မာကု 7
7
ထုင်း ကူန်းတားကဲအာည်ႇနီး
မတဲ ၁၅း၁-၉
1မေဲႈလာ်အူဆငည်း ဖာရိဆဲကဲ ကာည်း ဆြာကံတ်ကျာမ်း ကဲယာ်ည်ႇဒေဲႈပါ့်လှံင်းယေရုဆလိင် ကဲစီဒေဲႈဇူးကစုဒို့ ပါ့်ရီမ်းစံဝ်ယေဆု။ 2ကဲစီဒေဲႈယေဲဝ်း တပဲအန်းစံဝ်ကဲကလံက် အာဝ်တဲဝ်းမ ဒါးတည်းကဲ၊ ဂီဒါးတည်းမှေဲမ်ကအီႈ ဂီဟိုမ်းပံင်ဟိုမ်း။
3(ဆီမ်ဘာည်းဆံမ်ဒါ်ႈလာ်ဘာည်ဇေဲန်း ဖာရိဆဲကဲကာည်း တူအီးယုဒကဲပါ်ပည်မေဲႈ ကဲရေဲန်းတောႇဒေဲႈ ထုင်းမှေဲမ်းကူန်းတားကဲအာည်ႇနီး။ ဂါကဲညျံမ်တဲဝ်းတည်း တောႇတာ် ဘည်ဘာည်းထုင်းကဲ ကဲအာဝ်တံမ်ဟိုမ်းမပံင်ဟိုမ်း။ 4ဘိူဝ်ႎီးဒေဲႈ ဒပါ့်ကလာႈ၊ ဆာ်ကဲအာဝ်ပါည်းတောႇတာ် ဘည်ဘာည်းထုင်းကဲ ကဲအာဝ်တံမ်ဟိုမ်းမ။ ဒဇေဲန်းအာဝ်ႎါ်န်း ထုင်းမှေဲမ်းကဲမျိုးဟည်း အီးမိုႈ ဘည်ဘာည်းခိုည်ႇတာ် ကလိုက်၊ ကလော်က်၊ ကလော်က်တော်င်း ကာည်း ကူအိကဲဒီး၊ ကဲရေဲန်းတောႇဒေဲႈဒို့။)
5ဘိူန်ဇေဲန်း ဖာရိဆဲကာည်း ဆြာကံတ်ကျာမ်းကဲမာ် မှောႇတာ့်စံဝ်ယေဆု စီဒါ်ႈ “ဆီမ်ဘာည်း တပဲမည်းစံဝ်ကဲ အာဝ်ရေဲန်းတောႇဟံင်း ထုင်းကူန်းတားကဲအာည်ႇနီး၊ စီဒါးတည်းမှေဲမ်ကအီႈ ဟိုမ်းလာ်ပံင်ဟိုမ်း။” 6စံဝ်ယေဆုမာ် စီႎီးဒါ်ႈဘိုးတာ့်ကဲ “ပံင်ဟောကလာင်းအူန်း ပရောဖဲတ်ဟေဆာယ အီးမိုႈလော်င်ပဲကဲဒီး အီးရေဲန်းထင်နှေး လိူည်တူအီးချှီႇ မှာန်ပေါႇအခည်းဟာ့်၊ အန်းဒါ်ႈအူန်း
‘မိုႈလိူည် မိုည်ႇကဲ ခိုည်းတာ့်အံဝ်း။
အီးမိုႈနောႈကဲခည်း စီခညျှာန်းဒိုင်းပေါႇ တာ့်အံဝ်းဟာ့်။
7ကဲပနံဝ်းဒဲႈလိူည် အီးမိုႈထုင်းတြားပံင်ရေဲန်းအူန်းတူအီးကဲ ပေန်ဒို့ တြားစံဝ်ဖြား။
အီးမိုႈတာ့်အံဝ်းမာ် ကဲလီလာဂျေဲပ်လိူည်။’
8တောႇတာ်ဘာည်းဇေဲန်း အီးမိုႈပဲကဲဒီးမာ် ႎီုန်ဒို့ဖာ်ႈ ဆိန်တြားစံဝ်ဖြား၊ စီရေဲန်းတောႇဒို့ ဘည်ဘာည်းထုင်းတူအီးဟာ့်။”
9စံဝ်ယေဆုမာ် ကလာင်းဒါ်ႈဘိုး တာ့်ကဲ “ပဲကဲဒီးမာ် ဟည်ကံတ်ကျာင်ပေါႇခည်း ဘည်ဘာည်းပႎဲႈႎီုန်ပဲ တာ့်ဆိန်တြားစံဝ်ဖြား၊ နှာင်းပဲကံပ်ဘိူန်းရေဲန်း တောႇတာ်ဘည်ဘာည်းထုင်းပဲ။ 10တီင်ဘေဲႇကျာမ်း မောဆေ ကိက်ဒါ်ႈအူန်း ဘာည်းညျေဲန်း ‘ရိုဆေကူန်းမားပဲနာ်ႏ။ ချှေႈမှေဲ့ဘူဒါ်ႈ ဆာ်အန်းဒါ်ႈကလူည်ႇကလေဲပ် တာ့်ကူန်းမားအန်း ဒဲႈအန်းကတူႈကညား တံမ်ယာ်မ်း။’ 11ဘည်ဘာည်းမာ် အီးမိုႈပဲကဲဒီး ဆံမ်ပနံဝ်းဒဲႈ ဒါ်ႈတာ့်ကဲ ဘာည်းညျေဲန်း၊ ချှေႈမှေဲ့ဘူဒါ်ႈ အန်းဘည်မေဲႈစံမ့်ဂျိုးအုက်စာ စာနံင်လှူကဇော်ည် တာ့်ကူန်းမားအန်းမာ် ဆာ်အန်းဟည်ဒါ်ႈအူန်း ‘အီးနီးဟည်မိုႈဟော်ည်ႇ ကော်ဘာန်(ဂျိုးပံင်လှူတာ့်စံဝ်ဖြား)’၊ 12ပဲစီပနံဝ်း ဒါ်ႈအူန်း ‘အန်းအာဝ်လိုမ လှူကဇော်ည် တာ့်ကူန်းမားအန်း။’ 13တောႇတာ့်ဘာည်းဇေဲန်း ပဲဟည်ဂီပႎဲႈႎီုန် ကျောႈစံဝ်ဖြား ဂေါႇမိုႈလီုင်ဘည်ဘာည်းထုင်းပဲ ပံင်ဒဲႈပဲတာ်အီးရေဲန်းကတူည်ႇ၊ စီမေဲႈဘိုး မျိုးကဲအီးဟည်းပံင်ရေဲန်းတောႇဒေဲႈပဲ ဘာည်းဇေဲန်း ဂီုန်းပေါႇခည်း။”
အီးမိုႈအန်းအီးဒဲႈ တူအီးမှေဲမ်ကအီႈ
မတဲ ၁၅း၁၀-၂၀
14ႎါည်းဒီး စံဝ်ယေဆုစီႎီးတေဲႇဘိုး တူအီးကဲဒီး အူဘော်က်၊ စီဒါ်ႈ “ပဲပါ်ပည်မေဲႈ တညာဝ်းလာည်း ကျောႈကလာင်းအံဝ်း နှာင်းနာ်ႇကဘ္လူႈဒို့နာ်ႏ။ 15ဂါဆီုင်မိုႈ အန်းအီးဂေါ်ည်းခရာ်ည်ႇ ဆာ်လေဲပ်ခေဲင်းတိုးတူအီးအဲနီး အန်းအာဝ်ဒဲႈမ တိုးအဲမှေဲမ်ကအီႈ။ မိုႈလိူည်အန်းအီးလေႈဒေဲႈ ခေဲင်းတိုးပိုင်းအဲတူအီးနီး မိုႈ အန်းအီးဒဲႈ တူအီးမှေဲမ်ကအီႈ။ 16ဂါဆီင်မိုႈ အီးမေဲႈချှိုက်ကဲပါ်ပည်မေဲႈ၊ တညာဝ်းလာည်းဒို့နာ်ႏ။#၇:၁၆ တီင်ဘေဲႇကျာမ်းအီးပျီမ်းမာင်ကလံက် အာဝ်တောႇမ ဘေဲႇထဲဝ်လှေနီး။”
17ႎါည်းအန်းစံဝ် ယာ်ည်ႇလည်လေႈဒတူအီးကဲ စီလေဲပ်ဟာဝ်းခေဲင်းခလေဲပ်၊ အီးမိုႈတပဲအန်းကဲမာ် စီမှောႇပေါႇ ပံင်ဆီင်ကလာင်းဒါ်ႈ တာ့်ကျောႈကကည်းဒီး။ 18အန်းစံဝ်စီႎီးကလာင်းဒါ်ႈတာ့်ကဲ “ပဲမာ် အာဝ်မေဲႈဟီုဝ် နောႈကဘ္လူႈ။ ပဲအာဝ်နာ်ႇဟီုဝ် အန်းအီးဂေါ်ည်းခရာ်ည်ႇတူအီးကဲနီး ဆာ်လေဲပ်ခေဲင်းတိုးတူအီး အန်းအာဝ်ဆမားဒဲႈမ တူအီးမှေဲမ််ကအီႈ။ 19ဆီမ်ဘာည်းဆံမ်ဒါ်ႈလာ်ဘာည်းဇေဲန်း အန်းအာဝ်ဆမားမလေဲပ် ခေဲင်းပိုင်းနောႈတူအီး။ အန်းလေဲပ်ဟာဝ်းဖာ်ႈ ခေဲင်းႎတ်အဲ၊ စီလေႈဟာဝ်း ပါ့်လအီင်ဟာ့်။” (ဂေါႇမိုႈအန်းဟည်ဒါ်ႈဘာည်းဇေဲန်း ပံင်ဆီင်ဒါ်ႈစံဝ်ယေဆု မိုႈ ပံင်ဟိုမ်းတော်န်းမျိုးမာ် ဟည်ဆငါးဟော်ည်ႇဒို့။)
20အန်းစံဝ် စီကလာင်းဒါ်ႈဘိုး “မိုႈလိူည် အန်းအီးလေႈဒေဲႈ ဒခေဲင်းတူအီးဒီး ဒဲႈတူအီးမှေဲမ်ကအီႈ။ 21ဆီမ်ဘာည်းဆံမ်ဒါ်ႈလာ်ဘာည်ဇေဲန်း၊ ခေဲင်းပိုင်းနောႈတူအီးနီး လေႈဒေဲႈပေါႇ ပံင်တဂေန်းကလေဲပ်ကလေႈ၊ အာဝ်ဂေါ်ည်းတောႇတြား၊ ဘျားလအီး၊ ပတတ်ယာ်မ်းအီး၊ ပံင်ကလူည်ႇတာ့်အီုင်ဟိုမ်းအီး၊ 22လောဖားဒါင်း၊ နောႈကော်က်တာ့်အီး၊ ပံင်ခလံဝ်းတာ့်အီး၊ နောႈအန်းအီးတောႇလော်င်ကာမ၊ နောႈဆကေဲႈ၊ ဆီင်လီလာဒါ်ႈတာ့်အီး၊ တေဲႈကနေဲႈဇား၊ နောႈဟာည်းဇေဝ်ကဲဒီး။ 23ပံင်အီးမှေဲမ်ကအီႈဇေဝ်ကဲဒီး ပါ်ပည်မေဲႈ လေႈဒေဲႈဒို့ ခေဲင်းတူအီး၊ စီဒဲႈတူအီး မှေဲမ်ကအီႈ။”
ဘည်ဘာည်းညျှေဲမ် အီးပဲန့်အူချှေႈ
မတဲ ၁၅း၂၁-၂၈
24ႎါည်းဒီး စံဝ်ယေဆုမာ် လေႈဟာဝ်းဖာ်ႈ ဒပါ့်ဒီး စီဟာဝ်း ပါ့်အရာပ်တုရုဟာ့်။ ဘိူဝ်ဟာဝ်းစာ်မ်းအန်းစံဝ် ပါ့်ဒီး အန်းစီဒမ်း ပါ့်ခလေဲပ်အူခလေဲပ်။ အန်းစံဝ် အာဝ်ဆီင်ဒဲႈမ အီးနာ်ႇ လော်င်အန်းစံဝ်ဟည်စာ်မ်းပါ့်ခလေဲပ်ဒီး။ ဘည်ဘာည်းစံမ့်ဇေဲန်းမာ် အန်းစံဝ်အာဝ်ဘိူန်းမ ချိုင်းဂေါ်ည်းအူန်း။ 25အီးမိုႈမာ ကော်န်းအီးပဲန့်ဒဲ့ အီးကနံမ်းဇာဝ်းလေဲပ်ဒီး စံန်အန်းအာ်နာ်ႇ ခါဝ်စံဝ်ယေဆုဒေဲႈစာ်မ်းပါ့်ဒီး၊ အန်းမာ်စီဒေဲႈဇူး အံက်ဆကျူႇ လအာည်ႇစံဝ်ယေဆု။ 26အန်းမိုႈ အီးပဲန့်ခြိူဝ်းဂရိ တူအီးအရာပ်ဆုရိဖိနေက်ဟာ့်။ အန်းစီဒေဲႈ မှာန်းတာ့်အန်းစံဝ် နှာင်းအန်းစံဝ်ချူႈလိူည်းဒဲႈကနာ်မ်းဇာဝ်း အီးလေဲပ်ဂေါ်ည်းခေဲင်းတိုးကော်န်းအန်း။ 27စံဝ်ယေဆုမာ် ကလာင်းဒါ်ႈတာ့်အန်း “ဒဲႈဆဲ ကော်န်းဒဲႈကဲဟိုမ်း နှာင်းဖည်း လအာည်ႇ။ အာဝ်ချှင်တော်မ တေဲႈပံင်ဟိုမ်းကော်န်းဒဲ့ စီဒဲႈဆံဝ်းဟိုမ်း။”
28ယားဒီးမာ် ႎီးကလာင်းဒါ်ႈ “မိုႈအိူဝ်၊ စံဝ်ကညျား။ အီးမိုႈဆံဝ်းအီးဂေါ်ည်းချေဲမ်းပဒေဲန်းမာ် အန်းဘိူန်းအူန်းဟိုမ်း ပံင်ဟိုမ်းအီးခလိူဝ်းကော်န်းဒဲ့ကဲ။”
29ဘိူန်ဇေဲန်း စံဝ်ယေဆု စီႎီးဒါ်ႈတာ့်အန်း “ပံင်ကလာင်းမည်း ဟည်မိုႈပေါႇခည်း။ မည်းစီႎီးဟာဝ်း ပါ့်ခလေဲပ်မည်း စံင်နည်နာ်ႏ၊ ဂေါႇမိုႈကနာ်မ်းဇေဝ် အန်းအီးလေဲပ် ခေဲင်းကော်န်းဒဲ့မည်းဒီး အန်းဟည်လည်လေႈဒဲဝ်းဟာဝ်းဟော်ည်ႇ ဒကော်န်းမည်း။”
30မာကော်န်းဒဲ့ဒီးမာ် ဟည်ႎီးဖာ်ႈ ပါ့်ခလေဲပ်အန်း၊ အန်းစီယေဲဝ်းလာ် ကော်န်းဒဲ့အန်း ဂီဂေါ်ည်းအိနှိုည်နှီမ်းအူန်း ပါ့်ဒီအိအန်း ဂေါႇမိုႈ ကနာ်မ်းဇေဝ်ဒီး ဟည်လည်လေႈဟာဝ်း ဒအန်း။
စံဝ်ယေဆု ဆားနှာမ်းဒဲႈ တူအီးကျောႈအ ချှိုက်ကအာဝ်း
31ႎါည်းဒီး စံဝ်ယေဆု စီလည်လေႈဟာဝ်း ဒအရာပ်တုရု၊ အန်းစံဝ်ခလောႈဟိုက်ဟာဝ်းဖာ်ႈ ညျှာအရာပ်ဆိဒိုင်၊ စီႎီးခလောႈလေႈဘိုး ပါ့်အရာပ်ဒေကာပေါလိ စီဟာဝ်းလာ် ပါ့်တီုင်းအေဲမ်းဂါလိလဲ။ 32ဘိူန်ဇေဲန်း တူအီးကဲမာ် စီယိုင်းဒေဲႈ တူအီးကျောႈအ ချှိုက်ကအာဝ်းအူချှေႈ ဒေဲႈဇူးပါ့်စံဝ်ယေဆု၊ ကဲမှာန်း တာ့်အန်းစံဝ် နှာင်းအန်းစံဝ်ဒါးတည်းအန်း တာင်တေဲင်းချှေႈဒီး၊ ဆားနှာမ်းဒဲႈနှာင်းအန်းဂဲန်း။
33စံဝ်ယေဆု စီတေဲႇလေႈဟာဝ်း ချှေႈဒီး ဒခေဲင်းတူအီးကဲဒီး၊ စီဒါးကနူးအန်း စုဟပ်ကတဲဝ်းချှိုက်ချှေႈဒီး။ အန်းစီဘတ်ဖာ်ႈ အေဲမ်းဘတ်တံင်တည်းအန်း စီစုဟပ်ဘိုးလာ်တံင်ဆတာႇချှေႈဒီး။ 34ႎါည်းဒီး အန်းစံဝ် ဆီင်ဂေဲႈတိူဝ်ႈဟိုက်ပါ့်ပ္လါ်န်း စီတိုႈဖေဲမ်းဒါင်း စီဒါ်ႈ “အေဖတ။” ပံင်ဆီင်ဒါ်ႈ အေဖတ မိုႈ “ႎိူဝ်ႈနာ်ႏ#၇:၃၄တည်းကျောႈ “ႎိူဝ်ႈနာ်ႏ” ဒီး မိုႈ ကျောႈကပ္လ၊ ပံင်ဆီင်ဒါ်ႈအန်းမိုႈ “ယေဲဝ်းတညာဝ်းနာ်ႏ၊” “ဂဲန်းနာ်ႏ။” ။”
35ချှေႈဒီးမာ် ဟည်ႎီးယေဲဝ်းတညာဝ်းဟာဝ်းပေါႇ အူစာ်န်း၊ ဆတာႇအန်းမာ် ဟည်အီုင်ဇိူဝ်းဒေဲႈ၊ ဟည်ဘိူန်း ကျောႈချှီႇချှီႇ ကျောႈဆံက်ဆံက်ပေါႇ။ 36ဘိူန်ဇေဲန်း စံဝ်ယေဆု စီတာ်မ်းအူန်းတာ့်ကဲ ကရီးကတီး နှာင်းကဲဘူကလာင်းတာ့်ဆိ။ ဘည်ဘာည်းစံမ့်ဇေဲန်းမာ် အန်းစံဝ် ချဲန်းအာ်ချဲ၊ ဆတာင်းဒီး ချဲန်းအာ်ကရော်တ်ဟာဝ်းဒို့ တော်န်းဒီ။ 37ဘိူဝ်ယေဲဝ်းတညာဝ်းတူအီးကဲ တာ့်လော်င်ကဲဒီး၊ ကဲမာ် အာမ်းဒို့ပေါႇခည်း၊ ကဲစီလည်ကမိုန်ကလာင်းဒါ်ႈလာ် “ပံင်ရေဲန်းစံဝ်ယေဆုပါ်ပည်မေဲႈမာ် မှေဲမ်အာမ်းပေါႇခည်း။ အန်းစံဝ်ဟည်ရေဲန်းဒဲႈ တူအီးချှိုက်ကအာဝ်းကဲ ဆမားယေဲဝ်းတညာဝ်း၊ တူအီးကျောႈအကဲမာ် အန်းဟည်ရေဲန်းဒဲႈကဲ ဆမားကလာင်း ကျောႈဆံက်ချှီႇ။”
বর্তমানে নির্বাচিত:
မာကု 7: RMT
হাইলাইট
শেয়ার
কপি
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.