Yohana 6

Isa ka kɛ́ mɔɔ waa loolu (5 000) balo teme

Matiyu 14.13-21; Malɛkɛ 6.30-44; Luka 9.10-17

1Wo timinnin kɔ, Isa ka taa Galile kɔɔ kɔma, ai y'a fɔla min ma kɔtunun Tibɛliya kɔɔ. 2Jama ba tɛɛ a kɔ, kamasɔlɔn ai tɛɛ aa kawanankolu yena, a tɛɛ minu kɛla jangalotɔlu yɛ. 3Isa do ka jɛlɛ tini dɔ kɔkan k'i sii a kɔbiladennu fɛ. 4Wo k'a talan, Jahudiyalu ya Timinkunna Selilon ma tɛɛ vɛ sulunya.

5Isa k'a ɲa lawuli ka jama ba natɔla ye a ma mingɛ, a k'a fɔ Filipe yɛ, a vɛɛ: «M'i bulu san min ne fɔsa mɔɔ minu yi dɔnni kɛ?» 6(A ka wo fɔ Filipe lɔsumanko le lɔ. Niwotɛ, a tɛɛ k'a lɔn a kɛtɔ min kɛla.)

7Filipe k'a javi, a vɛɛ: «Hali ni mɔ ka wɔligbɛ gbana kɛmɛ fila (200) bulu le san, ai bɛ tɛnala a dɔɔni gbu sɔlɔnna a lɔ.»

8Isa kɔbiladen dɔ min tɔɔ tɛɛ ko Andele, Simɔn Piyɛli dɔɔni, wo do vɛɛ Isa yɛ: 9«Kavelen dɔ yi jan, bulukala loolu ni jɛɛni fila y'a bolo. Kɛɛ wo kɛtɔ mindɛ ɲiala jama ba min ma?»

10Isa do vɛɛ ai yɛ: «Ài yi mɔɔlu lasii duu ma.» Bin mɛsɛnni walanin tɛɛ woja. Wo lɔ, ai k'i sii. Kɛ́ minu tɛɛ jama lɔ, wolu tɛɛ mɔɔ waa loolu (5 000) jate bɔle. 11Isa ka bulu wolu ta, ka balika bɔ Ala yɛ, ka ban k'a lɔtala mɔɔ siininnu wotɛ. A ka jɛɛni fila kɛ wo boloɲa kelen ne ma. Mɔɔ bɛ ka bulu ni jɛɛ sɔlɔn fɔɔ k'ai wasa. 12Mɔɔlu ka dɔnni kɛ k'i fa mingɛ, Isa vɛɛ a kɔbiladennu yɛ: «Ài yi bulu ni jɛɛ kulunkulun tɔlu ladɛn, fɔsa a dɔ kana tiɲa.» 13Wo ma, bulukala loolu wo tɔ min na bɔla mɔɔlu ya dɔnni kɔ, ai ka wo kulunkulunnilu ladɛn ka gbɔlɔ ɲa tan ni fila (12) lafa.

14Jama ka Isa ya kawananko wo ye mingɛ, ai vɛɛ: «Kelaba min ka kan ka na dunuɲa, wo le min ne jɔ!» 15Isa tɛɛ k'a lɔn ne ko ai tɛɛ a fɛ k'a mina k'a kɛ aiya masakɛ le le diyanigbeya boloma. Wo le k'a kɛ, a k'a majaanya ai la kɔtunun ka taa tini kɔkan.

Isa ka taama kɔɔ kɔkan teme

Matiyu 14.22-27; Malɛkɛ 6.45-52

16Wuladala senin, a kɔbiladennu ka taa kɔɔ kawun na, 17ka don kulun kɔnɔ, ka kɔɔ tɛɛ damina Kapɛlɛnamu fannɔ. Su tɛɛ vɛ ko, kɛɛ Isa tɛɛ ma na ba ai ma. 18Fɔɲɛ ba vɛ bɔla ka kɔɔ lajaman bubale. 19Ai ka kilo loolu niwotɛ wɔɔlɔ jate kɛ kulun bɔlila waate min nɔ, ai ka Isa taamantɔla ye kɔɔ kɔkan, a v'i madonna kulun na. Wo lɔ, ai bɛ ka siyan. 20Kɛɛ Isa do vɛɛ ai yɛ: «Ài kà siyan, ǹe le.» 21Ai tɛɛ a fɛ k'a ta kulun kɔnɔ, kulun do ka se telemanin ai taaya lɔ.

Niimaya bulu

22Wo dusagbɛlon, jama min ka to kɔɔ kɔma, wolu k'a ye ko kulun kelen ne tɛɛ je kunun, ani Isa tɛɛ ma taa a kɔbiladennu fɛ kulun kɔnɔ, mafɔ a kɔbiladennu le na taala dein. 23Kɛɛ kulun dɔlu ka bɔ Tibɛliya ka se dingila wo dafɛ, ai ka bulu dɔn tɛɛminja mɔ Kuntii ya balikabɔ kɔla Ala yɛ. 24Jama k'a ye mingɛ ko Isa ni a kɔbiladennu tɛɛ tɛ je butu, ailu gbu vɛ donna kulun wolu kɔnɔ ka taa a ɲininya lɔ Kapɛlɛnamu so kɔnɔ.

25Mɔɔlu ka Isa ye mingɛ kɔɔ kɔma, ai do vɛɛ a yɛ: «Kalanmɔɔ, i senin jan waate mindɛ lɔ?»

26Isa k'ai javi, a vɛɛ: «Ǹ'i tuɲa fɔ ài yɛ, ài tɛ ǹ ɲininna ǹa kawananko tɔɔmaselu ɲayenko lɔ, mafɔ ài na bulu min dɔnna mingɛ k'ài fa kpe. 27Ài kà baale kɛ dɔnnifenko lɔ min yi tolinna, mafɔ min yi mɛnna ka niimaya banbali di, Mɔɔnivin Tanin kɛtɔ min dila ài ma, kamasɔlɔn mɔ Fa Ala vɛ aa seetiiya tɔɔmase bila a kan.»

28Ai k'a maɲininga, ai vɛɛ: «Mɔ ka kan ka mindɛ le kɛ fɔsa m'i Ala ya baale kɛ?»

29Isa do k'ai javi, a vɛɛ: «Ala ya baale le min ne: Ka limaniya aa mɔɔ kelayanin ma.»

30Wo lɔ, ai do vɛɛ a yɛ: «Ni wo le, i kɛtɔ kawananko mindɛ le kɛla fɔsa m'i wo ye ka limaniya i ma? I kɛtɔ mindɛ le kɛla? 31Mɔ bemanu na dɔnnifen suu dɔ dɔnna fuwa lɔ, ai y'a fɔla min ma ko mana, iwo a sɛvɛnin teme kitabu kɔnɔ, ko: ‹A na bulu dila ai ma ka bɔ haijɛnɛ ko ai y'a dɔn.› »

32Wo fɔ ai bolo, Isa vɛɛ ai yɛ: «Ǹ'i tuɲa fɔ ài yɛ, Nabi Musa ma bulu di ài ma ka bɔ haijɛnɛ, mafɔ ǹ Fa le yi bulu bɛlɛbɛlɛ dila ài ma ka bɔ haijɛnɛ. 33Kamasɔlɔn min jiinin ka bɔ haijɛnɛ, ale le Ala ya bulu le, wo le do yi niimaya dila dunuɲa ma.»

34Ai vɛɛ: «Mɔ Kuntii, i yi to bulu wo dila mɔ ma waate bɛ.»

35Isa do vɛɛ ai yɛ: «Ǹe le niimaya bulu le. Ni mɔɔ mɔɔ si ka na m̀ ma, kɔɔn tɛnala wo tii minala butu. Ni mɔɔ mɔɔ do ka limaniya m̀ ma, minkɛlɔɔ tɛnala wo tii minala butu. 36Kɛɛ iwo ǹ n'a fɔla ài yɛ teme, ài na ǹ yena ài ɲa la, kɛɛ ài do ma limaniya m̀ ma. 37Ǹ Fa vɛ mɔɔ minu dila m̀ ma, wolu bɛ natɔle m̀ ma. Ni mɔɔ mɔɔ do ka na m̀ ma, ǹ tɛnala wo tii gbɛnna feu. 38Kamasɔlɔn m̀ ma jii ka bɔ haijɛnɛ ǹe gbu sawo kɛko lɔ, mafɔ ǹ kelaba sawo. 39Ǹ kelaba sawo le min ne, ko a na mɔɔ minu dila m̀ ma, wo suu suu kà tunun m̀ ma, mafɔ ǹ'ai bɛ lawuli ka bɔ saya lɔ dunuɲa laban lon. 40Kamasɔlɔn ǹ Fa sawo le min ne, ko mɔɔ minu bɛ ɲa lɔnin a Denkɛ lɔ ka limaniya a ma, wolu bɛ yi niimaya banbali sɔlɔn, ǹe do kɛtɔ ai lawulila ka bɔ saya lɔ dunuɲa laban lon.»

41Wo fɔ Isa bolo, Jahudiya kuntiilu ka kunnɔkuma damina ka bɛn Isa ya ko ma, kamasɔlɔn a n'a fɔla, a vɛɛ: «Ǹe le bulu le min jiinin ka bɔ haijɛnɛ.» 42Ai do vɛɛ: «Isa le tɛ min ne, Jusufu denkɛ? Mɔ do ka a fa ni a ba lɔn. Mindɛ kɛnin a a fɔla yi ne ko a jiinin ka bɔ haijɛnɛ le?»

43Isa do k'ai javi, a vɛɛ: «Ài kunnɔkuma to je i ɲɔɔ wotɛ. 44Mɔɔ suu suu tɛ se nala m̀ ma, ni ǹ Fa min na ǹ kelayala, ni ale ma wo tii masama k'a lana m̀ ma. Ǹe do kɛtɔ wo tii lawulila ka bɔ saya lɔ dunuɲa laban lon. 45A sɛvɛnin kelalu ya kitabulu kɔnɔ, ko: ‹Ala gbu le kɛtɔ ai bɛ kalanna.› Wo le y'a ma, mɔɔ minu bɛ vɛ ai tolomalɔla ǹ Fa kumakan na ani ka diɲa aa kalan ma, wolu bɛ yi nale m̀ ma. 46A tɛ k'a fɔ ko dɔ vɛ ǹ Fa ye. Mɔɔ suu suu ma ǹ Fa ye ba, mafɔ ale min bɔnin a fɛlɔ, wo le vɛ a ye. 47Ǹ'i tuɲa fɔ ài yɛ, ni mɔɔ mɔɔ ka limaniya, niimaya banbali yi wo tii le yɛ. 48Ǹe le niimaya bulu le. 49Ài bemanu ka mana dɔn fuwa lɔ, kɛɛ ai do ka sa. 50Kɛɛ bulu min jiinin ka bɔ haijɛnɛ, wo le ne. Ni mɔɔ min k'a dɔ dɔn, wo tii tɛnala sala. 51Ǹe le niimaya bulu le min jiinin ka bɔ haijɛnɛ. Ni mɔɔ min ka bulu min dɔ dɔn, wo tii totɔ niimaya le lɔ kudein. Ado ǹ kɛtɔ bulu min dila fɔsa dunuɲa yi niimaya sɔlɔn, wo le ǹ falikolo le.»

52Wo fɔ Isa bolo, Jahudiya kuntiilu v'i ɲɔɔ sɔsɔla, ai vɛɛ: «Kɛ́ min yi se a falikolo dila mɔ ma di vɛ ko m'a dɔn?»

53Wo kɛ, Isa vɛɛ ai yɛ: «Ǹ'i tuɲa fɔ ài yɛ, ni ài ma ǹe Mɔɔnivin Tanin falikolo dɔn ani ka ǹ jeli min, ài tɛnala niimaya sɔlɔnna. 54Ni mɔɔ min do ka ǹ falikolo dɔn ani ka ǹ jeli min, niimaya banbali yi wo tii le yɛ, ani ǹ kɛtɔ a lawulila ka bɔ saya lɔ dunuɲa laban lon. 55Kamasɔlɔn ǹ falikolo yi dɔnnifen bɛlɛbɛlɛ le le, ani ǹ jeli yi minnifen bɛlɛbɛlɛ le le. 56Wo le y'a ma, ni mɔɔ min ka ǹ falikolo dɔn ani ka ǹ jeli min, wo tii totɔ ǹa kafonɲɔɔya le lɔ, ǹe fana totɔ kafonɲɔɔya lɔ wo tii fɛ. 57Ǹ kelayanin Ɲɛnɛmayatii Fa bolo ka niimaya sɔlɔn teme a sabu la, ni mɔɔ mɔɔ si ka balo ǹ falikolo la, wo tii kɛtɔ niimaya sɔlɔnna ten ne ǹ sabu la. 58Bulu min jiinin ka bɔ haijɛnɛ, wo le ne. A kɛnin tɛ iwo ài bemanu na bulu min dɔnna ka ban ka sa. Ni mɔɔ mɔɔ si ka bulu min dɔ dɔn, wo tii totɔ niimaya le lɔ kudein.»

59Isa ka kuma wolu fɔ k'a to mɔɔlu kalanna Aladalibon na Kapɛlɛnamu.

Niimaya banbali kumalu

60A kɔbiladen siyama ka ko wolu mɛn mingɛ, ai vɛɛ: «Kuma min gbeleyayine! Jene yi se diɲala wo ma?» 61Isa tɛɛ k'a lɔn a miliya lɔ ko a kɔbiladennu yi kunnɔkuma fɔla ka bɛn aa kuma wolu ma. Wo le k'a kɛ, a vɛɛ ai yɛ: «Jalasa kuma min y'ài kunnɔtɛɛ dailu le le? 62Ni ài ka Mɔɔnivin Tanin jɛlɛtɔla ye ka seikɔ a bɔya lɔ do? 63Nii Sɛnɛyanin ne yi niimaya dila, niwotɛ adamaden fanga tɛ foi ɲia. Ǹ na kuma minu fɔla ài yɛ, wolu bɔnin Nii Sɛnɛyanin ne lɔ, ai do yi niimaya dila. 64Kɛɛ a dɔlu y'ài tɛma, minu limaniyanin tɛ.» (Ka ta a damina ma, Isa tɛɛ k'a lɔn mɔɔ minu limaniyanin tɛ ani mɔɔ min kɛtɔ a janvala.) 65Isa k'a fɔ kɔtunun, a vɛɛ: «Wo le n'a kɛla, ǹ n'a fɔla ài yɛ, ǹ ko, mɔɔ suu suu tɛ se nala m̀ ma, ni ǹ Fa ma wo see di a ma.»

66Ka ta wo lon ma, a kɔbiladen siyama ka seikɔ. Ai do ma diɲa ka bila a kɔ butu. 67Wo lɔ, Isa k'a fɔ aa keladen mɔɔ tan ni fila (12) yɛ, a vɛɛ: «Àilu do? Àilu fana y'a fɛ ka taa?»

68 # Matiyu 16.16; Malɛkɛ 8.29; Luka 9.20. Simɔn Piyɛli k'a javi, a vɛɛ: «Ǹ Kuntii, m'i taa jene kɔ ni ile tɛ? Niimaya banbali kumalu yi ile le bolo. 69Mɔ do vɛ limaniya yi ne, ani k'a lɔn ko ile le Ala ya Mɔɔ Sɛnɛyanin ne.»

70Isa do k'ai javi, a vɛɛ: «Ǹe gbu le n'ài mɔɔ tan ni fila (12) tala, kɛlɛ? Kɛɛ ài lɔ mɔɔ kelen yi Soitana den ne le.» 71Isa kan tɛɛ Simɔn Isekaliyɔti denkɛ Judasi le ma. A do tɛɛ Isa ya keladen mɔɔ tan ni fila (12) dɔ le le, min kɛtɔ a janvala.

বর্তমানে নির্বাচিত:

Yohana 6: MBT2023

হাইলাইট

কপি