Parei 19
19
A Pul ilak a Evasas
1Dav'a, naran Apulus ilak arna nut a Kurin, a Pul isapa navanel iv'a eia arna ptha kaier a Evases kapasla m'ertuan a Iesu kinkin kavr anr kavr ti a, 2“?Naran kvv'ah a Iesu, kvlev' M'im'iln P'as?”
Hir avvrprani kavvr ti a, “Kam'em' navrn v'nen a ti M'im'iln P'as iak.”
3Laha, hin ivr anr ml kavr ti a, “?V'eti kam'i kvlev' paptais v'ata?”
Avvr ti a, “Nvlev' paptaisan a Sun.”
4 #
Mat 3:11; Mak 1:4,7,8; Luk 3:4,16; Sun 1:26,27. A Pul ivr ti a, “Nvrdaui, a Sun ien paptais sena ti m'ertu apavvav nlr kavr a nelnal a ti apavv'ah dui iamk ipama ipatauatah, dui nen iv'i a Kristu Iesu.”
5Naran avrn si lera, avpaptais arna nahan a Mlin a Iesu. 6A Pul itu lm'an aranar, sarei, M'im'iln P'as ima aranar, avv'ana arna v'nen uraur kavvrp'ep'a v'nen p'as. 7Dui lera udlani ihih inal lman iru (12).
8Laha, hin iv'a al nmah tamat kavrp'ep'a v'nen nal itl, iadedrn. Kav'ana m'er ihua karv'r a ti apavv'ah v'nena v'anuan Atua. 9V'eti m'ertu kinkin ptr ihua ihuadau, ahavv'ahi, v'eti avsip'len navanelan a Iesu arna nah nelnal. Sena si lera, a Pul iruh asnr kalev'lar m'ertuan a Iesu, kavrav'a al nmahan a Tiranas, iv'i dui iv'iv'en sei nakl, kavvrur Paivul iel arna napn udlani. 10Iani inap'i lera pai iru, dav'a ti nelnal avlak arna nut a Esia, m'ertu a Isrel m'er m'ertu a Kris, avrn v'nenan a Mlin a Iesu.
Atua ien pari lilil iururaur arna lm'an a Pul
11Laha, Atua ien pari lilil iururaur arna lm'an a Pul. 12M'ertu avlev' kalik m'a parpar a Pul itua sarei kavuirv'a asnr m'ertu avm'at, laha, m'etienar ihiris, m'im'iln stu avruh a nlr. 13V'eti ardu a Isrel kinkin avunanut nakl kavtp'ev' m'im'iln stu kavvrdina nahan a Mlin a Iesu asnr m'ertu m'im'iln stu ianr kavvr ti a, “Kam'em' nvtu v'nen ihua anh arna nahan a Iesu, la a Pul ivrp'ep'ei ha.” 14Dui iamk, nahan iv'i a Skiva, hin iv'i pris lil iamk asnr ardu a Isrel, a natn avsaru avani inap'i lera.
15V'eti m'im'iln stu ivrpranr kavr ti a, “Nrndau a Iesu, karndau a Pul. ?V'eti kam'i kvv'i hir ak?”
16Sarei, dui la m'im'iln stu ilak a nln ra, isihavs aranar kathr kasiv'r udlani, kani ti hir avruh al nmah kavmalmal, p'akr itetaplih istudau. 17Sarei, m'ertu a Isrel m'er m'ertu a Kris udlani avlak a Evases avrn si lera kavdedrn ani istudau, iani ti nahan a Mlin a Iesu iv'a eia. 18Laha, nelnal atvv'ah sarei a Iesu, avrama kavvrp'ep'a si stuar kavv'iv'en pari stu avani. 19Laha, nelnal avan paria tiet avuirma pukar kavtupiani, kavtu nap' ani arna nah nelnal. Avspan ulien nen ier nav'et iv'i silva iv'i tausen inellm' (50,000). 20Inap'i lera, v'nenan a Mlin Lilad ivrvr kadama kahua istudau.
V'lv'elien lil arna nut a Evases
21Itauatah a si lera, a Pul iv'ah ti ipav'siau a Masetunia m'ei Akaia, sarei kadav'a a Serusalem, laha kavr ti a, “Naran p'elak sarei atlera, nkv'el pr kala nut a Rum.” 22Laha, itep'a dui arru arsr lm'an nakl, arv'i a Timuti m'ei a Erastas, arv'a a Masetunia, v'eti hin ilak uam a Esia.
23Arna naran lera, der lil iak sena navanelan a Iesu. 24Sena ti dui iamk, nahan iv'i a Timitrias, hin ien sei nakl arna silva, kan m'lk nmah tamatan aitul iamk, nahan iv'i Atemis, arna silva. M'ertu avan si lera avlev' nav'et istudau aranan. 25Hin iv'ara anr m'er ardu avan parei inap'i lera kavr ti a, “Ardu, kvrndu ti nav'etad iak sena pari lera. 26Kam'i kvrni kavla ti a Pul lera irv' m'ertu avstudau avvav nlr avruh asnd, iav'i arna nut a Evases uaki, v'eti arna nut udlani a Esia, sena ti ivr ti atua m'ertu iani a lm'an iav'i atua dau. 27Sena si lera, der ipaier nakd arna ti m'ertu apavsip'len pariad kavv'ah ti nmah tamatan atua lilad, iv'i Atemis, iv'i si kaka uaki, kavutakm a si p'sp'asan. Hin nelnal udlani a Esia m'a nadep' udlani avpatei.”
28Naran avrn v'nen lera, avlini a nl rer kavv'ara eia kavvr ti a, “Atemis, ilak a Evases, ilil.” 29Sarei, v'lv'elien lera ier v'anu lil lera udlani. Laha, avuadar a Kaias m'ei Aristakas, arv'i dui a Masetunia arsapei a Pul arna navanel, kavp'lt kavuirv'a a vtlam'el. 30A Pul irn ti ipav'a asnr nelnal, v'eti arm'ertuan a Iesu ahavm'ahu ani. 31Hir kinkin la avv'i mlin a Esia ha, avlap'as an a Pul, kavtep'a v'nen asnn, kavvr ti imahv'a a vtlam'el. 32Hir kinkin avvr si iamk, hir kinkin avvr si uraur, kavkakar istudau, sena ti hir avstudau ahavrndu sei avrama kavp'lt sanan. 33V'eti ardu a Isrel avlev' Aleksanta asnr, kavtp'i a ti ipap'tir arna nah nelnal, laha, hin Aleksanta iah lm'an a ti apavlak ms, sena ti irn ti ipavr mamh sei iani. 34V'eti naran nelnal avla ti iv'i dui a Isrel, hir udlani avv'ara eia kavvr v'nen iamk uaki, dav'a dav'a ihih m'etaneiel iru, kavvr ti a, “Atemis a Evases ilil.”
35Laha, kavman lil a Evases iv'a asnr kani ti avlak ms, kavr ti a, “Ardu a Evases, nelnal udlani avrndu ti pariad arna nut a Evases iv'i ti p'vp'aur nmah tamatan atua lil iv'i Atemis m'a nev'etet irs dandan eia. 36M'ertu kinkin ihei irndu ti ipavr ti si lera iv'i hap'ilien. Sena si lera mkvlak ms pr, mavan sei iv'i pthua. 37Kam'i kvlav'r ardu lera arma atlaha, v'eti aharv'nah si kinkin al nmah tamat, aharsip'len atua tav'etam'i. 38Sena si lera, ipavr ti a Timitrias m'er arm'ertu avan parei inap'ei, avrn ti apavv'ana m'a m'ertu arna kut, kut ien parei hilaha, kavman lil iak. Ip'as a ti apavrav'a kavv'ana hua m'a hir atlera. 39V'eti ipavr ti kam'i pavrn ti pavvrur si uraur, mkvrav'a pr arna kut lil iviviln ani. 40Sena ti ardu lilil avrndu ti apavv'ana hua m'a nakd sena der lil kvani dika, sena ti nkavvr si kinkin kavv'iv'en pla v'lv'elien lera.” 41Naran ivr sera v'nen lera itap'er avruruh.
বর্তমানে নির্বাচিত:
Parei 19: nmb
হাইলাইট
শেয়ার
কপি
Want to have your highlights saved across all your devices? Sign up or sign in
© 2023 Presbyterian Reformed Church of Australia
