Иоан 10

1Исусыс шуис: «Тіянлӧ быльсӧ веськыта висьтала: кин баля гидас оз пыр ыбӧсӧт, пырӧ мӧдіклаӧт, сія мортыс гусясись да лёк керись. 2Ыбӧсӧт пырисьыс ─ баляэз сьӧрын видзӧтісь. 3Гид сьӧрын видзӧтісьыс сылӧ осьтӧ ыбӧссӧ. Баляэс кылӧны сылісь шысӧ. Сія кытсалӧ ассис баляэсӧ нимнаныс, лэдзалӧ нійӧ. 4Баляэсӧ лэдзалас да мунӧ одзас. Баляэс тӧдӧны сылісь шысӧ да мунӧны сы сьӧрӧ. 5Тӧдтӧм морт сьӧрын нія озӧ мунӧ, пышшӧны сы дынісь. Сылісь шысӧ эд нія озӧ тӧдӧ». 6Исусыс сійӧ велӧтан висьтсӧ#10:6 велӧтан висьт ─ притча висьтасис фарисейеслӧ. Но нія эзӧ вежӧртӧ, мый йылісь Сія баитіс.

7Сэк Исусыс нылӧ шуис: «Тіянлӧ быльсӧ веськыта висьтала: Ме ─ баляэслӧ ыбӧс. 8Ме одзын вовліссес быдӧнныс вӧлісӧ гусясиссез да лёк кериссез. Баляэс эзӧ кывзісьӧ нійӧ. 9Ме ─ ыбӧс: Меӧт пырисьыс мезмас. Сія пырас и петас, видзсӧ адззас. 10Гусясись локтӧ гусявны, вийны, разьны. Ме локті сетны олан, сетны олансӧ тырмӧмви#10:10 тырмӧмви ─ обильно, в избытке. 11Ме ─ баляэз сьӧрын бур видзӧтісь. Баляэз сьӧрын бур видзӧтісьыс ассис ловсӧ пуктӧ баляэс понда. 12Баляэз сьӧрын медалӧм видзӧтісьлӧн баляэс эд абу асласӧсь. Казялас кӧ сія кӧинӧс, коляс баляэсӧ, ачыс пышшас. Кӧиныс гусялас баляэсӧ, вашӧтас нійӧ ӧтмӧдӧрӧ. 13Баляэз сьӧрын медалӧм видзӧтісьыс пышшӧ, сія эд медалӧм. Сія оз тӧждісь баляэс понда.

14Ме ─ баляэз сьӧрын бур видзӧтісь: Ме тӧда Ассим баляэзӧс, а Менам баляэзӧ тӧдӧны Менӧ. 15Айӧ тӧдӧ Менӧ, сідз и Ме тӧда Айӧс. Ассим оланӧс пукта баляэзӧ понда. 16Менам эмӧсь и мӧдік баляэз, нія мӧдік йӧрись. Меным колӧ и нійӧ вайӧтны. Нія кыласӧ Менчим шыӧс, сэк лоас ӧтік баля чукӧр да ны сьӧрын ӧтік видзӧтісь.

17Менӧ Айӧ радейтӧ сійӧн, мыля Ме сета Ассим оланӧс, медбы сійӧ бӧр босьтны. 18Менчим оланӧс озӧ мырддьӧ, Ме сійӧ Ачым сета. Оланӧс Ме верма сетны и верма бӧр босьтны. Сідз тшӧктіс керны Айӧ».

19Этна кыввезсянь иудейес бӧра пондісӧ етшасьны. 20Унаӧн ны коласісь баитісӧ: «Мый тійӧ Сійӧ кывзатӧ? Сэрпӧсь лов Сы пытшкын, сійӧн бӧбсорӧн и баитӧ». 21Мӧдіккез баитісӧ: «Этна кыввес абу бӧбсорӧн баитісьлӧн. Вермас разь сэрпӧсь лолыс осьтны синнэз синтӧмлісь?»

Исуслӧ озӧ веритӧ

22Вӧлі тӧв. Сэк Ерусалимас вӧлі «Вежа Керку вильмӧтӧм» нима вежалун. 23Исусыс ветлӧтіс Вежа Керкуын «Соломонлӧн вевттьӧминын»#10:23 Соломонлӧн вевттьӧмин ─ галерея Соломона в иерусалимском храме. 24Сэтӧн иудейес кытшӧвтісӧ Сійӧ. Нія юалісӧ: «Дыр я Тэ пондан миянӧс ылӧтлыны? Тэ кӧ Кристос-Мездӧтісь, веськыта висьтав».

25Исус шуис: «Ме тіянлӧ висьталі ни, а тійӧ одӧ веритӧ. Ме йылісь висьталӧны и Айӧ нимӧн Менам керӧммезӧ. 26Но тійӧ одӧ веритӧ. Тійӧ эд абу Менам баляэз коласісь. Ме тіянлӧ эта йылісь висьтавлі ни. 27Менам баляэзӧ кылӧны Менчим шыӧс да мунӧны Ме сьӧрӧ. И Ме тӧда нійӧ. 28Ме сета нылӧ пырся олан. Нія некӧр озӧ кулӧ. И Менам киись нійӧ некин оз гусяв. 29Менам Айӧ медыджыт. Сія сетіс Меным баляэсӧ. Айӧ киись нійӧ некин оз вермы мырддьыны. 30Ме да Айӧ ─ ӧтік».

31Сэк иудейес бӧра босьтісӧ иззэз, медбы нійӧн шупкавны Исуссӧ. 32Исусыс шуис нылӧ: «Уна бурсӧ Ме кери тіянлӧ Айӧ тшӧктӧм сьӧрті. Кӧда бур керӧм понда мӧдат Менӧ шупкавны иззэзнас?» 33Иудейес висьталісӧ Сылӧ: «Тэнӧ бурсӧ керӧмыт понда огӧ шупкалӧ иззэзнас. Шупкалам Асьтӧ Ен туйӧ пуктӧм понда, Тэ эд морт».

34Исусыс шуис нылӧ: «Тіян Туйдӧтын абу разь гижӧм: "Ме висьталі: тійӧ ─ еннэз". 35Вежа Гижӧтас висьталӧмыс оз эд вежсьы. Еныс шуӧ еннэзӧн нійӧ, кинлӧ сетіс Ассис кывсӧ. 36Сэк мыля нӧ тійӧ Менӧ шуат, серала пӧ Еныс вылын? Сы понда я, мыля висьталі: "Ме ─ Енлӧн Зон"? Менӧ эд Айӧ керис вежаӧн да ыстіс му вылас. 37Ме ог кӧ кер Айӧлісь уджсӧ, сэк Меным эд и веритӧ. 38Кера кӧ Айӧлісь уджсӧ, сэк веритӧ керӧмам, Меным кӧ одӧ веритӧ. Сэк пондат тӧдны да веритны: Айӧ ─ Меын, Ме ─ Сыын».

39Сэк Исуссӧ бӧра мӧдісӧ кутны, но Сія эз сетчы нылӧ.

40Исусыс муніс Иордан ю мӧдӧрас да сэтчин кольччис. Сэтӧн одзжык пыртліс Иоаныс. 41Уна отир ӧксисӧ Сы дынӧ. Нія баитісӧ: «Иоаныс эз мыччав ӧтік адззывлытӧм керӧм, но мый сія висьталіс Исусыс йылісь, быдӧс быль». 42Сэтчин унаӧн пондісӧ веритны Исусыслӧ.

Исус ловзьӧтӧ Лазарӧс

বর্তমানে নির্বাচিত:

Иоан 10: БЮ19

হাইলাইট

কপি