လူႉၵႃႇ 3

တြႃးဢၼ်တမၢၼ်ႇၸဝ်ႈယူဝ်းႁၢၼ်ႇႁေႃး

(တူၺ်း၊ မၢတ်ႈ 3:1-12။ မႃႇ 1:1-8။ ယူဝ်း 1:19-28)

1ၼႂ်းမိူဝ်ႈဢၼ် ၶုၼ်ႁေႃၶမ်းၵေႇသႃႇတီႉပေႇရီႉ လႆႈၸၢမ်ႇႁၢင်ႈၸၢမ်ႇႁေႃသိပ်းႁႃႈပီႊ၊ ပွၼ်ႇတီႉပီႉလတ်ႉလႆႈဢရႃႇၶုၼ်မိူင်းယူႉတႃႉ၊ ႁေႇရူတ်ႈလႆႈဢရႃႇၸဝ်ႈၽႃႉ ၼႂ်းမိူင်းၵႃႇလီႉလႄး၊ ၽီႉလိပ်ႉပူႉ ၼွင်ႉၸၢႆးမၼ်းလႆႈဢရႃႇၸဝ်ႈၽႃႉ ၼႂ်းမိူင်းဢီႉတူႉရေႇ တင်းမိူင်းတြႃႇၶေႃးၼိတ်ႉ၊ လူႉသႃႇၼီႉ လႆႈဢရႃႇၸဝ်ႈၽႃႉ ၼႂ်းမိူင်းဢႃႇၽီႉလီႉၼီႉ၊- 2ဢၼ်ႇၼၢတ်ႉတင်းၵႃႇယၽႃႉ လႆႈဢရႃႇ ၶုၼ်ယိတ်ႈပရေႃးႁဵၵ်ႈလႄႈ မီးယူႇႁင်းၽႂ်ႁင်းမၼ်းၼၼ်ႉ ယူဝ်းႁၢၼ်ႇလုၵ်ႈၸၢႆးၸႃႇၶရီႉ လႆႈပျႃႇတိၵ်ႈၽြႃးပဵၼ်ၸဝ်ႈ ၵႃႈတီႈၼႂ်းထိူၼ်ႇဢေႃႈ။- 3ယူဝ်းႁၢၼ်ႇၼၼ်ႉ လႄႇလဵပ်ႈႁိမ်းႁွမ်းၼမ်ႉႁွင်ႈယေႃးတၢၼ်ႇ ၵူႈတီႈၵူႈလႅၼ်လႄႈ ႁေႃးလၢတ်ႈတြႃးပပ်ႉတီႉၸမ်ႇ ဢၼ်ၸၢပ်ႈသႅင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ် ပုၼ်ႈလွင်ႈၼင်ႇႁိုဝ်တၵ်းလွတ်ႈဢပႅတ်ႈဢေႃႈ။- 4ၼႂ်းၵျၢမ်းပရေႃးၽႅတ်ႈဢီႉသႃႇယႃႉမႃးလႄႈဝႃႈၸမ်ႉ၊သဵင်ၵေႃႉဢၼ်ႁွင်ႉသႅၼ်ႇၵႃႈတီႈၼႂ်းထိူၼ်ႇလႄႈဝႃႈ၊မႄးသဵၼ်ႈတၢင်းထႃႇဝရႃႉၽြႃးတႃႉ၊ႁႂ်ႈသဵၼ်ႈတၢင်းမၼ်းၸဝ်ႈသိုဝ်ႈတႃႉ။- 5တီႈဢၼ်ၶူင်ႈဢၼ်ယၢၼ်းၵႃႈမီးၸိုင် တၵ်းလႆႈထူမ်ဢေႃႈ။ လွႆလူင်လွႆဢွၼ်ႇၵႃႈမီးၸိုင်၊ တၵ်းလႆႈၵိူၼ်ႇႁႂ်ႈတဵမ်ဢေႃႈ။ သဵၼ်ႈတၢင်းဢၼ်ၵူတ်ႉဢၼ်ငွၵ်းတင်းလၢႆၸိုင်၊ တၵ်းလႆႈႁႂ်ႈသိုဝ်ႈဢေႃႈ။ တၢင်းဢၼ်ႁူၵ်ႉႁၵ်းၶုၵ်းၶီၶုၵ်းၶၵ်းတင်းလၢႆၵေႃႈ တၵ်းလႆႈၽဵဝ်ႈႁႂ်ႈလိူမ်ႈဢေႃႈ။- 6ၵူၼ်းတင်းသဵင်ႈတင်းလူင်တၵ်းလႆႈႁၼ်တၢင်းဢၼ်ၵႄႇၶျွတ်ႈၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။

7မိူဝ်ႈၼၼ်ႉ ယူဝ်းႁၢၼ်ႇႁေႃးလၢတ်ႈၵႃႈတီႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉလႄႈဝႃႈၸမ်ႉ၊ ၸိူဝ်ႉၶိူဝ်းငူးႁၢႆႉၶဝ်ဢိူၺ်း၊ ၼင်ႇႁိုဝ်သူတၵ်းလႅၼ်ႈပၢႆႈသေၵႃႈတီႈၽေးတၢမ်ႇဢၼ်တၵ်းႁွတ်ႈမႃးၼၼ်ႉၸိုင် ၽူႈလႂ်ပၼ်သတီႉတီႈသူ။- 8မၢၵ်ႇဢၼ်ၵိုင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ်ၸိုင်မၢၵ်ႇတႃႉ။ ဢႃႇပြႃႇႁၢမ်ႇပဵၼ်ပေႃႈႁဝ်းဝႃႈၼႆယႃႇပေထၢင်ႇပေဝႃႈၼႂ်းၸႂ်။ ၵဝ်ဝႃႈၸမ်ႉ၊ ၼႂ်းမၢၵ်ႇႁိၼ်တင်းလၢႆၼႆႉၽြႃးပဵၼ်ၸဝ်ႈ ဢဝ်ဢွၵ်ႇၽၢၼ်ႇသၢင်းႁဵတ်းပဵၼ်လုၵ်ႈဢႃႇပြႃႇႁၢမ်ႇတင်းလၢႆလႆႈယူႇဢေႃႈ။- 9တေႃႈလဵဝ်ၼႆႉ ဢဝ်တင်းတႃမၢတ်ႇဝႆႉၵႃႈတီႈႁိမ်းႁၢၵ်ႈတူၼ်ႈမႆႉယူႇလႄႈ တူၼ်ႈဢၼ်ဢမ်ႇမၢၵ်ႇမၢၵ်ႇဢၼ်လီၵႃႈမီးတင်းသဵင်ႈတင်းလူင်ၸိုင် ၽၼ်းလူမ်ႉလႄႈၶျႃးသႂ်ႇၼႂ်းၽႆးဢေႃႈ။

10ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉၵေႃႈ လဝ်ႊထၢမ်လႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ ႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 11ယူဝ်းႁၢၼ်ႇၵေႃႈၶိုၼ်းလၢတ်ႈလႄႈဝႃႈ၊ ႁႂ်ႈၵေႃႉဢၼ်မီးသိူဝ်ႈသွင်ၽိုၼ်ၼၼ်ႉ ပၼ်တီႈၵေႃႉဢၼ်ဢမ်ႇမီးသိူဝ်ႈၼၼ်ႉတႃႉ။ ၵေႃႉဢၼ်မီးတၢင်းၵိၼ်တၢင်းၶူပ်းၵေႃႈ ႁႂ်ႈႁဵတ်းၸိူဝ်ႉၼင်ႇၼၼ်တႃႉ၊ ဝႃႈၼင်ႇၼႆဢေႃႈ။- 12ၵူၼ်းၵဵပ်းၶွၼ်ႇတင်းလၢႆ မႃးႁႂ်ႈလႆႈၶၢမ်ႇပပ်ႉတီႉၸမ်ႇလႄႈလဝ်ႊထၢမ်လႄႈဝႃႈ၊ သြႃႇၸဝ်ႈ၊ ႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊- 13မၼ်းၵေႃႈလၢတ်ႈလႄႈဝႃႈ၊ သူယႃႇပေဢဝ်လိူဝ်တွၼ်းသေဢၼ်ၸဝ်ႈသူၶၢၼ်းဝႆႉၼၼ်ႉ၊ ဝႃႈၼင်ႇၼႆဢေႃႈ။- 14ၵူၼ်းသိုၵ်းတင်းလၢႆၵေႃႈလဝ်ႊထၢမ်လႄႈဝႃႈ၊ႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈလၢတ်ႈလႄႈဝႃႈ၊ သူယႃႇပေႁဵတ်းပႄႉႁဵတ်းၼႅင်ႇၵႃႈတီႈပိူၼ်ႈတၢင်ႇၵေႃႉ၊ယႃႇပေမၢပ်ႇၵိၼ်မႂ်ၵိၼ်ပိူၼ်ႈတၢင်ႇၵေႃႉ၊မီးၸႂ်ဢၼ်ဢိမ်ႇဢၼ်တဵမ်တင်းၵႃႈမၼ်းၶၼ်မၼ်း ဢၼ်တူဝ်ၸဝ်ႈၵဝ်ႇလႆႈၼၼ်ႉတႃႉ၊ ဝႃႈၼင်ႇၼႆဢေႃႈ။

15ၼႂ်းမိူဝ်ႈဢၼ်ၵူၼ်းတင်းလၢႆၸိူဝ်းၼၼ်ႉ မုင်ႈထႃႈမွင်းထႃႈလွင်ႈယူဝ်းႁၢၼ်ႇလႄႈ ၶဝ်တင်းသဵင်ႈတင်းလူင်ၶႆႈၸႂ်ဝူၼ်ႉၸႂ်လႄႈဝႃႈ၊ ယူဝ်းႁၢၼ်ႇၼၼ်ႉပဵၼ်ၸဝ်ႈၶရိၸ်ႈ ၸႂ်ႈႁိုဝ်၊ ဢမ်ႇၸႂ်ႈႁိုဝ်။ ဝႃႈၼင်ႇၼႆယူႇၼၼ်ႉၸိုင်၊- 16ယူဝ်းႁၢၼ်ႇၶိုၼ်းလၢတ်ႈတီႈၵူၼ်းတင်းသဵင်ႈတင်းလူင်ၼၼ်ႉလႄႈဝႃႈၸမ်ႉ၊ ၵဝ်ဢဝ်သူပၼ်ပပ်ႉတီႉၸမ်ႇၼႂ်းၼမ်ႉဢေႃႈ၊ ၵေႃႉဢၼ်ယႂ်ႇမျၢတ်ႈၼႃႇသေၵဝ်ၼႆႉမႃးယူႇဢေႃႈ၊ ၵဝ်ၼႆႉယင်းဢမ်ႇထိူၵ်ႈၵႄႈဢဝ်သၢႆၶႅပ်းတိၼ်ၵေႃႉၼၼ်ႉ၊ ၵေႃႉၼၼ်ႉ ၼႂ်းဝီႉၺိၺ်ႇဢၼ်မူတ်းၸၢင်ႇၸဝ်ႈလႄႈသင်၊ ၼႂ်းၽႆးလႄႈသင်၊ တၵ်းဢဝ်သူပၼ်ပပ်ႉတီႉၸမ်ႇဢေႃႈ၊ ဝႃႈၼင်ႇၼႆဢေႃႈ။- 17ၼႂ်းမိုဝ်းမၼ်းၸဝ်ႈၼၼ်ႉမီးလူင်ႈၽတ်းယူႇလႄႈတၵ်းႁႂ်ႈတလၢင်းယဵပ်ႇၶဝ်ႈတူဝ်ၸဝ်ႈၵဝ်ႇမူတ်းသႂ်ဢေႃႈ။ ၶဝ်ႈၵျုင်ႇတူဝ်ၸဝ်ႈၵဝ်ႇၸမ်ႉ၊ တၵ်းဢဝ်ၸူႉဢဝ်သိမ်းဝႆႉၼႂ်းယွင်ၼႂ်းယေးလႄႈ ၶဝ်ႈလိပ်ႈၸမ်ႉ၊ တၵ်းဢဝ်တင်းၽႆးဢၼ်ဢမ်ႇမွတ်ႇလႆႈၼၼ်ႉတုတ်ႇပႅတ်ႈဢေႃႈ၊ ဝႃႈၼင်ႇၼႆဢေႃႈ။- 18မၼ်းဢဝ်တင်းၵႂၢမ်းတၢင်ႇၸိူဝ်ႉတၢင်ႇဢၼ်ၼမ်ၼႃႇ တိုၵ်းယူင်းၸူဝ်းဢဝ်လႄႈႁေႃးလၢတ်ႈတြႃးသတၢင်းသိူဝ်းပျေႃႇတီႈၵူၼ်းၸိူဝ်းၼၼ်ႉဢေႃႈ။

19ပိူဝ်ႈဢၼ်ယူဝ်းႁၢၼ်ႇ ၽုၺ်ႇၼႄသင်ႇသွၼ်ပၼ်တီႈၸဝ်ႈၽႃႉႁေႇရူတ်ႈ ၸႃႉၸဵမ်လွင်ႈႁေႇရူဝ်းတီႉ မေးၼွင်ႉၸၢႆးမၼ်း ဢိၵ်ႇတင်းတူႉၸရိူၵ်ႈဢပႅတ်ႈၵႃႈဢၼ်မၼ်းလႆႈႁဵတ်းၼၼ်ႉလႄႈ၊- 20ႁေႇရူတ်ႈၼၼ်ႉ သမ်ႉဢဝ်ဢပႅတ်ႈဢၼ်မႂ်ႇသႂ်ႇထၢပ်ႈထႅင်ႈၵႃႈၼိူဝ်ဢပႅတ်ႈၵႃႈမီးတင်းသဵင်ႈတင်းလူင်ၸိူဝ်းၼၼ်ႉသေလႄႈ ဢဝ်ယူဝ်းႁၢၼ်ႇၶင်ဝႆႉၵႃႈၼႂ်းထွင်ႇဢေႃႈ။

ၸဝ်ႈယေႇသူႉၶၢမ်ႇဢဝ်ပပ်ႉတီႉၸမ်ႇ

(တူၺ်း၊ မၢတ်ႈ 3:13-17။ မႃႇ 1:9-11)

21မိူဝ်ႈဢၼ်ၵူၼ်းတင်းသဵင်ႈတင်းလူင်ၸိူဝ်းၼၼ်ႉၶၢမ်ႇပပ်ႉတီႉၸမ်ႇၸိုင်၊ ယေႇသူႉၵေႃႈၶၢမ်ႇပပ်ႉတီႉၸမ်ႇလႄႈ၊ၼႂ်းမိူဝ်ႈဢၼ်မၼ်းၸဝ်ႈသူးတွင်းယူႇၼၼ်ႉ၊ၵၢင်ႁၢဝ်ၽုၺ်ႇပိုတ်ႇသေလႄႈ၊- 22ဝီႉၺိၺ်ႇဢၼ်မူတ်းၸၢင်ႇၸဝ်ႈ ပဵၼ်ပုင်ႇႁၢင်ႈၸိူဝ်ႉၼင်ႇၼူၵ်ႉတူႈၼၼ်ႉလူင်းမႃးၵႃႈၼိူဝ်မၼ်းၸဝ်ႈလႄႈ သဵင်ၸဝ်ႈပဵၼ်မႃးၵႃႈၼိူဝ်ၵၢင်ႁၢဝ်လႄႈဝႃႈ၊ၵေႃႉၼႆႉၸမ်ႉ၊ပဵၼ်လုၵ်ႈဢၼ်ၵဝ်ႁၵ်ႉၼႃႇ၊တီႈဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊ဝႃႈၼင်ႇၼႆဢေႃႈ။

ၸိူဝ်ႉၶိူဝ်းပူႇပေႃႈၸဝ်ႈယေႇသူႉ

(တူၺ်း၊ မၢတ်ႈ 1:1-17)

23 ယေႇသူႉၼၼ်ႉ မိူဝ်ႈဢၼ်ၸႃႉႁေႃးၸႃႉလၢတ်ႈၼၼ်ႉၸိုင်၊ ဢသၢၵ်ႈလႆႈသၢမ်သိပ်းၸမ်ၸမ်ဢေႃႈ။ ၵႃႈၼင်ႇဢၼ်ၵူၼ်းတင်းလၢႆထၢင်ႇထိူမ်ၼၼ်ႉ၊ မၼ်းၸဝ်ႈပဵၼ်လုၵ်ႈယူဝ်းသႅပ်ႈ၊ ယူဝ်းသႅပ်ႈပဵၼ်လုၵ်ႈဢေးလီႉ၊- 24ဢေးလီႉပဵၼ်လုၵ်ႈ မတ်ႈထတ်ႈ၊ မတ်ႈထတ်ႈပဵၼ်လုၵ်ႈလေႇဝီႉ၊ လေႇဝီႉပဵၼ်လုၵ်ႈမေႇလၶီႉ၊ မေႇလၶီႉပဵၼ်လုၵ်ႈယၢၼ်ႇၼႃႉ၊ ယၢၼ်ႇၼႃႉပဵၼ်လုၵ်ႈယူဝ်းသႅပ်ႈ၊- 25ယူဝ်းသႅပ်ႈပဵၼ်လုၵ်ႈမတ်ႉတထီႉ၊ မတ်ႉတထီႉပဵၼ်လုၵ်ႈဢႃႇမုတ်ႉ၊ ဢႃႇမုတ်ႉပဵၼ်လုၵ်ႈၼႃႇႁုမ်ႇ၊ ၼႃႇႁုမ်ႇပဵၼ်လုၵ်ႈဢေးသလီႉ၊ ဢေးသလီႉပဵၼ်လုၵ်ႈၼၵ်ႉၵေႇ၊- 26ၼၵ်ႉၵေႇပဵၼ်လုၵ်ႈမႃႇဢတ်ႈ၊ မႃႇဢတ်ႈပဵၼ်လုၵ်ႈမတ်ႉတထီႉ၊ မတ်ႉတထီႉပဵၼ်လုၵ်ႈသိမ်ႇမီႉ၊ သိမ်ႇမီႉပဵၼ်လုၵ်ႈယူဝ်းသႅပ်ႈ၊ ယူဝ်းသႅပ်ႈပဵၼ်လုၵ်ႈယူႉတႃႉ၊- 27ယူႉတႃႉပဵၼ်လုၵ်ႈယူဝ်းႁၢၼ်ႇၼႃႉ၊ ယူဝ်းႁၢၼ်ႇၼႃႉပဵၼ်လုၵ်ႈရေႇသႃႇ၊ ရေႇသႃႇပဵၼ်လုၵ်ႈၸေႇရူႉပႃႉပေႇလႃႉ၊ ၸေႇရူႉပႃႉပေႇလႃႉပဵၼ်လုၵ်ႈသႃလထီႉဢေးလႃႉ၊ သႃလထီႉဢေးလႃႉပဵၼ်လုၵ်ႈၼီႇရီႉ၊- 28ၼီႇရီႉပဵၼ်လုၵ်ႈမေႇလၶီႉ၊ မေႇလၶီႉပဵၼ်လုၵ်ႈဢတ်ႉတီႉ၊ ဢတ်ႉတီႉပဵၼ်လုၵ်ႈၵူဝ်းသမ်ႇ၊ ၵူဝ်းသမ်ႇပဵၼ်လုၵ်ႈဢေးလမူဝ်းတမ်ႇ၊ ဢေးလမူဝ်းတမ်ႇပဵၼ်လုၵ်ႈဢေးရႃႉ၊- 29ဢေးရႃႉပဵၼ်လုၵ်ႈယူဝ်းသေႇ၊ ယူဝ်းသေႇပဵၼ်လုၵ်ႈဢေးလျႃႇၸႃႇ၊ ဢေးလျႃႇၸႃႇပဵၼ်လုၵ်ႈယူဝ်းရိမ်ႇ၊ ယူဝ်းရိမ်ႇပဵၼ်လုၵ်ႈမတ်ႈထတ်ႈ၊ မတ်ႈထတ်ႈပဵၼ်လုၵ်ႈလေႇဝီႉ၊- 30လေႇဝီႉပဵၼ်လုၵ်ႈသူႉမွင်ႇ၊ သူႉမွင်ႇပဵၼ်လုၵ်ႈယူႉတႃႉ၊ ယူႉတႃႉပဵၼ်လုၵ်ႈယူဝ်းသႅပ်ႈ၊ ယူဝ်းသႅပ်ႈပဵၼ်လုၵ်ႈယူဝ်းႁၼ်ႇ၊ ယူဝ်းႁၼ်ႇပဵၼ်လုၵ်ႈဢေးလျႃႇၵိမ်ႇ၊- 31ဢေးလျႃႇၵိမ်ႇပဵၼ်လုၵ်ႈမေႇလေႇ၊ မေႇလေႇပဵၼ်လုၵ်ႈမေးၼၼ်ႇ၊ မေးၼၼ်ႇပဵၼ်လုၵ်ႈမတ်ႉတထႃႉ၊ မတ်ႉတထႃႉပဵၼ်လုၵ်ႈၼႃႇထၼ်ႇ၊ ၼႃႇထၼ်ႇပဵၼ်လုၵ်ႈတႃႇဝိတ်ႈ၊- 32တႃႇဝိတ်ႈပဵၼ်လုၵ်ႈယေႇသႄး၊ ယေႇသႄးပဵၼ်လုၵ်ႈဢူဝ်းပိတ်ႉ၊ ဢူဝ်းပိတ်ႉပဵၼ်လုၵ်ႈပေႃးၸႃႉ၊ ပေႃးၸႃႉပဵၼ်လုၵ်ႈၸႃႇလမုၼ်ႇ၊ ၸႃႇလမုၼ်ႇပဵၼ်လုၵ်ႈၼႃႇသုၼ်ႇ၊- 33ၼႃႇသုၼ်ႇပဵၼ်လုၵ်ႈဢမီႉၼတပ်ႉ၊ ဢမီႉၼတပ်ႉပဵၼ်လုၵ်ႈဢႃႇရမ်ႇ၊ ဢႃႇရမ်ႇပဵၼ်လုၵ်ႈႁေႇၸရုၼ်ႇ၊ ႁေႇၸရုၼ်ႇပဵၼ်လုၵ်ႈၽေးရိတ်ႉ၊ ၽေးရိတ်ႉပဵၼ်လုၵ်ႈယူႉတႃႉ၊- 34ယူႉတႃႉပဵၼ်လုၵ်ႈယႃႇၵုပ်ႈ၊ ယႃႇၵုပ်ႈပဵၼ်လုၵ်ႈဢီႉၸၢၵ်ႈ၊ ဢီႉၸၢၵ်ႈပဵၼ်လုၵ်ႈဢႃႇပြႃႇႁၢမ်ႇ၊ ဢႃႇပြႃႇႁၢမ်ႇပဵၼ်လုၵ်ႈတေႇရႃႉ၊ တေႇရႃႉပဵၼ်လုၵ်ႈၼႃႇၶေႃႇ၊- 35ၼႃႇၶေႃႇပဵၼ်လုၵ်ႈၸေႇရွၵ်ႉ၊ ၸေႇရွၵ်ႉပဵၼ်လုၵ်ႈရႃႇၵေႃး၊ ရႃႇၵေႃးပဵၼ်လုၵ်ႈၽႃႇလိၵ်ႉ၊ ၽႃႇလိၵ်ႉပဵၼ်လုၵ်ႈႁေႇပႃႇ၊ ႁေႇပႃႇပဵၼ်လုၵ်ႈသႃႇလႃႉ၊- 36သႃႇလႃႉပဵၼ်လုၵ်ႈၵႃႇဢီႉၼၼ်ႇ၊ ၵႃႇဢီႉၼၼ်ႇပဵၼ်လုၵ်ႈဢႃႇၽၵ်ႉၸတ်ႉ၊ ဢႃႇၽၵ်ႉၸတ်ႉပဵၼ်လုၵ်ႈသေႇမႃႉ၊ သေႇမႃႉပဵၼ်လုၵ်ႈၼူဝ်းဢႃႇ၊ ၼူဝ်းဢႃႇပဵၼ်လုၵ်ႈလႃႇမႅၵ်ႈ၊- 37လႃႇမႅၵ်ႈပဵၼ်လုၵ်ႈမထူႉသလႃႉ၊ မထူႉသလႃႉပဵၼ်လုၵ်ႈဢေးၼွၵ်ႉ၊ ဢေးၼွၵ်ႉပဵၼ်လုၵ်ႈယႃႇရိတ်ႉ၊ ယႃႇရိတ်ႉပဵၼ်လုၵ်ႈမႁႃႇလေႇလေႇလႃႉ၊ မႁႃႇလေႇလေႇလႃႉပဵၼ်လုၵ်ႈၵႃႇဢီႉၼၼ်ႇ၊- 38ၵႃႇဢီႉၼၼ်ႇပဵၼ်လုၵ်ႈဢေးၼုတ်ႉ၊ ဢေးၼုတ်ႉပဵၼ်လုၵ်ႈသေႇထႃႉ၊ သေႇထႃႉပဵၼ်လုၵ်ႈဢႃႇတၢမ်ႇ၊ ဢႃႇတၢမ်ႇပဵၼ်လုၵ်ႈၽြႃးပဵၼ်ၸဝ်ႈဢေႃႈ။

বর্তমানে নির্বাচিত:

လူႉၵႃႇ 3: CBMS

হাইলাইট

কপি