Улон-вылон 3
3
3-тӥ ЛЮКЕТ
1Инмарлэн Кузё-Инмарлэн кылдытэм кыр пӧйшуръёсыз пӧлысь кый ваньмызлэсь кескичез вал. Кый кышномуртлы шуиз: «Инмар зэмзэ ик-а вераз: ”Райысь нокыӵе но писпулэсь емышсэ эн сие?”» 2Кышномурт кыйлы шуиз: «Писпуосысь емышъёсты сиыны ми быгатӥськомы, 3рай шорын будӥсь писпулэсь емышсэ гинэ эн сие, шуиз Инмар, соос борды эн йӧтӥське, медад кулэ». 4Соку кый кышномуртлы шуиз: «Уд, уд кулэ; 5нош Инмар тодэ, кудаз нуналэ емышез оскалтоды, со нуналэ тӥляд синъёсты усьтӥськозы, соку тӥ ӟечез но уродэз тодӥсь инмаръёс кадесь луоды». 6Кышномурт адӟиз, писпулэн емышез сиыны ярамон шуыса, син азьын но чебер адӟиське, бордаз туж кыске, уго со тодонлык сётӥсь писпу вал; писпуысь емышез ишкалтӥз но сииз сое, картэзлы но сиыны сётӥз, – со но сииз. 7Соку кыксылэн но синъёссы усьтӥськизы, соос валазы, соос гольыкесь шуыса, соку соос смоквапулэсь куаръёссэ огазе вуризы но соин кус котырзэс шобыртӥзы.
8Нуналлэн ыркыт вакытаз райтӥ ветлӥсь Инмарлэсь Кузё-Инмарлэсь куаразэ кылӥзы; соку Адам кышноеныз ӵошенназы ик Инмарлэн Кузё-Инмарлэн син азьысьтыз райысь писпуос пӧлы ватӥськизы. 9Инмар Кузё-Инмар Адамлы вазиськыса шуиз: «[Адам,] кытын тон?» 10Адам шуиз: «Тынэсьтыд куарадэ мон райысь кылӥ, но кышкатски: мон гольык вал, соин ик ватӥськи». 11Соку [Инмар] шуиз: «Тон гольык шуыса, кин тыныд вераз? Мынэсьтым тыныд сиыны лэзьымтэ писпуысь емышсэ тон ӧд сиы-а?» 12Адам шуиз: «Кышно, кудзэ Тон мыным сётӥд, со мыным писпулэсь емышсэ сётӥз но, мон сии». 13Соку Инмар Кузё-Инмар кышномуртлы шуиз: «Мар тон лэсьтӥд?» Кышномурт шуиз: «Кый мынэсьтым визьме тугаз но, мон сии».
14Соку Инмар Кузё-Инмар кыйлы шуиз: «Тон тае лэсьтэмед понна вань пудоос, вань луд пӧйшуръёс азьын каргамын; кӧт вылад ветлод, вань улон нуналъёсыд ӵоже сюй-тузон сиыса улод; 15тон куспы, кышномурт куспы, тынад кидысэд-выжыед но солэн кидысэз-выжыез куспы тушмонъяськыса улон поно; со кидыс тынэсьтыд йырдэ сузмытоз, нош тон солэн пыдтышказ лекалод».
16Кышномуртлы шуиз: «Нуны вайыны секытэн луэм дыръяд куректондэ-курадӟондэ йылэто но йылэто; висьыса-курадӟыса нуныостэ ваёд; мылкыдыд картэд пала кыстӥськоз-лӧптылоз, со тонэн кузёяськыса улоз». 17Нош Адамлы шуиз: «Аслад кышноедлэсь верамзэ кылзӥськыса, ”солэсь емышсэ эн сиы” косэмме санэ понытэк, писпуысь сиыны лэзьымтэ емышез сиемед понна тонэн сэрен музъем каргамын; вань улон нуналъёсыд ӵоже солэсь емышъёссэ сиёд но ӝожомыса-куректыса кӧттэ тырод; 18бышкись будосъёс, кыйбодыос музъем вылад будозы; бусы турынэн кӧттэ тырыса улод; 19со музъеме ик берытскытозяд, кытысь тон поттэмын, ымныртӥд нюлам вуэд бызьыса, няньдэ сиёд; уго тон сюй, сюе ик берытскод». 20Адам кышноезлы ним сётӥз: Ева#3:20 Ева, еврей кылын Хавва: хая – улыны глагол бордысь кылдэмын, уго со вань улӥсь муртъёслэн анайзы луиз.
21Инмар Кузё-Инмар Адамлы но, солэн кышноезлы но кулэсь дӥськут лэсьтӥз, соосты дӥсяз.
22Инмар Кузё-Инмар шуиз: «Тани, Адам, ӟечез но уродэз тодыса, Асьме пӧлысь одӥгезлы укшась луиз; табере со, кизэ мычыса, улон писпуысь емышсэ но ишкалтоно медаз луы, медаз но сиы, пумтэм вапумъёс улоно медаз луы». 23Инмар Кузё-Инмар Едем садысь сое улляз, вордӥськем-потэм музъемзэ гырыса-кизьыса мед улоз шуыса. 24Адамез улляса лэзиз но Едем садлэн шундыӝужанпал дураз улон писпу доры мынӥсь сюресэз возьманы Херувимез но бергась-ӝуась мечез пуктӥз.
বর্তমানে নির্বাচিত:
Улон-вылон 3: УДМБИБ
হাইলাইট
শেয়ার
কপি
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
