Иоан 9

1Мунтӧнняс Исусыс казяліс шогмӧмсянь синтӧм мортӧс. 2Исуслӧн велӧтчиссес юалісӧ Сылісь: «Велӧтісь! Кинлӧн умӧль керӧм кузя сія шогмис синтӧм? Сія ачыс умӧльсӧ керис али ай-мамыс?» 3Исус висьталіс: «Сія эз шогмы синтӧмнас аслас да ай-мамыс умӧль керӧм кузя. Сія сэтшӧм шогмис, медбы сы вылын мыччавны Енлісь керӧмсӧ. 4Меным колӧ керны уджсӧ Менӧ Ыстісьлісь, кытчӧдз луныс эз на чулав. Сибалӧ ой. Ойнас некин нем оз вермы керны. 5Кытчӧдз Ме му вылас, Ме ─ отирлӧ югытыс». 6Сідз висьталӧм бӧрын Исусыс сьӧвзис му вылас да сорлаліс нять тор. Нять торнас мавтіс мортыслісь синнэсӧ. 7Исусыс сылӧ висьталіс: «Мун, миссьы Силоам ваас». Силоам кывсӧ вуджӧтны кӧ, лоӧ «Иньдӧм». Синтӧм мортыс муніс, миссис ваас, пондіс адззыны да бертіс.

8Матын оліссес да мӧдіккес одзжык адззывлісӧ синтӧм мортсӧ. Нія юасисӧ: «Абу я эта сія мортыс, кӧда эстӧн кортӧн пукаліс?» 9Ӧтіккез баитісӧ: «Эта сія мортыс». Мӧдіккез шуисӧ: «Вачкисьӧ сы вылӧ, но не сія». Веськӧтӧм мортыс висьталіс: «Ме сія мортыс». 10Сэк сылісь юалісӧ: «Кыдз нӧ тэ пондін адззыны?» 11Сія висьталіс: «Исус нима морт керис нять тор да мавтіс менчим синнэзӧс. Сія висьталіс меным, мун пӧ миссьы Силоам ваас. Ме муні, мисси да понді адззыны». 12Сэк сылісь юалісӧ: «Кытӧн нӧ Сія?» Мӧдыс шуис: «Ме ог тӧд».

Фарисейезлӧн юасьӧм

13Сэк веськалӧм мортсӧ нуӧтісӧ фарисейез дынӧ, 14мыля Исусыс сорлаліс нять торсӧ да веськӧтіс синтӧмсӧ шоччисян лунӧ. 15Фарисейес юасисӧ веськалӧмыслісь: «Кыдз тэ пондін адззыны?» Сія висьталіс нылӧ: «Сія менчим синнэзӧс мавтіс нятьӧн, ме мисси да понді адззыны». 16Сэк мукӧд фарисейес шуисӧ: «Абу Сія Мортыс Енсянь, Сія эд шоччисян лунӧ керӧ сійӧ, мый сэк оз туй керны». Мӧдіккес баитісӧ: «Вермас разь керны сэтшӧм адззывлытӧммесӧ умӧльсӧ керись морт?» Нія ӧтамӧдныскӧт пондісӧ етшасьны. 17Бӧра юалісӧ синтӧмӧн шогмӧм мортлісь: «Тэ мый висьталан Сы йылісь? Сія эд осьтіс тэнчит синнэтӧ». Мӧдыс шуис: «Енсянь юӧртісь Сія».

18Иудейес эзӧ веритӧ сылӧ. Нія шуисӧ, сія пӧ, натьтӧ, эз вӧв синтӧм. Сэк корисӧ сылісь ай-мамсӧ. 19Нылісь юалісӧ: «Тіян я эта зонныт? Сы йылісь тай шуат: шогмис пӧ синтӧм. Кыдз нӧ сія ӧні адззӧ?» 20Ай-мамыс нылӧ висьталісӧ: «Мийӧ тӧдамӧ ассиным зоннымӧс. Сія шогмис синтӧм. 21Кыдз сія пондіс адззыны, и кин сійӧ веськӧтіс, мийӧ огӧ тӧдӧ. Сія ыджыт ни, ассис юалӧ. Ась ачыс висьталӧ». 22Ай-мамыс сідз висьталісӧ, нія полісӧ иудейезісь да. Иудейес эд вӧлі баитчӧмась, кин пондас пӧ Сійӧ мортсӧ пуктыны Кристос-Мездӧтісьӧ, сійӧ мортсӧ нія синагогасис вашӧтасӧ. 23Сійӧн ай-мамыс и висьталісӧ: сія пӧ ыджыт ни, юасьӧ ассис.

24Мӧдпырся корисӧ веськалӧм мортсӧ да висьталісӧ: «Ен одзын висьтав быльсӧ! Мийӧ эд тӧдамӧ: тэнӧ Веськӧтісьыс ─ умӧльсӧ керись морт». 25Сія висьталіс нылӧ: «Керӧ я Сія умӧльсӧ, ме ог тӧд. Тӧда дзир сійӧ: ме вӧлі синтӧм, а ӧні адзза». 26Бӧра юалісӧ сылісь: «Мый Сія керис тэкӧт? Кыдз осьтіс синнэтӧ?» 27Мӧдыс шуис: «Ме тай тіянлӧ висьталі ни, но тійӧ эдӧ кывзӧ. Мый бы эшӧ кылатӧ? Натьтӧ, тійӧ мӧдат лоны Сылӧн велӧтчиссезӧн?» 28Нія видісӧ сійӧ, висьталісӧ: «Тэ Сылӧн велӧтчисьыс. Мийӧ велӧтчиссес Моисейлӧн. 29Мийӧ тӧдамӧ, Моисейыскӧт баитіс Еныс. А Сійӧ огӧ тӧдӧ, кытісь Сія». 30Мортыс шуис нылӧ: «Сысянь и диво кутӧ: тійӧ одӧ тӧдӧ, кытісь Сія. А Сія Менчим синнэзӧс осьтіс. 31Мийӧ тӧдамӧ, умӧльсӧ кериссесӧ Еныс оз кывзы. Сія кывзӧ Сійӧ бурӧ пуктіссесӧ да Сы сьӧрті кериссесӧ. 32Эз на сэтшӧмыс вӧвлы, медбы чужӧмсянь синтӧм мортлӧ кинкӧ осьтіс синнэз. 33Эз бы вӧв Сія Енсянь, сэк нем бы эз вермы керны». 34Сэтчӧ сылӧ шуисӧ: «Тэ шогмӧмсянь ни умӧльнас быдсӧн тырӧмыт, и миянӧс пондін велӧтны!» Нія сійӧ вашӧтісӧ.

Исус баитӧ веськӧтӧм морткӧт да фарисейезкӧт

35Исусыс кыліс мортсӧ вашӧтӧм йылісь. Адззис веськӧтӧм мортсӧ да шуис: «Веритан я тэ Ен Зонлӧ?» 36Мӧдыс шуис: «Велӧтісь! Висьтав, кин Сія, медбы ме Сылӧ понді веритны». 37Исус шуис сылӧ: «Тэ Сійӧ адззылін. Сія тэкӧт баитӧ». 38Веськӧтӧм мортыс шуис: «Верита, Дӧсвидзисьӧ!» И уськӧтчис Сы одзӧ му вылас.

39Сэк Исусыс шуис: «Ме локті му вылас суд чулӧтны, медбы синтӧммес пондісӧ адззыны, а синаэс дугдісӧ адззыны». 40Сэтӧн тшӧтш вӧлісӧ фарисейез. Нія кылісӧ Исуслісь висьталӧмсӧ да юалісӧ: «Поди, и мийӧ синтӧмӧсь, огӧ адззӧ?» 41Исусыс висьталіс нылӧ: «Вӧліт бы тійӧ синтӧмӧсь, сэк эз бы вӧв тіян вылын умӧль керӧмыс. Но тійӧ шуат: адззам пӧ, сідзкӧ, тіян вылын умӧль керӧмныт кольччӧ».

Баляэз сьӧрын бур видзӧтісь

বর্তমানে নির্বাচিত:

Иоан 9: БЮ19

হাইলাইট

কপি