Wikhikən 16

1Nit wehci ktiyolpa yohtəl kekwseyal welaman skat kənapiskwahmatihpa.

2Kohci noteh ləkowakc imihewikwamək. Cotehihəlo tepənaskowihak ikehec tan toci tan wen napəholakc litəhasoc otəlokewan Kelowəsitəl.

3Nihtəl kekwsal təlehləkoniyalc ipəcəl skat okəcicihawiwal Nmihtakwsəl, kesəna nil.

4Kemokəlo weci ktiyolpa yohtəl kekwsal welaman tan toci tepənaskowihak ikehec, mikwitəhatəməniyac kisi yəholniyas. Kenok yohtəl kekwsal skat yəlolowekkopənil wecehtakemək əmskowas macehak, ipəcəl kowiceyolopahpən.

5Təkec ntəlih Tan eyit tan petəkimitpən, skat wen kilowaw ntəlipapehcimko, Tama ktəlih?

6Kenok ipəcəl yəholekwpən yohtəl kekwsal, wənmaci təhasowakən psənsowəl kməshonowal.

7Kenok olamewakən yəholekw, kohcikaniyewoltiniya elimacəhay. Ipəcəl skat macəhawan Nociwolehlowet skatəc pəkəcihewo. Kenok macəhayan npetəkimac ewoltiyekw.

8Tan toci pəkəccat, okələmanc skitkəmikw oci lahkəmiksowakən, naka ocikeyakwihewakən, naka ociyətplotəmowakən.

9Oci lahkəmiksowakən, ipəcəl skat olamsətəmoniya nhəkek:

10Oci keyakwihewakən, ipəcəl Nmihtakws ntəlih kilowaw skatəc knəmihihpa akwamk.

11Oci ətplotəmowakən, ipəcə skitkəmikw okinceməsəməl kisitplotasowəl.

12Ktanakwotol kekwsal mehc eyanil yəholekwil; kenok skat kisi pəmiptoneyal təkec.

13Kenok tan toci Wəlamewakəne Kehci-niweskwit pəkəciyat, knikanawtik ewokowac msiw wəlamewakən ikək. Ipəcəl skatəc ocikəlosiw ohəkek, kenok tan kekw notək otakənotəmənc, kmoskehtakoniyalc tanil kehtiyekəhakil.

14Nekəm nkicihtəmitəhaməkwc; ipəcəl wikwehtonc nil nməcesom kmessowehtakoniyac kilowaw.

15Msiw kekwsal tanil Nmihtakws eyicil, nil nihtəl nməcesoməl. Nit tehc yəholekwpən wekwehtonc nil nməcesom kəmesoweh takoniyac kilowaw.

16Mahkiyewos skatəc knəmihihpa, apc mahkiyewos knəmihihpac, ipəcəl Nmihtakws ntəlih.

17Nit tehc ankwoc tanihi ekehkinacihi yəhotolto: Kekwseya yot yəlolakw? Makwiywos skatəc knəmihihpa, apih mahkiyewos knəmihihpac? Ipəcəl ntəlih Nmihtakws?

18Nit tehc yəhotoltowək: Kekwse iya yot tan weskowotək? Mahkiyewos? Skat kci citonewin tan itək.

19Sesohs okəcecihton okətipapehcimkon; 'tiya: Kici papehcitoltiniya ipəcəl ntitəlmopən, Mahkiyewos skatəc knəmihihpa, apih mahkiyewos knəmihihpac?

20Leyo, iyalekw kilowaw ksasehtemohltipac, konmahtehmoltipac, kenok oskitkəmikw wəlitəhasoc: konmacitəhasoltipac; kenok konmacitəhaswakənowal likwolpehtasowalc wəlitəhaswakənək.

21Ehpit tan toci keti nemikwəsilit wasisəl, sespehtəhaso ipəcəl otepənas kocakəm ikehe; kenok kisi nemikwosilit wasisəl, mehc skat mikwitəhatəmowən osespehtəhasowakən itohciyolitəhasit pəmawsowinowəl onəmikwosilin skitkəmikw.

22Təhalo kilowaw təkec elihiyekw onmacitəhasowakən; kenok apc knəmiholpac kməshonowal olitəhasowiwəlih, kolitəhasowakənowal skatəc wen wikwehtakoniyal.

23Nit na kiskət skatəc kekw kilowatəmowipac. Leyo, yəholekw, tan kekwse weci kilowatəmekw Nmihtakws nocsowənək, kmilkoniyac.

24Təkec təkkiw meskw kekw kilowatəmotipa nowisonək. Kilowatəmotikw kməsənəməniyac, welaman kolitəhasowakənowah psəntehtaso.

25Yohtəl kekwseyal yəholekwil kilo ewestowakənək. Tepənaskowihak ckowihe tan toci skatəc kəlolopa kilowewestowakənək kenok papek akənotəmolniyac Nmihtakws.

26Nit kcisok wikotəmaniyac nowisowənək; skat ktiholopa papatəmowewoləpac Nmihtakws.

27Ipəcəl Nmihtakws Nekəm kəselməkowah, ipəcəl kəmosalipapən, naka kolamsətəmotiniyapən nocihan Kelowəsitow ikək.

28Nocihapən Nmihtakws pəkəciyapən oskitkəmikw. Apc nəkətəmən skitkəmikw ntəlih Nmihtakws.

29Tanik weci kehkimocik ohəkek 'tiyawal: Təkec kpapekewest, skat kwilowewesto.

30Təkec nkəcicitonen knəkakciciton msiw kekwsal; skat kotəmitəhatəmowən wen kpapehcimkon. Oci yot weci wəlamsətəmotiyek kil kocihapən Kelowəsitow ikək.

31Sesohs 'tasitema: Təkec kolamsətəmotipa?

32Sakihək, tepənaskowihak ihkowihe, naka ikehe, tan toci ksisehləkapac msiw wen wihkək, knəkanəkkəlipac npeskotec. Skat npeskowiw, ipəcəl Nmihtakws nwiciyeyakw.

33Yohtəl kikwseyal yəholekwpənil welaman nil nhəkek wantəkewowakən ktiyeniya. Oskitkəmikw ktiyeniya wəletəhasoltikw: nil nkisipiyemsənotəmən skitkəmikw.

বর্তমানে নির্বাচিত:

Wikhikən 16: PQM2014

হাইলাইট

কপি