Иоан 8

1Исусыс муніс Виягӧд#8:1 Виягӧд ─ (Оливка) эта кылыс грек кыв вылын «Елеон» керӧсӧ. 2Асывнас Сія бӧра локтіс Вежа Керкуас. Отирыс быдӧнныс локтісӧ Сы дынӧ. Исусыс пуксис да пондіс нійӧ велӧтны.

3Туйдӧтӧ велӧтіссес фарисейескӧт Исусыс дынӧ вайӧтісӧ инькаӧс, кӧда ветлӧтӧм жӧникыс сайсянь. Сійӧ сувтӧтісӧ быдӧнныс одзӧ. 4Исусыслӧ висьталісӧ: «Велӧтісь! Этӧ инькасӧ кутӧмась жӧникыс сайсянь ветлӧтӧм понда. 5Туйдӧтас Моисейыс висьталӧм: сэтшӧммесӧ пӧ колӧ кувтӧдз шупкавны иззэзӧн. А Тэ мый висьталан?» 6Нія сідз баитісӧ Исуссӧ кутӧм могись, медбы сэсся вӧлі, мый висьтавны Сы вылӧ умӧльсӧ.

Но Исусыс дзар эз кер ныланьӧ. Сія лажмыта мышкыртчӧмӧн гижис мыйкӧ му вылас чуньнас. 7Мӧддэс орӧттӧг юасисӧ Сылісь. Сэк Сія лэбтіс юрсӧ да висьталіс: «Кинлӧн абу ӧтік умӧль керӧм, медодз ась сія шупкӧ изсӧ». 8Сэсся бӧра мышкыртчис да пондіс гижны му вылас. 9Исуслісь висьталӧмсӧ кылӧм бӧрын отирыс пондісӧ сьӧрсьӧн-бӧрсьӧн мунны. Нылӧн сьӧлӧммезныс уськӧтісӧ тӧдвыланыс умӧль керӧммезнысӧ. Медодз мунісӧ пӧрисьжыккес, сэсся мӧддэс. Мунісӧ быдӧнныс. Кольччис Исусыс да Сы одзын сулалісь инькаыс. 10Исусыс лэбтіс юрсӧ: сэтӧн эз вӧв ӧтік морт, сулаліс дзир ӧтнас инькаыс. Исусыс шуис сылӧ: «Кытӧн тэ вылӧ умӧльсӧ баитіссес? Некин эз судит тэнӧ?» 11Инькаыс горӧтчис: «Эзӧ, Дӧсвидзись». Исусыс шуис сылӧ: «И Ме тэнӧ ог судит. Мун да сэсся эн ни кер умӧльсӧ».

Исус ─ отирлӧ югытыс

12Сыбӧрын Исусыс бӧра баитіс отирыскӧт. Сія нылӧ висьталіс: «Ме ─ отирлӧ югытыс. Ме сьӧрӧ мунісьыс оз понды ветлӧтны пемытын, сылӧн лоас олан сетісь югытыс».

13Сэк фарисейес горӧтчисӧ Сылӧ: «Тэ Ас йывсит Ачыт баитан, сійӧн Тэнат кыввезлӧ оз туй веритны». 14Сэтчӧ Исусыс нылӧ висьталіс: «Ась Ме и Ас йывсим баита, Ме быльсӧ висьтала. Ме эд тӧда, кытісь локті да кытчӧ муна. А тійӧ эд одӧ тӧдӧ, кытісь Ме да кытчӧ муна. 15Тійӧ судитат отир моз. Ме некинӧс ог судит. 16Ме кӧ судита, судита веськыта. Ме эд абу ӧтнам. Мекӧт ӧтлаын Менӧ ыстісь Айӧ. 17Тіян Туйдӧтын гижӧм сідз: кык мортлӧн висьталӧмыс ─ быль. 18Ме Ас йывсим Ачым висьтала, Ме йылісь висьталӧ и Менӧ ыстісь Айӧ». 19Сэк Исусыслісь юалісӧ: «Кытӧн Тэнат Айыт?» Исусыс висьталіс: «Тійӧ одӧ тӧдӧ Менӧ, одӧ тӧдӧ Менчим Айӧс. Тӧдіт кӧбы Менӧ, сэк тӧдіт бы и Менчим Айӧс».

20Сідз Исусыс баитіс Вежа Керкуын, сьӧм ӧктан доз дынын велӧтӧм коста. Исуссӧ эзӧ кутӧ, Сылӧн кадыс эд эз на лок.

21Исусыс нылӧ бӧра висьталіс: «Ме муна. Тійӧ Менӧ пондат кошшыны, но кулатӧ умӧльсӧ керӧммезныт кузя. Кытчӧ Ме муна, сэтчин тійӧ одӧ вермӧ локны». 22Сэтчӧ иудейес горӧтчисӧ: «Оз я Сія мӧд Асьсӧ вийны, сідз кӧ баитӧ: "Кытчӧ Ме муна, сэтчин тійӧ одӧ вермӧ локны"». 23Исусыс нылӧ шуис: «Тійӧ уліссес коласісь, а Ме ─ выліссес коласісь. Тійӧ ─ эта му вылісь, Ме абу татісь. 24Сійӧн эд Ме и висьталі тіянлӧ: тійӧ кулатӧ умӧльсӧ керӧммезныт кузя. Одӧ кӧ пондӧ веритны висьталӧмам "Ме Сія, Кӧда эм"#8:24 «Ме Сія, Кӧда эм» ─ этна кыввезӧн Еныс шувліс Асьсӧ Важ Йитӧтас, то кулатӧ умӧльсӧ керӧммезныт кузя». 25Сэк Сылісь юалісӧ: «Кин нӧ Тэ?» Исусыс нылӧ шуис: «Ме одззасянь ни тіянлӧ висьталі, кин Ме. 26Ме верма уна мый висьтавны тіян йылісь, уна понда верма судитны, но Менӧ Ыстісьыс висьталӧ быльсӧ. Ме отирыслӧ висьтала Сысянь кылӧмӧс».

27Исусыс баитіс Айыс йылісь, но мӧддэс Сійӧ эзӧ вежӧртӧ. 28Исусыс висьталіс нылӧ: «Кӧр Морт Зонсӧ лэбтат, сэк вӧлись вежӧртат: Ме ─ Сія, кинӧн Ачымӧс шуа. Ассяням Ме нем ог кер. Ме баита Айӧ велӧтӧм сьӧрті. 29Менӧ Ыстісьыс Мекӧт. Айӧ эз коль Менӧ ӧтнамӧс. Ме эд быдӧс кера Сы сьӧрті».

30Исуслісь этӧ висьталӧмсӧ кылӧм бӧрын унаӧн пондісӧ веритны Сылӧ.

Тіянӧс мездас быльыс

31Сэк Исусыс висьталіс Сылӧ веритісь иудейеслӧ: «Пондат кӧ овны Менам кыв сьӧрті, сэк тійӧ былись Менам велӧтчиссез. 32Сэк тійӧ пондат тӧдны быльсӧ, и быльыс тіянӧс мездӧтас». 33Нія висьталісӧ: «Мийӧ Авраамлӧн увтыр и некӧр эгӧ вӧлӧ раббезӧн. Мыля нӧ Тэ баитан: "Тійӧ мездӧтчат"?» 34Исусыс шуис: «Тіянлӧ быльсӧ веськыта висьтала: умӧльсӧ керисьыс раб умӧль керӧмыслӧн. 35Рабыс пыр кежӧ оз вермы кольччыны керкуас, а Зон пыр сэтӧн олӧ. 36Зоныс кӧ тіянӧс мездӧтас, сэк вӧлись тійӧ былись мездӧтчӧмӧсь#8:36 мездӧтчӧм ─ свободный лоат. 37Ме тӧда: тійӧ Авраамлӧн увтыр. Но мӧдат тай Менӧ вийны, Менам кыввезӧ озӧ тӧрӧ сьӧлӧманыт да. 38Ме тіянлӧ баита сы йылісь, мый Меным мыччаліс Айӧ. А тійӧ керат сійӧ, мый тіянлӧ висьталіс айныт».

39Сэтчӧ Сылӧ висьталісӧ: «Миян айным ─ Авраам». Исусыс шуис нылӧ: «Вӧлітӧ бы тійӧ челядьыс Авраамлӧн, сэк керит бы Авраамыс моз. 40Ме тіянлӧ висьталі Енсянь кылӧм быльсӧ, а тійӧ Менӧ мӧдат вийны. Авраамыс сідз эз керлы. 41Тійӧ кератӧ айнытлісь уджсӧ».

Сэтчӧ Сылӧ горӧтчисӧ: «Мийӧ эгӧ шогмӧ кыскасисьсянь. Миян ӧтік Айным ─ Ен». 42Исусыс висьталіс нылӧ: «Вӧлі бы Еныс тіян Ай, сэк и Менӧ радейтіт бы. Ме Еныс дынсянь петі да локті. Ме эг лок Ассяням, Сія Менӧ ыстіс. 43Мыля одӧ вежӧртӧ Менчим баитӧмӧс? Одӧ вежӧртӧ сійӧн, мыля одӧ вермӧ кывзыны Менчим кыввезӧс. 44Тіян айныт куль, тійӧ керат сы тшӧктӧм сьӧрті. Сія одззасянь ни морт вийись вӧлі. Быльыс дынісь сія ылаліс, и сыын абу быльыс. Сія ассяняс висьталӧ бӧбӧтӧмӧн. Сія эд бӧбӧтчись и бӧбӧтчӧмыслӧн ай. 45Ме быльсӧ баита, но тійӧ Меным одӧ веритӧ. 46Вермас я кинкӧ тіян коласісь осудитны Менӧ умӧль керӧм понда? Ме кӧ баита быльсӧ, мыля Меным одӧ веритӧ? 47Кин Енсянь, сія кывзӧ Енлісь кыввесӧ. Тійӧ абу Енсянь, сійӧн и одӧ кывзӧ».

Авраам да Исус йылісь

48Сэтчӧ иудейес Исусыслӧ висьталісӧ: «Миян эта висьталӧмным абу я быль: Тэ Самарияись и Тэ пытшкын сэрпӧсь лов?» 49Исусыс нылӧ шуис: «Меын сэрпӧсь лолыс абу. Ме бурӧ пукта Ассим Айӧс, а тійӧ Менӧ умӧльтат. 50Ме ог кошшы Аслым ошкӧмсӧ. Мӧдік эм, Кӧда Меным кошшӧ ошкӧмсӧ. Сія веськыта судитӧ. 51Тіянлӧ быльсӧ веськыта висьтала: Менам кыв сьӧрті олісьыс некӧр оз кув».

52Иудейес Сылӧ висьталісӧ: «Ӧні мийӧ тӧдамӧ, Тэ пытшкын сэрпӧсь лов. Авраамыс куліс, Енсянь юӧртіссес кулісӧ. Тэ тай баитан: "Менам кыв сьӧрті олісьыс некӧр оз кув". 53Тэ мый, миян Авраам айся ыджытжык? Авраамыс куліс, Енсянь юӧртіссес кулісӧ. Кинӧ Тэ Асьтӧ пуктан?»

54Исусыс нылӧ висьталіс: «Ачымӧс кӧ Ме ошка, сія ошкӧмыс абутӧм туйӧ. Менӧ ошкӧ Айӧ, Кӧда йылісь тійӧ шуат, Сія пӧ тіян Ен. 55Тійӧ Сійӧ одӧ тӧдӧ, Ме Сійӧ тӧда. Висьтала кӧ, ог Ме Сійӧ тӧд, сэк лоа тіян кодь бӧбӧтчись. Ме тӧда Сійӧ и кера Сы кыв сьӧрті. 56Тіян Авраам айныт гажӧн мӧдіс пантавны Менчим локтан лунӧс. Сія адззыліс сійӧ лунсӧ да гажмис».

57Сэтчӧ иудейес Сылӧ висьталісӧ: «Тэныт эд абу на и витдас во#8:57 витдас во ─ 50 лет и Тэ адззылін Авраамсӧ?» 58Исусыс шуис нылӧ: «Тіянлӧ быльсӧ веськыта висьтала: Авраам шогмытӧдз Ме вӧлі ни». 59Сэк нія босьтісӧ иззэз да мӧдісӧ Сійӧ шупкавны, но Исусыс сайӧвтчис да петіс Вежа Керкусис. Сія муніс иудейес коласӧт да иньдӧтчис одзлань.

Исус веськӧтӧ синтӧмӧс

বর্তমানে নির্বাচিত:

Иоан 8: БЮ19

হাইলাইট

কপি