Mark 10
10
Paa kula la paa ɓini la
Mat 19.1-12; Luk 16.18
1Jesu o̰ tɨ un ne, ər si tɨ lɔr nəgri sul tɨ Jude tɨ larɨm tɨ Jurdḛ tapaa. Bi duga taygɨ tɨ ər sul la ər edɨ gɨ a wa̰y kuna ər ka na toni. 2Tɨ daamu Parisyḛ-a hina tɨ Jesu ndɔ tɨ ər sangni. A ɓiri ər, pay wo ɓər na ul mu tɨ ii kun bla a? 3Jesu duga gɨ a: «Kəy jaa jo Moys ja gɨ i a?» 4A ja ɓə: «Moys naa gɨ i ul mu ɓə: wo ne taam ər ii kun gɨna, ka ər kya̰ maktub ər kay tɨ ər sul barita ər kun ər.» 5La Jesu duga gɨ a: «Moys kya̰ gṵ hul ne naa gɨ i, i hul sɨgra jaa. 6Lɛ toni, tɨ mum lɔ ɗula, gorne Ndɨla ɗo mum gun, “ər ɗo wo ɓər la ər ɗo ii la.”#10.6 Gen 1.27, 5.2 7Nejo wo ɓər ɓə ər ba la ər na̰ la nɨm, lɛ ər ɓə ər ndɔ kay na ər ii, 8la a ji tɨ ndidi gun a ɓə tɨm kuna ndula ya̰m ɓudu.» Kuna ne gɨna, a tɨ bi ndidi cam lo, lɛ a tɨ ndula ya̰m ɓudu. 9Wo ka wa̰y ne Ndɨla hari tɨ paa ɓaan lo. 10Gorne a duga tɨ gə̰y gɨna, ər bi tɨ wa̰y edɨ ɓiri ər jaa ne cam. 11La Jesu duga gɨ a: «Jo wo kun ər ii lɛ ər ko paa jak gɨna, ər ka juna tɨ ər ii tɨ toni kwi. 12La jo ii ɓini ər ɓər lɛ ər si ər ko ɓər jak gɨna, ər ka juna tɨ ər ɓər tɨ toni kwi la.»
Jesu la ɓimi la
Mat 19.13-15; Luk 18.15-17
13La bi hina na ɓimi tɨ Jesu ndɔ ka ər soon gɨ a Ndɨla lɛ ər bi tɨ wa̰y edɨ kun a. 14Gorne Jesu ləg wa̰y ne ər bi tɨ wa̰y edɨ ka gɨna, hul laa ka ər la, ər ja gɨ a: «Yḭ nɨm ɓimi ka a hina tɨ ən ndɔ, yḭ ka gɨ a ul mu kway lo, kəysul Ndɨla na waan ti gɨ bi ne ka ndɔ kuna ɓimi no̰.» 15Tɨ kuri ən ja gɨ i tɨ bayri, jo wo par Ndɨla waan tɨ ər ndɔ kuna ɓimi lo gɨna, ər ɓə wur tɨ nin lo bad. 16La Jesu so ɓimi tɨ ər daa la ər kay ər daa tɨ a sul ɓudu na ɓudu, ər jul ər mu tɨ a sul.
Jesu-a na wo tɨ wani
Mat 9.16-30; Luk 18.18-30
17Gorne Jesu wo tɨ saal gɨna, ɓər paa yey hina, ər ha̰w ər ɗa̰y tɨ ər kwi la ər ɓiri ər jaa: «Wo tɨ wa̰y ɓla ne ndinimani, kəyjo ən ɓə kar ta ən ɓə tɨm jili na kwi tina a?» 18Jesu duga gɨ ər ɓə: «Kəyjaa əm soon ən wo ndinimani a? Wo ndinimani in teni, lɛ Ndɨla ɓudu ngoy jo tɨ wo ndinimani. 19Əm una Ndɨla na gṵ hul ne jaa ɓə: Əm ɓə wo humna lo la, əm ɓə juna kar lo la, əm ɓə sila lo la, əm ɓə wo tan tɨ ər wa̰y kula lo la, əm ɓə wo na jaa ɓijim ja lo la, əm ɓə əm ba la əm naa la hormo̰ kar.» 20Lɛ ɓər duga gɨ Jesu ɓə: «Wo tɨ wa̰y ɓla, ən ka mum ne gun ɓagcagri na ən kɔr.» 21Jesu ləg ər la, ka ər kum la, ər ja gɨ ər: «Gə̰y gɨ əm wa̰y ɓudu cam, əm si, əm huna əm mum tɨ tina gun lɛ gə̰y gɨna, əm ɓaan gɨ bi tɨ ndemni gursu. Ne gɨna, əm ɓə mum tina tɨ ndɨlasul pi. Tɨ mum ne na mu tɨ tong gɨna əm hina əm so ul tɨ ən lɔ.» 22Gorne ər laa jaa ne gɨna, ər ji ɗoy cilip la ər ndula laar ər lo, ər ɗo ər sul ər si kəysul ər wa̰y tɨ tina tɨ dɨbla. 23Jesu ɗo ji tɨ ər bi tɨ wa̰y edɨ ne yeri ər sul la ər ja gɨ a: «Pɛw nari ne wo tɨ wani ɓə wur tɨ Ndɨla waan hul.» 24Jaa ne ɓɔr Jesu bi ji lɛ Jesu ja gɨ a cam: «Ən ɓimi pɛw nari gɨ wo tɨ wani tɨ wur tɨ Ndɨla waan hul! 25Tɨ ndog gɨ lɔgum tɨ wur tɨ ibra ho̰on lɛ pɛw nari gɨ wo tɨ wani tɨ wur tɨ Ndɨla waan hul» 26Duga jaa ne ɓɔr ər bi tɨ wa̰y edɨ ji la a ja gɨ peer ɓə: «Tɨ in gɨna, jajo ɓə nina tina a?» 27Jesu ɗig ji tɨ a sul la ər ja gɨ a ɓə: «Gɨ woɓari gɨna pɛw nari lɛ wa̰y ne bunga Ndɨla in teni, kəysul wa̰y ɓudu ne ura Ndɨla in teni.» 28Piyɛr ɗolɔ tɨ gɨ Jesu ja jaa kuna ne: «Yini nɨm mum gun lɛ i so ul tɨ əm lɔ.» 29Jesu duga gɨ ər: «Tɨ kuri ən ja gɨ i, jo wo nɨm ər gə̰y la, ər ɓungɨ tɨ ɓərgɨ la, ər ɓungɨ tɨ aa la, ər ba la, ər na̰ la, ər ɓimi la, ər wərgɨ la, yin jaa la Jaa Ndinimani jaa la gɨna, 30ər ɓə ər ɓungɨ tɨ ɓərgɨ la, tɨ aa la, ər ɓimi la, ər na̰ la, ər worgɨ la tina lahul aru. Ta gorne ər par ər hul tɨ pɛw gun ne wag tɨ ər sul la gɨna, ər ɓə tɨm jili na kwi tina tɨ lula sul ne wo hina. 31Bi dɨbla tɨ toni mani ɓə duga tɨm bi tɨ ɓəgri la, bi tɨ ɓəgri ɓə duga tɨm bi tɨ toni mani la.»
Jesu ja jaa tuna ər ulu la ər wag tɨ ngalɨm la
Mat 20.17-19; Luk 18.31-34
32Jesu ya̰ na ər bi tɨ wa̰y edɨ a so ul tɨ saal tɨ Jerusalɛm, Jesu si tɨ ər bi kwi ɓag ɓa̰ndḛ. Gɨna ayri ka ər bi tɨ wa̰y edɨ la bi ne so ul tɨ a lɔ. Jesu duga jul ər bi tɨ wa̰y edɨ dɔkɔmɛ kar sap teni ər ja gɨ jaa tuna wa̰y ne wo wag tɨ ər sul. Ər ja gɨ a: 33«Yḭ laa ɓari, yi wo saal tɨ Jerusalɛm, a ɓə yin Wo Ɓa̰ sul sula gɨ woom tɨ bi tɨ hima ɓina la, bi tɨ gṵ hul ɓla la naa. A ɓə jaa tɨ ulu kay tɨ ən sul la, a ɓə ən nɨm tɨ bi tɨ Ndɨla una lo daa. 34A ɓə ən siri kar la, a ɓə hirgɨ tɨb tɨ ən ji la, a ɓə ən ɗɨb na ngar la, a ɓə ən humna la, lɛ ɗa̰y tɨ tedi tɨ bəgri gɨna, ən ɓə wag tɨ ngalɨm.»
Jebede na ɓimi na jaa tɨ ɓiri
Mat 20.20-28
35Jak la Ja̰ la, Jebede na ɓimi kori tɨ Jesu ndɔ, a ɓiri ər jaa kuna ne: «Wo tɨ wa̰y ɓla, yini taam ɓə əm ka gɨ i wa̰y ne i wo əm ɓiri le.» 36Jesu ja gɨ a: «Kəyjo yḭ taam a?» 37A duga gɨ ər: «Əm naa əm gṵ ka ən ɓimi tɨ ndidi ne lor le, ɓudu ti tɨ əm lɨma sul la, ɓudu ti tɨ əm gɨlay sul la.» 38Jesu duga gɨ a: «Yḭ una wa̰y ne i ɓiri ji lo. Yḭ lɛm ham tɨ pɛw ne yin wo yḭḭ, yḭḭ bla a? Ɓee batɛm ne ən wo kar, yḭ ɓə lɛm kar bla a?» 39A duga gɨ ər: «Yini ɓə lɛm bla.» Lɛ Jesu ja gɨ a: «Ndu ne yin wo yḭḭ, yḭ ɓə yḭḭ la batɛm ne ən ɓə tina, yḭ ɓə tina la 40lɛ ja tɨ tɨm tɨ ən gɨlay sul la tɨ ən lɨma sul la gɨna, ən lɛm ən gṵ sula gɨ i naa lo. Ndɨla kaaw un ne gɨ bi ne yḭrmar par a sul toni.»
41Gorne ər bi tɨ wa̰y edɨ ton dɔkɔmɛ laa jaa ne gɨna, a ndula laar a lo tɨ Jak a na Ja̰ sul. 42Tɨ in jo Jesu soon a gun tɨ ər ndɔ. Ər ja gɨ a: «Yḭ una ɓari ɓə bi ton ī ləg a kuna woom a ka dwari tɨ bi sul la, bi nii ton ti tɨ ya̰ sul ka dwari tɨ a sul la. 43lɛ ɓə tɨm kuna paa ne tɨ i daan lo. Wo ne taam tɨm ɗəng tɨ ər peer daan gɨna, ka ər ti wo tɨ gɨ ər peer cida kar. 44La jo wo taam tɨm wo tɨ toni mani tɨ i daan gɨna, ka ər ti ha̰r tɨ bi gun maan. 45Kəysul yin, Wo Ɓa̰ ən hina ka bi ka gɨ ən cida lo, lɛ ən hina gɨ bi cida kar la, ən so ən ndula ən naa tɨ bi dɨbla nina.»
Jesu nen Bartime
Mat 20.29-34; Luk 18.34-43
46Jesu a na ər bi tɨ wa̰y edɨ a an tɨ Jeriko. Gorne a wag tɨ Jeriko na bi dɨbla tɨ a lɔ gɨna, wo ji nina paa ndil ɓə Bartime, Time na ɓa̰ ti tɨ ul taal. Ər wo wa̰y ndɔri. 47Gorne ər laa ɓə tɨ Jesu tɨ Najarɛt jo wo ɗira gɨna, ər ɗolɔ tɨ gwar kar: «Jesu, Dabid na ɓa̰ ka, ləg ən jindemni.» 48Lɛ bi dɨbla kway gɨ ər un tɨ ngɔr kar lɛ ər ka ngɔr na dwari ɓə: «Dabid na kaa, ləg ən jindemni.» 49Jesu lor tɨ gor la ər ja gɨ a: «I soon ər.» A soon gɨ ər wo ji nina la a ja gɨ ər: «Par əm ndɔ ka sɨgra, əm o̰ ndal, ɓə ər soon əm.» 50Wo ji nina ɗoli ər sər ɗəng la ər o̰ ndal, ər hina tɨ Jesu ndɔ. 51Jesu, ɓiri ər: «Kəyjo əm taam ɓə ən ka gɨ əm a?» Wo ji nina duga gɨ ər ɓə: «Ən Baali, ka ən ji duga ləg un.» 52Lɛ Jesu ja gɨ ər: «Si, əm hul kula nen əm.» Tɨ daamu, ər ji təng yaar ər ləg un la ər so ul tɨ Jesu lɔ.
বর্তমানে নির্বাচিত:
Mark 10: nie
হাইলাইট
শেয়ার
কপি
Want to have your highlights saved across all your devices? Sign up or sign in
© 2023, ATALTRAB
