Wikhikən 14
14
1Mosahk onmacitəhasowic kməshonowal! Wəlamsətəmotikw Kelowəsit ohəkek, naka, nil nhəkek wəlamsətəmotikw!
2Lamikowam Nmihtakws wik ktanakətol ihyoltimkil. Skat leyinokəsəpən ktiholniyapənp; ipəcəl nil ntəlihan naci wəlehtolniya tan ihyoltimək.
3Lihayan naciwəlehtolekw ihyoltimək, apcəc npəkəci təliwihkwehləlpac nhəkek welaman tan eyi kilowaw na ktiyoltiniya.
4Kəcicitotiniya tan elihay, naka kəcicitotiniya awht.
5Toma 'tiyal: Nsakəmam, skat nkəcicitonewin elihayin, tan ntəlih kisikcicitonen awht?
6Sesohs 'tiyal: Nil nit awht, naka welamewakəni, pemawsowakəni. Skat weci opəkəcihayonəl Nmihtakwsəl; skat ocipəkəcihakw nil nhəkek.
7Kciciyekwsəpən nil, kci cihawapəna Nmihitakws. Təkec wecehtakemək kəcicihawa Nekəm, kisi nəmiyawa.
8Pilip 'tiyal, Nsakəmam, moskehtowineh Kmihtakws, nihtəc kiyaskwi nilon.
9Sesohs 'tiyal: Kis kweni wiciyewolekw, Pilip, meskw mehc kəciciho? Tan kisi nəmihit nil okisi nəmiyal Nmihtakwsəl. Kekwse weci itəmən: Moskehtowineh Kmitakws?
10Skat iya kolamsətəmowən nil ntin Nmihtakws ohəkek? Naka Nmihtakws iyo nil nhəkek? Kəlosowakənəl tanil yəholekwil skat nociyitemonəl nil nhəkek kenokəlo Nmihtakws tan meci mihehit nhəkek, Nekəm otəlokanəl lohkewakənəl.
11Wəlamsətowikw nil nti Nmihtakws ohəkek naka Nmihtakws iyo nil nkəkek kesəna oci wəlamsətəmokw lohkewakən ikək.
12Leyo, yəholekw Tan welamsətək nhəkek lohkewakənəl tanil nil elokiyanil nekəmcəna otəlokanəl: piyemkikwənolc lohkewakənəl elehtakecil, ipəcəl ntəlih Nmihtakws.
13Tan kekwse wici wikotəmekw nil nowisowənək, nit ntəleykanc; welaman Nmihtakws okici təmitəhamkosin 'Kwəssəl ohəkek.
14Wihkotəmekw kekwse nowisonək, ntəlehtakanc.
15Mosaliyekw, saktəmok ntəlkitəmowakənil.
16Nil nkwilotəmowan Nmihtakws, kmilkoniyac kətək Nociwəlehlowet, Nekəm wiciyeyakowahc mecimiw.
17Nət olamewakəne Kehci-niweskwit, tan skitkəmikw skat kisi wikwehlakwil; ipəcəl skat onəmiyawiyəl kesəna skat onənoowiyəl. Kenok kilowaw knənowawa; ipəcəl wiciyeyakowa, iyoc khəkewak.
18Skatəc knəkələlopa ksesəmi kipəswoltiniya. Aoltiyekw kpetehkolpac.
19Nit mcəsəl mahkiyewos skitkəmikw skatəc nəmcokowən: kenok kilowaw knəmihipa; ipəcəl nil npəmaws, kilowaw na kocipəmawsoltiniya.
20Nit kisokin kəcicitoniyac nil nti Nmihtakws ohəkek, naka kilowaw ktiyoltiniya nil nhəkek; naka nil ntin kilowaw khəkewak.
21Tan eyit ntəlkitəmowakənəl osaktəmənəl, nekəm nət nkəselməkw; nekəm tan keselmit, ocikseləmoksoc Nmihtakws; niləcəna nkəselma nekəm ntəlih nesowehləsəc ohəkek.
22Sota 'tiyal, (skat Sota Iskaliyot), Nsakəmam, tanəc ktəli kisi mesowehləsinc nhəkenok, yaka skat kmesowehləsihwən skitkəmikw?
23Sesohs asitewtəm: Wen mowalit nhəlowakənəl osaktəmənəlc, Nmihtakws okəselmalc npehtehkowanəc tan eyit nwiciyewaw toltinenəc.
24Tan skat mohsalikw nekəm skat osaktəmonəl nkəlosowakənəl. Kəlooswakən tan notəmekw skat nil nkəlosowakən nit, kenok Nmihtakws okəlosowakənəl nit, Tan petəkimitpən.
25Yohtəl kəlosowakənəl iyalolekwil kweni wiciyewolekw.
26Kenok Nociwolehlowet kesəseyit Kehci-niweskwit, Wici oliniweskwit, tanil Nmihtakws otəlkimalc nowisowənk Nekəm knəka kehkimkoniyalc msiw kekwsal kisehtakoniyac kmikwitəhatəməniya msiw kikwsal tanil nil kisi yəholekwpənil.
27Wantəkewowakən nəkətəmən khəkewak. Nwantəkewowakən kəmiləniya. Skat ktəlimiloniya tahalo skitkəmikw elimilowek. Mosahk sespehtəhasowic kməshonowal, kesəna mosahk seksowic!
28Knotəməniyapən yəholekwpən nmacəha acəc kpetekolpa tan ewoltiyekw. Mosaliyekw kolitəhasoltipap, ipəcəl ntitəmopən ntəlih Nmihtakws, ipəcəl Nmihtakws piyemkil skatək nil.
29Nit təkec kisi yəholekwpən meskw skat tepənaskowihanok, welaman toci tepənaskowihak kolamsətəməniyac.
30Skat akwamk təlimoskowimlopa, ipəcəl skitkəmikw okinceməsəməl ckowihiyəl, nil nhəkek kətama, kekw otipiwən.
31Kenok welaman skitkəmikw okəcicihton nmosalan Nmihtakws, naka tan Nmihtakws elitpəlomit, nit elehtahki. Onakesoltikw maciyapasinic!
বর্তমানে নির্বাচিত:
Wikhikən 14: PQM2014
হাইলাইট
শেয়ার
কপি
Want to have your highlights saved across all your devices? Sign up or sign in
Maliseet Gospel of John © Canadian Bible Society, 2014
