Fagbulun 5
5
Sik Daduwa Ananias ay Safira at Fagbulun
1E sik daduwa nafabili at daga. At ngayan Ananias ay at mangena Safira. 2Ka fag daduwa nadiyuganan nabul at tiba at nafabilian at ba singku, ay at sawad nafon wa sa sangay Nasugu. 3Ay Pedru nainto te, “Ananias, taw ngani Satanas at fagmagurangun emu? Kamuwagan way o sa at Masine fag Falad, madyay nasuksuk yay o at tiba am nafabul fag ngay singku siginan am daga. 4Kaduge am yud nafabili ay daga, am way tagbilug. Go kin? Ay nu nafabili wo, nus nga setaw wa ro nu gamatangan o sa baliwa am nafabul fag ngay singku. Go kin? Taw fakatanyaun am nafagbulun? Nu kamuwagan o bunwa fagtvngvd sas taw, am fakamuwaganan sa was Diyus.” 5-6Ay nu nadungug at longan, Ananias nagfu ay inkate wan. Ay fagayu at nadungug sat kin-gurungan kalimu dawdaw. Ay tagsanya fag ngay baguwama nkakbang sat kinkate, ay nasifig, ay nauba wan laman nanlibing.
7Nu nlangfe wa tuluk uras, Ananias mangena nasakbo. Ay kanya wa bulun gsaful at kin-gurungan sat mangama baliwa. 8Ay Pedru nainto te, “Go kayu wa fiya tuy ay nafabilian ay daga at fansali?” Ay Safira gbalus te, “Kin, kayu wa fiya anya em nafabul.” 9Ay Pedru nalong yangay te, “Taw ngani am daduwa ay faginsadiun nanfaskud nanfamuwagan sa tam Fun Diyus at Masine fag Falad? Linggati, nin wa sad sakbawan at ngay nalibing am mangama, ay o yangay ro fiya at fadogan.” 10Ay rodi tv Safira nagfu wa sas Pedru at akbang, ay inkate wan. Ay ka fag ngay baguwama at nasakbo, nu nalag te, inkate wan, kanya nauba at bilug ay nalibing nafataladan at mangama. 11Ay fagayu tagafanud at maful sanya kalimu dawdaw, ay anggan fagayu at nadungug at kin-gurungan.
Madaragang ay Madulawan fag ngay Fagbulun
12Isus at ngay Nasugu nafagbulun sik ngay madulawan ay madaragang fag ngay fagbulun sa sangay taw faglagan. Ay fagayu tagafanud maful sis Diyus bale, sis ke maugunan fag dalan, at ngayan te, Sulumun. 13Ay at yud gafanud fag ngay taw dewa kalimu nangaful sa sangay tagafanud, igseg tuwa anya. 14Ay dewa katanya, kaayu tuwa dawdaw tagafanud sa tam Fun, mangama ay anggan mangena. 15Ay nu katanya, at ngay taw nauba at ke daylan sangaba dalan. Ay nafatagilid sat fagtiyugan ay sat igyan laman Pedru nu dumalan sanya, dewa naaninu fagtvngvd sat tiba umfiya wan. 16Ay at ngay taw siginan at ngay fulan sirut tagsafungan fulan Erusalem inful sanya. Ay nauba at ke daylan ay at ke mafurat fag falad. Ay fagayu nfiya wan.
E Gfauri sas Isus At ngay Nasugu
17Ay fun taganyun ay at ufud fag fulan taw Sadusiyu galabian dawdaw sas Isus at ngay Nasugu at fagbulun. 18Nu katanya, kanya nagamat ka fag ngay Nasugu ay nasungsung. 19Ay gina sad yabi tam Fun Diyus at tagfabarita at sadi naluwang at ngay sakbawan sungsungan ay nafalfas ka fag ngay Nasugu. Ay ka fag tagfabarita nalong te, 20“Loi wa sas Diyus bale, ay foyungi sa sangay taw sanya sa baliwa at bagu fag leleg.” 21Ay ka fag ngay Nasugu nu nadungug ka fag longan, sbalabag sirut, nasakbo sas Diyus bale ay gfoyung sa sangay taw sanya.
Ay fun taganyun ay at ngay ufud nu nful wan, kanya nafaful taw Udyu at ngay tagfangguna fagayu laman nansulitanan sas Taw Udyu Tiba Tungud Tagmagurang. Ay kanya nasugu sik ngay taw sas sungsungan te, “Tabani stiye ka fag ngay Nasugu.” 22Ay at nasugu nu ndasug sas sungsungan, wa sanya ka fag ngay Nasugu. Ay kanya nfoli ay nafoyung at nalag te, 23“Nu glag ami ngay sakbawan madingdingan yay, ay e gtanud yay sis day sakbawan. Ay roro gina ami naluwang, we taw sisad bale.” 24Ay at fun ngay tagulit Diyus bale ay at fun taganyun nu nadungug, gadayuwan sat amatanganan te, “Tain manga at kin-gurungan ka fag ngay Nasugu at fagnalfasun daw?” 25Ay rodi sik taw indasug ay nafoyung sat maful fag ngay tagmagurang te, “Kanya fag ngay taw, ay nasungsung egmenit, katsi sa was Diyus bale gfoyung sa sangay taw.” 26Ay at ngay tagulit Diyus bale at fun ay at ngay ufud nalo sanya sa sangay Nasugu. Ay malukme tuwa nu nataban anya sa ka fag ngay tagmagurang at fagmafulan, teway kanya kalimu sat ngay taw te, mafalang batu.
27Ay at ngay tagtaban nu ndasug wan, nataban wa ka fag ngay Nasugu sas Taw Udyu Tiba Tungud Tagmagurang. Ay at fun taganyun ginto te, 28“Go sangay ebi, ya matvngvd em longan ayu te, lag gfoyung sa baliwa ka fag taw at ugali? Ay madyay katsi nu gfoyung am, nafafagdaul wam ngap karo fulan Erusalem. Ay glong yay am te, ami at nafate Isus.” 29Ay Pedru, ay anggan at ngay ufud nabalus te, “Diyus tuwa em fagfaningun, bundi sa sik taw. 30Tam ngay aguyangan at Diyus gdog yay nafaleleg tam Isus, dewa am nafate anya sas salibagan kayu. 31Ay Diyus nafatsa at siyun fag day tigyangan Isus, laman kanya tam Fun ay tam Tagfalangfe, ay laman taw Israel mubun at asalanan ay gfalyam wan. 32Ay ami wan at nafatuyan sa ka fag fagbulun. Ay anggan at Masine fag Falad, Diyus nafon sa sangay tagfaning anya, nafatuyan yangay.”
33Ay ka fag ngay Taw Udyu Tiba Tungud Tagmagurang nu nadungug ka fag ngay Nasugu at longan, matvngvd nu kadotama, ay gafateun ka fag ngay Nasugu. 34Ay at sadi at tagmagurang, sik Parisiyu, at ngayan Gamaliyel, sik tagfoyung Muisis at Suguwan. Ay fagayu taw gseg anya. Ay kanya nlindug ay nalong te, “Tabani yap sirut ka fag ngay Nasugu sat dayu.” 35Ay nu nataban wan, Gamaliyel nalong sat ngay ufud te, “Am ku kalongan taw Israel. Faamatanganuni ay fagananfagbulunun sanya fag ngay taw. 36Anway ebi ataw sik taw at ngayan Teudas, indasug ay gfandaragang te, ‘E fagmadaragangun aktuwa. Ay tagfaning angku 400k taw.’ Dewa katanya, bandi e nafate wayay anya, ay at ngay tagfaning anya nasaruwayan wan. Ay ka fag fulan taw nalyam wan. 37Ay bandi e sadi ya fiyak taw, Udas, sik taw Galiliya. Kanya ndasug gina griruk ay gtap ngay taw at kayuwan fag buknga. Ay sik ngay taw galo anya. Ay bandi e nafate wayay anya, ay at ngay tagalo anya nasaruwayan wan. 38Nu katanya, glong aw ayu te, katsi ro lag tam gsalag ka fag ngay takamoyung, fabayani wa anya. Anway at fasadan ay at fagbulun nut siginan way ros taw, wa ban e masuwad. 39Ay roro nut siginan was Diyus, watam mafafasalag ka fag ngay taw. Ay tam fagsalagun anwa tam Diyus.” 40Ay ngay Taw Udyu Tiba Tungud Tagmagurang nafaning Gamaliyel. Ay rodi gdog yay fiya nafasakbo ka fag ngay Nasugu ay nalong te, falangi. Ay matvngvd nu gsalag te, “Lag ban gfoyung sa ka fag Isus at ugali.” Ay nu ntabu wan, nafalfas wan. 41Ay ka fag ngay Nasugu nalo wan siginan ka fag ngay Taw Udyu Tiba Tungud Tagmagurang. Ay guseganan tuwa, teway Diyus at fagnafiliun anya nus nga e gfauri anya, laman Isus e fanambagun. 42Ay kayu menit kayu menit kanya gfatunglus tuwa nu gfoyung at Masine fag Barita sa baliwa tam Fun Isus, tam Diyus at nafili fag Fun, dewa sas Diyus bale ay dewa sa sangay bale.
বর্তমানে নির্বাচিত:
Fagbulun 5: TAWEAST
হাইলাইট
শেয়ার
কপি
Want to have your highlights saved across all your devices? Sign up or sign in
Copyright © 2023 by OMF International, Philippines
