Versets bíblics populars de Yohanes 15

Comparteix

Kita ini sama deng tu tanaman anggor kong ngoni ini sama deng tu Kita pe cabang-cabang. Sapa jo yang badekat pa Kita kong Kita badekat pa dia, dia itu bole mo beking tu bae. Soalnya dia nyanda mampu beking tu bae kalu dia bajao dari pa Kita.

Ngoni badekat jo pa Kita, deng Kita lei badekat pa ngoni. Soalnya, ngoni nyanda dapa beking tu bae kalu ngoni jao dari pa Kita, itu sama deng tu cabang yang nyanda mo babua kalu dia tapisa dari tu tanaman anggor.

Kalu ngoni badekat pa Kita deng tu Kita pe firman ada pa ngoni pe hati, ngoni minta jo pa Tuhan Allah apa yang ngoni suka kong Dia mo kase itu pa ngoni.

Bukang ngoni yang da pili pa Kita, mar Kita yang da pili pa ngoni. Kita da suru pa ngoni supaya pigi for beking tu hal bae yang mo ada trus, sama deng cabang yang babua trus. Deng bagitu, apa yang ngoni minta pa Bapa pake Kita pe nama, Dia mo kase itu pa ngoni.

Tu sayang yang paling basar itu, kalu orang siap mati supaya de pe tamang-tamang bole hidop.

Kita pe orang-orang sama deng cabang-cabang, kong tu cabang-cabang yang babua, Dia potong sadiki for beking bersi supaya tamba babua, kong tu cabang-cabang yang nyanda babua, Dia potong kong buang.

Ini tu Kita pe prenta: ngoni musti baku sayang sama deng Kita so sayang pa ngoni.

Kalu ngoni ja beking tu bae sama deng tu cabang yang babua banya, itu kase tunjung kalu ngoni ini Kita pe murit-murit, trus deng orang-orang lia ngoni ja beking tu bae, dorang mo puji deng hormat tu Kita pe Bapa.”

Yesus bilang satu prumpamaan bagini, “Kita ini sama deng tanaman anggor yang butul, kong Kita pe Bapa sama deng orang yang punya kobong anggor.

Sapa jo yang jao dari pa Kita, Tuhan Allah mo beking pa dia sama deng cabang yang nyanda babua, tu orang yang punya kobong potong tu cabang trus kalu so kring dia lego ka api.

Kita bilang samua itu pa ngoni, supaya tu rasa snang yang ada pa Kita bole ada pa ngoni pe hati, sampe ngoni bole rasa snang luar biasa.

Kalu ngoni beking tu Kita pe prenta-prenta, ngoni mo rasa trus tu Kita pe sayang, sama deng Kita beking tu Kita pe Bapa pe prenta-prenta kong Kita bole rasa trus tu Dia pe sayang.

Jadi yang Kita prenta pa ngoni bagini: Ngoni ini musti baku-baku sayang.”

Kalu misalnya ngoni ini sama deng dorang yang nyanda percaya pa Kita, pasti dorang sayang pa ngoni. Mar ngoni ini beda deng dorang. Kita da pili pa ngoni supaya ngoni beda deng dorang, so itu dorang binci pa ngoni.