Parei 18
18
A Pul iv'a arna nut a Kurin
1Itauatah a si lera, a Pul iln nut Atens kadav'a a Kurin. 2Kapasla dui a Isrel ki iamk, nahan iv'i Akuila, hin iak arna nut a Puntas. Hir m'ei a naun, a Prisila, ap'hrdan arna nut a Itali, sena ti mlin lil a Rum, a Klutias, itu v'nen kavr ti arm'ertu a Isrel udlani apavruh a Rum. Laha, iv'a kalar. 3Kalak kam'akar m'er, sena ti pariar inap'amk, avan nmah kanuis. 4Iel arna Sapat iv'ana m'a m'ertu al nmah tamat, sena ti irn ti ipavav v'ahienar arm'ertu a Isrel m'er m'ertu a Kris. 5Naran a Sailas m'ei a Timuti arandan a Masetunia karma, a Pul irn ti nln idv, kavrp'ep'ei iel asnr m'ertu a Isrel kavr ti a Iesu iv'i a Kristu.
6V'eti hir avmlani kavv'ana stu, laha, hin ininuen klusan kavr anr kavr ti a, “Ipavr ti kam'i pavmln, v'eti iav'i pariak. Hilaha p'eruh kadav'a asnr v'anudl.” 7Karuh atlera kadav'a al nmaha dui iamk, nahan iv'i a Sastas. Hin ipatei Atua iel, nmahan iter a p'ak nmah tamat. 8Laha, a Krispas, iv'i dui ip'aur nmah tamat, iv'ah a Mlin Lilad, hir m'er m'ertu udlani avlak al nmahan. Nelnal arna nut a Kurin avrn v'nenan kavv'ah a Iesu kavpaptais.
9Arna lihat iamk, a Pul im'atr kala ti a Mlin Lilad ivr ani, kavr ti a, “Madedrn, v'eti pav'ana. Map'nh. 10Sena ti Kana nlak m'ah, dui kinkin ikaier p'akm kutakm anh, sena ti m'ertuak avstudau arna v'anu laha.” 11Laha, ilak atlera pai iamk nal ilm'sei, kav'iv'en a nelnal v'nenan Atua.
12Laha, naran a Kaliu iv'i kavman arna nut Akaia, ardu a Isrel avp'tir kavp'lt kavmlen a Pul kavuirv'a arna kut kavvr ti a, 13Aulera irv' m'ertu a ti apavpatei Atua arna navanel la iaviviln m'a v'nen huam'em' ha.
14Naran a Pul irn ti ipav'ana, a Kaliu ivr anr ardu a Isrel kavr ti a, “Ardu a Isrel, pavv'rn. Ipavr ti si lera kvvruri iv'i si stu, v'aha p'kl stu, iviviln a ti p'ern v'nenam'i. 15V'eti ipavr ti iv'i v'lv'elien sena v'nen, v'aha naha sei, v'aha v'nen huam'i uaki, kam'i pavmhmah ani, sena ti kana narn ti p'elma si udlani lera.” 16Sarei, itp'av'r avruh arna kut. 17Sarei, ardu a Kris avuadei a Sustenis, iv'i dui ip'aur nmah tamatar ardu a Isrel, kavrpi a nah nmah na kut, v'eti a Kaliu iav'ah si udlani lera.
A Pul im'alet ml Antiuk
18 #
Nut Kaka 6:18. Itauatah a si lera, a Pul ilak atlera ip'arei uam, sarei, kavr ip'as anr tv'ald kalnr kadav'a arna nut a Kenkria. Akas nil ptn atlera, sena turanien iani asn a Mlin Eia. Sarei, avv'el m'er a Prisila m'ei Akuila arna nauak kavrav'a a Siria. 19Laha, ier a Evases kalnr atlera, v'eti hin iv'a al nmah tamat kav'ana m'er ardu a Isrel. 20Naran avmiman ani kavvr ti ipalak li uam m'er, ivr ti ikahei. 21V'eti ivr ip'as anr kavr ti a, “Nkav'a pr asn tim'ah la ipatu hin a Serusalem ra. V'eti ipavr ti Atua irni, p'em'alet dama ml asnm'i.” Sarei, iln nut a Evases arna nauak.
22Kadama aut a Sisaria kadav'a eia a Serusalem, kavr ip'as m'a nelnal arna sas, sarei, kadav'a auei ml Antiuk. 23Kalak ip'arei isusupa atlera, karuh kadav'a arna v'anu udlani a Kalesia m'ei a Vritsia, kani ti m'ertuan a Iesu udlani avp'tir ihua.
Apulus iv'iv'en mamh v'nenan Atua
24Dui Isrel iamk ima arna nut a Evases, nahan iv'i Apulus. Hin iak Aleksadria kav'i dui iv'ana ip'as karndu mamh v'nen arna Paivul. 25Dui lera, atv'iv'en mamh sera navanelan a Mlin Lilad ani. Hin nln ilaph ani kavrp'ep'a v'nenan a Mlin Lilad kav'iv'en mamh v'nen ivruri, v'eti irndu paptaisan a Sun uaki. 26Kav'ana dinei al nmah tamat, iadedrn a si kinkin. Naran Akuila m'ei a Prisila arrn v'nenan, arvr ti ipama a utar, karv'iv'en navanelan a Mlin Lilad ip'as mau ani. 27Naran hin irn ti ipav'a Akaia, tv'ald avtep'a ruplet iv'a asnr m'ertuan a Iesu atlera, kavmiman anr ihua a ti apavlav'i kavp'auri. Naran hin ima, isr lm'ar m'ertu la avv'ah a Iesu sena vtmienan Atua ha. 28Sena ti hin iv'ana istudau m'er ardu a Isrel arna nut m'auar kav'iv'en anr a ti Paivul ivr ti a Iesu iv'i a Kristu.
বর্তমানে নির্বাচিত:
Parei 18: nmb
হাইলাইট
শেয়ার
কপি
Want to have your highlights saved across all your devices? Sign up or sign in
© 2023 Presbyterian Reformed Church of Australia
