HECHOS 4

Pedro jare Juan mburuvicha judío reta jóvai

1Pedro jare Juan imiari ñogüɨnoi opaete vae reta pe ramboeve, yogüeru chupe sacerdote reta, tupao iyangarekoa reta juvicha jare saduceo reta ndive. 2Iyarasɨ yae reta. Echa oporomboe reta jare omoërakua reta Jesús rupi oikove yeta omanogüe reta. 3Oipɨɨ reta Pedro jare Juan, jare oñoña tembipɨɨrɨru pe pɨareve regua. Echa kaaru ma ko. 4Ërei jeta oporogüɨrovia Tumpa iñee oendu vae reta; oupitɨ cinco mil rupi kuimbae oporogüɨrovia vae reta.

5Pɨareve pe oyemboatɨ Jerusalén pe tëta ruvicha reta, tenondegua reta, mborookuai re oporomboe vae reta, 6jare sacerdote tenondegua ete Anás, Caifás, Juan, Alejandro jare opaete sacerdote tenondegua ete reta jëtara reta. 7Jayave güeruruka Pedro jare Juan jae reta jóvai, jare oparandu chupe reta:

—¿Mbae nunga mbaepuere rupi pa peyapo kuae?, ani ¿kia jee re pa peyapo?

8Jayave Pedro tɨnɨe Espíritu Santo pe, jare jei chupe reta:

—Tëta ruvicha reta jare Israel iñemuña reta itenondegua reta: 9Añave peparandu peï oreve ikavi vae oyeapo kuae imbaerasɨ pe vae re. Peipota peikuaa kërai ra kuae kuimbae okuera ma imbaerasɨ güi. 10Peikuaa kavi kuae, jare opaete Israel pegua reta, Jesucristo Nazaret pegua jee re okuera ma kuae kuimbae peróvai oï vae, jókuae pe reta peikutuuka kurusu re vae jare Tumpa omoingove ye omanogüe reta ipɨte güi vae. Jae etei ko ombogüera kuae kuimbae. 11Kuae Jesús ko jae ita, pe o iyapoa reta peröɨro vae, ërei jae ou opɨta o ekina iguapɨkarä.#Sal 118.22. 12Mbaetɨ yé kia re yandepuere yayemboasauka.#Jn 14.6. Echa mbaetɨ oñemee ɨvɨ pegua reta pe ïru kia, jese yayemboasauka vaerä.

13Jayave oecha reta yave kërai Pedro jare Juan okɨɨyembae reve imiari, jare oikuaa reta mbaetɨ ko oyemboe vae. Ipɨakañɨ yae jese reta, jare oikuaa reta Jesús jemimboe ko vae. 14Ërei oecha reta yave kuimbae okuera vae oyemboɨ oï jae reta ndive, ipuereä mbae jei ikotɨ reta. 15Jayave oyókuai Pedro jare Juan oë räri vaerä ipɨte reta güi. Jare oñomomiari reta jei:

16—¿Mbae ra yayapota kuae kuimbae reta pe? Echa opaete Jerusalén pegua reta oikuaa mɨakañɨ tuicha vae ko oyapo reta, jare yande reta yaikuaku rapeä ko. 17Ërei agüɨye vaerä jeieteño jërakua, yayopia reta agüɨye vaerä ma imiari reta kia pe ave añave güive kuae kuimbae jee re.

18Jayave oenɨi Pedro jare Juan, jare oyopia yeyé jei reve:

—¡Agüɨye ye pemiari ani peporomboe Jesús jee re!

19Ërei Pedro jare Juan jei chupe reta:

—Pemae kavi pe reta. ¿Jupi ra Tumpa jóvai royapo vaerä peporookuai Tumpa iporookuai güi? 20Echa ore romombeu ñotai ko roecha jare roendu vae.

21Jayave jókuae mburuvicha reta oyókuai yeyé omongɨɨye reve oyora omondo Pedro jare Juan. Ipuereä oinupauka reta, opaete vae reta güi okɨɨye ramo. Echa opaete vae reta omboete Tumpa jókuae oyeapo vae jeko pegua. 22Echa jókuae kuimbae mɨakañɨ rupi okuera vae, cuarenta año oasa ma güɨnoi.

Oporogüɨrovia vae reta oyerure ñemoäta ngatu re

23Pedro jare Juan oyeyora güire, yogüɨraja iñeïru reta pɨri, jare omombeu chupe reta opaete sacerdote reta itenondegua reta jare Israel iñemuña itenondegua reta jei chupe reta vae. 24Jae reta kuae oendu yave, metei rami oyerure Tumpa pe, jei reta: “OreYa Tumpa, nde ko jae ara, ɨvɨ, ɨguasu jare opaete mbaembae oï#Ex 20.11; Neh 9.6; Sal 146.6. pɨpe vae iyapoa. 25Nde rere nderembiokuai David rupi körai:

‘¿Maera pa iyarasɨ oyomboemboe kuimbae reta?

¿Maera pa tëtaguasu reta oyapo yemongeta ikavimbae?

26Mburuvicha guasu ɨvɨ pegua reta

jare mburuvicha reta oyemboatɨ metei rami

yandeYa kotɨ jare jembiparavo Cristo#Sal 2.1-2. kotɨ.’

27Echa añetete ko, Herodes,#Lc 23.7-11. Poncio Pilato,#Mt 27.1-2; Mc 15.1; Lc 23.1; Jn 18.28-29. judiombae vae reta jare Israel pegua reta oyomboatɨ kuae tëta guasu pe ndeRaɨ iyoambae Jesús kotɨ. Jae ko nde reiparavo#Is 52.13; Flp 2.7. vae. 28Ombopo reta vaerä ndembaepuere rupi arakae voi ma rere oyeapo vaerä vae. 29Añave, oreYa, emae oremomburu reve oreokuai vae reta re. Emee nderembiokuai reta pe okɨɨyembae reve imiari vaerä neñee re. 30Jare eechauka ndembaepuere rupi oporombogüera reta vaerä, eyapo vi mɨakañɨ reta ndeRaɨ iyoambae Jesús jee re.”

31Jare opa oyerure yave, yatɨ ñogüɨnoia okana. Jare opaete jae reta tɨnɨe Espíritu Santo pe, jare imiari reta Tumpa iñee re okɨɨyembae reve.

Oporogüɨrovia vae reta güɨnoi imbaembae metei ramiño

32Jare opaete oporogüɨrovia vae reta metei ramiño ñogüɨnoi. Mbaetɨ metei ave jei imbaembae re: “Kuae ko chembae.” Echa opaete imbaembae reta güɨnoi metei ramiño.#Hch 2.44-45. 33Jare mbaepuere yae reve temimondo reta omombeu yandeYa Jesús oikove ye vae regua. Jare Tumpa iporerekua yae jese reta. 34Mbaetɨ metei ave mbae oata chupe vae jae reta ipɨte pe. Echa opaete güɨnoi ɨvɨ ani o vae reta, omee reta, jare güeru jepɨgüe, 35oñono reta temimondo reta ipo pe. Jayave omboyao reta mbae oata chupe vae reta pe. 36Jare metei levita ɨvɨ Chipreɨgua José jee vae, temimondo reta oero Bernabé pe vae (kuae tee oipota jei: “Oporombopɨakatu vae”). 37Jae omee iɨvɨ jare güeru jepɨgüe oñono temimondo reta ipo pe.

বর্তমানে নির্বাচিত:

HECHOS 4: GUABD

হাইলাইট

কপি