လူႉၵႃႇ 6

လွင်ႈဝၼ်းၵမ်သိၼ်

(တူၺ်း၊ မၢတ်ႈ 12:1-8။ မႃႇ 2:23-28)

1လိုၼ်းသေဝၼ်းၵမ်သိၼ်ပထမႃႉ ၼႂ်းဝၼ်းၵမ်သိၼ်တူႉတီႉယႃႉၼၼ်ႉ၊ မၼ်းၸဝ်ႈၽႃႇလတ်းၵႂႃႇၵႃႈၼႂ်းႁႆႊၶဝ်ႈၵျုင်ႇလႄႈ တပႄးၸဝ်ႈတင်းလၢႆယၵ်းဢဝ်ႁူင်းၶဝ်ႈၵျုင်ႇသေယဝ်ႉ၊ ဢဝ်တင်းမိုဝ်းၶိုတ်ႈပွတ်ႈၵိၼ်ဢေႃႈ။- 2ၽႃႇရီႉသႄး ၵမ်ႈၽွင်ႈၵေႃႈလၢတ်ႈလႄႈဝႃႈ၊ လွင်ႈဢၼ်ဢမ်ႇထုၵ်ႇလီႁဵတ်းၼႂ်းဝၼ်းၵမ်သိၼ်ၸိုင်၊ ႁဵတ်းသင်လႄႈသူႁဵတ်းၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 3ယေႇသူႉၵေႃႈၶိုၼ်းလၢတ်ႈလႄႈဝႃႈ၊ လွင်ႈဢၼ် တႃႇဝိတ်ႈႁဵတ်း ၼႂ်းမိူဝ်ႈဢၼ်မၼ်းဢိၵ်ႇတင်းၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းတင်းလၢႆဢိုပ်းတၢင်းၵိၼ်ၼၼ်ႉ၊- 4ဢၼ်ဝႃႈလွင်ႈဢၼ်မၼ်းၶဝ်ႈၵႂႃႇၵႃႈၼႂ်းႁိူၼ်းၽြႃးပဵၼ်ၸဝ်ႈသေလႄႈ ၵိၼ်ၶဝ်ႈမုၼ်းၽၢႆႇၼႃႈၸဝ်ႈ ဢၼ်ယိတ်ႈပရေႃးႁဵၵ်ႈၵူၺ်းၵူၺ်းထုၵ်ႇလီၵိၼ်ၼၼ်ႉလႄႈ သမ်ႉဢဝ်ပၼ်တီႈၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၼၼ်ႉၸိုင်၊ သူဢမ်ႇယၢမ်ႈလႆႈၽတ်းႁိုဝ်။- 5လိူဝ်သေၼၼ်ႉ လုၵ်ႈၵူၼ်းပဵၼ်ၸဝ်ႈဝၼ်းၵမ်သိၼ်ဢေႃႈ၊ ဝႃႈၼင်ႇၼႆဢေႃႈ။

ၵူၼ်းဢၼ်မိုဝ်းႁဵဝ်ႇၶွၼ်ၼိုင်ႈ

(တူၺ်း၊ မၢတ်ႈ 12:9-14။ မႃႇ 3:1-6)

6ၼႂ်းဝၼ်းၵမ်သိၼ်တၢင်ႇဝၼ်း၊ မိူဝ်ႈဢၼ်မၼ်းၸဝ်ႈၶဝ်ႈၵႂႃႇၵႃႈၼႂ်းၸရွပ်ႈႁေႃးတြႃးသေလႄႈ သင်ႇသွၼ်သုင်းမႃႉပၼ်ယူႇၼၼ်ႉၸိုင်၊ ၼႂ်းတီႈၼၼ်ႉ မီးၵူၼ်းဢၼ်မိုဝ်းႁဵဝ်ႇၶွၼ်ၶႂႃၵေႃႉၼိုင်ႈဢေႃႈ။- 7ၼႂ်းဝၼ်းၵမ်သိၼ် မၼ်းၸဝ်ႈတၵ်းႁႂ်ႈတၢင်းၶႆႈတၢင်းပဵၼ်မၼ်းၼၼ်ႉႁၢႆႁိုဝ်။ တၵ်းဢမ်ႇႁႂ်ႈႁၢႆႁိုဝ်ဝႃႈၼႆ၊ ၵူၼ်းထုတ်ႇၵျၢမ်းဢိၵ်ႇတင်းၽႃႇရီႉသႄးတင်းလၢႆၸိူဝ်းၼၼ်ႉ၊ ၼင်ႇႁိုဝ်တၵ်းမီးတီႈဢၼ်တၵ်းတၢင်ႇဢပႅတ်ႈၵႃႈၼိူဝ်မၼ်းၸဝ်ႈၸိုင်၊ လွမ်တူၺ်းမၼ်းၸဝ်ႈယူႇဢေႃႈ။- 8မၼ်းၸဝ်ႈႁူႉ တၢင်းၵျၢမ်ႇတၢင်းပွင်ၶဝ်ၼၼ်ႉလႄႈ လၢတ်ႈတီႈၵူၼ်းဢၼ်မိုဝ်းႁဵဝ်ႇၶွၼ်ၼိုင်ႈၼၼ်ႉလႄႈဝႃႈ၊ လုၵ်ႉတႃႉ။ ၸုၵ်းယူႇၼႂ်းၶိုင်ႈၵၢင်ၼႆႉတႃႉ၊ ဝႃႈၼႆ၊ ၵႃႈၼင်ႇဢၼ်ဝႃႈၼၼ်ႉ၊ မၼ်းလုၵ်ႉလႄႈၸုၵ်းယူႇဢေႃႈ။- 9ယေႇသူႉၵေႃႈထၢမ်ၶဝ်ၼၼ်ႉလႄႈဝႃႈ၊ ၵဝ်တၵ်းထၢမ်သူလူးၵွၼ်ႇဢေႃႈ။ ၼႂ်းဝၼ်းၵမ်သိၼ်ထုၵ်ႇလီႁဵတ်းၸိူဝ်ႉၼင်ႇႁိုဝ်။ ထုၵ်ႇလီႁဵတ်းၵျေးၸူးႁိုဝ်။ ထုၵ်ႇလီယႃႉတၢင်းလီပိူၼ်ႈႁိုဝ်။ ထုၵ်ႇလီၶျွတ်ႈဢဝ်ဢသၢၵ်ႈႁိုဝ်။ ထုၵ်ႇလီဢဝ်တၢႆႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 10လူတူၺ်းလဵပ်ႈႁွပ်ႈၶဝ်တင်းသဵင်ႈတင်းလူင်ယူႇသေလႄႈလၢတ်ႈတီႈၵေႃႉၼၼ်ႉလႄႈဝႃႈ ယဵတ်ႇမိုဝ်းမႂ်းတႃႉ၊ ဝႃႈၼင်ႇၼႆယဝ်ႉၸင်ႇ၊ ၵေႃႉၼၼ်ႉယဵတ်ႇမိုဝ်းမၼ်းလႄႈ၊ မိုဝ်းမၼ်းၼၼ်ႉ လီမႃးပဵၼ်ၸိူဝ်ႉၼင်ႇမိုဝ်းတၢင်ႇၶွၼ်ဢေႃႈ။- 11ၶဝ်ၼၼ်ႉတဵမ်ဝႆႉတင်းတေႃးသႃႉ တၢင်းၸႂ်မႆႈၶႆႈၸႃႉသေလႄႈ တၵ်းလႆႈႁဵတ်းၸိူဝ်ႉၼင်ႇႁိုဝ်တီႈယေႇသူႉဝႃႈၼႆ၊ ၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်လၢတ်ႈၸႃၵၼ်ဢေႃႈ။

ၸဝ်ႈယေႇသူႉလိူၵ်ႈတမၢၼ်ႇၸဝ်ႈသိပ်းသွင်ပႃး

(တူၺ်း၊ မၢတ်ႈ 10:1-4။ မႃႇ 3:13-19)

12ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ၼင်ႇႁိုဝ်တၵ်းလႆႈႁဵတ်းသူးတွင်းပထၼႃႇၸိုင်၊ မၼ်းၸဝ်ႈၶိုၼ်ႈၵႂႃႇၵႃႈၼိူဝ်လွႆပုၼ်ႉလႄႈ ႁဵတ်းသူးတွင်းပထၼႃႇတီႈၽြႃးပဵၼ်ၸဝ်ႈယူႇတင်းၶိုၼ်းဢေႃႈ။- 13မိူဝ်ႈဢၼ်မိူင်းလႅင်းမႃးၸိုင်၊ မၼ်းၸဝ်ႈႁွင်ႉဢဝ်တပႄးၸဝ်ႈတင်းလၢႆလႄႈ လိူၵ်ႈၵဵပ်းဢဝ်သိပ်းသွင်ပႃးယဝ်ႉၸင်ႇ၊ ႁွင်ႉႁဵၵ်ႈၶဝ်ဝႃႈ တမၢၼ်ႇၸဝ်ႈဢေႃႈ။- 14ၸိုဝ်ႈသဵင်ၶဝ်ၼၼ်ႉၸမ်ႉ၊ ပဵၼ်သီႉမုၼ်ႇ ဢၼ်လႆႈႁွင်ႉႁဵၵ်ႈၸိုဝ်ႈ ပေႇတရူႉ၊ တင်းၼွင်ႉၸၢႆးမၼ်းဢၼ်ႇတရေႇ၊ ယႃႇၵုပ်ႈတင်းယူဝ်းႁၢၼ်ႇ၊ ၽီႉလိပ်ႉပူႉ တင်းပႃႇထေႃးလမႄး၊- 15မၢတ်ႈထႄႇတင်းထူဝ်းမႃႉ၊ ယႃႇၵုပ်ႈလုၵ်ႈၸၢႆးဢႃႇလၽႄး တင်းသီႉမုၼ်ႇ ဢၼ်လႆႈႁွင်ႉၸေႇလုတ်ႉ၊- 16ယူႉတႃႉ ၼွင်ႉၸၢႆးယႃႇၵုပ်ႈ တင်းယူႉတႃႉဢီႉသၵႃႇရေႇဢုတ်ႈ ဢၼ်ဢဝ်မၼ်းၸဝ်ႈဢၢပ်ႈၼၼ်ႉဢေႃႈ။

ၸဝ်ႈယေႇသူႉသင်ႇသွၼ်လႄႈယူတ်းယႃ

(တူၺ်း၊ မၢတ်ႈ 4:23-25)

17မၼ်းၸဝ်ႈဢိၵ်ႇတင်းၶဝ်ၼၼ်ႉလူင်းသေၵႃႈၼိူဝ်လွႆမႃးလႄႈ ၸုၵ်းယူႇၵႃႈတီႈလိၼ်ပဵင်းဢေႃႈ။ မၼ်းၸဝ်ႈမီးတင်းတပႄးၸဝ်ႈၼမ်ၼႃႇ ဢိၵ်ႇတင်းၶဝ်ၸိူဝ်းဢၼ်လုၵ်ႉသေၵႃႈတီႈၸႃႉၸဵမ် ဝဵင်းယေႇရူႉသလႅမ်ႇ တင်းမိူင်းယူႉတႃႉ တင်းၵႃႈႁိမ်းၽင်ႇပၢင်ႇလၢႆႇ ဝဵင်းတူႉရူႉ တင်းဝဵင်းၸီႉတုမ်ႇ ၵူႈတီႈၵူႈလႅၼ် မႃးႁႂ်ႈလႆႈထွမ်ႇလႆႈငိၼ်းတြႃးလႄႈ ၶၢမ်ႇတၢင်းဢၼ်တၢင်းၶႆႈတၢင်းပဵၼ်ၶဝ်ႁၢႆတင်းလၢႆၼၼ်ႉဢေႃႈ။- 18ၶဝ်ၸိူဝ်းဢၼ်ၽီၵူဝ်ႈၵိူၵ်ႇၼိၵ်ႈၸၢၵ်ႈငႅၼ်းသႄးၼၼ်ႉၵေႃႈ လႆႈၵတ်းယဵၼ်ၶျၢမ်းသႃႇဢေႃႈ။- 19ပိူဝ်ႈဢၼ်တၼ်းၶူဝ်းဢွၵ်ႇၵႃႈၼႂ်းမၼ်းၸဝ်ႈႁႂ်ႈၵူၼ်းတင်းသဵင်ႈတင်းလူင်ၵတ်းယဵၼ်ၶျၢမ်းသႃႇလႄႈ ၵူၼ်းဢၼ်ၸူႉဢၼ်တုမ်တင်းလၢႆ ၵျၢမ်ႇႁႃႁႂ်ႈလႆႈတိူဝ်ႉမၼ်းၸဝ်ႈဢေႃႈ။

မင်ႇၵလႃႇဢိၵ်ႇတင်းဢႃႉမင်ႇၵလႃႇ

(တူၺ်း၊ မၢတ်ႈ 5:1-12)

20မိူဝ်ႈၼၼ်ႉ မၼ်းၸဝ်ႈႁႅၼ်တူၺ်းတပႄးၸဝ်ႈၸိူဝ်းၼၼ်ႉလႄႈဝႃႈ၊ သူၸိူဝ်းဢၼ်ယၢၵ်ႈဢၼ်ၽၢၼ်ၼႆႉ မီးမင်ႇၵလႃႇဢေႃႈ။ လွင်ႈမၼ်းၸမ်ႉ မိူင်းၽြႃးပဵၼ်ၸဝ်ႈပဵၼ်မိူင်းသူဢေႃႈ။- 21သူၸိူဝ်းဢၼ်ဢိုပ်းယၢၵ်ႈတေႃႈလဵဝ်ၼႆႉ မီးမင်ႇၵလႃႇဢေႃႈ။ လွင်ႈမၼ်းၸမ်ႉ သူတၵ်းႁွတ်ႈထိုင်တၢင်းဢၼ်လိူင်ႇၸႂ်ဢေႃႈ။ သူၸိူဝ်းဢၼ်ႁွင်ႉႁႆႈတေႃႈလဵဝ်ၼႆႉ မီးမင်ႇၵလႃႇဢေႃႈ။ လွင်ႈမၼ်းၸမ်ႉ သူတၵ်းလႆႈၶူဝ်ဢေႃႈ။

22ၵွပ်ႈပိူဝ်ႈလုၵ်ႈၵူၼ်းလႄႈ မိူဝ်ႈဢၼ်ပိူၼ်ႈၸင်းသူ၊ မိူဝ်ႈဢၼ်ၶဝ်ၽၢတ်ႇၵၼ်တင်းသူလႄႈ သႄႉသွမ်းယႃႉသရေႇသူၼၼ်ႉၸိုင်၊ သူမီးမင်ႇၵလႃႇဢေႃႈ။- 23ၼႂ်းဝၼ်းမိူဝ်ႈၼၼ်ႉ မီးတၢင်းဢၼ်သိူဝ်းပျေႃႇတႃႉ။ မီးတင်းၸႂ်ဢၼ်သိူဝ်းၸူမ်းလႄႈၵျွၵ်းဝႅၼ်တႃႉ။ လွင်ႈမၼ်းၸမ်ႉ ဢၵျူဝ်းသူယႂ်ႇၼႃႇၵႃႈတီႈၼႂ်းမိူင်းၵၢင်ႁၢဝ်ပုၼ်ႉဢေႃႈ။ ပူႇပေႃႈၶဝ်ၼၼ်ႉႁဵတ်းတီႈပရေႃးၽႅတ်ႈတင်းလၢႆ မိူၼ်ၸိူဝ်ႉၼင်ႇၼႆဢေႃႈ။

24သူၸိူဝ်းဢၼ်ၸၢင်ႈမၢၵ်ႈၸၢင်ႈမီးၼႆႉ မီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူလႆႈၶၢမ်ႇတၢင်းဢၼ်သၢၵ်ႈသႃႇသူဢေႃႈ။- 25သူၸိူဝ်းဢၼ်လႆႈၵိၼ်ဢိမ်ႇၵိၼ်တဵမ်ၼႆႉ မီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူတၵ်းႁွတ်ႈထိုင်တၢင်းဢၼ်ဢိုပ်းဢၼ်ယၢၵ်ႈဢေႃႈ။ သူၸိူဝ်းဢၼ်ၶူဝ်တေႃႈလဵဝ်ၼႆႉ မီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူတၵ်းၶၢင်းၶီၶၢင်းၽၢၼ်လႄႈႁွင်ႉႁႆႈဢေႃႈ။- 26မိူဝ်ႈဢၼ်ၵူၼ်းတင်းလၢႆယွင်ႈယေႃးသူၸိုင် သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ ပူႇပေႃႈၶဝ်ၼၼ်ႉ ႁဵတ်းတီႈမိၵ်ႉသႃႇပရေႃးၽႅတ်ႈတင်းလၢႆမိူၼ်ၸိူဝ်ႉၼင်ႇၼႆယဝ်ႉ။

သင်ႇသွၼ်ႁႂ်ႈႁၵ်ႉရၢၼ်ႇသူႇ

(တူၺ်း၊ မၢတ်ႈ 5:38-48။ မၢတ်ႈ 7:12)

27ၵဝ်ဝႃႈတီႈသူၸိူဝ်းဢၼ်ငိၼ်းၵႂၢမ်းၵဝ်ၼႆႉၸမ်ႉ၊ ႁၵ်ႉရၢၼ်ႇသူႇသူတႃႉ။ ႁဵတ်းၵျေးၸူးတီႈၶဝ်ၸိူဝ်းဢၼ်ၸင်းသူၼၼ်ႉတႃႉ။- 28ႁဵတ်းမႅတ်ႈတႃႇ တီႈၶဝ်ၸိူဝ်းဢၼ်ၵိၼ်ႇလႃႇသူၼၼ်ႉတႃႉ။ သူးတွင်းပုၼ်ႈၶဝ်ၸိူဝ်းဢၼ်ယႃႉယူၵ်ႉသူၼၼ်ႉတႃႉ။- 29တီႈၵေႃႉဢၼ်တူပ်းၵႅမ်ႈမႂ်းၽၢၵ်ႇၼိုင်ႈၼၼ်ႉ၊ ပၼ်ၵႅမ်ႈမႂ်းၽၢၵ်ႇၼိုင်ႈထႅင်ႈလူးၵွၼ်ႇတႃႉ။ တီႈၵေႃႉဢၼ်သိမ်းဢဝ်ၽႃႈဝႆမႂ်းၼၼ်ႉၵေႃႈ ယႃႇပေႁၢမ်ႈတၢပ်ႈႁႄႉၶႅၼ်မၼ်း ဢဝ်သိူဝ်ႈမႂ်းထႅင်ႈၼၼ်ႉ။

30ၽူႈလႂ်သေဢမ်ႇဝႃႈ၊ ၵေႃႉဢၼ်ယွၼ်းတီႈမႂ်းၼၼ်ႉၸိုင်၊ ပၼ်တႃႉ။ တီႈၶဝ်ၸိူဝ်းဢၼ်သိမ်းဢဝ်ၶူဝ်းလဵင်းမႂ်းၼၼ်ႉ ယႃႇပေၶိုၼ်းယွၼ်းဢဝ်။- 31ၵႃႈၼင်ႇဢၼ်သူၶႂ်ႈႁႂ်ႈပိူၼ်ႈႁဵတ်းတီႈသူၼၼ်ႉ၊ သူႁဵတ်းတီႈပိူၼ်ႈတႃႉ။

32ပေႃးသူႁၵ်ႉၶဝ်ၸိူဝ်းဢၼ်ႁၵ်ႉသူၼၼ်ႉၵူၺ်းၸိုင်၊ တၵ်းမီးၵျေးၸူးဢၼ်လႂ်။ ၶဝ်ၸိူဝ်းဢၼ်ႁၢႆႉဢၼ်ႁုၵ်းၼၼ်ႉ ႁၵ်ႉၶဝ်ၸိူဝ်းဢၼ်ႁၵ်ႉၶဝ်ၼၼ်ႉယူႇ ဢမ်ႇၸႂ်ႈႁိုဝ်။- 33ပေႃးသူႁဵတ်းၵျေးၸူးတီႈၶဝ် ၸိူဝ်းဢၼ်ႁဵတ်းၵျေးၸူးတီႈသူၼၼ်ႉၵူၺ်းၸိုင်၊ တၵ်းမီးၵျေးၸူးဢၼ်လႂ်။ ၶဝ်ၸိူဝ်းဢၼ်ႁၢႆႉဢၼ်ႁုၵ်းၼၼ်ႉ ႁဵတ်းထၢၼ်ႇၼႆႉယူႇဢမ်ႇၸႂ်ႈႁိုဝ်။- 34ပေႃးသူပၼ်ၵူႈပၼ်ယိမ်တီႈပိူၼ်ႈတၢင်ႇၵေႃႉလႄႈမုင်ႈထႃႈမွင်းထႃႈ လွင်ႈဢၼ်ၶဝ်တၵ်းတႅၼ်းၶိုၼ်းၼၼ်ႉယူႇၸိုင်၊ တၵ်းမီးၵျေးၸူးဢၼ်လႂ်။ ၶဝ်ၸိူဝ်းဢၼ်ႁၢႆႉဢၼ်ႁုၵ်းၼၼ်ႉၸၢင်ႈပၼ်ၵူႈပၼ်ယိမ် တီႈၶဝ်ၸိူဝ်းဢၼ်ႁၢႆႉဢၼ်ႁုၵ်းၼင်ႇၵၼ်ၼၼ်ႉ ႁႂ်ႈလႆႈၶၢမ်ႇၵျေးၸူးတၢင်းဢၼ်တႅၼ်းၶိုၼ်းၼၼ်ႉယူႇဢေႃႈ။- 35သူၸမ်ႉ၊ ႁၵ်ႉရၢၼ်ႇသူႇသူတႃႉ။ ႁဵတ်းၵျေးၸူးတႃႉ။ ယင်းဢမ်ႇမီးတီႈဢၼ်မုင်ႈထႃႈမွင်းထႃႈသေၸိူဝ်ႉသေပိူင်လႄႈ ပၼ်ၵူႈပၼ်ယိမ်တႃႉ။ ပေႃးႁဵတ်းၸိူဝ်ႉၼင်ႇၼႆၸိုင် ဢၵျူဝ်းသူတၵ်းယႂ်ႇဢေႃႈ။ သူတၵ်းပဵၼ်လုၵ်ႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢေႃႈ။ လွင်ႈမၼ်းၸမ်ႉ မၼ်းၸဝ်ႈႁဵတ်းၵျေးၸူးတီႈၶဝ်ၸိူဝ်းဢၼ်ဢမ်ႇႁူႉၵျေးၸူးၸဝ်ႈ ဢိၵ်ႇတင်းၶဝ်ၸိူဝ်းဢၼ်မီးသၽေႃးဢၼ်ႁၢႆႉဢၼ်ႁုၵ်းတင်းလၢႆၼၼ်ႉယူႇဢေႃႈ။- 36ပိူဝ်ႈၼႆလႄႈ ၸိူဝ်ႉၼင်ႇဢၼ်ပေႃႈသူမီးၸႂ်ဢၼ်ဢဵတ်းလူၼၼ်ႉ၊ သူၵေႃႈမီးၸႂ်ဢၼ်ဢဵတ်းလူတႃႉ။

လွင်ႈတၢင်းဢၼ်တႅပ်းတတ်းတြႃး

(တူၺ်း၊ မၢတ်ႈ 7:1-5)

37ယႃႇပေၸီႇယၢင်ႇပိူၼ်ႈ။ ပေႃးသူဢမ်ႇႁဵတ်းၸိုင်၊ သူတၵ်းၵၢင်းလွတ်ႈတင်းတၢင်းဢၼ်ၸီႇယၢင်ႇဢေႃႈ။ ယႃႇပေၸီႇယၢင်ႇဢပႅတ်ႈတီႈပိူၼ်ႈ။ ပေႃးဢမ်ႇႁဵတ်းၸိုင် သူတၵ်းၵၢင်းလွတ်ႈတင်းတၢင်းဢၼ်ၸီႇယၢင်ႇဢပႅတ်ႈဢေႃႈ။ ပွႆႇလွတ်ႈဢပႅတ်ႈပိူၼ်ႈတႃႉ။ ပေႃးသူပွႆႇလွတ်ႈၸိုင် ဢပႅတ်ႈသူတၵ်းလွတ်ႈဢေႃႈ။

38ပၼ်တီႈပိူၼ်ႈတၢင်ႇၵေႃႉတႃႉ။ ပေႃးသူပၼ်ၸိုင်၊ ပိူၼ်ႈတၢင်ႇၵေႃႉၼၼ်ႉ တၵ်းပၼ်တီႈသူဢေႃႈ။ တၢင်းဢၼ်တူင်ပဵင်းတဵမ်တဵမ်ၵူၺ်းဢမ်ႇၵႃး၊ တၢင်းဢၼ်သတ်ႉၼဵၵ်းယူႇ၊ သၼ်ႇၶွၼ်းယူႇ၊ လူၼ်ႉလိူဝ်ယူႇၼၼ်ႉၸိုင်၊ ၶဝ်တၵ်းပၼ်ၵႃႈၼႂ်းႁူဝ်ဢူၵ်းသူဢေႃႈ။ သူပၼ်တီႈပိူၼ်ႈဢၼ်တူင်ဢၼ်တႅၵ်ႈၵႃႈႁိုဝ်သေဢမ်ႇဝႃႈ၊ သူတၵ်းလႆႈၶၢမ်ႇ ၵႃႈၼင်ႇဢၼ်တူင်ဢၼ်တႅၵ်ႈၼၼ်ႉဢေႃႈ။

39ဢူႉပမႃႇၸမ်ႉ၊ ၵူၼ်းတႃမွတ်ႇတၵ်းၼႄပၼ်သဵၼ်ႈတၢင်းတီႈၵူၼ်းတႃမွတ်ႇလႆႈႁိုဝ်။ တင်းသွင်ၵေႃႉတၵ်းတူၵ်းၵႃႈၼႂ်းလုၵ်းၼႂ်းၶုမ် ဢမ်ႇၸႂ်ႈႁိုဝ်။- 40တပႄးဢမ်ႇပူၼ်ႉလိူဝ်သေသြႃႇ။ တပႄးဢၼ်သင်ႇသွၼ်ဢဝ်မူတ်းမူတ်းသဵင်ႈသဵင်ႈယဝ်ႉၵူႈၵေႃႉၵူႈၵူၼ်း တၵ်းပဵၼ်ၸိူဝ်ႉၼင်ႇသြႃႇမၼ်းဢေႃႈ။

41မႂ်းယင်းဢမ်ႇၶုၵ်းၸႂ်လႆႈၶႆႈၸႂ်ထူပ်း သဵၼ်ႈဢၼ်မီးယူႇၵႃႈၼႂ်းမၢၵ်ႇတႃမႂ်းလႄႈ၊ ႁဵတ်းသင်လႄႈတူၺ်းမုၼ်ႈဢၼ်မီးယူႇၵႃႈၼႂ်းမၢၵ်ႇတႃပီႈၼွင်ႉမႂ်းၼၼ်ႉၼင်ႇႁိုဝ်။- 42ယင်းဢမ်ႇႁၼ်သဵၼ်ႈဢၼ်မီးယူႇၵႃႈၼႂ်းမၢၵ်ႇတႃမႂ်းလႄႈ တၵ်းလၢတ်ႈတီႈပီႈၼွင်ႉမႂ်းလႄႈဝႃႈ၊ ပီႈၼွင်ႉဢိူၺ်း၊ ႁႂ်ႈၵဝ်လႆႈဢဝ်မုၼ်ႈဢၼ်မီးယူႇၵႃႈၼႂ်းမၢၵ်ႇတႃမႂ်းၼၼ်ႉဢွၵ်ႇသေၵမ်း၊ ဝႃႈၼင်ႇၼႆၼင်ႇႁိုဝ်။ ၵူၼ်းဢၼ်ၸၢင်ႈထိမ်ႇၸၢင်ႈမႅပ်းၼႆႉဢိူၺ်း၊ ဢဝ်သဵၼ်ႈဢၼ်မီးယူႇၵႃႈၼႂ်းမၢၵ်ႇတႃမႂ်းၼၼ်ႉ ဢွၵ်ႇပႅတ်ႈသေဢွၼ်တၢင်းတႃႉ။ လိုၼ်းၼၼ်ႉၸင်ႇ၊ ၼင်ႇႁိုဝ်တၵ်းလႆႈဢဝ်မုၼ်ႈဢၼ်မီးယူႇၵႃႈၼႂ်းမၢၵ်ႇတႃပီႈၼွင်ႉမႂ်းၼၼ်ႉဢွၵ်ႇၸိုင်၊ ၸင်ႇတၵ်းႁၼ်လီလီဢေႃႈ။

လွင်ႈတူၼ်ႈတင်းမၢၵ်ႇမၼ်း

(တူၺ်း၊ မၢတ်ႈ 7:16-20။ မၢတ်ႈ 12:33-35)

43တူၼ်ႈဢၼ်လီ ဢၼ်ၸၢင်ႈမၢၵ်ႇမၢၵ်ႇဢၼ်ဢမ်ႇလီၼၼ်ႉ ဢမ်ႇမီးသေတူၼ်ႈ။ တူၼ်ႈဢၼ်ဢမ်ႇလီ ဢၼ်ၸၢင်ႈမၢၵ်ႇမၢၵ်ႇဢၼ်လီၼၼ်ႉ ဢမ်ႇမီးသေတူၼ်ႈ။- 44တူၺ်းမၢၵ်ႇတူၼ်ႈၵူႈတူၼ်ႈလႄႈ တၵ်းႁူႉလွင်ႈသၽေႃးတူၼ်ႈၸိူဝ်းၼၼ်ႉဢေႃႈ။ ဢမ်ႇၸၢင်ႈဝိတ်းဢဝ်မၢၵ်ႇလိူဝ်ႇသၢင်းၽေႃး ၵႃႈတီႈတူၼ်ႈၼၢမ်။ ဢမ်ႇၸၢင်ႈဝိတ်းဢဝ်မၢၵ်ႇၸပိတ်ႈ ၵႃႈတီႈတူၼ်ႈၼၢမ်လိၼ်။- 45ၵေႃႉဢၼ်လီၼၼ်ႉၸိုင်၊ ၸၢင်ႈဢဝ်လွင်ႈတၢင်းဢၼ်လီၵႃႈၼႂ်းတိူၵ်ႈၽၼ်ႇတႃႇႁူဝ်ၸႂ်ဢၼ်လီမၼ်းၼၼ်ႉဢွၵ်ႇလႄႈ ၼႄပျႃးဢေႃႈ။ ၵေႃႉဢၼ်ႁၢႆႉၼၼ်ႉၸိုင်၊ ၸၢင်ႈဢဝ်လွင်ႈဢၼ်ႁၢႆႉ ၵႃႈၼႂ်းတိူၵ်ႈၽၼ်ႇတႃႇႁူဝ်ၸႂ်ဢၼ်ႁၢႆႉမၼ်းၼၼ်ႉဢွၵ်ႇလႄႈ ၼႄပျႃးဢေႃႈ။ လွင်ႈမၼ်းၸမ်ႉ သူပ်းၸၢင်ႈမွၵ်ႇလၢတ်ႈၸွမ်း ၵႃႈၼင်ႇဢၼ်မီးတဵမ်ဝႆႉၵႃႈၼႂ်းႁူဝ်ၸႂ်ၼၼ်ႉဢေႃႈ။

လွင်ႈၵူၼ်းသွင်ၵေႃႉဢၼ်ႁဵတ်းႁိူၼ်း

(တူၺ်း၊ မၢတ်ႈ 7:24-27)

46သူယင်းဢမ်ႇထွမ်ႇဢဝ်ၵႂၢမ်းၵဝ်လႄႈ ႁဵတ်းႁိုဝ်လႄႈႁွင်ႉၵဝ်လႄႈဝႃႈ၊ၸဝ်ႈႁဝ်း၊ၸဝ်ႈႁဝ်း၊ ဝႃႈၼင်ႇၼႆၼင်ႇႁိုဝ်။- 47ၵေႃႉဢၼ်မႃးၵႃႈတီႈၵဝ်လႄႈ ငိၼ်းၵႂၢမ်းၵဝ်သေယဝ်ႉထွမ်ႇဢဝ်ၼၼ်ႉ မိူၼ်ၵၼ်တင်းၵူၼ်းၸိူဝ်ႉၼင်ႇႁိုဝ်ၼၼ်ႉဝႃႈၼႆၸမ်ႉ၊- 48မိူၼ်ၸိူဝ်ႉၼင်ႇ ၵူၼ်းၵေႃႉၼိုင်ႈ ဢၼ်ယၢမ်းမိူဝ်ႈဢၼ်မၼ်းႁဵတ်းႁိူၼ်းတိူၵ်ႈၼၼ်ႉၸိုင်၊ ၶုတ်းလိုၵ်ႉၼႃႇလူင်လၢင်သေလႄႈ ၶျႃးဝႆႉငဝ်ႈႁၢၵ်ႈတိူၵ်ႈၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။ မိူဝ်ႈဢၼ်ၼမ်ႉၼွင်းလႄႈမႃးထူဝ်းႁိူၼ်းတိူၵ်ႈၼၼ်ႉၸိုင် ၵွပ်ႈပိူဝ်ႈဢၼ်တႄႇဝႆႉၵႃႈၼိူဝ်မၢၵ်ႇႁိၼ်လႄႈ ဢမ်ႇတူင်ႉဢမ်ႇၶွၼ်းလႆႈ။- 49ၵေႃႉဢၼ်ငိၼ်းၵႂၢမ်းၵဝ်လႄႈ ဢမ်ႇထွမ်ႇဢဝ်ၼၼ်ႉၸမ်ႉ၊ မိူၼ်ၸိူဝ်ႉၼင်ႇ ၵေႃႉဢၼ်ႁဵတ်းႁိူၼ်းတိူၵ်ႈၵႃႈၼိူဝ်လိၼ်လႄႈ ဢမ်ႇပႃးငဝ်ႈႁၢၵ်ႈမၼ်းၼၼ်ႉဢေႃႈ။ မိူဝ်ႈဢၼ်ၼမ်ႉၼွင်းလႄႈမႃးထူဝ်းႁိူၼ်းတိူၵ်ႈၼၼ်ႉၸိုင် လူမ်ႉပင်းၵႂႃႇၵမ်းလဵဝ်ဢေႃႈ။ တၢင်းဢၼ်လူမ်ႉဢၼ်ပင်းႁိူၼ်းတိူၵ်ႈၼၼ်ႉယႂ်ႇၼႃႇဢေႃႈ၊ ဝႃႈၼႆ၊ မၼ်းၸဝ်ႈႁေႃးလၢတ်ႈဝႃႈၼင်ႇၼႆဢေႃႈ။

বর্তমানে নির্বাচিত:

လူႉၵႃႇ 6: CBMS

হাইলাইট

কপি