Улон-вылон 2
2
2-тӥ ЛЮКЕТ
1Тазьы кылдытэмын вал ин но музъем – ваньмыз, мар вань соос пушкын. 2Сизьыметӥ нуналлы Инмар лэсьтоно ужъёссэ быдэстӥз; сизьыметӥ нуналаз вань ужъёссэ быдэстэм бере Со шутэтскиз. 3Инмар сизьыметӥ нуналэз бакель кариз, дун-чылкыт кариз; уго Аслэсьтыз лэсьтэм, кылдытъям вань ужъёссэ быдэстэм бераз та нуналэ Инмар шутэтскиз.
4-5Тани инлэн но музъемлэн кылдэмзы – кутсконаз ик, Инмар Кузё-Инмар музъемез но инмез, бусыысь котькудзэ куакез но бусыысь котькудзэ турын-куарез кылдытон вакытэ, соос музъем вылын ӧй на вал, уг на будо вал, уго Инмар Кузё-Инмар музъем вылэ зор уг на лэзьы вал, музъемез утялтӥсь адями ӧй на вал; 6нош музъем вылысь ӝутскылӥсь бус быдэс музъемез мускытатыса возьылӥз. 7Инмар Кузё-Инмар музъем сюйысь-тузонысь адямиез кылдытӥз: солэн ымныраз пельтыса, улонлэсь шоканзэ пушказ пыртӥз; соку адями улэп улӥсь лул луиз. 8Шундыӝужанэ, Едеме, Кузё-Инмар рай пуктӥз но Аслэсьтыз кылдытэм адямизэ отчы интыяз. 9Инмар Кузё-Инмар музъемысь пӧртэм пумо писпуос будэтӥз – учкыны чебересь, емышъёссы сиыны ческытэсь; райлэн шораз улон писпуэз, ӟечез но уродэз тодон писпуэз будэтӥз. 10Раез мускытатон понна Едемысь шур потэ вал, отысь потыса, со ньыль шурлы вайяськыса кошкылӥз. 11Огезлэн шурлэн нимыз Фисон: со зарниен узыр быдэс Хавила музъемтӥ бызе, 12со музъемысь зарни умой шуыса лыдъяське; отын ик вань бдолах#2:12 бдолах – ческыт зыно сир (смола) но оникс из. 13Кыкетӥезлэн шурлэн нимыз Гихон [Геон]: со быдэс Куш музъем пыр бызе. 14Куинетӥезлэн шурлэн нимыз Хиддекель [Тигр]: со Ассириялэн азьпалтӥз бызе. Ньылетӥез шур – Евфрат. 15[Аслэсьтыз кылдытэм] адямизэ Инмар Кузё-Инмар кутӥз но сое Едем садэ улыны интыяз, сое мед утялтоз, мед утёз шуыса. 16Инмар Кузё-Инмар адямилы курон-косон сётыса шуиз: «Садысь вань писпуослэсь емышсэс сиыса улод, 17нош ӟечез но уродэз тодон писпулэсь емышсэ эн сиы, уго со писпулэсь емышсэ сиён нуналад кулонэн кулод». 18Инмар Кузё-Инмар шуиз: «Адямилы огназлы улыны ӟеч ӧвӧл; солы тупась, юрттӥськись кылдытоме». 19Инмар Кузё-Инмар сюйысь вань кыр пӧйшуръёсты, вань ин тылобурдоосты кылдытӥз но [соосты] адями доры адӟыны вайиз, кызьы со соосты нималоз, вань улэп лулъёслы адями кыӵе ним сётоз, сыӵе ик соослэн нимъёссы мед луозы шуыса. 20Вань пудо-животъёслы, ин тылобурдоослы, лудысь вань пӧйшуръёслы адями ним сётӥз, нош адямилы аслыз укшась юрттӥськись ӧз сюры. 21Инмар Кузё-Инмар адями вылэ кужмо ум лэзиз; умме усем бераз солэсь одӥг урдлызэ басьтӥз но со интыез сӥльын-мугорын шобыртӥз. 22Инмар Кузё-Инмар, адямилэсь урдлызэ басьтыса, солэсь кышно кылдытӥз но сое адями доры вайиз. 23Соку адями шуиз: «Тани, та лы мынам лыосы пӧлысь, та мугор но мынам мугорылэсь пӧрмытэмын; со ”кышно” шуыса нимаськоз, [аслаз] картэз бордысь басьтэмын уго». 24Со понна ик адями аслэсьтыз атайзэ, аслэсьтыз анайзэ кельтоз но кышноез борды лякиськоз: [кыкназы] одӥг лулмугор луозы. 25Кыксы но гольыкесь вал, Адам но, кышноез но, но ӧз возьдаське.
বর্তমানে নির্বাচিত:
Улон-вылон 2: УДМБИБ
হাইলাইট
শেয়ার
কপি
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
