Yohana 7

Isa ni a dɔɔkɛlu

1Wo kɔ, Isa tɛɛ Galile koovi lɔtaamana. A tɛɛ tɛ a fɛ ka taa ni sei kɛ Jude koovi lɔ, kamasɔlɔn Jahudiya kuntiilu tɛɛ a faako ɲaɲininna. 2Wo k'a talan, Jahudiyalu ya Gbaakɔlɔsii Selilon ma tɛɛ vɛ sulunya. 3Wo lɔ, Isa dɔɔkɛlu vɛɛ a yɛ: «Bɔ jan, i yi taa Jude koovi lɔ, fɔsa i kɔbilabalu fana y'i kɛkolu ye je. 4Kamasɔlɔn ni mɔɔ y'a fɛ a mangutu yi bɔ, i tɛ kolu kɛla doon nɔ. Komi i yi ko minu kɛla yi ne, wo lɔ, i yi taa i jɛlɛ jiya dunuɲa bɛ la!» 5(Hali a dɔɔkɛlu gbu tɛɛ ma limaniya a ma.)

6Isa do k'ai javi, a vɛɛ: «Ǹa waate ma se ba bene. Kɛɛ àilu koni, waate suu suu bɛnyine ài ma. 7Ài tɛ se gbeyala dunuɲa yɛ, kɛɛ ǹe do gbeyayine a yɛ, kamasɔlɔn ǹ'i seleya dila ka bɛn a ma ko a kɛkolu kɛwonyanin. 8Wo le y'a ma, àilu yi taa selibɔya lɔ, kɛɛ ǹe do tɛ taala, kamasɔlɔn ǹa waate ma se ba.» 9Isa wɔlinin wo fɔla, a ka to Galile.

Isa ka taa selibɔya lɔ Jelusalɛmu teme

10A dɔɔkɛlu taa kɔ selibɔya lɔ, ale fana ka taa. Kɛɛ a ma taa gbɛ la, fɔ doon nɔ. 11Wo k'a talan Jahudiya kuntiilu tɛɛ a ɲininna selibɔya lɔ, ai vɛɛ: «Kɛ́ wo yi mineja?» 12Mɔɔ siyama tɛɛ i ɲɔɔ sɔsɔla kan majii lɔ ka bɛn Isa ma. A dɔlu vɛɛ: «Mɔɔ bɛlɛ le a le.» A dɔgbɛlɛlu vɛɛ: «Wo tɛ, mɔɔlafiliba le.» 13Kɛɛ mɔɔ suu suu ma ko fɔ gbɛ la ka bɛn a ma, kamasɔlɔn ai tɛɛ siyanna Jahudiya kuntiilu ɲa.

14Selibɔ tɛmala lɔ, Isa ka don lɔhɔlɔmabonba luu kɔnɔ ka mɔɔlu kalan damina. 15Jahudiya kuntiilu ka kawakoya, ai vɛɛ: «Kɛ́ min na lɔnni min sɔlɔnna min ne, k'a talan a ma kalan foi kɛ?»

16Isa k'ai javi, a vɛɛ: «Ǹa kalan ma bɔ ǹe gbu lɔ, fɔ ǹ kelaba. 17Ni mɔɔ min y'a fɛ ka Ala sawo kɛ, wo tii kɛtɔ a lɔnna ni ǹa kalan bɔnin Ala le lɔ, niwotɛ ni ǹ'i kumala ǹ jɛlɛkanu ya seetiiya le lɔ. 18Mɔɔ min yi kumala a jɛlɛkanu ya seetiiya lɔ, wo tii yi mɔɔlu ya buɲali le kɔ. Kɛɛ mɔɔ min y'a kelaba ya buɲali kɔ, wo tii le tuɲande le, a do tɛ faɲa suu suu fɔla. 19Nabi Musa le na Ala ya seliya dila ài ma, kɛlɛ? Kɛɛ ài suu suu tɛ seliya wo labatola yi ne. Mindɛ lɔ ài yi ǹ faako ɲaɲininna?»

20Jama k'a javi, ai vɛɛ: «Jinatɔ le i le. Jene i faako ɲaɲininna?»

21Isa do k'ai javi, a vɛɛ: «Ǹ na baale kelen ne kɛla, wo do n'ài bɛ kawakoyala. 22Nabi Musa na kɛnɛkɛko jamali dila ài ma, k'a talan mɔ bemanu le na kɛnɛkɛko daminala, Nabi Musa tɛ. Wo le n'a kɛla, hali Nɔningɛlon gbu, ài y'ài denkɛlu makɛnɛkɛla. 23#Yohana 5.9.Ni ài y'ài denkɛlu makɛnɛkɛla Nɔningɛlon fɔsa Nabi Musa ya seliya kana tiɲa, a yi di vɛ ài mɔnɛnin m̀ ma kamasɔlɔn m̀'ɛ mɔɔ falikolo lakunnin lakɛnɛya Nɔningɛlon? 24Ài kà ko ye ài ɲa la dein k'a kiti tɛɛ wo ma, mafɔ ài yi kiti tɛɛ telenmandeya bolo le ma.»

Jalasa Isa le Masa Tɔɔmasenin ne?

25Wo le k'a kɛ, Jelusalɛmuka dɔlu k'a fɔ i ɲɔɔ yɛ, ai vɛɛ: «Jalasa ai tɛ kɛ́ min ne ɲininna a faako lɔ? 26Ài y'a ye! A yi kumala bala lɔ, kɛɛ ai do tɛ foi fɔla a yɛ. Jalasa maa kuntiilu v'a lɔn bɛlɛbɛlɛ kɛ k'a fɔ ko ale le Masa Tɔɔmasenin ne? 27Ni wo le, ǹu koni ka kɛ́ min bɔya lɔn. Kɛɛ ni Masa Tɔɔmasenin ka na, mɔɔ suu suu tɛnala a bɔya lɔnna.»

28Isa ka to mɔɔlu kalanna lɔhɔlɔmabonba luu kɔnɔ, a k'a kan labɔ, a vɛɛ: «Tuɲa le, ài ka ǹ lɔn, ani m̀ bɔya! Kɛɛ ǹ nanin tɛ ǹ jɛlɛkanu ya seetiiya lɔ. Min na ǹ kelayala, wo le tuɲande le, àilu do ma wo lɔn. 29Kɛɛ ǹe do ka a lɔn kamasɔlɔn m̀ bɔnin ale le fɛlɔ, ale le do na ǹ kelayala.»

30Wo fɔ Isa bolo, ai tɛɛ a fɛ ka a mina, kɛɛ mɔɔ suu suu bolo ma se a ma, kamasɔlɔn aa waate tɛɛ ma se ba. 31Wo bɛ n'a kɛ, mɔɔ siyama ka limaniya a ma jama lɔ, ai vɛɛ: «Ni Masa Tɔɔmasenin ka na, jalasa a kɛtɔ kawanankolu kɛla ka timin kɛ́ min ta la?»

Jahudiya kuntiilu ka lakanalibalu lataa Isa minaya lɔ teme

32Jama tɛɛ ko minu fɔla kan majii lɔ ka bɛn Isa ma, Falisilu ka wolu mɛn. Wo lɔ, ailu ni salakalase kuntiibalu ka lakanaliba dɔlu lataa a minaya lɔ. 33Isa do k'a fɔ jama yɛ, a vɛɛ: «Ǹ kɛtɔ waateni kɛla ài fɛ bene, wo kɔ, ǹ kɛtɔ taala ǹ kelaba ma. 34Ài kɛtɔ ǹ ɲininna, kɛɛ ài do tɛnala ǹ yena, kamasɔlɔn ǹ kɛtɔ tɛɛminja, ài tɛnala sena taala woja.»

35Jahudiya kuntiilu k'a fɔ i ɲɔɔ yɛ, ai vɛɛ: «Kɛ́ min taatɔ min ne, k'a fɔ ko mɔ tɛnala a yena? Jalasa a a fɛ ka taa maa mɔɔlu ma minu siinin Gɛlɛki solu la, ka Gɛlɛkikalu kalan? 36A vɛɛ ko mɔ kɛtɔ a ɲininna, kɛɛ mɔ tɛnala a yena. A vɛɛ fana ko a kɛtɔ tɛɛminja, mɔ tɛnala sena taala woja. Wo kɔlɔ yi mindɛ le?»

Niimaya ji

37Selibɔ laban lon na, min tɛɛ lonba le, Isa k'i lɔ k'a kan labɔ, a vɛɛ: «Ni minkɛlɔɔ vɛ kɛla mɔɔ min na, wo tii yi na m̀ ma k'i min. 38Ni do mɔɔ min ka limaniya m̀ ma, a kɛtɔle iwo a sɛvɛnin kitabu kɔnɔ teme, ko: ‹Niimaya ji woyotɔle a josokun nɔ iwo kɔɔkun.› » 39Isa kan tɛɛ Nii Sɛnɛyanin ne ma, min ditɔ a malimaniyamɔɔlu ma. Wo waate lɔ, Nii Sɛnɛyanin tɛɛ ma di ba bene, kamasɔlɔn Isa tɛɛ ma magbiliyali sɔlɔn ba bene.

Jama lɔ ka tala teme ka bɛn Isa ma

40Jama ka kuma wolu mɛn mingɛ, a dɔlu vɛɛ: «Kelaba min ka kan ka na, ale le min ne jɔ!»

41A dɔgbɛlɛlu vɛɛ: «Masa Tɔɔmasenin ne a le le.»

Kɛɛ a dɔlu vɛɛ: «Ɛnɛn, Masa Tɔɔmasenin kɛtɔ bɔla Galile di? 42Jalasa a sɛvɛnin tɛ kitabu kɔnɔ ko Masa Tɔɔmasenin kɛtɔ Nabi Dawuda bɔzɔn ne le, ka bɔ Dawuda fɛso Bɛtilɛhɛmu?» 43Wo lɔ, jama lɔ ka tala ka bɛn Isa ma. 44A dɔlu tɛɛ a fɛ ka a mina, kɛɛ mɔɔ suu suu bolo ma se a ma.

Jahudiya kuntiilu ya limaniyabaliya

45Lakanaliba minu tɛɛ vɛ na Isa minaya lɔ, wolu ka seikɔ salakalase kuntiibalu ni Falisilu fɛlɔ. Ai do ka lakanalibalu maɲininga, ai vɛɛ: «Mindɛ kɛnin ài ma na a le?»

46Lakanalibalu k'ai javi, ai vɛɛ: «Mɔɔ foi ma kuma ba bene iwo kɛ́ min yi kumala teme!»

47Falisilu k'ai javi, ai vɛɛ: «A vɛ àilu fana lafili? 48Kuntii kelen, niwotɛ Falisi kelen ma limaniya ba a ma, kɛlɛ? 49Kɛɛ mɔɔ lɔkolon jama min ma foi lɔn ka bɛn Nabi Musa ya seliya ma. Wo le y'a ma, ai bɛ yi Ala ya daan ne kɔlɔ!»

50 # Yohana 3.1, 2. Ai lɔ kelen min tɔɔ tɛɛ ko Nikodɛmu, min tɛɛ vɛ taa Isa ma kɔlɔman ne, wo k'a fɔ dɔ kuntiilu yɛ, a vɛɛ: 51«Ka bɛn maa seliya ma, mɔ tɛ se kiti benna mɔɔ kɔkan, fɔ m'a lamɛn bene k'a lɔn a na min kɛla, kɛlɛ?»

52Ai k'a javi, ai vɛɛ: «Ile fana yi Galileka le le? Ni i ka kitabulu kalan kobɛn, i kɛtɔ a yena ko kela foi tɛnala bɔla Galile.» 53Wo kɔ, ai bɛ ka taa aiya luulu ma.

বর্তমানে নির্বাচিত:

Yohana 7: MBT2023

হাইলাইট

কপি