas wali tigidali sogo pabo bidi nogo si olama, sągą me badu si tomode bidali bidi dao. 4Tama Satan te bidi Judas aga homu tomoba pelama, tama Judas pelama, te pris tuni bidi dabe me, te Moni Lotu Be tempel tonalubo sę ebo tuni enesigi bidi dabe me augwali dali agai po miani. Agai te Jisas augwaligo nogoba mubo sunumi nigabo po wali. 5Tibaso, augwali homu dwagi yai yali. Augwaligo po weyu, te po wai, “Nage dago mone ge mawaibao.” 6Judasgo te po wali, “Dagego po usu dao.” Tama agai te Jisas augwaligo nogoba mubo sunumi gegebo gagalali. Agai tonaluali, me sogo te we bidi hauwa te Jisasde bidisiąbaso, tebo sogo agai Jisas te tuni bidi dabego nogoba muaibao.
Jisas wali pabo bidi sigo te Pasova tubo nai sisi egi pai
(Mat 26:17-25; Mak 14:12-21; Jon 13:21-30)
7Te bo disąwai tubo nai bret tuabo olo bidibo side, deli sogo silama, te kibu sipsip wai elebo bodolu sogo yagasali. Sipsip wai eleyu, te Juda dabego ma koneani, ‘Polobadu Godigo dago nǫų dabe ela soyu, elebe.’ 8Tama Jisasgo aga bidi Pita dali Jon dali “Dage si pao” augwali sibolo weyu, te po wai, “Dage si pelama, te nai sisi egi pao, te dago Pasova tubo nai,” te po wai. 9Tama augwali sigo te po hanalu wai, “Nago homu da sigo te tubo nai menade sisi yaibawe?” 10Jisasgo augwali sibolo te po wai, “Dage si te moni be nani tomoba pao. Tama tųdu pobadi, sę ebo bidi me deligo baketgo ąį tulama, tolasa peyu dage si tiąba asaibao. Te bidi wali dage si pao. Tama be tomoba te bidi pobaso da, dage si me te be tomoba pao. 11Dage sigo te be page bidibolo wao, ‘Po ola mabo bidigo nagebolo te po walio, “Nago be tomode te ena dali, eno bidi dabe dali, dago te Pasova nai tuabo be habu menadewe?” ’ 12Tama te bidigo dage si ugwadu moni be habu ola mawaibao. Tede te nai tuabo ni nami me dua yabo ni nami me agai sę ebo bagego te sisila muai dao. Te be habude dage sigo te tubo nai sisila muao,” Jisasgo te po wai. 13Tama te bidi si pelama, Jisasgo wali po gilama, te sę pedalali. Tama augwali sigo agai wali po wali pelama, te tubo nai sisila muani.
Jisas aga wali bilali bidi dabebolo diluai nai bret me wain ąį manio
(Mat 26:26-30; Mak 14:22-26; 1 Ko 11:23-25)
14Te Pasova nai tuabo sogo pedalali. Tama Jisas te beba aselama, te aga te nai tuabo ni namide dua yali, te aga po sela pabo bidi dabe te aposel bage augwali me tede dua yali. 15Jisas augwalibolo te po wai, “Eno homugo godola pelama, te dago wąį nǫų hani te Israel dabe bugagia bidimainu sula tagalu ela soale side ma kone palu tubo nai Pasova dage dali megi tama tueibao. Tilama, nosali ena dene saibao. 16Eno mu po dagebolo obao, eno e Pasova nai dage dali ma tugobeo. Tama e nai ma tusiąbadi, te Godigo we bidi tonalubo sogo gagalama, e nai tuabo sę page hania mu pedelaibao. Tama te sogo eno ma tueibao,” Jisasgo te po wai.
17Te Jisasgo agai te bono du kaneme wain wę pągąwai kap selama, Godibolo usu da po olama, tama aga bidi dabebolo mayu, te po wai, “Dage te bono du kaneme wain wę selama, duga hasi tomode dobola selama, tuao. 18Eno dagebolo obao, megi tama gagalama, eno bono du wain wę ma tugobeo. Tama tusiąbadi, te Godigo agai we bidi tonalubo sogo pedalabo sogo eno e nai ma tueibao,” Jisasgo te po wai.
19Te Jisasgo agai te diluai nai bret me selama, Godibolo nage usu dao olama, tama te nai bret nogogo togolama, aga bidi dabebolo dobawai. Agai te po wai, “E nai eno tigi mi dao. Eno dage tau somainogo mobao. Tuao. Ena isilama, dage nosali tama tuyu, ena konealu bidao,” te po wai.
20Te nosali genuai nai tulama, te Jisasgo agai te diluai nai bret dobayu yali tiwai egi pelama, te bono du kaneme wain wę me tama tiali. Agai te po wai, “E bono du kaneme da, te eno kaneme dao. Gesi tų eno kanemego nigaibao, dage God dali mu kęą somainogo, eno kaneme gelebao. #Jer 31:31-34 21Dagego suao. Ena te boi bidigo nogoba muabo bidi ena dali ede bidibao. 22Ena da te Godigo Bidi Mu da. Ena te Godigo polobadu tų nigilai te tųdu paibao. Tiali goli, ena te boi bidi nogoba muani bidi tede ena hobede mu ebao,” wali.
23Te Jisasgo te po obaso, agai bidi dabe augwa hasi hanalua peyu, dego te kolesaga yaibawe, augwa hasi te po wai.
Da tomode de polalubo bidi dawe?
24Te Jisas wali pabo bidi dabe augwa hasi konila yali. Tama konila po weyu, te po wai, “Da tomode mena bidi te polalubo bidi dawe?” 25Jisasgo te po augwali dali wai, “Te Juda bidi hani isąwai dabego tobolu bidi dabe augwaligo bomo elalu, te we bidi tonalubo dao. Augwali genuai bidi bidibo dao. Augwaligo te we bidigo te tuni bidibolo wiegi yai bidi dao omainogo ebo dao. 26Tiali goli, te we bidi dabego te wabe. Tiali goli, dagego te tobage sę egio. Menio. Dage polalubo bidi homu ebaso da, teda dage nosali bidi tiwai bidao, gesi bidi tiwai. Dagego tobolu bidi bidabo homu eyu da, dage sę bidi tau sabo bidi bidao. 27Mena bidi polalubo bidi dawe? Te saide dualama nai tubo bidi dawe? Te sę tau sabo bidi nai poude togola magasobo bidi dawe? Te saide dualama nai tubo bidi naga te polalubo bidi dao. Tiali goli, ena dage tomode bidiyu dage sę tau sabo bidi dao,” Jisasgo te po augwalibolo wai.
28“Te polobadu te sę pedelama, enaba te haniani sęgę asainogo yai digi, dage ena dali bidai dao. Tama dagego ena taga soai menio. 29Eno Ayago we bidi tonalubo sę enabolo mawai. Tiali gilama, eno te sę dagebolo mobao. 30Nosali eno tigidali we bidi tonalubo side, dage ena dali hodobo nai tuagameo. Tama dage te tobolu bidigo duabo ni namide dualama, tama dagego te Israel bidi hani nogo si olama, sągą badu si te we bidi hani po dodolobo hani bidagameo,” Jisasgo te po aga bidi dabe dali wai.
Jisasgo te po wai, “Pita, nago ena tudiba muaibao”
(Mat 26:31-35; Mak 14:27-31; Jon 13:36-38)
31Te Jisasgo te bidi Saimonbolo weyu, te po wai, “Saimon, Saimon, nage odao. Te dwai haubo noma bidi nogi Satan agai dage dayu, usu sainogo, agai God hanalu wali. Tama Godigo ‘Ao’ wali. 32Satango te sę yainogo yai digi, eno nage tau sainogo, God hanalu wali, ‘Saimon tau sao. Agai homu kolesaga tigidali nageba mubo sę tagalidali weyu, nago Saimon tau sao.’ Tama Saimon, nosali nage begasa, ma aselama, tama nago naga ama dabe bomo mayu dąų walao,” Jisasgo te po wai. 33Pitago Jisasbolo wai, “Genuai Bidi, ena nage dali kalabus paibao. Ena nage dali isabo me sisi yalio,” Pitago te wai, Jisas dali. 34Jisasgo Pitabolo te po wai, “Pita, eno nagebolo obao, e sogo hulide te ba kakaruk po wasiąbadi, tama nago sela sogo waibao, ‘Eno Jisas nogi konebe.’ Te po nago waibao,” Jisasgo te po wali.
Jisasgo sela po wai, gamugi dage masigi po dali, wa po dali, hwą ge po me
35Jisasgo te po aga wali bilali bidi dabe augwalibolo wai, “Polobadu eno dage te sę egi pao weyu, duga gamugi dage masigi dali, wa dali, sągą nadoba dali sela pigio, te po wai. Tiali sogo, dage nai me deli sǫą paidawe?” Jisasgo augwali dali te po wai, tama augwaligo “Menio,” te po wai. 36Jisasgo augwali dali te po wai, “Tiali goli, megi te gamugi dage masigi munalubo bidigo te nai sao, te wa munalubo bidi me aga wa sao. Tama hwą ge meni yai bidi da, teda aga ugwa menama, gasa bidigo abelama, te ugwade sai masigigo te moni hwą ge sao,” Jisasgo te po wai. 37“Magi basowe? Bukude wali po augwaligo te po wai, ‘Augwaligo homude augwaligo aga dali dwai bidi dabe dali sisilai dao,’ wali. Tama eno dagebolo obao, tigidali po bukude wali po tiwai ena dali nai gilama walaibao. Ena tǫde bidibo sogo tamadi sia saibao,” Jisasgo te po aga bidi dabebolo wai. #Ais 53:12
38Augwaligo te po wai, “Genuai Bidi, nago suao, dago moni hwą ge si e dao.” Jisasgo sulama, augwalibolo te po wai, “Te tama usu dao.”
Jisasgo te Getsemani gide Godibolo po wai
(Mat 26:36-46; Mak 14:32-42)
39Te Jisas te be taga peyu, te bulu du nogi Oliv teba pali, aga polobadu hauwa sogo teba pai dao. Tama aga bidi dabe augwali aga wali pai. 40Tama Jisas te bulu du Olivba sabolama, aga bidi dabebolo te po wai, “Dagego Godibolo hanalu po wao, te Satango dage dwai sę tomoba gegidali weyu.” 41Tama Jisasgo augwali taga peyu, aga dwasianu bobenu gana palio. Agai kidu tǫba sugunama, Godibolo po weyu, te po wai, 42“Eno aya, nago homugo usu da wida, te sęgę enade elalubo dagala sąyao. Tialima, nago eno homu wali pelamuo. Naga homu kolesaga naga wali pao,” Jisasgo te po wai, aga Aya dali. 43[Tama Godigo sę ebo mobo ensel bidi me deli dagaludu asiyu, pedelagaselama, te Jisasba bomo mayu tau sali. 44Jisas aga homu sęgę mu ebaso, Godibolo aga hanalubo po bomonama wai. Tama Jisasgo tigide te posolo wę kisu yai, te wę te tǫba tuloluai, te kaneme tiwai.]
45Te Jisasgo aga Godibolo wali po silama, tama hodaluama, tama aga bidi dabe pageba ma pali. Tama augwali godege pibo aga suali. Augwali homu sęgę mu ebaso, tama augwali godege piai. 46Tama agai augwalibolo te po wai, “Ya, dage magi baso pibawe? Hodaluiąo. Godibolo hanalubo po wao, te Satango dage dwai sę tomoba gegidali weyu,” Jisasgo te po wai.
Judasgo Jisas te boi bidigo nogoba muani
(Mat 26:47-56; Mak 14:43-50; Jon 18:3-11)
47Te Jisasgo aga po obadi yaide, tama genuai bidi hani pąba asali. Te bidi Judas te Jisas wali pabo bidi nogo si olama, sągą me badu si tomode bidali, te bidi polasa asai. Tama aga aselama, Jisas dali pąba kisa sagasai. 48Tiali goli, Jisasgo agabolo te po wai, “Judas, ena da te Godigo Bidi Mu dao. Nago kisa sagasu, ena te boi bidi dabego nogoba mubawe?” 49Jisasgo bidi dabe augwaligo te sę pedalabo maga ebaso, augwaligo te po wai, “Genuai Bidi, nago usu da wida, dago te boi bidi dabe hwą gego elaibao,” te po Jisas dali wai. 50Tama te tamadi asai bage tomode te pris tuni bidigo sę ebo bidi me deli bidai. Tama Jisas wali pabo bidi mego te bidigo dolo nogo badu olo moni kago hwągo togwa sąwai, tama te olo tǫba tuloluai. 51Tiali goli, Jisasgo te sulama, te po wai, “Tagalao. Me menio.” Tama agai nogo te boi bidi oloba muai, tama te olo dwagi yai ma yai.
52Te Jisasgo agai po wai, te pris tuni bidi dabe me, te Moni Lotu Be tempel tonalubo tuni enesigi bidi dabe me, te monu dabe me, augwalibolo agai po wai, augwaligo aga tuainogo asali baso. Agai te po wai, “Dagego moni kago hwą dabe, wąbi dabe sesali da. Te dagego nai wi sai bidi nogo tulama, sela painogo asobo ąǫ yaliwe?” Jisasgo te po boi bidi dali wai. 53“Tigidali sogo dage dali ena te Moni Lotu Be tempel tomode bidai dao. Te sogo dagego ena me sai menio. Tialima, megi e sogo dagego Godigo bodolu muani side dao, dagego duga homu wali piąo. Megi Satango bomogo sę ebo side dao,” Jisasgo te po te boi bidi dabe dali wai.
Pitago te po wai, “Jisas eno konebeo”
(Mat 26:57-58, 69-75; Mak 14:53-54, 66-72; Jon 18:12-18, 25-27)
54Te Jisasgo aga po ola silibo si da, augwaligo aga nogo pageabi elama, sela pai. Augwaligo Jisas odasa peyu, te Godibolo te polalubo tuni pris bidigo beba pai. Tama Pita me augwali wali pai. Tiali goli, aga digibulu gana bidai. 55Te bage augwaligo sia te be mesalode nogai, sia kedau tuenu. Tama Pita me augwali dali dualama, sia te gogo tueinu dua yali. 56Te be tomode sę ebo wego Pita suai, te sia ulade. Te wego aga gedu diliasa tonaluyu, te po wai, “Te bidi me Jisas dali bidibo eno suai dao,” te po wai. 57Hogwa siyu, Pitago te po wai, “Ena menio. We, nago wabo po eno te Jisas konebeo,” Pitago te po wai. 58Nosali gana gasa bidi mego Pita sulama, te po wai, “Nage me te Jisasgo hani dao.” Tiali goli, Pitago te po wai, “Abagi, ena mu menio.” 59Nosali bidama, gesege elama, gasa bidi mego po bomonama, te po wai, “Mu tama dao. Te bidi me Jisas dali bidai dao. Te bidi Galili tǫ bidi tama dao, Jisas tiwai,” te po wai. 60Tiali goli, Pitago te po wai, “Abagi, nago te wabo po eno konebeo.” Agai te po tama obadi, ba kakaruk po wai. 61Tama te kakaruk po ma wabo si, Jisasgo begelama, Pitaba tonani. Tama Pitago Jisasgo aga dali polobadu gana wali po ma koneama, “Te sogo hulide ba kakaruk po wasiąbadi, tama nago sela sogo te po waibao, ‘Eno Jisas konebeo,’ waibao.” 62Tama Pita agai Jisasgo te wali po ma koneagasu, buluba pelama, moni gela mu wai.
Augwaligo Jisas gisugu maiyu, eleyu yai
(Mak 14:65)
63Te Jisas tonalubo bidi dabe augwaligo dwai dwai haniani po aga dali weyu, te aga eleyu yai. 64Augwaligo Jisas ugwago gedu haluama, nogogo elama, agabolo hanalu wali, “Dego nage elaliwe? Te nosali asabo nai konea pai profet bidigo wali po tiwai wao,” te po wai. 65Tama augwaligo bidi posobo dwai po hauwa Jisas dali wai.
Augwaligo Jisas kaunsil bidigo gedude po tų ela mawai
(Mat 26:59-66; Mak 14:55-64; Jon 18:19-24)
66Te nosali te giliga pedelai, tama te Israel bidi hani tobolu bidi dabe dali, te pris tobolu bidi dabe me, te Juda dabego bomo yai po page koneani bidi dabe me, augwali tigidali sisinai, tama augwaligo po kaunsil bidigo po wabo gilama, te po wainogo yai. Tama te Jisas tonalubo bage augwaligo Jisas kaunsil geduba odasa pai. Te kaunsil dabe augwaligo te po wai, 67“Nago dabolo wao, nage Godigo sa muai nosali asaibao wali bidi Krais dawe?” Tama Jisasgo augwalibolo te po wai, “Eno dagebolo weyu da, te dagego te po mu po dao homu egobeo. 68Tialima, eno dagebolo me dagego homu ena da te Godigo sa muai bidi dawe hanalu da, te dagego eno po wei ponogobeo,” Jisasgo te po wai, augwali dali. 69“Tiali goli, megi me, tigidali sogo nosali me, te Godigo Bidi Mu te bomo tigidali elalubo Godigo dolo nogo badu bidaibao, polalubo bidi bidabo madide. Ena da te Godigo Bidi Mu dao,” Jisasgo te po wai.
70Te bidi dabe tigidaligo te po wai, “Tama nage te Godigo Ogwa mu dawe?” Jisasgo te po wai, “Dagego enabolo wali po tiwai, ena tama dao.” 71Augwaligo te po wai, “Dago magi baso gasa bidi i olama, te bidigo Jisasgo dwai sę yali po pusaibawe? Te Jisas aga digi aga pedauwalidu ena da Godigo ogwa da wali dwai po te dago megi tama odalio,” te Juda bagego te po wai.
S'ha seleccionat:
Luk 22: mps
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.