Tegagia 39
39
I Yusupu, inso a rahano i Potipa hawe a ntorungku
39:1-23
1I Yusupu winawa i Masiri, ka i'amba i Potipa, asa to Masiri, langkai potorono ndi Pirao, petewawado puu mpodagai mokole umolio inso a ngkaedo to Sumaila anu mewawao i ra'ai. 2#Tin. 7:9Sine Ondae i Ue kumongkomio i Yusupu, ranta ka igagi mia mehasili. Onae mo'ia a rahano ueno, to Masiri atuu. 3Ueno kumitao nine Ondae i Ue kumongkomio ka nine maupo hapa anu inanggano, Doweweuo i Ue mehasili. 4I Yusupu mohawe pompehohawano ueno ka gagi puu pompekakaakono. I Yusupu pinoweeako pabawa a rahano ka luwuno arataano ipeweengakono a ngkaeno i Yusupu. 5Mompu'u iweeakono i Yusupu pabawa a laro rahano ka a luwuno arataano, Ondae i Ue rumonsoo rahano to Masiri atuu hangano i Yusupu, ranta ronso-Do i Ue kongko a luwuno arataano, moiko anu i raha maupo anu i lere. 6Ipeweengakono luwuno arataano a ngkaeno i Yusupu, ka hangano haweno i Yusupu onae nahi mokolili uluakono mbo'u maupo hapa sangkadio kaangano onaeno.
I Yusupu atuu tekosi koroino ka montama rupano. 7Telaloomo ba opia tempo kombiano ueno tedonta aroa kumitao i Yusupu, ka i'amba motae, ”Aiwamo poturi saru ongkue.” 8Sine, i Yusupu nahi behe ka ipotaeakono kombiano ueno atuu, ”Haweku i ndi'ai ondae ueku nahi domokolili uluakono mbo'u maupo hapa anu kongko a laro raha andio ka dopeweengakonomo luwu arataado a ngkaeku. 9Tamoako i raha andio, ondae nahi lalua sekono ongkue, ka nahina anu nahi dopeweengakono ndi ongkue sangkadio omiu, hangano omiu kombiado. Nde kana'umpe aku moweweu mosa'oa anu langkai andio ka moweweu hala ndi Ondae Ue Ala?” 10Maupo beine atuu popandeio i Yusupu oleo me'eu oleo, nahi perioo ta moturi saru onae ke walino moturi.
11I asa oleo i Yusupu mewinso a laro raha ta umanggao anggaano, tekonai nahina maupo te'asa mia inso a ihino raha atuu kongko i raha. 12Ka i'amba beine atuu uminio i Yusupu ka idiio lembano ka ipotae, ”Aiwamo poturi saru ongkue.” Sine i Yusupu bintao lembano a ngkaeno beine atuu ka ipelulu meluarako. 13Mansano kumitao beine atuu nine i Yusupu bintao lembano a ngkaeno ka molaiomo meluarako, 14onae mebooli moboi ira ihino raha. Ipotae ndi ondae, ”Kitao, iwawao asa to Ibarani ndi ontae, ka ipemae-maeakita mia andio. Mia andio rumangkuhi aku ta moturi saru ongkue, sine mebooli aku meroku, 15Mansano rumongeo kupebooli meroku ntu'u, ibintaomo lembano ndi ongkue ka ipelulu meluarako.” 16Ka i'amba beine atuu numaao lembano i Yusupu i horino, ranta ka ipekule ueno. 17Ipohaweomo ndi Potipa tutulu anu mengkena, ipotae, ”Ata to Ibarani anu winawamiu ndi ontae, rumangkuhi aku mingki memae-maeakune. 18Sine tempono kupebooli meroku ntu'u, ibintaomo lembano ndi ongkue, ka i'amba melulu meluarako.” 19Rumongeo tutulu pinohaweno kombiano ndi onae, ”Kanatuumo iweweu aku atamiu atuu,” onaemo ka itesingka tekudano ueno. 20Ka i'amba i Yusupu irakoo ueno ka wininso a laro torungku, ukoado luwuno tinahado mokole. Kanandiomo itinorungku i ra'ai.
21Sine, Ondae i Ue kumongkomio i Yusupu ka pompehohawa-Do nahi otu-otu ndi onae. Doweweuo i Yusupu mohawe pompehohawa inso a mpetewawa torungku atuu. 22Petewawa torungku me'ala-alaakono luwuno mia mentinaha a laro torungku atuu ndi Yusupu, ka luwuno anu asalakono wineweu i tu'ai, onaemo anu umorusuo. 23Petewawa torungku nahi salo-saloo luwuno anu ipe'ala-alaakono i Yusupu, hangano Ondae i Ue kumongkomio ka maupo hapa anu inanggano Ondae i Ue weweuo mehasili.
বর্তমানে নির্বাচিত:
Tegagia 39: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
