လူႉၵႃႇ 4

ၸဝ်ႈယေႇသူႉၶၢမ်ႇတၢင်းၸၢမ်းတူၺ်း

(တူၺ်း၊ မၢတ်ႈ 4:1-11။ မႃႇ 1:12-13)

1 ယေႇသူႉပျေႉၸုမ်ႇတင်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇသေလႄႈ ၼႂ်းမိူဝ်ႈဢၼ်လုၵ်ႉသေၵႃႈတီႈၼမ်ႉႁွင်ႈယေႃးတၢၼ်ႇ ၶိုၼ်းမိူဝ်းယူႇၼၼ်ႉၸိုင်၊ ဝီႉၺိၺ်ႇၸဝ်ႈဢဝ်ၵႂႃႇသူင်ႇၵႃႈတီႈၼႂ်းထိူၼ်ႇဢေႃႈ။- 2သီႇသိပ်းဝၼ်းတဵမ်တဵမ် မၼ်းၸဝ်ႈၶၢမ်ႇတၢင်းဢၼ်မႃႇၼၢတ်ႈၸၢမ်းတူၺ်းၸူဝ်းဢဝ်ဢေႃႈ။ ၼႂ်းၶိင်ႇမိူဝ်ႈၼၼ်ႉတဵမ်တဵမ်မၼ်းၸဝ်ႈဢမ်ႇၵိၼ်တၢင်းၵိၼ်တၢင်းၶူပ်း။ ပူၼ်ႉသေၶိင်ႇၼၼ်ႉယဝ်ႉၸင်ႇ၊ တွင်ႉမႆႈဢေႃႈ။

3မႃႇၼၢတ်ႈလဝ်ႊလၢတ်ႈလႄႈဝႃႈ၊ ပေႃးၸဝ်ႈႁဝ်းၸႂ်ႈလုၵ်ႈၽြႃးပဵၼ်ၸဝ်ႈၸိုင်၊ မီးဢမိင်ႉတီႈမၢၵ်ႇႁိၼ်ၼႆႉႁႂ်ႈပဵၼ်ၶဝ်ႈမုၼ်းသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊- 4ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ ၵူၼ်းတၵ်းလႆႈဢဝ်တင်းၶဝ်ႈမုၼ်းၵူၺ်းလဵင်ႉၸႂ်ဢမ်ႇၸႂ်ႈ၊ မႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

5ၵမ်းၼၼ်ႉ မႃႇၼၢတ်ႈသမ်ႉဢဝ်မၼ်းၸဝ်ႈၵႂႃႇၵႃႈၼိူဝ်လွႆဢၼ်သုင်လႄႈ ၼႄပျႃးမိူင်းတင်းသဵင်ႈတင်းလူင် ၵႃႈဢၼ်မီးၵႃႈၼႂ်းလေႃးၵႃႉၼႆႉတီႈမၼ်းၸဝ်ႈၵမ်းလဵဝ်သေလႄႈ လဝ်ႊလၢတ်ႈလႄႈဝႃႈ၊- 6မုၼ်တၼ်းၶူဝ်းဢႃႇၼူႉၽေႃႇၵႃႈမီးၸိူဝ်းၼႆႉၸိုင်၊ ၵွပ်ႈပိူဝ်ႈဢၼ်ဢၢပ်ႈဝႆႉတီႈၵဝ်ယဝ်ႉဢိၵ်ႇတင်း ၵွပ်ႈပိူဝ်ႈဢၼ်ၵဝ်ပၼ်တီႈၵေႃႉဢၼ်ၵဝ်ၶႂ်ႈပၼ်ၼၼ်ႉလႄႈ၊ ၵဝ်တၵ်းပၼ်တီႈၸဝ်ႈႁဝ်းဢေႃႈ။- 7ပိူဝ်ႈၼႆလႄႈ ပေႃးၸဝ်ႈႁဝ်းၵူဝ်းၵႂၢႆႇၵဝ်ၸိုင်၊ ၵႃႈမီးတင်းသဵင်ႈတင်းလူင်ၸိူဝ်းၼႆႉတၵ်းပဵၼ်ၶွင်ၸဝ်ႈႁဝ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 8ယေႇသူႉၵေႃႈ ၶိုၼ်းလၢတ်ႈလႄႈဝႃႈ၊ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ မႂ်းတၵ်းလႆႈၵူဝ်းၵႂၢႆႇၽြႃးပဵၼ်ၸဝ်ႈမႂ်းထႃႇဝရႃႉၽြႃးဢေႃႈ။ တၵ်းလႆႈႁဵတ်းဝၢတ်ႈတီႈမၼ်းၸဝ်ႈၼၼ်ႉၵူၺ်း၊မႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

9ၵမ်းၼၼ်ႉ မႃႇၼၢတ်ႈသမ်ႉဢဝ်မၼ်းၸဝ်ႈၵႂႃႇသူင်ႇၵႃႈတီႈ ဝဵင်းယေႇရူႉသလႅမ်ႇလႄႈ တၢင်ႇဝႆႉၵႃႈၼိူဝ်ပၢႆၸိၵ်းၸွမ်ပိၵ်ႈမၢၼ်ႇၸဝ်ႈယဝ်ႉၸင်ႇ၊ လဝ်ႊလၢတ်ႈလႄႈဝႃႈ၊ ပေႃးၸဝ်ႈႁဝ်းၸႂ်ႈလုၵ်ႈၽြႃးပဵၼ်ၸဝ်ႈၸိုင်၊ ၸဝ်ႈႁဝ်းဢဝ်တူဝ်ၸဝ်ႈၵဝ်ႇပွႆႇသေၵႃႈတီႈၼိူဝ်ၼႆႉတူၵ်းၵႃႈတႂ်ႈသေၵမ်း။- 10ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ ၼင်ႇႁိုဝ်တၵ်းပႂ်ႉလူပႂ်ႉတူၺ်းမႂ်းၸိုင်၊ မၼ်းၸဝ်ႈတၵ်းသင်ႇလၢတ်ႈလွင်ႈမႂ်းဝႆႉ တီႈတမၢၼ်ႇၵၢင်ႁၢဝ်တင်းလၢႆလႄႈ၊- 11ၼင်ႇႁိုဝ်ၶဝ်တၵ်းဢမ်ႇပၼ်ႁႂ်ႈတိၼ်မႂ်းတိူဝ်ႉမၢၵ်ႇႁိၼ်ၸိုင်၊ ၶဝ်တၵ်းဢဝ်တင်းမိုဝ်းႁႄႉႁွပ်ႇယွင်ႈဢဝ်မႂ်းဢေႃႈ၊ မႃးၼင်ႇၼႆယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 12ယေႇသူႉၵေႃႈ ၶိုၼ်းလၢတ်ႈလႄႈဝႃႈ၊ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ မႂ်းဢမ်ႇလႆႈႁဵတ်းတၢင်းဢၼ်ၸၢမ်းတူၺ်းၽြႃးပဵၼ်ၸဝ်ႈမႂ်းထႃႇဝရႃႉၽြႃး မႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။- 13မႃႇၼၢတ်ႈၼၼ်ႉ မိူဝ်ႈဢၼ်ႁဵတ်းတၢင်းဢၼ်ၸၢမ်းတူၺ်းၸူဝ်းဢဝ်တင်းသဵင်ႈတင်းလူင်ၼၼ်ႉယဝ်ႉတူဝ်ႈၸိုင်၊ ဢွၵ်ႇၵႂႃႇသေၵႃႈတီႈမၼ်းၸဝ်ႈလႄႈ ယူႇၶိင်ႇႁိုင်တၢၼ်ႇတၢၼ်ႇဢေႃႈ။

ၸဝ်ႈယေႇသူႉတႄႇၸႃႉၵၢၼ်ငၢၼ်းၸဝ်ႈ

(တူၺ်း၊ မၢတ်ႈ 4:12-17။ မႃႇ 1:14-15)

14 ယေႇသူႉၼၼ်ႉ ပႃးတင်းတၼ်းၶူဝ်းဝီႉၺိၺ်ႇၸဝ်ႈ ၶိုၼ်းမိူဝ်းၵႂႃႇၵႃႈတီႈမိူင်းၵႃႇလီႉလႄးပုၼ်ႉလႄႈ သတၢင်းသဵင်ၶၢဝ်ႇမၼ်းၸဝ်ႈၸွတ်ႇတူဝ်ႈၵႃႈတီႈႁိမ်းႁွမ်းၼၼ်ႉၵူႈတီႈၵူႈလႅၼ်ဢေႃႈ။- 15မၼ်းၸဝ်ႈသင်ႇသွၼ်ပၼ်ၵႃႈတီႈၼႂ်းၸရွပ်ႈႁေႃးတြႃးတင်းလၢႆလႄႈ ၵူၼ်းတင်းသဵင်ႈတင်းလူင်ယွင်ႈယေႃးမၼ်းၸဝ်ႈဢေႃႈ။

ၵူၼ်းဝဵင်းၼႃႇၸရႅတ်ႈဢမ်ႇတွၼ်ႈႁပ်ႉၸဝ်ႈယေႇသူႉ

(တူၺ်း၊ မၢတ်ႈ 13:53-58။ မႃႇ 6:1-6)

16မိူဝ်ႈဢၼ် ၶိုၼ်းႁွတ်ႈထိုင်ၵႃႈတီႈဝဵင်းၼႃႇၸရႅတ်ႈ တီႈဢၼ်မၼ်းၸဝ်ႈယႂ်ႇမႃးၼၼ်ႉၸိုင်၊ ၵႃႈၼင်ႇဢၼ်ထုင်းၸၢမ်ႇၸဝ်ႈမီးဝႆႉၼၼ်ႉ၊ ၼႂ်းဝၼ်းၵမ်သိၼ် မၼ်းၸဝ်ႈၶဝ်ႈၵႃႈၼႂ်းၸရွပ်ႈႁေႃးတြႃးသေလႄႈ လုၵ်ႉၸုၵ်းႁႂ်ႈလႆႈၽတ်းၵျၢမ်းလိၵ်ႈဢေႃႈ။- 17မၼ်းၸဝ်ႈႁပ်ႉၶၢမ်ႇဢဝ်ၵျၢမ်းလိၵ်ႈပရေႃးၽႅတ်ႈ ဢီႉသႃႇယႃႉ ၵႃႈတီႈပိူၼ်ႈလႄႈ၊ မိူဝ်ႈဢၼ်ၽုၺ်ႇလိတ်ႈၵျၢမ်းလိၵ်ႈၼၼ်ႉၸိုင်၊ ၵႂၢမ်းလိၵ်ႈတီႈဢၼ်ထူပ်းႁၼ်ၼၼ်ႉဝႃႈၸမ်ႉ၊- 18ဝီႉၺိၺ်ႇထႃႇဝရႃႉၽြႃးၼၼ်ႉတႄႇယူႇၼိူဝ်ၵဝ်ဢေႃႈ။ လွင်ႈမၼ်းၸမ်ႉ ၼင်ႇႁိုဝ်တၵ်းလႆႈမွၵ်ႇလၢတ်ႈသတၢင်းသိူဝ်းပျေႃႇတီႈၵူၼ်းၽၢၼ်တင်းလၢႆၼၼ်ႉၸိုင်၊ မၼ်းၸဝ်ႈပၼ်ၽိၵ်ႈသိၵ်ႈတီႈၵဝ်ယဝ်ႉ။ ၼင်ႇႁိုဝ်တၵ်းလႆႈၼႄပျႃး လွင်ႈတၢင်းဢၼ် ပွႆႇလွတ်ႈတီႈၶဝ်ၸိူဝ်းဢၼ်တီႉဢဝ်ၶင်ဝႆႉယူႇၼၼ်ႉ ဢိၵ်ႇတင်းလွင်ႈတၢင်းဢၼ်မၢၵ်ႇတႃၶိုၼ်းႁၼ် တီႈၶဝ်ၸိူဝ်းဢၼ်တႃမွတ်ႇတင်းလၢႆၼၼ်ႉလႄႈသင်၊ ၼင်ႇႁိုဝ်တၵ်းလႆႈၵႄႇသႄႇဢဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉလႄႈသင်၊- 19ၼင်ႇႁိုဝ်တၵ်းလႆႈမွၵ်ႇလၢတ်ႈၶိင်ႇၵႃႇလႃႉ ပီႊမင်ႇၵလႃႇထႃႇဝရႃႉၽြႃးလႄႈသင်၊ မၼ်းၸဝ်ႈပွႆႇၸႂ်ႉၵဝ်မႃးယဝ်ႉ၊ ဝႃႈၼင်ႇၼႆဢေႃႈ။- 20မၼ်းၸဝ်ႈဢဝ်ၵျၢမ်းလိၵ်ႈၼၼ်ႉႁမ်းၵဵၼ်လႄႈ ပၼ်တီႈၵေႃႉဢၼ်ပႂ်ႉၸရွပ်ႈႁေႃးတြႃးၼၼ်ႉယဝ်ႉၸင်ႇ၊ၼင်ႈယူႇသေဢေႃႈ။ ၶဝ်ၸိူဝ်းဢၼ်မီးယူႇၵႃႈၼႂ်းၸရွပ်ႈႁေႃးတြႃးတင်းသဵင်ႈတင်းလူင်ၼၼ်ႉ ဢွၼ်ၵၼ်ယႅၵ်ႉတူၺ်းမၼ်းၸဝ်ႈၸေးၸေးလႄႈယူႇဢေႃႈ။- 21မၼ်းၸဝ်ႈၵေႃႈလၢတ်ႈလႄႈဝႃႈ၊ ဝၼ်းမိူဝ်ႈၼႆႉ ၼႂ်းၵျၢမ်းလိၵ်ႈတီႈၼႆႈ ပျေႉၸုမ်ႇၵႃႈတီႈႁူသူဝႆႉယဝ်ႉ၊ ဝႃႈၼင်ႇၼႆဢေႃႈ။

22ၶဝ်တင်းသဵင်ႈတင်းလူင်ႁပ်ႉတုင်းဢဝ်မၼ်းၸဝ်ႈလႄႈ ဢၢမ်းလွင်ႈၵႂၢမ်းလီၵႂၢမ်းဝၢၼ်ဢၼ်ဢွၵ်ႇၵႃႈၼႂ်းသူပ်းမၼ်းၸဝ်ႈၼၼ်ႉသေလႄႈလၢတ်ႈလႄႈဝႃႈ၊ ၵေႃႉၼႆႉပဵၼ်လုၵ်ႈၸၢႆးယူဝ်းသႅပ်ႈ ဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။- 23မၼ်းၸဝ်ႈၵေႃႈလၢတ်ႈလႄႈဝႃႈ၊ သူတၵ်းလၢတ်ႈဢူႉပမႃႇတီႈၵဝ်ဢမၢၼ်ႇၶၼ်ပဵၼ်လႄႈဝႃႈ၊ မေႃယႃဢိူၺ်း၊ ႁႂ်ႈတၢင်းၶႆႈတၢင်းပဵၼ်တူဝ်ၸဝ်ႈၵဝ်ႇႁၢႆတႃႉ။ ၵႃႈဢၼ်ႁဝ်းလႆႈငိၼ်းလွင်ႈဢၼ်မႂ်းႁဵတ်းၵႃႈၼႂ်းဝဵင်းၵပိူဝ်ႇၼေႇဢုမ်ႇပုၼ်ႉ တင်းသဵင်ႈတင်းလူင်ၼၼ်ႉၸိုင်၊ ၵႃႈၼႂ်းဝဵင်းတူဝ်ၸဝ်ႈၵဝ်ႇၼႆႉၵေႃႈႁဵတ်းသေၵမ်းတႃႉ၊ ဝႃႈၼင်ႇၼႆဢေႃႈ။- 24ၼႂ်းဝႃႈၼၼ်သေၵေႃႈ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ပရေႃးၽႅတ်ႈၵေႃႉလႂ်သေဢမ်ႇဝႃႈ၊ ဢမ်ႇၸၢင်ႈလႆႈၼႃႈလႆႈတႃၵႃႈတီႈမိူင်းတူဝ်ၸဝ်ႈၵဝ်ႇ။- 25ၵဝ်သမ်ႉဝႃႈတီႈၸိုဝ်ႈတီႈၸႂ်ႈထႅင်ႈၸမ်ႉ၊ ၼႂ်းၸူဝ်ႈပၢၼ်ပရေႃးၽႅတ်ႈဢေးလီႉယႃႉၼၼ်ႉ၊ မိူဝ်ႈဢၼ်ၽႃႉလႅင်ႉသၢမ်ပီႊပၢႆႁူၵ်းလိူၼ်တဵမ်တဵမ်လႄႈ ၵႃႈတီႈမိူင်းၼႆႉတင်းမိူင်း ပဵၼ်လွင်ႈဢၼ်တၢင်းၵိၼ်တၢင်းၶူပ်းၵႃႈပႅင်းၼႃႇလူင်လၢင်ၼၼ်ႉၸိုင်၊ ၼႂ်းမိူင်းဢီႉသရေႇလႃႉၼႆႉ မီးမႄႈမူၵ်းမႄႈမၢႆႈၼမ်ၼႃႇဢေႃႈ။- 26ၼႂ်းဝႃႈၼၼ်သေၵေႃႈ ဢေးလီႉယႃႉဢမ်ႇလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇၸူးၵႃႈတီႈမႄႈမူၵ်းမႄႈမၢႆႈၸိူဝ်းၼၼ်ႉသေၵေႃႉသေၵူၼ်း။ မၼ်းလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇၸူးၵႃႈတီႈမႄႈမူၵ်းမႄႈမၢႆႈဢၼ်ပဵၼ်ၵူၼ်းဝဵင်းၸႃႇရိပ်ႉတႃႉ မိူင်းၸီႉတုမ်ႇပုၼ်ႉ ၵေႃႉလဵဝ်ၵူၺ်းဢေႃႈ။- 27ၼႂ်းၸူဝ်ႈပၢၼ်ပရေႃးၽႅတ်ႈဢေးလီႉသႄးၼၼ်ႉၵေႃႈ၊ ၵႃႈတီႈမိူင်းဢီႉသရေႇလႃႉၼႆႉ မီးၵူၼ်းပဵၼ်တုတ်ႈၼမ်ၼႃႇဢေႃႈ။ လိူဝ်သေၵူၼ်းသူႉရီႉ ဢၼ်လႆႈၸိုဝ်ႈၼေႇမၢၼ်ႇၼၼ်ႉ ၽူႈလႂ်ဢမ်ႇႁွတ်ႈထိုင်တၢင်းဢၼ်မူတ်းသႂ်သေၵေႃႉသေၵူၼ်း၊ ဝႃႈၼင်ႇၼႆဢေႃႈ။- 28ၶဝ်ၸိူဝ်းဢၼ်မီးၼႂ်းၸရွပ်ႈႁေႃးတြႃးတင်းသဵင်ႈတင်းလူင်ၼၼ်ႉ၊ မိူဝ်ႈဢၼ်ငိၼ်းၵႂၢမ်းမၼ်းၸဝ်ႈၼၼ်ႉၸိုင်၊ မီးတၢင်းဢၼ်ၸႂ်မႆႈၶႆႈၸႃႉၼႃႇလူင်လၢင်လႄႈ၊- 29လုၵ်ႉႁေႃႈမၼ်းၸဝ်ႈဢွၵ်ႇၵႂႃႇၵႃႈတီႈၼွၵ်ႈဝဵင်းယဝ်ႉၸင်ႇ၊ ၼင်ႇႁိုဝ်တၵ်းလႆႈဢီးမၼ်းၸဝ်ႈတူၵ်းပႅတ်ႈၸိုင် ဢဝ်မၼ်းၸဝ်ႈၵႂႃႇၵႃႈတီႈႁိမ်းလႅၼ်သုတ်းပၢႆလွႆတီႈဢၼ်ဝဵင်းတႄႇဝႆႉၼၼ်ႉဢေႃႈ။- 30ၵူၺ်းၵႃႈ မၼ်းၸဝ်ႈလတ်းၵႃႈၼႂ်းၶိုင်ႈၵၢင်ၶဝ်လႄႈဢွၵ်ႇၵႂႃႇသေၵႃႈတီႈၼၼ်ႈဢေႃႈ။

ၵူၼ်းဢၼ်ၽိူဝ်ႉၶဝ်ႈၵေႃႉၼိုင်ႈ

(တူၺ်း၊ မႃႇ 1:21-28)

31မၼ်းၸဝ်ႈၵႂႃႇႁွတ်ႈထိုင်ၵႃႈတီႈဝဵင်းၵပိူဝ်ႇၼေႇဢုမ်ႇ မိူင်းၵႃႇလီႉလႄးပုၼ်ႉလႄႈ ၼႂ်းဝၼ်းၵမ်သိၼ်ၸိုင်၊ သင်ႇသွၼ်ပၼ်လႄႈယူႇဢေႃႈ။- 32ပိူဝ်ႈဢၼ်ၵႂၢမ်းမၼ်းၸဝ်ႈပႃးတင်းဢႃႇၼႃႇတၼ်းၶူဝ်းလႄႈ ပရဵၵ်ႈသၢတ်ႈတင်းလၢႆဢၢမ်း လွင်ႈတၢင်းဢၼ်မၼ်းၸဝ်ႈသင်ႇသွၼ်ပၼ်ၼၼ်ႉၼႃႇလူင်လၢင်ဢေႃႈ။

33ၵႃႈၼႂ်းၸရွပ်ႈႁေႃးတြႃးၼၼ်ႉ မီးၵူၼ်းဢၼ်ၽီၵူဝ်ႈၵိူၵ်ႇၶဝ်ႈၵေႃႉၼိုင်ႈလႄႈ မၼ်းၼၼ်ႉႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊- 34ဢူဝ်းယေႇသူႉ၊ ၵူၼ်းဝဵင်းၼႃႇၸရႅတ်ႈ၊ ၸဝ်ႈႁဝ်းၸၢပ်ႈသႅင်ႇၵၼ်တင်းႁဝ်းၶႃႈၸိူဝ်ႉၼင်ႇႁိုဝ်ၶႃႈ။ ၸဝ်ႈႁဝ်းမႃးႁႂ်ႈလႆႈယႃႉပႅတ်ႈႁဝ်းၶႃႈႁိုဝ်။ လွင်ႈဢၼ်ၸဝ်ႈႁဝ်းပဵၼ်ၽူႈလႂ်ၸိုင်၊ ၵဝ်ၶႃႈႁူႉယူႇၶႃႈဢေႃႈ။ ပဵၼ်ၵူၼ်းမူတ်းၸၢင်ႇၽြႃးပဵၼ်ၸဝ်ႈၶႃႈဢေႃႈ၊ ဝႃႈၼင်ႇၼႆဢေႃႈ။- 35ယေႇသူႉၵေႃႈသင်ႇလၢတ်ႈတီႈမၼ်းလႄႈဝႃႈ၊ ယူႇတဵတ်ႇတဵတ်ႇတႃႉ။ ဢွၵ်ႇသေၵႃႈၼႂ်းမၼ်းၼႆႉၵႂႃႇတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ၽီႁၢႆႉၼၼ်ႉႁႂ်ႈၵေႃႉၼၼ်ႉလူမ်ႉတူၵ်းၵႃႈၼႂ်းၵၢင်ၶဝ်သေယဝ်ႉဢမ်ႇႁဵတ်းၽေးဢူႉပၢတ်ႈလႄႈ ဢွၵ်ႇၵႂႃႇသေဢေႃႈ။- 36ၵူၼ်းတင်းသဵင်ႈတင်းလူင်ၵႂင်ၸႂ်ယုင်ႈၸႂ်လႄႈ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်လႄႈဝႃႈ၊ ၵႂၢမ်းၼႆႉပဵၼ်ၵႂၢမ်းၸိူဝ်ႉၼင်ႇႁိုဝ်။ မၼ်းၸဝ်ႈဢဝ်တင်းဢႃႇၼႃႇတၼ်းၶူဝ်းသင်ႇဝႆႉ ၽီဢၼ်ၵူဝ်ႈၵိူၵ်ႇတင်းလၢႆလႄႈ ၶဝ်ဢွၵ်ႇၵႂႃႇလူင်ပႄႇ၊ ဝႃႈၼင်ႇၼႆဢေႃႈ။- 37သတၢင်းသဵင်ၶၢဝ်ႇမၼ်းၸဝ်ႈၼၼ်ႉၵေႃႈ ၸွတ်ႇၸႅတ်ႇၵႂႃႇၵႃႈတီႈႁိမ်းၼၼ်ႉၵူႈတီႈၵူႈလႅၼ်ဢေႃႈ။

ၸဝ်ႈယေႇသူႉႁဵတ်းႁႂ်ႈတၢင်းပဵၼ်ၵူၼ်းၼမ်ၼႃႇႁၢႆ

(တူၺ်း၊ မၢတ်ႈ 8:14-17။ မႃႇ 1:29-34)

38မၼ်းၸဝ်ႈလုၵ်ႉသေၵႃႈၼႂ်းၸရွပ်ႈႁေႃးတြႃးဢွၵ်ႇၵႂႃႇလႄႈ ၶဝ်ႈၵႃႈၼႂ်းႁိူၼ်းသီႉမုၼ်ႇဢေႃႈ။ ဢွၵ်ႇၼၢႆးပေႇတရူႉၼၼ်ႉ ၼၢဝ်ၼႃႇလူင်လၢင်လႄႈ ၶဝ်လဝ်ႊယွၼ်းပုၼ်ႈမၼ်းၵႃႈတီႈမၼ်းၸဝ်ႈဢေႃႈ။- 39မၼ်းၸဝ်ႈၸုၵ်းယူႇၵႃႈတီႈႁိမ်းၽူႈယိင်းၼၼ်ႉလႄႈ သင်ႇသွၼ်ပၼ်တၢင်းၼၢဝ်မၼ်းသေယဝ်ႉ၊ ၼၢဝ်မၼ်းၼၼ်ႉႁၢႆလႄႈ မၼ်းလုၵ်ႉႁဵတ်းဝၢတ်ႈၶႅၵ်ႇၵမ်းလဵဝ်ဢေႃႈ။- 40ယၢမ်းမိူဝ်ႈဢၼ်ၵၢင်ဝၼ်းတူၵ်းၸိုင်၊ ၵေႃႉသေႈၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်ၼၼ်ႉတင်းသဵင်ႈတင်းလူင် ဢဝ်ၵူၼ်းၶႆႈၵူၼ်းပဵၼ်တင်းလၢႆမႃးၵႃႈတီႈမၼ်းၸဝ်ႈဢေႃႈ။ မၼ်းၸဝ်ႈဢဝ်မိုဝ်းတၢင်ႇသႂ်ႇၵႃႈၼိူဝ်ၵူၼ်းၸိူဝ်းၼၼ်ႉႁင်းၽႂ်ႁင်းမၼ်းလႄႈ ႁႂ်ႈတၢင်းၶႆႈတၢင်းပဵၼ်ၶဝ်ႁၢႆဢေႃႈ။- 41ၽီႁၢႆႉတင်းလၢႆၵေႃႈဢွၵ်ႇသေၵႃႈၼႂ်းၵူၼ်းၼမ်ၼႃႇၵႂႃႇလႄႈ ႁွင်ႉသႅၼ်ႇလႄႈဝႃႈ၊ ၸဝ်ႈႁဝ်းပဵၼ်လုၵ်ႈၽြႃးပဵၼ်ၸဝ်ႈၶႃႈဢေႃႈ၊ ဝႃႈၼင်ႇၼႆဢေႃႈ။ ပိူဝ်ႈဢၼ်ၶဝ်ႁူႉလွင်ႈဢၼ်မၼ်းၸဝ်ႈပဵၼ်ၸဝ်ႈၶရိၸ်ႈလႄႈ လွင်ႈၼင်ႇႁိုဝ်ၶဝ်တၵ်းဢမ်ႇလႆႈလၢတ်ႈၸိုင် မၼ်းၸဝ်ႈႁႄႉၶႅၼ်သင်ႇသွၼ်ၶဝ်ၼၼ်ႉဢေႃႈ။

ၸဝ်ႈယေႇသူႉႁေႃးလၢတ်ႈၼႂ်းၸရွပ်ႈႁေႃးတြႃး

(တူၺ်း၊ မႃႇ 1:35-39)

42မိူဝ်ႈဢၼ်မိူင်းလႅင်းမႃးၸိုင်၊ မၼ်းၸဝ်ႈဢွၵ်ႇၵႂႃႇၸူးၵႃႈတီႈထိူၼ်ႇပုၼ်ႉလႄႈ ၵူၼ်းဢၼ်ၸူႉဢၼ်တုမ်တင်းလၢႆ ႁႃမၼ်းၸဝ်ႈဢေႃႈ။ မိူဝ်ႈဢၼ်ႁွတ်ႈထိုင်ၵႃႈတီႈမၼ်းၸဝ်ႈၼၼ်ႉ၊ ၼင်ႇႁိုဝ်မၼ်းၸဝ်ႈတၵ်းဢမ်ႇလႆႈဢွၵ်ႇသေၵႃႈတီႈဢၼ်ၶဝ်မီးၼၼ်ႉၵႂႃႇၸိုင်၊ ႁၢမ်ႈတၢပ်ႈႁႄႉၶႅၼ်ဢေႃႈ။- 43မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်တၵ်းလႆႈႁေႃးလၢတ်ႈတြႃးသတၢင်းသိူဝ်းပျေႃႇ ဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈၼၼ်ႉၼႂ်းဝၢၼ်ႈၼႂ်းဝဵင်းတၢင်ႇတီႈတၢင်ႇလႅၼ်တင်းလၢႆဢေႃႈ။ ပုၼ်ႈဢၼ်တၵ်းလႆႈႁဵတ်းၸိူဝ်ႉၼင်ႇၼႆၸိုင်၊ ၵဝ်လႆႈၶၢမ်ႇတၢင်းဢၼ်ပွႆႇၸႂ်ႉမႃးယဝ်ႉ၊ ဝႃႈၼင်ႇၼႆယဝ်ႉၸင်ႇ။- 44ႁေႃးလၢတ်ႈၵႃႈတီႈၼႂ်းၸရွပ်ႈႁေႃးတြႃးမိူင်းၵႃႇလီႉလႄးတင်းလၢႆလႄႈယူႇဢေႃႈ။

বর্তমানে নির্বাচিত:

လူႉၵႃႇ 4: CBMS

হাইলাইট

কপি