Wikhikən 13
13
1Nit meskw nankəmihanok wikhəpaltimək Sesohs okocicihtones otepənaskowihahkən ikehe ocinotahan skitkəmikw otəlihan Omihtakwsək, kis okisi kselmapənihi osiwes tanili skitkəmikw ewoltilicihi, omosalapənihi maləməte mehcihak.
2Olakwihpowakən ikəhes, məcəhant okisi pcehtowats Sota Iskaliyot Simo 'kwəssəl oməshonək otahkinowehlan;
3Sesohs okəcicihtones Omihtakwsəl oponehtakon msiw kekwsal opitinək, nekəm okisocihan Kelowəsitow ikək, otəlihan Kelowəsitow ikək;
4Oci onakehsopən olakwihpowakənək, oponehtonepənil otəlkwotawakənəl, wikwehtonepən kasikəhosot otəlekəpilsinepən.
5Akimte osokatowepən samakwan towikəsikwensotik, toci omaceksəsptowanepənil osihtowal tanihi ekehkimacihi, ocikashəmowanepənil kasikəhosotik tan elekəpilsihtpən.
6Toci opəkəcihanəl Simo Piyeləl, Piyel 'tiyal: Nsakəmam, kəsəspatonəl nsitəl?
7Sesohs asitewtəm: Tan eləki təkec skat kəciritowən; kenok elmihak kəcicitonc.
8Piyel 'tiyal: Kil skat tehc kəsəspatowiwnəl nsitəl. Sesohs 'tasitewtəmal: Skat ksəspahləlowan kil kətama ktiyewən təpeltəmowakən nhəkek.
9Simo Piyel 'tiyal: Nsakəmam, skat tepəkt nsitəl, kenok naka npihtinəl naka nəniyakən.
10Sesohs 'tiyal: Tan wət kisiksəspahtasit tepəkt wetəmetəhatək okosəspahton osihtəl, toci nkihkahpapatəmipehkiko. Kilowaw kpapatəmipeh kikoltipa, kenok skat msiw.
11Kenok Sesohs okəcicihal tanəl ketowikinowehlihcil, nit weci itək: Skat msiw kpapatəmi pehkikoltipa.
12Nit kisiksəspatowat osihtowal, kisiwihkweyehtakw otəlkwotawakənəl, kisəpesit, 'tiya: Kəcicitoniya kisilehləlekw?
13Təliwihihpa Notəkehkikemit Nsayit kəmamən, kolamhəltipa, ipəcəl nil nət.
14Nit tehc nil tan Ksakəmamoltiniya nhək, naka kənotəkehkimləpa, ksispahtolekw ksitowal, kilowaw əpəna kəsəspahtaotoltiniyal ksitowal.
15Ipəcəl kisimiləniya, kehkinsot ktəlokhəteniya tan lehləlekw.
16Leyo, yəholekw, tan wət tepeləməkwsit, skat acispew skatək 'Sakəmaməl; kesəna tan wət elkimot skat piyemispew skatək tanil elkimacil.
17Nit kəcicitowew yohtəl kekwsal, kolewoltipa hələkhətiyekw.
18Skat nocikəlosiw msiw kesiyekw: nkəcicihak tanik mekənokpənik: Ipəcəl welaman tan elowikhasik əlihe: Tan wət mawihpoltiyek həpanəl, eliyonkehtakws wokwən nil əlkwiw.
19Nit nikanakən otəmolpa meskw ikəhanok, welaman ikəhak kolamsətəməniyac nil nət.
20Leyo, tan yəholekw, tan wen wikwehlat tanil nil elkimok, naka nil nowihkwehləkw. Tan wen wikwehlit nil, wikwehlal tanil petəkimitpən.
21Nit Sesohs kisi itək nihtəl, nihtəl wənmacitəhaso oməshonək, otakənotəmowa, itək: Leyo, tan yəholekw, peskw kilowaw ntahkinoowehləkwih.
22Toci notəhkehkimocik isakihotoltowək, skat okəcicihawiwal tanil wenil itəkil.
23Nit peskw tanil Sesohs ekehkimacihi, tanil kesehnacil, sitkwehsinol Sesohsəl opəskonək.
24Nit tehc Simo Piyel omatkwehtowal opapehihiman tanil wenil itəkil.
25Toci nekəm tan esitkwesikpən Sesohsəl opəskonək, 'tiyal: Nsakəmam wen nət?
26Sesohs asitewtəm: Nət ehtə tanəc mihlok apsəkikwsəsək kisiskwihikiyan. Kisiskwihikek apsəkikwsəsək omilan Sota Iskaliyotəl, Simo 'kwəssəl.
27Kisimsənək apsəkikwsəsək mocəhant okəsahahnəl. Toci Sesohs otiyəhal: Tan kekw ketilehtakiyən, nəkəsalehtak.
28Nit skat wen nekəmaw tanik mawipomacik okəcicitoniya kekwse weciyəhat nit.
29Kenok ankwəc litəhasoltowək ipəcəl Sota otiyin maninot, Sesohs okisiyəhan mənohmon tanil kekwsal pawatəməkw ociwikhəpaltimək, kesəna omilan kekwse təmaksəsowino.
30Nit kosimsənək apsəkikwsəsək nəkəsanotehe kis piskihe.
31Nit tehc kisi notəhat Sesohs itəm: Tokec pəmawsowin 'Kwəssəl kci təmitəlamkosowəl.
32Kelowəsit wecikcitemitəhamkosit ohəkek. Kelowəsit ninka okici təmitəhamalc ohəkek, onəkəsak citəmitəhamalc.
33Wasistək, mahəsəl mahkiyewos kowiceyolpa. Kilowahipac, tahalo iyalokpən Leswihsək tan tet elihay skat petapasoniya, nit na kilowaw iyalolekw.
34Piley həlkitəmowakən milekw, welaman kəseltoliniya. Tahalo nit elikselməlekw, nit na ktəlikseltoltiniya kilowaw.
35Nihtəc msiw wenik okəcicitoniya kilowaw kotəkehkimkosoltiniya nil nhəkek kseltoltiyekw.
36Simo Piyel 'tiyal: Nsakəmam, tama ktəli? Sesohs 'tasitemal: Tan elihay skat kisi nosokəwiw təkec; kenok elmihak nosokowic.
37Piyel 'tiyal: Nsakəmam, kekweci skat kisi nosokolo təkec? Npəmawsowakən ntəliponmənc oci kil.
38Sesohs 'tasitemal: Ktəliponmənc kpəmawsowakən oci nil? Leyo, yəhol, napahac skat mətehtaksiw akimte ktikənewalic nihi.
বর্তমানে নির্বাচিত:
Wikhikən 13: PQM2014
হাইলাইট
শেয়ার
কপি
Want to have your highlights saved across all your devices? Sign up or sign in
Maliseet Gospel of John © Canadian Bible Society, 2014
