Fagbulun 4
4
Pedru ay Uan si sangay Taw Udyu at Daga Salubangan
1Ay kaduge Pedru ay Uan igfoyung sa sangay taw, ngay taganyun, ay at fun ngay tagulit Diyus bale, ay anggan ngay taw Sadusiyu nkakbang sas duwama. 2Ay kadotama sa ka fag duwama nu gfoyung sa baliwas Isus nu gdog gleleg, ay nu gfatuyan te, fagayu at kinkate gdog yangay ban fiya gleleg. 3Nu katanya, nagamat ka fag duwama, ay nasungsung anggan sbalabag, anway ginanya gakayabiun wan. 4Ay dewa katanya, ngayuk taw aro at nadungug at foyungan ay nafanud sas Isus. Ay at tagafanud nu fagayu wan, nu ndain 5,000k mangama.
5Ay nus balabag wan, ngay taganyun daul, ay taw Udyu at ngay tagmagurang, ay anggan at ngay tagfoyung Muisis at Suguwan inful sas Erusalem. 6Ay anggan at fun taganyun at ngayan Anas, anggan Kayfas, ay Uan, ay Aleandru, ay anggan fun taganyun at ngay kalongan sanya yangay. 7Ay ka fag ngay taw nu nafatsa wa at buknga Pedru ay Uan, ginto te, “Daginan ay fagmadaragangun? Ay sinu at nasugu ayu te, fasurei ay fagbulun takatanya?” 8Ay at Masine fag Falad nafaamatanganan Pedru, ay kanya nalong te, “Am fag ngay taganyun daul ay am taw Udyu at ngay tagmagurang, 9ay fagnafastiyeun emi katsi at masuwad, nut sa way baliwa em nafafiya fag taw at yud malo, ay manga nu anway te, tain at faginfiyaun katsi. 10Fagayu am, anggan fagayu taw Israel, asafuli te, Isus, tagsiginans Nasaret, at fagmadaragangun at nafafiya ka fag taw tagsi ay buknga katsi. Isus, Diyus at nafili fag Fun, kanya ay natuktuk ebi sas salibagan kayu, ay roro Diyus gdog yay nafaleleg anya. 11Marirukan sis Diyus at longan sas Isus baliwa te, ‘Kanya wan fag Batu at fangawat bale at fagmatungkudan. Ay am at ngay takawat bale kalimata way am ka fag Batu. Ay roro kanya tuwa fag Batu at tiba tungud at famatvngvd fagdaul bale.’#4:11 Danyu 118:22. 12Nus nga sinu fag taw ste swa daga we mafabalabag antam. At mafabalabag antam Isus wadi.”
13Ay ka fag ngay taw gaylatan dawdaw Pedru ay Uan te, di kalimu nu gfoyung, dewa yud e nagadalan fag taw. Ay nasaful wa te, ka fag duwama mangaro Isus at ngay ufud ebi. 14Ay nalag wayay at kinfiya nu malindug igfataladan Pedru ay Uan we fagalongunun. 15Ay nu katanya, nafalaklo Pedru ay Uan sit fagmafulan. Ay gsulitanan yay sa baliwas duwama. 16Ay iglong te, “Tain ro tam fagbulun sanya fag duwama? Indungug wan sas fagdaul Erusalem at fagbulun, ay watam mafafamayud sa sangay taw. 17Dewa katanya, laman wa gfarapyag at foyungan sa sangay taw, sumalag tam te, ‘Lag am gfoyung nus nga sinu fag taw sas Isus baliwa.’ ” 18Ay rodi ka fag ngay taw gdog yay nafatsanya ka fag duwama, ay matvngvd nu gsalag te, “Lag wa gelongan ay gfoyung sas Isus baliwa.” 19Ay Pedru ay Uan nabalus te, “Muwag. Amatangani go nday tuwa Diyus at fakaumsigun fag fagbulun: go nanfaning wami ay fakaumsigun, ay ate nanfaning wami Diyus at fakaumsigun? 20Wami katuwas nu gfoyung ami sa baliwa em nalag ay em nadungug.” 21Ay roro ka fag ngay taw matvngvd nu gsalag ka fag duwama te, lag gfoyung, ay rodi nafalfas wan. Dewa kaumsig nanfauri duwama wa mafafauri teway kalimu at ngay taw, teway at ngay taw gseg sas Diyus teway nalag tuway sat madaragang fag fagbulun. 22Ay ka fag mangama at kinfiya, at banwa glabi yay 40.
Ngay Tagafanud Igdarangin laman di Kalimu Kamoyung
23Pedru ay Uan nu nalfas wan, infoli wa sat ngay ufud. Ay nafoyung ka fag ngay taganyun daul ay ka fag ngay taw Udyu at ngay tagmagurang at longan sa anya. 24Ay at ngay tagafanud nu nadungug, insadi at amatanganan ay igdarangin sas Diyus te, “Em Fun, o wan at Tiba Tungud fag Diyus, at naawat banwa, ay daga, ay dagat, ay anggan fagayu tagsanya. 25Ay o wan at nalong, gina at Masine fag Falad nafaamatanganan sa em aguyangan fun Dabid, am fanuguwan, laman nafoyung am longan te,
‘Taw ro at yud Udyu fag ngay taw at fakadotamaun?
Ay taw ro tibak taw at fakamasadanun yud e masuwad?
26Ngay fun ay ngay tagmagurang inful ay nafamasadan nanfabarangyan sas Diyus ay sat nafili fag Fun.’#4:26 Danyu 2:1-2.
27Ay katsi stiye fag fulan, duwak fun inful, Erudes ay Punsyu Pilatu. Kanya gasfuwan sas yud Udyu fag ngay taw ay anggan sa sangay taw Udyu, laman nanfaringangan am fanuguwan Isus am nafili. 28Fakatanyaun, in-gurungan wan am fasadan ebi ebi, kata am fakaumsigun teway madaragang tuwo. 29Ay katsi, em Fun Diyus, linggati ka fag ngay taw at famalimuwanan emi. Ay tarabangi emi, ami am ngay fanuguwan, laman madaragang tuwami nu gfoyung ami am longan sa sangay taw. 30Ay gina ami gfoyung, fasurei am fagmadaragangun ay fafiyai at ke daylan, gasfuwan at ngay madulawan ay madaragang fag ngay fagbulun siginan am fanuguwan Isus at masine at fagmadaragangun.” 31Ay at ngay tagafanud nu ntabu wa nu gdarangin, si at fagmafulan fag bale nauwigan dawdaw. Ay at Masine fag Falad nafabitsug at ngay amatanganan ay maseganama nu gfoyung Diyus at longan.
Ngay Tagafanud Nafasadi at Nanuranan
32Ay at ngay tagafanud masadi at amatanganan ay at fasadan. Ay we glong te, “Angku wadi ku nafabul fag nanuranan,” anway fagayu at nanuranan sa tuwas fagayu tagafanud. 33Ay at ngay Nasugu madaragang tuwa nu gfatuyan sa baliwa tam Fun Isus nu gdog gleleg. Ay tam Diyus gtarabang tuwa fagayu tagafanud. 34Ay nus di sadi at taw sanya, di e fagayudanun, anway fagayu taw nu e daga, ay ate nu e bale, nafabili wan, ay nauba at nafabul fag ngay singku, 35ay nafon sa sangay Nasugu laman gfon nus nganday tagayudan.
36Ay katanya yangay Use at fagbulun. Kanya sik taw Sipre ay siginans Lebi fag fulan taw. Kanya fag ngay Nasugu nafangayan anya te, Bernabe, at masuwad te, “Tagfatvngvd at tiba at amatanganan.” 37Use nafabili at daga. Ay nauba at nafabul fag ngay singku ay nafon sa sangay Nasugu.
বর্তমানে নির্বাচিত:
Fagbulun 4: TAWEAST
হাইলাইট
শেয়ার
কপি
Want to have your highlights saved across all your devices? Sign up or sign in
Copyright © 2023 by OMF International, Philippines
