Wikhikən 17
17
1Yohtəl kəlosowakənəl Sesohs itəm, spəmək spəmkik əlapopən. Itəm: Nmihtakws tepənaskowihak ikehe kci təmitəhaman kwəss, welaman kwəss kihitəmitəhaməkw kil.
2Tahalo kil elimiltəpən otəpeltəmən msiw mhək, welaman omilan askəmasowakən msiw tanihi miltəpənihi.
3Yot nit askəmasowakən, knənakon kil tepəkt welamewi Kelowəsit wiyən, naka okəcicihaniya Sesohs Niweskol tan petəkimitəpən.
4Nil kihitəmitəhaməlopən ktakəmikok: nkisaton lohkewakən tan miliwnpən ntəlokatəmən.
5Təkec, Nmihtakws, ocikcitəmitəhamin kil khəkek nit kci təmitəhamkosowakən ikək tan nisiyəkwpən meskw kehtakəmikwinok.
6Ntahkinowehtowanepən kowisowən nihtək pəmawsowinowək tanik weci miliwnpənik skitkəmikw. Kil nehketkək, kil kmilinək, osaktəməniyapən kəlosowakən.
7Təkec okəcicitoniya, msiw kekwsal tanil kisi miliwpənil ocihe khəkek.
8Ipəcəl kəlosowakənəl tanil miliwnpənil, nmilanepənil oməsənəməniyapənil, okəcicitoniya olamewakən ikək nocihan kil khəkek, olamsətəmotiniyapən kpetəkimihpən.
9Npapatəmowewak. Skat npapatəmowewotəmowən skitkəmikw; kenok npapatəmowewak tanik miliwnpənik, ipəcəl kil nit.
10Msiw kikwsal tanil nil, kil na nihtəl; tanil kil, na nihtəl: nil wecikcitəm mitəhamkosi nihtəl.
11Nil skat akwamk ntəlmeyiw skitkəmikw; yoktək eyoltowək skitkəmikw, nil npəkəhihi eyən. Kelowəsitwi Mihtakwsəl, awkewowan yoktək kowisowənək tanik miliwnpənik, welaman lipeskowiwəkc, tahalo kilon elipeskoweyəkw.
12Tan kweni wicihemok, ntətəlankewowapənik kowisowənək. Tanik yəkt miliwnpənik ntankewowapənik kətama wen skwəskehtasiw, tepəkt skwəskehlətowakən 'kwəssəl, welaman tan Kelowəsitewe Wikhikən itək nki kahki sehtaso.
13Təkeyih npəkəci tan eyiyən, yohtəl kekwsal etliyetəmanil skitkəmikw, welaman otiyeniya nil nolitəhaswakən nkikapsənehtaso ohəkewak.
14Milanepən kəlosowakən, skitkəmikw otakwitəhamapənihi, ipəcəl skat 'ceyaoltiwiyək skitkəmikw, tahalo nil skat elitəleyawiw skitkəmikw.
15Skat wikotəmolowən kociwikw, wehlan skitkəmikw; kenok kociyankewowanp mətowewowakənək.
16Skat 'ceyaoltiwiyək oskitkəmikw tahalo nil skat elitəleyawiw skitkəmikw.
17Oci nəkskamewewehlan nekəmaw kolamewakənəm ikək; 'kəlosowakən olamewakən nit.
18Tahalo kil eliyəlkimiyənpəha skitkəmikw nil, nitna nekəmaw elihəlkimək oskitkəmikw.
19Oci nekəmaw kci tpəsowewehləs, welaman nekəmaw ocikci tpəsowewe tasoltiniya olamewakən ikək.
20Skat tepəkt yokt npapatəmowewawiyək, kenok naka owihi msiw tanik ociyolamsətəməniya nhəkek okəlosowakənəl əmowikowak.
21Welaman msiw nekəmaw opeskowiniya, tahalo kil, Nmihtakws, elihiyən nhəkek nil khəkek nti, nekəmaw iyoltowəkp khəkeyenok. Welaman skitkəmikw olamsətəmən kil kpetəkimihpən.
22Kicitəmitəhamkosowakən tan miliwnpən, nil nkisimilan, welaman opeskowiniya tahalo kilon elipeskowiyəkw.
23Nil nti ohəkewak, kil ktih nhəkek welaman nekəmaw okikawəli peskowehlan, welaman oskitkəmikw okəcicitonc kil kpetəkimihpən, ktəli mosalan nekəmaw tahalo nil elimosaliyən.
24Nmihtakws, npawatəmən tanik miliwnpənik nwiciyeyakon tan eyi; welaman otəsakihtoniya nkicitəmitəham kosowakəm tan miliwnpən; ipəcəl kəselmihpən meskw skitkəmikw kisitasinok.
25Ksəsewey Nmihtakws, skitkəmikw skat knənakowənewihpən, kenok nil knənolohpən, yokt okəcicitoniyahpən kil petəkimihpən.
26Ntahkinowehtowanepən kowisowən, ntahkinowehtonc, welaman ksalməkwsowakən, tan wecikselmiyənpən iyop ohəkewak, nil ntiyəp ohəkewak.
বর্তমানে নির্বাচিত:
Wikhikən 17: PQM2014
হাইলাইট
শেয়ার
কপি
Want to have your highlights saved across all your devices? Sign up or sign in
Maliseet Gospel of John © Canadian Bible Society, 2014
