Mark 9
9
1Ər ja gɨ a: «Kuri, ən ja gɨ i tɨ bayri, tɨ bi ne ti le daan, bi tapeer ɓə Ndɨla na waan ləg na hina na dwari barita a ɓə ulu ɗang.»
Jesu ndula yɛr tɨ nan sul
Mat 17.1-13; Luk 9.28-36
2Ɗa̰y taar tɨ plaa, Jesu jul Piyɛr la, Jak la, Ja̰ la tɨ nan baw sul ɓag teni na a sul. Tɨ un ne, ər ndula yɛr tɨ a kwi. 3Ər ngɔmi duga buy ne wo lɛm ər buy tina tɨ lɔr nəgri sul le lo. 4Tɨ un ne Jesu na bi tɨ wa̰y edɨ tɨ tedi ləg Eli la, Moys la, a wag a ja jaa na Jesu. 5Tɨ gorne Piyɛr ləg wa̰y ne gɨna, ər ja gɨ Jesu: «Wo tɨ wa̰y ɓla, ndini ne yi ɓə tɨm un ne. Ka i kaw li tanda tɨ tedi, ɓudu gɨ yim, ɓudu gɨ Moys la, ɓudu gɨ Eli la.» 6Piyɛr una jaa tɨ ja lo, kəysul ayri ka a ji tɨ tedi gun. 7Dabra goblɨ o̰ tɨ ndal hina kubgɨ a sul la, a laa wo gṵ tɨ goblɨ hul ja ɓə: «Wo ne tɨ ən ɓa̰ ne ən ka ər kum nari, i kay i tulɔ tɨ ər jaa lɔ ɓari.» 8Tɨ daamu Jesu na bi tɨ wa̰y edɨ ləg un gɨna, a ləg wo ɓudu lo lɛ tɨ Jesu ɓudu ngoy jo gə̰y na a. 9Gorne a wo jir tɨ nan sul gɨna, Jesu peer a kuna ne: «Yḭ ka gɨ wo in wa̰y ne i ləg lɔ jul lo, marway na lula sul ne, Wo Ɓa̰ ɓə wag tɨ bi tɨ ulu daan.» 10A waal jaa ne tɨ a daan la, a ɓiri paa: «Wag tɨ bi tɨ ulu daan tɨ kəy cam a?»
11La a ɓiri Jesu: «Kəyjaa bi tɨ gṵ hul ɓla ja ɓə Eli jo ɓə hina barita Wo Ɓa̰ ɓə hina a?» 12Ər duga gɨ a: «Kuri, Eli ɓə hina mum kay na ɗa̰ygor bari, lɛ kəyja jo a kya̰ tɨ Ndɨla maktub hul toni tuna Wo Ɓa̰ sul a? Ər ɓə pɛw dɨbla tina la a ɓə ər koor la lo a? 13Tɨ ɓari, ən ja gɨ i tɨ bayri: Eli hina teni la a ka gɨ ər wa̰y ne a hul taam kuna a kya̰ tɨ Ndɨla maktub hul.»
Jesu kun jinsə tɨ ɓa̰ sul
14Gorne a duga a wo hina tɨ ər bi tɨ wa̰y edɨ tapeer ndɔ ndog gɨna, a ləg bi dɨbla yeri a sul la, bi tɨ gṵ hul ɓla wo paa gaglə na a. 15Gorne bi gun ɗo ji ləg Jesu gɨna, ɓɔr a ji la a yey a tung ər kwi, a ka ər lapya. 16Jesu ɓiri ər bi tɨ wa̰y edɨ: «Kəy jo wur i tɨ paa tɨ peer gaglə a?» 17Wo paa tɨ bi daan duga gɨ ər: «Wo tɨ wa̰y ɓla, ən hina gɨ əm na ən ɓa̰ ne lal ɓijim kway gɨ ər un tɨ ja jaa. 18Tɨ un gun ne lal ɓijim ne o̰ na ər, ər tɨba tɨ lɔr ər mu huyri wag la ər twi ər ɗəngni lɔ la. Ta ər duga ər nangni gijir la. Ən ɓiri əm bi tɨ wa̰y edɨ ka a kun lal ɓijim ne le, a dwari lɛm lo.» 19Gɨna, Jesu so jaa ər ja gɨ a: «Yḭ bi hul sɨgra tɨ lula sul ne, ən ɓə na i tɨm marway an tɨ wa? Ən ɓə daa kay tɨ i lɔ marway an tɨ wa? I hina gɨ ən na ɓa̰ le!» 20La a hina gɨ ər na ɓa̰. Lɛ gorne lal ɓijim ləg Jesu gɨna, ər nibri ɓa̰, ər so ər jiga ər tɨ lɔr. Ɓa̰ ɓɨrgɨ tɨ nəgri la huyri wag tɨ ər mu kɔb-kɔb. 21Jesu ɓiri ɓa̰ ba: «Kərkwi jo mo̰y ne ka ər a?» Ɓa̰ ba duga gɨ ər: «Ɓagcagri na ər ɓa̰. 22Lal ɓijim jiga ər tɨ laa la, tɨ ndu la yɔd tɨ ər humna. Jo əm lɛm gɨ i wa̰y paa kar gɨna, əm ləg i jindemni la əm yaar i.» 23Jesu ja gɨ ər: «Jo əm lɛm hul kula gɨna, wa̰y ne bunga wo tɨ hul kula in teni.» 24Tɨ daamu, ɓa̰ ba ja tɨ ndal: «Baali, ən ko hul! Əm yaar ən kəysul ən hul kula gaw.» 25Gorne Jesu ləg bi dɨbla yey tɨ a ndɔ, ər meer lal ɓijim na gṵ sɨgra kuna ne: «Lal huru ne ɓəw ɓa̰ mu, ən naa əm gṵ, wag tɨ ɓa̰ ne ndɔ marway na ji tɨ kwi.» 26La lal ɓijim dig ɓa̰ na dwari na ngɔr tɨ ər mu la ər nibri ər la ər wag tɨ ər ndɔ. Ɓa̰ duga ley kuna wo tɨ ulu no̰. Bi gun ilgɨ ɓə ər uy teni. 27Jesu par ər daa, ər uma ər tɨ ndal la ɓa̰ o̰ lor tɨ ndal. 28Gorne Jesu a na ər bi tɨ wa̰y edɨ a duga tɨ gə̰y gɨna, ər bi ɓiri ər: «Kəyjaa yini lɛm lal ɓijim ne kun lo a?» 29Jesu duga gɨ a: «Lal ɓijim kalɔ kuna ne a ɓə wag tɨ wo ndɔ na ul mu tɨ Ndɨla soon ɓudu ngoy.»
Jesu na ulu la ər wag tɨ ngalɨm
Mat 17.22-23; Luk 9.43-45
30Jesu a na ər bi tɨ wa̰y edɨ o̰ tɨ un ɗay, a ɗen tɨ lɔr nəgri sul tɨ Galile, lɛ Jesu taam ɓə wo ka una lo. 31Kəysul ər edɨ gɨ ər bi tɨ wa̰y edɨ wa̰y la ər ja gɨ a ɓə: «A ɓə, Yin, Wo Ɓa̰ nɨm tɨ bi tɨ ɓijim kar daa la ɓə ən humna, lɛ ɗa̰y tɨ tedi hul gɨna, ər ɓə wag tɨ bi tɨ ulu daan.» 32Ər bi tɨ wa̰y edɨ una jaa ne ji lo lɛ, a oy jaa ne ji ɓiri.
Jajo ɓə tɨm wo ɗəng tɨ Ndɨla waan hul
Mat 18.1-5; Luk 9.46-48
33Jesu a na ər bi tɨ wa̰y edɨ an tɨ Kapɛrnom. Gorne a ti tɨ gə̰y, ər ɓiri a jaa: «Yḭ gag peer tɨ kəy sul tɨ ul?» 34Lɛ a ti a muguni kəysul a gag peer pay jajo ɓə tɨm wo ɗəng tɨ a daan a? 35Jesu ti tɨ nəgri la ər soon ər bi tɨ wa̰y edɨ dɔkɔmɛ kar sap ər ja gɨ a: «Jo wo taam tɨm wo tɨ toni mani gɨna, ka ər ka ər ndɔ wo ne tong bi lɔ la, wo tɨ gɨ bi gun cida kar la.» 36La ər so ɓa̰ paa ər kay ər tɨ a daan la, ər ja gɨ a ɓə: 37«Wo ne par ɓa̰ma tɨ ər ndɔ na yin ndil gɨna, ər par yin man kəw la, wo ne par yin gɨna, ər par yin ngoy lo lɛ ər par wo ne toon ən la.»
Wo ne tɨ yi paa pɛni lo tɨ yi paa
Mat 18.6-9; Luk 9.49-50, 17.1-2
38Ja̰ ja gɨ Jesu: «Wo tɨ wa̰y ɓla, yini ləg wo paa kun Sidan na əm ndil lɛ yini taam gɨ ər un kway, kəysul ər tɨ yi paa lo.» 39Lɛ Jesu duga gɨ ər: «Yḭ ka gɨ ər un kway lo, kəysul wo lɛm wa̰y ne ɓɔrji kar na yin ndil la ər ɓə duga ən ja ɓijim ja lo la. 40Kəysul wo ne tɨ yi paa pɛni lo, yḭr tɨ yi paa. 41Jo wo naa gɨ i ndu tɨ yḭḭ tɨ pinjal na yin ndil gɨna, ən ja gɨ tɨ bayri ər ɓə wa̰y tɨ daa sul haam lo bad.»
Jesu peer ər bi tɨ tomni
Mat 18.6-9; Luk 17.1-2
42«Jo wo ne ka nɨ ɓa̰ma ɓudu ne ko ən hul tɨ peer daan tɨba tɨ ɓijim hul gəna, golgo tɨ gɨ ər kura ɗəng ɓəwlu tɨ ər aan tɨ ər jiga tɨ larɨm ɓɔ ji. 43Jo tɨ əm daa jo ɗo əm tɨ ɓijim hul gɨna, əm tḭ ər, kəysul əm wur tɨ Ndɨla waan hul daa taal ɓudu golgo ura əm wur tɨ laa ne uy lo daan na əm daa tɨ ndidi. 44(Tɨ un ne, hṵy ne li bi ndula uy lo tɨ nin la, laa kaw uy lo la.) 45Jo əm ɗa̰y jo ɗo əm tɨ ɓijim hul gɨna, əm tḭ ər kəysul əm wur tɨ Ndɨla waan hul ɗa̰y taal ɓudu golgo ura əm wur tɨ laa na əm ɗəygɨ tɨ ndidi. 46(Tɨ un ne hṵy ne li bi ndula uy lo la, laa kaw uy lo la). 47La jo tɨ əm ji jo ɗo əm tɨ ɓijim hul gɨna, əm jul ər əm jiga ər teni. Kəysul əm wur tɨ Ndɨla waan hul ji taal ɓudu golgo, ura wur tɨ laa ji taal tɨ ndidi.» 48Tɨ un ne hṵy ne li bi ndula uy lo la, laa kaw uy lo la. 49Kəysul ja kaaw Ndɨla ɓə ər sangni na laa.
50«Ɓɔ tɨ wa̰y ndinimani lɛ jo ər lor lo gɨna, i ɓə ər kar waa ta ər ɓə duga lura a? Ka i lor kuna ɓɔ no̰, ka i ti na lapya na peer.»
বর্তমানে নির্বাচিত:
Mark 9: nie
হাইলাইট
শেয়ার
কপি
Want to have your highlights saved across all your devices? Sign up or sign in
© 2023, ATALTRAB
