မာကု 6
6
ပရောဖဲတ် အီးဘူဘိူန်းဆရေငါည်းချှီႇ
မတဲ ၁၃း၅၃-၅၈၊ လုကာ ၄း၁၆-၃၀
1ႎါည်းဒီး စံဝ်ယေဆုကာည်းတပဲအန်းကဲ စီယာ်ည်ႇပါ့်ဒီး ဟာဝ်းစာ်မ်း ပါ့်လှံင်းဂေါ်ည်းအန်းစံဝ်။ 2ဘိူဝ်စာ်မ်းဒေဲႈဆငည်းဆတာင်း အန်းစံဝ်စီလေဲပ်ဒါး ခေဲင်းတရော်ပ် ဟောပနံဝ်းဒဲႈ ကျောႈတြားတာ့်တူအီးပါ်ပည်မေဲႈ။ စံန်ကဲယေဲဝ်းတညာဝ်း ကဲမာ်အာမ်းငါ်ႇဒို့ ကဲစီဒါ်ႈ “ဘာည်းမှေဲအန်းဆံမ်ဆမားလာ်ရေဲန်း ကဲနီး၊ ပါ့်မှေဲ အန်းဘိူန်းဒေဲႈ ပိင်ညာ ကာည်း တာန်ခိုး နှာင်းဆမားရေဲန်း အီးမှေဲမ်အာမ်းကဲနီး။” 3ကဲမာ် အာဝ်ဆီင်ညျှေဲမ်မအန်း၊ စီလည်ဒါ်ႈ “ချှေႈနီး အန်းအာဝ်မိုႈဟီုဝ် လံက်ဆမား၊ အာဝ်မိုႈဟီုဝ် ကော်န်းမာရိ၊ အာဝ်မိုႈဟီုဝ် ချှေႈပီဒါင်း ရာကိုပ်၊ ယောတေ၊ ယုဒကာည်းဆိမိုန်။ အီးမိုႈႎါးလိုည်းအန်းကဲမာ် အာဝ်မိုႈဟီုဝ် ကဲအီးဂေါ်ည်းတောႇ ခေဲင်းကဇိုင်းအဲ။”
4စံဝ်ယေဆုစီဒါ်ႈ တာ့်ကဲ “ပရောဖဲတ်ဒါ်ႈအီး ဘိူန်ဒ ပါ့်လှံင်းဒီဂေါ်ည်းကဲ ပါ့်ဒီဂေါ်ည်းခြိူဝ်းမျိုးကဲ ကာည်း ပါ့်ခလေဲပ်ကဲ၊ အီးမိုႈပါ့်အရာပ်ဒီဟည်းခည်း ကဲဘိူန်းဒို့ဆရေငါည်းချှီႇ။”
5ဂေါႇမိုႈကဲအာဝ်ညျှေဲမ်အန်းစံဝ်၊ အန်းစံဝ်စီဘိူန်းလိူည် တာင်တည်းအန်း တံင်တူအီးဆဲဝ်းကလံက် ရေဲန်းဒဲႈကဲဂဲန်း။ ဘိူန်ဒအီးဒီး ပံင်အီးမှဲမ်အာမ်းမျိုးမှေဲ့မာ် အန်းအာဝ်ဘိူန်းမရေဲန်းနှဲ ပါ့်ဒီး။
6အန်းစံဝ်စီအာမ်းအူန်း ဂေါႇမိုႈတူအီးကဲဒီး အာဝ်ညျှေဲမ်အန်း။
စံဝ်ယေဆု ဆူည်ႇဟာဝ်း တပဲအန်းအူကိူဝ်းလေႈအယ်ချှေႈ
မတဲ ၁၀း၅-၁၅၊ လုကာ ၉း၁-၆
ႎါည်းဒီး စံဝ်ယေဆုစီလှယ်လာ် ဟောပနံဝ်း ကျောႈတြား အူကဇိုင်းဟော်ည်ႇအူကဇိုင်း။ 7အန်းစံဝ် တေဲႇလာ်တပဲအန်းကဲ အူကိူဝ်းလေႈအယ်ချှေႈကဲဒီး အန်းစီဒဲႈကနေဲႈအန်း တာ့်ကဲ နှာင်းကဲဘိူန်း ချူႈလိူည်းႎီုန် ကနာ်မ်းဇာဝ်းကဲ။ ႎါည်းဒီးအန်းစံဝ် စီဆူည်ႇကဲတံန်တောႇဟာဝ်းအယ်ချှေႈ အယ်ချှေႈ ဘာည်းဇေဲန်း။ 8အာည်ႇဟာဝ်းကဲ အန်းစံဝ် စီတာမ်းအူန်း ဒါ်ႈ “ပါ့်အီုန်ဒါ်န်းနံင်ဟာဝ်းပဲ၊ ဘိူန်ဒကဆားအီုင်ဂျိုန်းပဲ မျိုးမှေဲ့မာ် ပဲခူတေဲႈဒိူည်းဟာဝ်းနာ်ႏ။ အီးမိုႈ ဇာန်၊ ပံင်ဟိုမ်းပံင်စိုင်း ကာည်း ရိူန်းခြီးမာ် ပဲခူတေဲႈဒိူည်းဟာဝ်းနာ်ႏ။ 9ချှေဲပ်လိူည်ခနဲပ်ပဲ၊ ခူဒိူည်းတဆီးဘ္လူတ်ႇနာ်ႏ။ 10ဘိူန်ဒဇေဲန်း ဆာ်ပဲစာ်မ်းလှံင်းမှေဲ့မာ် ခလေဲပ်မှေဲ့ ဆာ်ရံပ်အိုင်ရိုႈပဲ၊ ဇိုဂီဂေါ်ည်းတာ့်ခေဲင်းလှံင်းဒီး ဂါပဲညျံမ်လည်လေႈဟာဝ်းပဲပါ့်ဒီဟည်း၊ ပဲစီဒမ်းလိူည် ခေဲင်းခလေဲပ်ဒီးနာ်ႏ။ 11ပါ့်မှေဲ့ဘူဒါ်ႈ တူအီးကဲ ဆာ်ကဲဘူရံပ်လာည်းပဲ၊ ဘူတညာဝ်းပံင်ဒါ်ႈပဲ ဘိူဝ်လည်လေႈဟာဝ်းပဲတာ့် ဒဒီဂေါ်ည်းကဲ နှာင်းကဲနာ်ႇ မိုႈတာ် စံဝ်ဖြား နံင်ဒဲႈတံမ် တာ့်ကဲ၊ ပဲလိုဖူႈႎီုန် ကဘူႈအီးတံက်တီင်ဇာ်န်းပဲနာ်ႏ။”
12ႎါည်းဒီး တပဲအန်းစံဝ်ကဲမာ် လည်လေႈဟာဝ်းပေါႇ၊ ကဲစီဟောတြား တာ့်တူအီးကဲ နှာင်းကဲလှေဲႇနောႈကဘ္လည်အကျာင်းကဲ။ 13ကဲစီချူႈလိူည်းႎီုန်ကနာ်မ်းဇေဝ်ကဲ၊ အီးမိုႈတာ့်တူအီးဆဲဝ်းကဲမာ် ကဲစီကျည်းဒဲႈဖာ်ႈ အေဲမ်းပျိုင်း စီရေဲန်းဒဲႈကဲဂဲန်းဒို့။
ဘည်ဘာည်းယာ်မ်း ဆြာဘပ်တိစမ်ယောဟာန်
မတဲ ၁၄း၁-၁၂၊ လုကာ ၉း၇-၉
14ယာမ်းဇေဲန်း ခါဝ်ဆတာင်းစံဝ်ယေဆု ဟည်လိူဝ်ႈယာဝ်း၊ တားကညျားဒါင်းဟေရိုတ် စီယေဲဝ်းလာ်တညာဝ်း ခါဝ်ဆတာင်းလှေဒီး။ တူအီးကလံက်စီဒါ်ႈ “မိုႈပေါႇ ဆြာဘပ်တိစမ်ယောဟာန် ႎီးယာ်ည်ႇအီမ်းဒေဲႈဘိုး ဂေါႇမိုႈဘာည်းဇေဲန်း အန်းဘယ်လာ်ရေဲန်းနှဲ ပံင်အီးမှေဲမ်အာမ်း။”
15တူအီးကဲအီးဟည်းမာ် ဒါ်ႈ “အန်းမိုႈပရောဖဲတ်အေးလိယ။” မာင်ကလံက်မာ်ဒါ်ႈ “အန်းမိုႈ ပရောဖဲတ်အူချှေႈ ဘာည်းပရောဖဲတ်ကဲ ခည်အာည်ႇနီး။”
16ဘိူဝ်ယေဲဝ်းတညာဝ်းဟေရိုတ်တာ် လော်င်ဘည်ဘာည်းကဲဒီး အန်းမာ်ဒါ်ႈပေါႇ “ချှေႈနီး ဟည်မိုႈယောဟာန် ပံင်ဆူည်ႇဒဲႈအံဝ်း အီးက္လံက်ႎီုန်ကေဲန်းအန်း၊ ဟည်ႎီးယာ်ည်ႇအီမ်းဒေဲႈဘိုး။” 17ဆီမ်ဘာည်းဆံမ်ဒါ်ႈလာ်ဘာည်းဇေဲန်း၊ ခည်အာည်ႇနီး ဟေရိုတ်ဟည်ဒဲႈကျောႈဆူည်ႇ တာ့်တူအီးကဲ စာနံင်ကမ်းဟပ်လာ်ယောဟာန် ခေဲင်းကဘေဲမ်း ဂေါႇမိုႈအန်းဟည်ဖာႇလာည်းအူန်း အီးမိုႈပီး ပီဒါင်းအန်းဖိလိပု အန်းအီးဇီုဝ်ဟေရောဒိ။ 18အီးမိုႈယောဟာန် စီဂီချဲ ဒါ်ႈတာ့်ဟေရိုတ် “အာဝ်ပေန်မဘာည်းဇေဲန်း အာဝ်ပေန်ဖာႇလာည်း ပီး ပီဒါင်းအဲ။”
19ဂေါႇမိုႈဘာည်းဇေဲန်း ဟေရောဒိ စီအူန်းနောႈႎံင်း ဟည်ဆီင်ပယာ်မ်းပေါႇ ယောဟာန်။ အန်းဆီင်ပယာ်မ်းစံမ့်မာ် အာဝ်ဘိူန်းမ ပယာ်မ်း။ 20ဆီမ်ဘာည်းဆံမ်ဒါ်ႈဘာည်းဇေဲန်း ဂေါႇမိုႈဟေရိုတ် ယုမ်ယံမ်ရိုဆေ ယောဟာန်၊ နာ်ႇအူန်းဘိုး ယောဟာန်မိုႈတူအီးဆီုဝ်ယိုး တူအီးချှီႇမှေဲမ်း၊ အန်း စီကဇောည်ဂျဲတ်ကာင်းဒဲႈ စာယောဟာန်။ ဟေရိုတ် ယေဲဝ်းတညာဝ်း ကျောႈပံင်ဒါ်ႈယောဟာန် ယာမ်းမှေဲ့ဘူဒါ်ႈ၊ အန်းဘည်ဘူလံက်နောႈအန်းမာ်၊ အန်းခိုည်းတညာဝ်းပေါႇ ပံင်ဒါ်ႈယောဟာန်ကဲဒီး။
21ႎါည်းဒီး ဟည်စာ်မ်းဒေဲႈဆငည်းချှင်တော် စာဟေရောဒိ၊ ဘိူဝ်ရေဲန်းဟေရိုတ်တာ် ပ္လေါ်ည်းဆငည်းကိူတ်အန်း။ ဆငည်းဒီး ဟေရိုတ်စီ ကလာင်းလာ် တားအမာတ်ဒါင်းကဲ၊ အီးတိူဝ်ႈတေဲင်းကော်န်းနာန်းကဲ၊ တောႇဘိုးတူအီးဒါင်း အီးဂေါ်ည်းခေဲင်း အရာပ်ဂါလိလဲကဲ၊ စီရေဲန်းပ္လေါ်ည်းချှိုင်းပံင်ဟိုမ်း။ 22ဘိူန်ဇေဲန်း ကော်န်းလိုည်းဟေရောဒိဒီး စီလေဲပ်ခေဲင်းပ္လေါ်ည်းဒီး စီကာနှဲဒဲႈအီးတိူဝ်ႈ။ ဟေရိုတ်ကာည်း ဘံဝ်ဖီုင်းအန်းကဲဒီး ကဲကျိူက်ခည်း ဘည်ဘာည်းကာနှဲအန်း၊ ကဲမာ်တိူဝ်ႈခိုည်းတခိူည်းပျော်ခည်း။ ဘိူန်ဇေဲန်း တားကညျားဒါင်းဟေရိုတ်စီဒါ်ႈ တာ့်အီးလိုည်းဒီး “မှာန်းပံင်ဆီင်ဘိူန်းမည်းတာ့်အံဝ်း၊ အံဝ်းနံင်ဒဲႈ။” 23ႎါည်းဒီး အန်းတိူင်ႏဒဲႈကျောႈကတိဘာည်းညျေဲန်း “ဂါဆီုင်မိုႈပံင်မှာန်းမည်း ကီုင်းအံဝ်းအူကဒည်မာ် အံဝ်းနံင်ဒဲႈပေါႇ တာ့်မည်း။”
24အီးလိုည်းဒီးမာ် စီလည်လေႈဟာဝ်းဖာ်ႈ ဒကဆီုဝ်ဒီး စီဟာဝ်းဇူးပါ့်ဂေါ်ည်းမာအန်း၊ စီမှောႇဒါ်ႈ “ဆီအံဝ်းနံင်မှာန်း။” မာအန်းစီဒါ်ႈ “မှာန်းက္လောက်ကေဲန်း တားဆြာဘပ်တိစမ်ယောဟာန်၊ မည်းမှာန်းဘာည်းဇေဲန်းနာ်ႏ။”
25အီးလိုည်းဒီးမာ် ႎီးလေဲပ်ဟာဝ်းဇူးပေါႇအူစာ်န်း ပါ့်တားကညျားဒါင်းဒီး ချာ်န်းချာ်န်း၊ စီမှာန်းဒါ်ႈ “တေဲႈက္လောက်ကေဲန်း တားဆြာဘပ်တိစမ်ယောဟာန် စီဟပ်ဒေဲႈဖာ်ႈ တံင်လင်ပါန်း စီဒေဲႈဒဲႈပေါႇ တာ့်အံဝ်းစံင်နည်။”
26ဘိူန်ဇေဲန်း တားကညျားဒါင်းဒီးမာ် ပေန်လာ်နောႈဘူချှီႇ။ ဘည်ဘာည်းဇေဲန်းမာ် ဂေါႇမိုႈလီုင် ကျောႈကတိ ပံင်တိူင်ႏအန်း ကာည်း လီုင်အန်းတိူဝ်ႈငါည်း ကဲအီးဒေဲႈလေဲပ်ပ္လေါ်ည်းကဲဒီး၊ အန်းစီဘူဆမားမ ထဲင်းႎီုန် ပံင်မှာန်းအီးလိုည်းဒီး။ 27ဂေါႇမိုႈဘာည်းဇေဲန်း အန်းမာ် စီဒဲႈလာ်အမီင်း တာ့်ကော်န်းနာန်းအူချှေႈ ဆူည်ႇအန်းက္လံက်တေဲႈဒေဲႈ က္လောက်ကေဲန်းယောဟာန်ပေါႇအူစာ်န်း။ ကော်န်းဆီုက်နာန်းဒီးမာ် လေဲပ်ဟာဝ်း ပါ့်ကတဲဝ်းကဘေဲမ်း စီက္လံက်ဒေဲႈပေါႇ ခမေဲင်းယောဟာန်။ 28ကဲဟပ်ဒေဲႈ က္လောက်ကေဲန်းဒီး တံင်လင်ပါန်း စီဒေဲႈဒဲႈ တာ့်ကော်န်းလိုည်းဒဲ့ဒီး။ ကော်န်းလိုည်းဒီးမာ် လာည်းႎီးဒဲႈပေါႇ တာ့်မာအန်း။ 29ဘိူဝ်ယေဲဝ်းတညာဝ်း တပဲယောဟာန်ကဲတာ် ခါဝ်ဆတာင်းဒီး၊ ကဲစီဒေဲႈလာည်းတိုးအန်း စီဟာဝ်းတီႇဟပ်ႎီုန် ပါ့်ထံမ်ဖေဝ်း။
စံဝ်ယေဆု ချှိုင်းဒဲႈ တူအီးဖာ်န်းဟေင်ႏ
မတဲ ၁၄း၁၃-၂၁၊ လုကာ ၉း၁၀-၁၇၊ ယောဟာန် ၆း၁-၁၄
30ႎါည်းႎီးဒေဲႈစံင်နာင်းစံဝ်ကဲ ပါ့်ဟာဝ်းဒေဲႈကဲ၊ စီဒေဲႈဇူးခမို ပါ့်အန်းစံဝ်၊ စီကလာင်းနှဲဒို့တာ့်အန်း ဘာည်းရေဲန်းဒေဲႈကဲ ဘည်ဘာည်းပနံဝ်းဒေဲႈကဲတာ့်တူအီး။ 31ဂေါႇမိုႈတူအီးကဲဒီး ဂီဟာဝ်းဟာဝ်းႎီးႎီး လေဲပ်လေဲပ်လေႈလေႈ၊ အန်းစံဝ်ကာည်းတပဲအန်းကဲ ကံပ်ဘူမေဲႈ အချီုင်စာနံင်ဟိုမ်းတာ့်လာ်ဒါး အန်းစံဝ်စီဒါ်ႈ တာ့်တပဲအန်းကဲ “ဟာႈ အဲဟာဝ်းပါ့်ဒီယေန်ဒီဘူမေဲႈတူအီး နှာင်းအဲဘိူန်းအီုင်လှဲဝ်းအဲဒါး အူဂ္လိူမ်အူတည်။” 32ဂေါႇဘာည်ဇေဲန်း မိုႈလိူည်ကဲ ဘံက်ကလေဲႇဟိူဝ်း စီခလောႈဟာဝ်းပါင်းအေဲမ်းညျှာဒ ပါ့်ဒီယေန်ဒီဘူမေဲႈတူအီး။
33ဘည်ဘာည်းမာ် တူအီးကဲဒီး စီယေဲဝ်းလာ် ကဲလည်လေႈဟာဝ်း၊ ကဲစီနာ်ႇပေါႇ ပါ့်နံင်ဟာဝ်းကဲ။ တူအီးတော်န်းကီုင်းတော်န်းကဇိုင်း တဘုလည်လေႈဟာဝ်းလီုင်ဇာ်န်း ကဲဟည်စာ်မ်း လအာည်ႇယေဆုကာည်းတပဲအန်း ပါ့်ဒီး။ 34ဘိူဝ်လေႈဒေဲႈစံဝ်ယေဆု တာ့်ဒကလေဲႇဟိူဝ်း၊ အန်းစီယေဲဝ်းလာ် တူအီးဂီုန်းပေါႇခည်း။ အီးမိုႈတူအီးကဲဒီးမာ် ဘာည်းဒို့ပူး ဘူမေဲႈအီးတိူဝ်ႈအီးမေန်း၊ ဂေါႇမိုႈဘာည်းဇေဲန်း အန်းစံဝ်စီမေဲႈနောႈကႎါည်းတေဲင်းကဲ စီပနံဝ်းဒဲႈ တော်န်းမျိုးတော်န်းလှေ။
35ဘိူဝ်စာ်မ်းဒေဲႈဇိုအာ်ႇ တပဲအန်းကဲ စီဒေဲႈဇူးပါ့်အန်းစံဝ် စီဒါ်ႈ “အရာပ်ပါ့်နီး မိုႈအရာပ်ဒီဘူမေဲႈတူအီး ဘျည်းမာ် ဟည်အာ်ႇဒေဲႈ။ 36ဒဲႈတူအီးကဲနီး ဟာဝ်းဇိူဝ်ႈကဲဟိုမ်းပံင်ဟိုမ်း ပါ့်ကဇိုင်း ရီမ်းအရာပ်နီး။”
37အန်းစံဝ်စီဒါ်ႈ တာ့်ကဲ “ပဲစီဒဲႈကဲဟိုမ်း။”
တပဲအန်းကဲ စီႎီးဒါ်ႈ တာ့်အန်းစံဝ် “စာဟိုမ်းကဲ ယေးနံင်ဟာဝ်းဇိူဝ်ႈပံင်ဟိုမ်း ဒါးရိူန်းတဲင်ကား#၆:၃၇အူတဲင်ကား မိုႈ ငေါႈစာင်စာအူဆငည်း။ အယ်ပယာ်ႈ ဟီုဝ်။”
38အန်းစံဝ် စီႎီးဒါ်ႈ “ဟာဝ်းတိူဝ်ႈဟံင်း၊ နှာင်ပိုင်းပဲမေဲႈ ခမူန်း။”
ဘိူန်ဇေဲန်း ကဲတိူဝ်ႈယေဲဝ်း ဒေဲႈပါ်ႈ စီႎီးကလာင်းတာ့်အန်းစံဝ် “မေဲႈခမူန်းဖာ်န်းပိုင်း ကာည်း ကားအယ်တို။”
39ႎါည်းဒီး အန်းစံဝ်မာ် ဆူည်ႇတပဲအန်းကဲ ကလာင်းတာ့်တူအီးကဲဒီး နှာင်းကဲအံက်ခမို ပေန်စုမ်းပေန်စုမ်း တေဲင်းဘဲတ်ညိူဝ်း။ 40ဘိူန်ဇေဲန်း တူအီးကဲဒီးမာ် အံက်အူပယာ်ႈအူစုမ်း၊ ဖာ်န်းကိူဝ်းအူစုမ်း လှယ်အံက်ခမိုဘာည်းဇေဲန်း။ 41ႎါည်းဒီး စံဝ်ယေဆု စီတေဲႈဖာ်ႈ ခမူန်းဖာ်န်းပိုင်း ကာည်း ကားအယ်တိုဒီး စီဆီင်ဂေဲႈတိူဝ်ႈဟိုက်ပါ့်ပ္လါ်န်း စီခိုည်းတာင်ကေးစူးစံဝ်ဖြား။ ႎါည်းဒီး အန်းစံဝ်စီကဘျဲႈဖာ်ႈခမူန်း စီဒဲႈတာ့် တပဲအန်းကဲ စာနံင်ကဆာင်းဒဲႈ တာ့်တူအီးကဲဒီး။ တောႇတာ်ဘာည်းဇေဲန်း ကားအယ်တိုဒီးမာ် အန်းစံဝ်စီကဘျဲႈဖာ်ႈ စီကဆာင်းဒဲႈဘိုး တာ့်တူအီးကဲဒီး။ 42ကဲဒီးမာ် ဘိူန်းဒို့ဟိုမ်းဖည်း တော်န်းချှေႈ။ 43ႎါည်းဒီး တပဲအန်းစံဝ်ကဲ စီႎီးတကျေဲတ် ခမူန်းကာည်းကားဒီး ႎါည်းဟိုမ်းဟော်ည်ႇတူအီးကဲ၊ ခလိူဝ်းဘိုး အူကိူဝ်းလေႈအယ်ဂျီုက် ကံပ်နိုက်။ 44အန်းအီးဟိုမ်းခမူန်းကဲဒီးပါ်မေဲႈ စရာင်းအီးမာည်းလိူည်း ကဲဂေါ်ည်းဖာ်န်းဟေင်ႏ။
စံဝ်ယေဆု ဟာဝ်းတေဲင်းအေဲမ်း
မတဲ ၁၄း၂၂-၃၃၊ ယောဟာန် ၆း၁၅-၂၁
45ႎါည်းဒီးအူတည်ဒဲ့ အန်းစံဝ်စီဆူည်ႇတပဲအန်းကဲ ဘံက်ကလေဲႇဟိူဝ်း ခလောႈဟာဝ်းလအာည်ႇ ပါ့်ကဇိုင်းဘတ်ဆဲဒ အီးမိုႈညျှာဒအေဲမ်း။ ယာမ်းဇေဲန်းပေါႇ အန်းစီပ္လေႈႎီးလာ် တူအီးကဲဒီး။ 46ႎါည်းပ္လေႈႎီးအန်းစံဝ် တာ့်တူအီးကဲဒီး၊ အန်းစီဟိုက်ဟာဝ်း ပါ့်တေဲင်းနောႈ စာနံင်မှာန်းဆူး။
47ဘိူဝ်စာ်မ်းဒေဲႈအချီုင်ခည်ဆေဲမ်း ကလေဲႇဟိူဝ်းတပဲအန်းကဲ ဂီဂေါ်ည်းအူန်း ကဒည်တီုင်းအေဲမ်း၊ အန်းစံဝ်မာ် ဂေါ်ည်းအူန်း ပါ့်တေဲင်းနော အန်းအူချှေႈလိူည်။ 48အန်းစံဝ်စီယေဲဝ်းလာ် တပဲအန်းကဲ ဒါးလခွါည်း ကဲဂီခွါည်းကလေဲႇဟိူဝ်း ကီန်းပေါႇခည်းခည်း ဂေါႇမိုႈခူးဂီပူဒေဲႈညျှာနံင်ဟာဝ်းကဲ။ စာ်မ်းဒေဲႈအချီုင်အာည်ႇႎါႈဘျည်း အန်းစံဝ်စီဟာဝ်းတေဲင်းအေဲမ်း ဇူးပါ့်ကဲ၊ အန်းစီဒါ်ႈနံင် ခလောႈဟာဝ်း ဒကဲ။ 49ဘိူဝ်ယေဲဝ်းကဲတာ့် အန်းစံဝ်းဟာဝ်းတေဲင်းအေဲမ်း၊ ကဲထင်မိုႈ ကဘျော၊ ကဲစီ အောင်းရိုင်းဒို့။ 50ဂေါႇမိုႈကဲ ဟည်ယေဲဝ်းအန်းစံဝ်ဘာည်းဇေဲန်း၊ ကဲကဒိုန်းယံဝ်းဒို့။ ဘိူန်ဇေဲန်း အန်းစံဝ် စီကျောႈပေါႇ တာ့်ကဲအူစာ်န်း ဒါ်ႈ “ပဲခူယံဝ်း အူန်းနောႈပဲနှာင်းနှီမ်း မိုႈလိူည်အံဝ်း။” 51ႎါည်းဒီး အန်းစံဝ်စီဟိုက်ဟာဝ်း တေဲင်းကလေဲႇဟိူဝ်းဂေါ်ည်းကဲ၊ ခူးမာ် ဟည်ယေန်ဟာဝ်းပေါႇ။ တပဲအန်းကဲဒီးမာ် အာမ်းငါ်ႇဒို့ပေါႇခည်း။ 52ဆီမ်ဘာည်းဆံမ်ဘာည်းလာ်ဇေဲန်း ကဲယေဲဝ်းအူန်း ခည်မိုႈတာ် အန်းစံဝ်ရေဲန်းနှဲ ပံင်အီးမှေဲမ်အာမ်း ဒါးခမူန်းမာ်၊ ကဲအာဝ်ကဘ္လူႈနာ်ႇ ပံင်ဆီင်ဒါ်ႈအန်းချှီႇချှီႇ။ ကဲမာ် မိုႈပေါႇတူအီးကလာင်းဒည်းခည်းခည်း။
စံဝ်ယေဆု ဆားနှာမ်းဒဲႈ တူအီးဂီန်နေတရတ်ကဲ ဂဲန်း
မတဲ ၁၄း၃၄-၃၆
53ႎါည်းဒီး စံဝ်ယေဆု ကာည်း တပဲအန်း စီခလောႈဟာဝ်းညျှာဒအေဲမ်း စာ်မ်းလာ်ပါ့်လှံင်းဂီန်နေတရဲတ် ကဲစီဇံင်းလာ် ကလေဲႇဟိူဝ်းကဲ။ 54ဘိူဝ်လေႈဒေဲႈဒကလေဲႇဟိူဝ်း တူအီးပါ်ပည်မေဲႈ ဟည်ကအာ်မ်းပေါႇ အန်းစံဝ် အူစာ်န်း။ 55ဂေါႇမိုႈဘာည်းဇေဲန်း ကဲ စီဟာဝ်းပေါႇ ချာ်န်းချာ်န်း ပါ့်အရာပ်တော်န်းဒီ၊ ကဲယေဲဝ်းတညာဝ်း စံဝ်ယေဆုစာ်မ်းပါ့်မှေဲ့မာ် ကဲစီယိုင်းဒေဲႈဒို့ တူအီးဆဲဝ်းကဲ တောႇ စံမ့်ဂျိုးအိကဲ စီဒေဲႈဇူးလာ် ပါ့်အန်းစံဝ်။ 56အန်းစံဝ်ဟာဝ်းစာ်မ်း ပါ့်ဒီမှေဲ့ဘူဒါ်ႈ ပါ့်ကီုင်းမှေဲ့ဘူဒါ်ႈ ပါ့်ကဇိုင်းမှေဲ့ဘူဒါ်ႈ၊ ကဲစီယိုင်းဒေဲႈ တူအီးဆဲဝ်းကဲ ပ္လေႈအူန်းကဲဂေါ်ည်းပါ့်ကဒည်ကလာႈ၊ ကဲစီမှာန်းလာ် တာ့်အန်းစံဝ် နှာင်းအန်းဒဲႈ တူအီးဆဲဝ်းကဲ စုလံက်လိူည် တိုန်းတဆီးအန်းစံဝ်။ ကဲအီးဘိူန်းစုလံက် တဆီးအန်းစံဝ် ပါ်ပည်မေဲႈ၊ ကဲဟည်ဂဲန်းချှီႇဟာဝ်းဒို့။
বর্তমানে নির্বাচিত:
မာကု 6: RMT
হাইলাইট
শেয়ার
কপি
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.