လူႉၵႃႇ 7

ၸဝ်ႈယေႇသူႉႁႂ်ႈတၢင်းပဵၼ်ၶႃႈၶုၼ်သိုၵ်းရူဝ်းမႃႉႁၢႆ

(တူၺ်း၊ မၢတ်ႈ 8:5-13)

1မၼ်းၸဝ်ႈႁေႃးလၢတ်ႈၵႂၢမ်းတင်းသဵင်ႈတင်းမူတ်းၸိူဝ်းၼၼ်ႉ တီႈပရဵၵ်ႈသၢတ်ႈတင်းလၢႆယဝ်ႉၸင်ႇ၊ ၶဝ်ႈၵႂႃႇၵႃႈၼႂ်းဝဵင်းၵပိူဝ်ႇၼေႇဢုမ်ႇဢေႃႈ။- 2ၵႃႈၼႂ်းဝဵင်းၼၼ်ႉ ၶႃႈတပ်ႉမူးဢၼ်ၸဝ်ႈမၼ်းႁၵ်ႉၼႃႇၼၼ်ႉၵေႃႉၼိုင်ႈပဵၼ်ၼႃႇလႄႈၸမ်တၵ်းတၢႆဢေႃႈ။- 3တပ်ႉမူးၼၼ်ႉ မိူဝ်ႈဢၼ်ငိၼ်းလွင်ႈယေႇသူႉၸိုင် ပွႆႇၸႂ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်းယူႉတႃႉတင်းလၢႆၼၼ်ႉ ၵႂႃႇၵႃႈတီႈမၼ်းၸဝ်ႈလႄႈ တွင်းပၢၼ်ႇႁႂ်ႈမၼ်းၸဝ်ႈမႃးပၼ်ၵတ်းယဵၼ်ၶျၢမ်းသႃႇတီႈၶႃႈမၼ်းဢေႃႈ။- 4ၶဝ်ၼၼ်ႉႁွတ်ႈမႃးၵႃႈတီႈယေႇသူႉသေယဝ်ႉ၊ တွင်းပၢၼ်ႇၼႃႇလူင်လၢင်လႄႈဝႃႈ၊ ၵေႃႉၼၼ်ႉပဵၼ်ၵေႃႉဢၼ်ထိူၵ်ႈၶၢမ်ႇ လွင်ႈဢၼ်ၸဝ်ႈႁဝ်းထုၵ်ႇလီႁဵတ်းၵျေးၸူးၼႆၶႃႈဢေႃႈ။- 5လွင်ႈမၼ်းၸမ်ႉ မၼ်းၼၼ်ႉႁၵ်ႉပႅင်းၵူၼ်းမဵဝ်းႁဝ်းၶႃႈလႄႈ ပူၵ်းႁဵတ်းၸရွပ်ႈႁေႃးတြႃးပုၼ်ႈႁဝ်းၶႃႈဝႆႉၶႃႈယဝ်ႉ၊ ဝႃႈၼင်ႇၼႆဢေႃႈ။- 6ယေႇသူႉၵႂႃႇလူၺ်ႈၵၼ်တင်းၶဝ်ၼၼ်ႉဢေႃႈ။ မိူဝ်ႈဢၼ်မၼ်းၸဝ်ႈႁွတ်ႈထိုင်တီႈဢၼ်ဢမ်ႇပေႃးၵႆၵၼ်တင်းႁိူၼ်းတပ်ႉမူးၼၼ်ႉၸိုင်၊ တပ်ႉမူးပွႆႇၸႂ်ႉၵေႃႉသေႈပီႈၼွင်ႉမၼ်းၵႂႃႇလႄႈ ႁႂ်ႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ယႃႇပေယၢပ်ႇၸႂ်ၸဝ်ႈႁဝ်းသေၵမ်းတီႈၶႃႈ၊ ၵဝ်ၶႃႈဢမ်ႇထိူၵ်ႈၶၢမ်ႇတၢင်းဢၼ်ၸဝ်ႈႁဝ်းတၵ်းမႃးၶဝ်ႈၵႃႈတႂ်ႈႁူမ်ႈႁိူၼ်းၵဝ်ၶႃႈၼႆႉတီႈၶႃႈ၊- 7မိူၼ်ၸိူဝ်ႉၼင်ႇၼၼ်၊ ၵဝ်ၶႃႈထၢင်ႇၵဝ်ၶႃႈဢမ်ႇပဵၼ်ၵေႃႉဢၼ်ထိူၵ်ႈႁွတ်ႈထိုင် ၵႃႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။ ပေႃးၸဝ်ႈႁဝ်းမီးဢမိင်ႉၵမ်းၼိုင်ႈၵူၺ်းၸိုင်၊ ၵူၼ်းၵဝ်ၶႃႈၼႆႉတၵ်းလႆႈၵတ်းယဵၼ်ၶျၢမ်းသႃႇတီႈၶႃႈဢေႃႈ။- 8ၵဝ်ၶႃႈၼႆႉ ပိၵ်ႉသမ်ႉပဵၼ်ၶႃႈတႂ်ႈၶုၼ်သေၵေႃႈ၊ ဢုပ်ႉပိူင်ႇၵူၼ်းသိုၵ်းတင်းလၢႆလႄႈ၊ ပေႃးလၢတ်ႈတီႈၵေႃႉၼိုင်ႈလႄႈဝႃႈ၊ ၵႂႃႇတႃႉ၊ ဝႃႈၼင်ႇၼႆၸိုင် ၵႂႃႇတီႈၶႃႈဢေႃႈ။ ပေႃးလၢတ်ႈတီႈၵေႃႉၼိုင်ႈလႄႈဝႃႈ၊ မႃးတႃႉ၊ ဝႃႈၼင်ႇၼႆၸိုင် မႃးတီႈၶႃႈဢေႃႈ။ တီႈၶႃႈၵဝ်ၶႃႈၵေႃႈ ပေႃးလၢတ်ႈလႄႈဝႃႈ၊ ႁဵတ်းဢၼ်ၼႆႉတႃႉ၊ ဝႃႈၼင်ႇၼႆၸိုင် ႁဵတ်းတီႈၶႃႈဢေႃႈ ဝႃႈၼႆ၊ ၶဝ်လဝ်ႊလၢတ်ႈဝႃႈၼင်ႇၼႆဢေႃႈ။- 9ယေႇသူႉၼၼ်ႉ မိူဝ်ႈဢၼ်ငိၼ်းၵႂၢမ်းၼၼ်ႉၸိုင်၊ ဢၢမ်းၼႃႇလႄႈ ဝၢႆႇတူၺ်းၶဝ်ၸိူဝ်းဢၼ်ၸွမ်းပႃႈလင်မၼ်းၸဝ်ႈတင်းလၢႆသေယဝ်ႉ၊ လၢတ်ႈလႄႈဝႃႈ၊ ၵဝ်ဝႃႈၸမ်ႉ၊ တၢင်းယုမ်ႇမၢတ်ႈထၢၼ်ႇၼႆႉၸိုင်၊ ၵႃႈၼႂ်းၸိူဝ်ႉၶိူဝ်း ဢီႉသရေႇလႃႉၼႆႉ ၵဝ်ဢမ်ႇပႆႇတွၼ်ႉထူပ်းသေပွၵ်ႈ၊ ဝႃႈၼင်ႇၼႆဢေႃႈ။- 10ၶဝ်ၸိူဝ်းဢၼ်တပ်ႉမူးပွႆႇၸႂ်ႉမႃးတင်းလၢႆၼၼ်ႉ၊ မိူဝ်ႈဢၼ်ၶဝ်ၶိုၼ်းမိူဝ်းႁွတ်ႈထိုင်ၵႃႈတီႈႁိူၼ်းၸိုင်၊ ထူပ်းႁၼ်ၶႃႈဢၼ်ၸပ်းတၢင်းၶႆႈတၢင်းပဵၼ်ယူႇၼၼ်ႉယူႇလီယူႇဢေႃႈ။

ၸဝ်ႈယေႇသူႉႁႂ်ႈလုၵ်ႈၸၢႆးမႄႈမၢႆႈလုၵ်ႉၶိုၼ်းလိပ်း

11ဝၼ်းမိူဝ်ႈၽုၵ်ႈ မၼ်းၸဝ်ႈၵႂႃႇၵႃႈတီႈဝဵင်းဢၼ်လႆႈႁွင်ႉႁဵၵ်ႈၸိုဝ်ႈၼႃႇဢီႉၼႃႉၼၼ်ႉလႄႈ တပႄးၸဝ်ႈတင်းလၢႆဢိၵ်ႇတင်းၵူၼ်းဢၼ်ၸူႉဢၼ်တုမ်ၼမ်ၼႃႇ ၸွမ်းပႃႈလင်မၼ်းၸဝ်ႈၵႂႃႇဢေႃႈ။- 12မိူဝ်ႈဢၼ်ႁွတ်ႈၸမ်ၵႃႈတီႈႁိမ်းၽၵ်းတူဝဵင်းၼၼ်ႉၸိုင်၊ ပိူၼ်ႈဢဝ်ၵူၼ်းတၢႆၵေႃႉၼိုင်ႈ ဢၼ်ပဵၼ်လုၵ်ႈၸၢႆးၵေႃႉလဵဝ်ၵူၺ်းတီႈမႄႈမၢႆႈၼၼ်ႉဢွၵ်ႇမႃးလႄႈ ၵူၼ်းဝဵင်းၼမ်ၼႃႇၸွမ်းမႃးဢေႃႈ။- 13ၸဝ်ႈၽြႃးၼၼ်ႉ မိူဝ်ႈဢၼ်ႁၼ်မႄႈယိင်းၼၼ်ႉၸိုင်၊ မီးၸႂ်ဢၼ်ဢဵတ်းလူလႄႈလၢတ်ႈလႄႈဝႃႈ၊ ယႃႇပေႁွင်ႉပေႁႆႈ၊ ဝႃႈၼင်ႇၼႆသေယဝ်ႉ၊- 14သုတ်ႉၸမ်လႄႈ ဢဝ်မိုဝ်းမၼ်းၸဝ်ႈတိူဝ်ႉသႂ်ႇၸုင်းယဝ်ႉၸင်ႇ၊ ၶဝ်ၸိူဝ်းဢၼ်ႁၢပ်ႇၼၼ်ႉၸုၵ်းၵိုတ်းယူႇဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ လုၵ်ႈဢွၼ်ႇၵေႃႉၼႆႉဢိူၺ်း၊ လုၵ်ႉတႃႉ။ ၵဝ်မီးဢမိင်ႉတီႈမႂ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 15ၵေႃႉဢၼ်တၢႆၼၼ်ႉလုၵ်ႉၼင်ႈယူႇသေလႄႈ လၢတ်ႈၵႂၢမ်းမႃးဢေႃႈ။ မၼ်းၸဝ်ႈၵေႃႈဢဝ်မၼ်းဢၢပ်ႈပၼ်တီႈမႄႈမၼ်းဢေႃႈ။- 16ၵူၼ်းတင်းသဵင်ႈတင်းလူင် ႁွတ်ႈထိုင်တၢင်းဢၼ်ၵူဝ်ဢၼ်ႁႄလႄႈ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊ ပရေႃးၽႅတ်ႈဢၼ်ယႂ်ႇၼႃႇပေႃႇမႃးၵႃႈၼႂ်းႁဝ်းယဝ်ႉ။ ၽြႃးပဵၼ်ၸဝ်ႈမႃးလူမႃးတူၺ်းၵူၼ်းမဵဝ်းမၼ်းၸဝ်ႈယဝ်ႉ၊ ဝႃႈၼင်ႇၼႆဢေႃႈ။- 17သတၢင်းသဵင်ၶၢဝ်ႇမၼ်းၸဝ်ႈၸွတ်ႇသႃႈႁူင်ႁၢင်းၵႂႃႇ ၸႃႉၸဵမ်မိူင်းယူႉတႃႉလႄႈ ၵႃႈတီႈႁိမ်းႁွမ်းတီႈၼၼ်ႈၵူႈတီႈၵူႈလႅၼ်ဢေႃႈ။

တပႄးတမၢၼ်ႇၸဝ်ႈယူဝ်းႁၢၼ်ႇမႃးတီႈၸဝ်ႈယေႇသူႉ

(တူၺ်း၊ မၢတ်ႈ 11:2-19)

18တပႄးယူဝ်းႁၢၼ်ႇတင်းလၢႆ မွၵ်ႇလၢတ်ႈလွင်ႈတၢင်း တင်းသဵင်ႈတင်းလူင်ၸိူဝ်းၼၼ်ႉတီႈသြႃႇၶဝ်ဢေႃႈ။- 19ယူဝ်းႁၢၼ်ႇၼၼ်ႉႁွင်ႉဢဝ်တပႄးမၼ်းသွင်ၵေႃႉယဝ်ႉၸင်ႇ၊ ပွႆႇၸႂ်ႉၵႂႃႇၸူးၵႃႈတီႈယေႇသူႉလႄႈ ႁႂ်ႈၶဝ်လဝ်ႊထၢမ်လႄႈဝႃႈ၊ ၸဝ်ႈႁဝ်းပဵၼ်ၸဝ်ႈဢၼ်တၵ်းမႃးၼၼ်ႉၶႃႈႁိုဝ်။ ဢမ်ႇၼၼ်လႄႈ တၵ်းလႆႈမုင်ႈထႃႈမွင်းထႃႈတၢင်ႇၵေႃႉလူးၵွၼ်ႇၶႃႈႁိုဝ်။ ဝႃႈၼင်ႇၼႆဢေႃႈ။- 20ၶဝ်ၼၼ်ႉႁွတ်ႈထိုင်ၵႃႈတီႈမၼ်းၸဝ်ႈသေယဝ်ႉ၊ လဝ်ႊလၢတ်ႈလႄႈဝႃႈ၊ ယူဝ်းႁၢၼ်ႇဢၼ်ပၼ် ပပ်ႉတီႉၸမ်ႇၼၼ်ႉပွႆႇၸႂ်ႉႁဝ်းၶႃႈမႃး တီႈၸဝ်ႈႁဝ်း ႁႂ်ႈႁဝ်းၶႃႈလဝ်ႊထၢမ်လႄႈဝႃႈ၊ ၸဝ်ႈႁဝ်းပဵၼ် ၸဝ်ႈဢၼ်တၵ်းမႃးၼၼ်ႉၶႃႈႁိုဝ်။ ဢမ်ႇၼၼ်လႄႈ တၵ်းလႆႈမုင်ႈထႃႈမွင်းထႃႈတၢင်ႇၵေႃႉလူးၵွၼ်ႇၶႃႈႁိုဝ်။ ဝႃႈၼင်ႇၼႆၶႃႈယဝ်ႉ၊ ဝႃႈၼင်ႇၼႆဢေႃႈ။- 21မိူဝ်ႈၶိင်ႇၼႃႇရီႇၼၼ်ႉ ယေႇသူႉႁႂ်ႈၵူၼ်းၼမ်ၼႃႇ ၵၢင်းလွတ်ႈတင်းတၢင်းၶႆႈတၢင်းပဵၼ် ဢိၵ်ႇတင်းတၢင်းဢၼ်ၽီႁၢႆႉၶဝ်ႈတင်းလၢႆယူႇဢေႃႈ။ တီႈၶဝ်ၸိူဝ်းဢၼ်တႃမွတ်ႇၵေႃႈမၼ်းၸဝ်ႈႁဵတ်းၵျေးၸူး ႁႂ်ႈတႃၶဝ်ႁၼ်မႃးဢေႃႈ။- 22မိူဝ်ႈၼၼ်ႉယေႇသူႉၵေႃႈ ၶိုၼ်းလၢတ်ႈတီႈၶဝ်ၼၼ်ႉလႄႈဝႃႈ၊ သူၵႂႃႇလႄႈ လဝ်ႊလၢတ်ႈတီႈယူဝ်းႁၢၼ်ႇ ၵႃႈဢၼ်သူလႆႈငိၼ်း၊ ၵႃႈဢၼ်သူလႆႈႁၼ်တင်းလၢႆၼႆႉတႃႉ။ ၶဝ်ၸိူဝ်းဢၼ်တႃမွတ်ႇၼၼ်ႉလႆႈႁၼ်မႃးဢေႃႈ။ ၶဝ်ၸိူဝ်းဢၼ်တိၼ်လူႉၼၼ်ႉလႆႈပႆတၢင်းၵႂႃႇဢေႃႈ။ ၶဝ်ၸိူဝ်းဢၼ်ပဵၼ်တုတ်ႈၼၼ်ႉ လႆႈႁွတ်ႈထိုင်တၢင်းဢၼ်မူတ်းသႂ်ဢေႃႈ။ ၶဝ်ၸိူဝ်းဢၼ်ႁူၼူၵ်ႇၼၼ်ႉ လႆႈငိၼ်းမႃးဢေႃႈ။ ၶဝ်ၸိူဝ်းဢၼ်တၢႆယဝ်ႉၼၼ်ႉ လႆႈႁွတ်ႈထိုင်တၢင်းဢၼ်လုၵ်ႉၶိုၼ်းဢေႃႈ။ ၶဝ်ၸိူဝ်းဢၼ်ၽၢၼ်ၼၼ်ႉၵေႃႈ လႆႈငိၼ်းသတၢင်းသိူဝ်းပျေႃႇဢေႃႈ။- 23ၵွပ်ႈပိူဝ်ႈၵဝ်လႄႈ ၵေႃႉဢၼ်ၸႂ်ဢမ်ႇလူႉၼၼ်ႉမီးမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။

24ဝၢႆးလင်ၶဝ်ၸိူဝ်းဢၼ် ယူဝ်းႁၢၼ်ႇပွႆႇၸႂ်ႉမႃးၼၼ်ႉၵႂႃႇသေယဝ်ႉ၊ ယေႇသူႉဢဝ်လွင်ႈယူဝ်းႁၢၼ်ႇၼၼ်ႉ လၢတ်ႈတီႈပရဵၵ်ႈသၢတ်ႈတင်းလၢႆလႄႈဝႃႈ၊ သူဢွၵ်ႇၵႂႃႇ ၵႃႈတီႈၼႂ်းထိူၼ်ႇပုၼ်ႉႁႂ်ႈလႆႈလူလႆႈတူၺ်းလွင်ႈၸိူဝ်ႉႁိုဝ်။ ဢွၵ်ႇၵႂႃႇႁႂ်ႈလႆႈလူလႆႈတူၺ်းမႆႉဢေႃႈဢၼ်လူမ်းထူဝ်းႁိုဝ်။- 25ဢမ်ႇၼၼ်လႄႈ၊ သူဢွၵ်ႇၵႂႃႇ ႁႂ်ႈလႆႈလူလႆႈတူၺ်းလွင်ႈၸိူဝ်ႉႁိုဝ်။ ဢွၵ်ႇၵႂႃႇႁႂ်ႈလႆႈလူလႆႈတူၺ်း ၶဝ်ၸိူဝ်းဢၼ်ၼုင်ႈမႆၶူဝ်းလဵင်းဢၼ်ဢူၼ်ႈဢၼ်ဢွၼ်ႇႁိုဝ်။ ၶဝ်ၸိူဝ်းဢၼ်ၼုင်ႈမႆၶူဝ်းလဵင်းဢၼ်ႁၢင်ႈလီၼႃႇလႄႈ ၵိၼ်ၶူပ်းဢၼ်လီဢၼ်ငၢမ်းၼၼ်ႉ ၸၢင်ႈယူႇၵႃႈၼႂ်းႁိူၼ်းၶုၼ်ဢေႃႈ။- 26ဢမ်ႇၼၼ်လႄႈ သူဢွၵ်ႇၵႂႃႇႁႂ်ႈလႆႈလူလႆႈတူၺ်းလွင်ႈၸိူဝ်ႉႁိုဝ်။ ဢွၵ်ႇၵႂႃႇႁႂ်ႈလႆႈလူလႆႈတူၺ်းပရေႃးၽႅတ်ႈႁိုဝ်။ ၸႂ်ႈယဝ်ႉ။ ၵဝ်ဝႃႈၸမ်ႉ၊ ပဵၼ်ၵေႃႉဢၼ်ယႂ်ႇမျၢတ်ႈၼႃႇသေပရေႃးၽႅတ်ႈဢေႃႈ။- 27ဢၼ်မႃးၼႂ်းၵျၢမ်းလိၵ်ႈၸမ်ႉ၊ တူၺ်းလူး၊ ၵဝ်တၵ်းပွႆႇၸႂ်ႉတမၢၼ်ႇၵဝ်ဢၼ်တၵ်းမႄးသဵၼ်ႈတၢင်းဢၼ်မႂ်းၵႂႃႇၼၼ်ႉ ၵႃႈတီႈၽၢႆႇၼႃႈမႂ်းဢေႃႈ၊ ဢၼ်ဝႃႈၼင်ႇၼႆၼၼ်ႉ ၶႂ်ႈဝႃႈၵေႃႉၼၼ်ႉဢေႃႈ။- 28ၵဝ်ဝႃႈၸမ်ႉ၊ ၼႂ်းၶဝ်ၸိူဝ်းဢၼ်ၵိူတ်ႇလဵင်ႉမႃးၵႃႈတီႈမႄႈယိင်းတင်းလၢႆၼၼ်ႉ၊ ပရေႃးၽႅတ်ႈဢၼ်ယႂ်ႇမျၢတ်ႈၼႃႇသေယူဝ်းႁၢၼ်ႇၼၼ်ႉ ဢမ်ႇမီးသေၵေႃႉသေၵူၼ်း။ ၼႂ်းဝႃႈၼၼ်သေၵေႃႈ ၵေႃႉဢၼ်လဵၵ်ႉသေပိူၼ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉ ယႂ်ႇမျၢတ်ႈၼႃႇသေၵေႃႉၼၼ်ႉဢေႃႈ။

29ၸႃႉၸဵမ်ၵူၼ်းၵဵပ်းၶွၼ်ႇတင်းလၢႆလႄႈၵူၼ်းတင်းသဵင်ႈတင်းလူင် မိူဝ်ႈဢၼ်လႆႈငိၼ်းၵႂၢမ်းၼႆႉၸိုင်၊ ပိူဝ်ႈဢၼ်ၶဝ်လႆႈၶၢမ်ႇ ပပ်ႉတီႉၸမ်ႇ ဢၼ်ယူဝ်းႁၢၼ်ႇပၼ်ၼၼ်ႉယဝ်ႉလႄႈ ဢွၼ်ၵၼ်ယွင်ႈယေႃးၵျေးၸူးတၢင်းဢၼ်သိုဝ်ႈတေႃႇတီႈၽြႃးပဵၼ်ၸဝ်ႈဢေႃႈ။- 30ၽႃႇရီႉသႄး ဢိၵ်ႇတင်း ၵူၼ်းမေႃၵျၢမ်းတင်းလၢႆၸိုင် ပိူဝ်ႈဢၼ်ဢမ်ႇလႆႈၶၢမ်ႇ ပပ်ႉတီႉၸမ်ႇယူဝ်းႁၢၼ်ႇလႄႈ ပႄႇပႅတ်ႈၵျေးၸူးဢၼ် ၽြႃးပဵၼ်ၸဝ်ႈၵျၢမ်ႇႁဵတ်းတီႈၶဝ်ၼၼ်ႉဢေႃႈ။

31ပိူဝ်ႈၼႆလႄႈ ၵူၼ်းမဵဝ်းၼႆႉၸိုင် တၵ်းလႆႈၼႄပျႃးဢူႉပမႃႇ ပုင်ႇမၼ်းၸိူဝ်ႉၼင်ႇႁိုဝ်။ တၵ်းမိူၼ်ၸိူဝ်ႉၼင်ႇဢၼ်လႂ်။- 32မိူၼ်ၸိူဝ်ႉၼင်ႇလုၵ်ႈဢွၼ်ႇတင်းလၢႆ ဢၼ်ၼင်ႈယူႇၵႃႈၼႂ်းၵၢတ်ႇသေလႄႈ ၵေႃႉၼိုင်ႈလႄႈၵေႃႉၼိုင်ႈႁွင်ႉသႅၼ်ႇတီႈၵၼ်လႄႈဝႃႈ၊ ပိၵ်ႉသမ်ႉႁဝ်းပဝ်ႇပီႇပဝ်ႇၼႄး တီႈသူသေၵေႃႈသူဢမ်ႇၵႃႈဢမ်ႇဝႅၼ်။ ပိၵ်ႉသမ်ႉႁဝ်းထိုင်ၸႂ်ပွင်ႉၶၢင်းသေၵေႃႈ သူဢမ်ႇႁွင်ႉဢမ်ႇႁႆႈ၊ ဝႃႈၼင်ႇၼႆၼၼ်ႉဢေႃႈ။- 33လွင်ႈမၼ်းၸမ်ႉ ယူဝ်းႁၢၼ်ႇ ဢၼ်ပၼ်ပပ်ႉတီႉၸမ်ႇၼၼ်ႉ ယင်းဢမ်ႇၵိၼ်ၶဝ်ႈမုၼ်းဢမ်ႇသူတ်ႉၼမ်ႉၸပိတ်ႈယူႇလႄႈ မႃးသေၵေႃႈ သူဝႃႈ၊ ၵေႃႉၼႆႉပဵၼ်ၵူၼ်းဢၼ်ၽီႁၢႆႉၶဝ်ႈလူင်ပႄႇ၊ ဝႃႈၼင်ႇၼႆဢေႃႈ။- 34လုၵ်ႈၵူၼ်း ယင်းၵိၼ်ယင်းသူတ်ႉယူႇလႄႈ မႃးသေၵေႃႈ၊ သူသမ်ႉဝႃႈ၊ တူၺ်းလူး၊ ၵေႃႉၼႆႉပဵၼ်ၵူၼ်းဢၼ်ၵိၼ်ပူၼ်ႉၵိၼ်လိူဝ်၊ ၵူၼ်းဢၼ်ၵိၼ်ၼမ်ႉၸပိတ်ႈပူၼ်ႉလိူဝ်၊ ၵူၼ်းဢၼ်ႁဵတ်းၵေႃႉႁဵတ်းသေႈလူၺ်ႈၵၼ်တင်းၵူၼ်းၵဵပ်းၶွၼ်ႇ ဢိၵ်ႇတင်းၵူၼ်းႁၢႆႉတင်းလၢႆလူင်ပႄႇ၊ ဝႃႈၼင်ႇၼႆဢေႃႈ။- 35ၼႂ်းဝႃႈၼၼ်သေၵေႃႈ ပိင်ႇၺႃႇတြႃးလႆႈၶၢမ်ႇတၢင်းဢၼ်သိုဝ်ႈတေႃႇ ၼႂ်းလုၵ်ႈလၢင်းတူဝ်ၸဝ်ႈၵဝ်ႇတင်းသဵင်ႈတင်းလူင်ဝႃႈၼႆ၊ မၼ်းၸဝ်ႈဝႃႈၼင်ႇၼႆဢေႃႈ။

ၸဝ်ႈယေႇသူႉမီးၼႂ်းႁိူၼ်းသီႉမုၼ်ႇၵိူင်းၽႃႇရီႉသႄး

36 ၽႃႇရီႉသႄးၵေႃႉၼိုင်ႈ ႁွင်ႉပၢင်းဢဝ်မၼ်းၸဝ်ႈ၊ ႁႂ်ႈမၼ်းၸဝ်ႈလႆႈၵိၼ်တၢင်းၵိၼ်လူၺ်ႈၵၼ်တင်းမၼ်းသေယဝ်ႉ၊ မၼ်းၸဝ်ႈၵႂႃႇၶဝ်ႈၵႃႈၼႂ်းႁိူၼ်းၽႃႇရီႉသႄးၼၼ်ႉလႄႈ ဢိင်ယူႇႁိမ်းတီႈၵိၼ်ဢေႃႈ။- 37ၵႃႈၼႂ်းဝဵင်းၼၼ်ႉ မီးမႄႈယိင်းႁၢႆႉၵေႃႉၼိုင်ႈလႄႈ မိူဝ်ႈဢၼ်မၼ်းႁူႉလွင်ႈဢၼ်မၼ်းၸဝ်ႈဢိင်ယူႇႁိမ်းတီႈၵိၼ် ၵႃႈၼႂ်းႁိူၼ်းၽႃႇရီႉသႄးၼၼ်ႉၸိုင်၊ ဢဝ်တဝ်ႈၼမ်ႉမၼ်းႁွမ်မၢၵ်ႇႁိၼ်ၽိူၵ်ႇလုၵ်ႈၼိုင်ႈမႃးလႄႈ၊- 38ၸုၵ်းၵႃႈတီႈၽၢႆႇလင်ႁိမ်းတိၼ်မၼ်းၸဝ်ႈယူႇသေလႄႈႁွင်ႉႁႆႈလႄႈ ႁႂ်ႈၼမ်ႉတႃတူၵ်းသႂ်ႇၵႃႈၼိူဝ်တိၼ်မၼ်းၸဝ်ႈသေယဝ်ႉ၊ ဢဝ်တင်းၶူၼ်ႁူဝ်မၼ်းၸဵတ်ႉဢေႃႈ။ တိၼ်မၼ်းၸဝ်ႈၵေႃႈမၼ်းၼူမ်လႄႈ ဢဝ်တင်းၼမ်ႉမၼ်းႁွမ်တႃးယူႇဢေႃႈ။

39မိူဝ်ႈဢၼ်ၽႃႇရီႉသႄး ဢၼ်ႁွင်ႉပၢင်းမၼ်းၸဝ်ႈၼၼ်ႉႁၼ်ၸိုင်၊ မၼ်းထၢင်ႇၼႂ်းၸႂ်လႄႈဝႃႈ၊ ပေႃးၵေႃႉၼႆႉပဵၼ်ပရေႃးၽႅတ်ႈၸိုင် မၼ်းတၵ်းႁူႉလွင်ႈဢၼ်မႄႈယိင်းဢၼ်တိူဝ်ႉတိၼ်မၼ်းၸဝ်ႈယူႇၼႆႉ ပဵၼ်ၵူၼ်းၸိူဝ်ႉၼင်ႇႁိုဝ်ၼၼ်ႉဢေႃႈ။မၼ်းၼႆႉပဵၼ်မႄႈယိင်းဢၼ်ႁၢႆႉဢေႃႈ၊ ဝႃႈၼင်ႇၼႆဢေႃႈ။- 40ၵမ်းၼၼ်ႉ ယေႇသူႉၵေႃႈၶိုၼ်းလၢတ်ႈလႄႈဝႃႈ၊ သီႉမုၼ်ႇဢိူၺ်း၊ ၵဝ်မီးတီႈလၢတ်ႈလွင်ႈပိူင်ၼိုင်ႈတီႈမႂ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလဝ်ႊလၢတ်ႈလႄႈဝႃႈ၊ သြႃႇၸဝ်ႈ၊ လၢတ်ႈပၼ်သေၵမ်းၶႃႈ၊ ဝႃႈၼင်ႇၼႆယဝ်ႉၸင်ႇ၊- 41မၼ်းၸဝ်ႈၵေႃႈလၢတ်ႈလႄႈဝႃႈ၊ တီႈၸဝ်ႈငိုၼ်းၵေႃႉၼိုင်ႈ မီးၵူၼ်းဢၼ်ၵူႈငိုၼ်းသွင်ၵေႃႉဢေႃႈ။ ၵေႃႉၼိုင်ႈၸမ်ႉ၊ ထုၵ်ႇၼီႈတေႇၼႃႇရီႇႁႃႈပၢၵ်ႇၶႅပ်းဢေႃႈ။ ၵေႃႉၼိုင်ႈၸမ်ႉ၊ ထုၵ်ႇၼီႈႁႃႈသိပ်းၶႅပ်းဢေႃႈ။- 42ပိူဝ်ႈဢၼ်ၶဝ်ၼၼ်ႉ ဢမ်ႇမီးတီႈဢၼ်တၵ်းတႅၼ်းပၼ်ၼီႈၼၼ်ႉလႄႈ၊ ၸဝ်ႈငိုၼ်းပွႆႇလွတ်ႈသေလၢႆလၢႆတီႈၶဝ်သွင်ၵေႃႉၼၼ်ႉဢေႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ ၼႂ်းၶဝ်သွင်ၵေႃႉၼၼ်ႉ၊ ၵေႃႉလႂ်ယဵင်ႈၶႅၼ်းတၵ်းႁၵ်ႉၸဝ်ႈငိုၼ်းၼၼ်ႉၼႃႇ၊ ဝႃႈၼင်ႇၼႆဢေႃႈ။- 43သီႉမုၼ်ႇၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၵဝ်ၶႃႈထၢင်ႇၵေႃႉဢၼ်မၼ်းပွႆႇလွတ်ႈၼမ်ၼႃႇၼၼ်ႉယဵင်ႈၶႅၼ်းတၵ်းႁၵ်ႉၼႃႇၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈၵေႃႈလၢတ်ႈလႄႈဝႃႈ၊ ၵႃႈၼင်ႇဢၼ်မႂ်းၸီႇယၢင်ႇၼႆႉ၊ ၸႂ်ႈယဝ်ႉ၊ ဝႃႈၼင်ႇၼႆယဝ်ႉၸင်ႇ၊- 44ဝၢႆႇတူၺ်းမႄႈယိင်းၼၼ်ႉသေလႄႈ လၢတ်ႈတီႈသီႉမုၼ်ႇလႄႈဝႃႈ၊ မႂ်းႁၼ်မႄႈယိင်းၼႆႉႁိုဝ်။ မိူဝ်ႈဢၼ်ၵဝ်ၶဝ်ႈမႃးၵႃႈၼႂ်းႁိူၼ်းမႂ်းၸိုင် မႂ်းဢမ်ႇပၼ်ၼမ်ႉသုၵ်ႈတိၼ်တီႈၵဝ်။ မႄႈယိင်းၼႆႉၸမ်ႉ၊ ၼမ်ႉတႃတူၵ်းသႂ်ႇၵႃႈၼိူဝ်တိၼ်ၵဝ်လႄႈ ဢဝ်တင်းၶူၼ်ႁူဝ်မၼ်းၸဵတ်ႉယဝ်ႉ။- 45မႂ်းဢမ်ႇၼူမ်ၵဝ်။ မၼ်းၼႆႉၸမ်ႉ၊ ၸႃႉၸဵမ်ၶိင်ႇမိူဝ်ႈဢၼ်ၵဝ်ၶဝ်ႈၵႃႈၼႂ်းႁိူၼ်းၼၼ်ႉလႄႈ၊ ၼူမ်တိၼ်ၵဝ်ယူႇဢမ်ႇလိုဝ်ႈဢမ်ႇသဝ်းဢေႃႈ။- 46မႂ်းဢမ်ႇဢဝ်ၼမ်ႉမၼ်းတႃးႁူဝ်ၵဝ်။ မၼ်းၼႆႉၸမ်ႉ၊ ဢဝ်တင်းၼမ်ႉမၼ်းႁွမ်တႃးတိၼ်ၵဝ်ယဝ်ႉ။- 47ပိူဝ်ႈၼႆလႄႈၵဝ်ဝႃႈၸမ်ႉ၊ မၼ်းၵၢင်းလွတ်ႈတၢင်းဢပႅတ်ႈၼမ်ၼႃႇလႄႈ ၸၢင်ႈႁၵ်ႉၼမ်ၼႃႇဢေႃႈ။ ၵေႃႉဢၼ်ၵၢင်းလွတ်ႈတၢင်းဢပႅတ်ႈၵေႇၵေႇၼၼ်ႉ ၸၢင်ႈႁၵ်ႉၵေႇၵေႇၵူၺ်း၊ ဝႃႈၼင်ႇၼႆဢေႃႈ။- 48တီႈမႄႈယိင်းၼၼ်ႉၵေႃႈမၼ်းၸဝ်ႈလၢတ်ႈလႄႈဝႃႈ၊ ဢပႅတ်ႈမႂ်းၸိုင် ပွႆႇလွတ်ႈယဝ်ႉ၊ ဝႃႈၼင်ႇၼႆဢေႃႈ။- 49ၶဝ်ၸိူဝ်းဢၼ် ဢိင်ယူႇႁိမ်းတီႈၵိၼ်လူၺ်ႈၵၼ်တင်းမၼ်းၸဝ်ႈတင်းလၢႆၼၼ်ႉၵေႃႈ ထၢင်ႇၼႂ်းၸႂ်လႄႈဝႃႈ၊ ၵေႃႉဢၼ်ပွႆႇလွတ်ႈဢပႅတ်ႈၼႆႉၸမ်ႉ၊ ပဵၼ်ၽူႈလႂ်၊ ဝႃႈၼင်ႇၼႆဢေႃႈ။- 50မၼ်းၸဝ်ႈၵေႃႈ လၢတ်ႈတီႈမႄႈယိင်းၼၼ်ႉလႄႈဝႃႈ၊ တၢင်းဢၼ်ယုမ်ႇမၢတ်ႈမႂ်းၵႄႇၶျွတ်ႈဢဝ်မႂ်းယဝ်ႉ။ ၵႂႃႇၼိမ်ၼိမ်တႃႉ၊ ဝႃႈၼင်ႇၼႆဢေႃႈ။

বর্তমানে নির্বাচিত:

လူႉၵႃႇ 7: CBMS

হাইলাইট

কপি