मरकुस 9

1यीशु ने चेल्‍लेयां जो बोल्लेया, “मैं तुसा कने सच-सच बोलदा कि जे मणू इत्ते खडित्ते रे हिन, तिन्हा बिच किच्‍छ मणू इदेय भी हिन, जिन्हा ने परमेश्वर रे राज जो पूरी ताकत बिच दिख्खे बगैर नी मरणा।”

यीशु रा रुप बदलणा

2छे रोज्जां बाद यीशु ने पतरस, याकूब अते यूहन्ना जो अपणे कने लेया, ते कुसकी पहाड़ पर इक्क एकांत जगाह् पर लेई गे; ते चेल्‍लेयां सामणे तिन्हेरा रुप बदली गेया। 3अते तिन्हेरे कपड़े बड़े जादा चमकणे लग्गे, पूरी दुनिया अंदर कोई भी धोबी तिय्यां नी चमकाई सकदा। 4ते चेल्‍लेयां ने भविष्यद्वक्ता मूसा ते एलिय्याह जो यीशु कने गल्लां करेया करदे दिख्खेया। 5ए दिखणे का बाद पतरस ने यीशु जो बोल्लेया, “ओ गुरु, असा तांइ इत्ते रैह्णा ठीक है: इधेरे तांइ असी तुसा तांइ, ते मूसा तांइ, ते एलिय्याह तांइ इत्ते त्रै तम्बू बणांदे।” 6पतरस ने इय्यां इधेरे तांइ बोल्लेया किजोकी से मणू इन्ने डरी गेरे थिये कि समजी नी थिये पांदे कि होर कै बोलण। 7तां इक्क बदल ने तिन्हा जो घेरी लेया, ते परमेश्वर री अवाज आई, “ए मेरा प्यारा पुत्तर है। इसेरी सुणो।” 8तिस्सी बेल्ले चेल्‍लेयां ने चौं पास्से नजर फेरी, ते यीशु जो छड्डी अपणे कने होर कुसकी जो नी दिख्खेया। 9पहाड़ का थल्ले उतरदे बेल्ले यीशु ने चेल्‍लेयां जो हुकम दित्तेया कि जां तांइ मणू रा पुत्तर, जे मैं ही है मरे रेयां बिच का जिन्दा ना होई जां, तां तांइ जे किच्‍छ तुसा ने दिख्खेया से कुसकी कने मत बोलदे। 10चेल्‍लेयां ने इस गल्ल जो चेत्ता रख्खेया ते बड़ी वरी अप्पु मिते बैह्स भी करदे थिये कि, “मरे रेयां बिच का जिन्दा होई जाणे रा कै मतलब है?” 11तां चेल्‍लेयां ने यीशु जो पूच्छेया, “शास्त्रि किजो बोलदे कि, मसीह का पैल्ले एलिय्याह रा आणा जरुरी है?” 12यीशु ने चेल्‍लेयां जो जवाब दित्तेया, ए सच है “एलिय्याह ने पैल्ले ही आई करी सब किच्‍छ सुधारणा, पर तुसा ए किजो नी समजदे कि मणू रे पुत्तर, जे मैं ही है रे बारे बिच, जे मैं ही है ए लिख्खे गे रा है कि तिन्ने बड़े दुख चुक्कणे, ते बेइज्जत कित्तेया जाणा? 13पर मैं तुसा जो बोलदा कि, एलिय्याह तां आई चुके रा है जे यूहन्ना बपतिस्मा दैणे वाला थिया, ते जिय्यां तिसेरे बारे बिच लिखेरा है, लोक्कां ने जे तिस कने गलत व्यवहार कित्तेया।”

दुष्टात्मा रे सताए मुडें जो ठीक करणा

14जां यीशु अपणे तिन्हा त्रै चेल्‍लेयां कने अपणे बाकि चेल्‍लेयां का हटी आए, तां दिख्खेया कि तिन्हेरे चौं पास्से बड़ी भीड़ लग्गे री थी, अते शास्त्रि मणू चेल्‍लेयां कने बैह्स करेया करदे हिन। 15भीड़ रे मणू यीशु जो दिख्खी करी हरान होए ते तिस्सी बेल्ले तिन्हेरे जो मिलणे तांइ दौड़ी करी गे। 16यीशु ने तिन्हा लोक्कां का पूच्छेया, “कुस गल्ल पर बैह्स होया करदी है?” 17भीड़ बिच मझाटे का इक्क जणे ने जवाब दित्तेया, “ओ गुरु, मैं अपणे मुंडे जो तुसा का ठीक करवाणे तांइ लाया थिया, जिस बिच इक्क दुष्टात्मा है जे तिसजो बोलणा नी दिंदी। 18से दुष्टात्मा जां भी मेरे मुंडे हावी हुंदी, तां से तिसजो जमीन पर पटकी दिंदी; ते तिस मुंडे रे मुँह बिच झाग निकलणा लगदा, ते से दांद्द पीह्णे लगदा ते से अकड़ी जांदा; इधेरे तांइ मैं तुसा रे चेल्‍लेयां का बिनती कित्ती कि से तिस दुष्टात्मा जो कड्डी दैण पर से तिसजो नी कड्डी सके।” 19ए सुणी करी यीशु ने चेल्‍लेयां जो जवाब देई करी बोल्लेया, “ओ अविश्वासी लोक्कों, मैं कधाड़ी तांइ तुसा रे कने रैह्णा? कधाड़ी तांइ तुसा जो सहन करणा? तिस दुष्टात्मा वाले मुंडे जो मेरे का लेई आओ।” 20तां से तिस मुंडे जो यीशु का लेई आये: अते जां तिस दुष्टात्मा ने यीशु जो दिख्खेया, तां तिसने चाणचक्के ही तिस मुंडे जो मरोड़ेया, ते तिसेरे मुँह झाग निकलणा लग्गी पेई ते से छटपटाई करी जमीन पर पेई गेया। 21यीशु ने तिसेरे प्यो जो पूच्छेया, “इसेरी ए हालत कधाड़ी का है?” तिन्ने बोल्लेया, “बचपन का। 22तिस दुष्टात्मा ने इसजो मुकाणे तांइ कदी आग्ग ते कदी पाणी बिच सुट्टेया, असा पर मेहरबानी करी के असा री मदद करो अगर तुसा करी सकदे।” 23यीशु ने तिस मणू जो बोल्लेया, “जे तू करी सकदा, इस गल्ल रा कै मतलब है? विश्वास करणे वालेयां तांइ सब किच्‍छ मुमकिन है।” 24तिस मुंडे रे प्यो ने छन्दे-मिन्नता करी के बोल्लेया, “ओ प्रभु, मैं विश्वास करदा, मेरे अविश्वास का उभरणे तांइ मेरी मदद करो।” 25जां यीशु ने दिख्खेया कि दिखणे वालेयां री भीड़ बद्देया करदी है, तां तिन्हा ने दुष्टात्मा जो ए बोल्ली करी झिड़केया, से जल्ली अते टोणी करणे वाली आत्‍मा, मैं तिज्जो हुकम दिन्दा कि इस बिच का निकली आ, अते इस बिच फिरी कदी भी मत जान्दी। 26तां से दुष्टात्मा लेरां मारदी अते तिस मुंडे जो बड़े जोरे मरोड़ी करी, निकली गई, अते निक्का अधमरा जदेया होई गेया, इत्ते तक लोक्कां जो लग्गेया कि से मरी गेया। 27पर यीशु ने तिसेरा हत्थ पकड़ी करी तिसजो उठाया, अते से ठीक होई करी खड़ी गेया। 28बाद बिच जां यीशु अपणे चेल्‍लेयां कने घरे किल्ले थिये, तां तिन्हेरे चेल्‍लेयां ने तिन्हा का पूच्छेया, “असां तिसजो किजो नी कड्डी सके?” 29यीशु ने चेल्‍लेयां जो बोल्लेया, “ए जाति बगैर प्रार्थना रे नी निकली सकदी।”

दुबारा अपणे मरणे रे बारे बिच यीशु री भविष्यवाणी

30फिरी से तित्ते का चले, अते गलील प्रदेश का होई करी जाया करदे थिये ते यीशु नी चाह्‍ंदे थिये कि कुसकी जो पता चले कि से तित्ते हिन, 31किजोकी से अपणे चेल्‍लेयां जो सिखाणा चाह्‍ंदे थिये। यीशु ने अपणे चेल्‍लेयां जो बोल्लेया “मणू रा पुत्तर, जे मैं ही है लोक्कां रे हत्थां पकड़ाया जाणा, अते तिन्हा ने मेरे जो मारी रखणा अते मैं मरणे रे तिज्जे रोज्जे जिंदा होई जाणा।” 32पर ए गल्ल चेल्‍लेयां जो समझ नी आई, अते से तिन्हा का पूच्छणे का डरदे थिये।

सबका बड्डा कुण?

33फिरी से कफरनहूम रे कस्बे बिच आये ते घरे आई करी यीशु ने चेल्‍लेयां का पूच्छेया, “तुसां रस्ते बिच कुस गल्ल जो लेई करी बैह्स करेया करदे थिये?” 34चेल्‍ले चुप्प रे, किजोकी रस्ते बिच से अप्पु-मिते ए बैह्स करदे थिये कि असा बिच का बड्डा कुण है? 35तां यीशु ने बेई करी सारे चेल्‍लेयां जो सद्देया अते तिन्हा जो बोल्लेया, “तुसां बिच जे कोई बड्डा बणना चाह्ए, से सबणी का छोटा ते सबणी रा नौक्कर बणे।” 36अते यीशु ने इक्क निक्के जो लेई करी तिन्हेरे मझाटे खड़ा कित्तेया, अते तिसजो खोखा लेई करी चेल्‍लेयां जो बोल्लेया, 37“जे कोई मेरे नां कने इदेय निक्केयां बिच का इक्क जो भी अपणांदा, से मेरे जो अपणांदा, अते जे कोई मेरे जो अपणांदा, से मेरे जो नी पर मेरे भेजणे वाले जो अपणांदा।”

जो खलाफ नी, से कन्ने है

38तां यूहन्ना ने यीशु जो बोल्लेया, “ओ गुरु, असा ने इक्क मणू जो तेरे नां कने दुष्टात्मा कडदे दिख्खेया अते असा तिसजो ठाक्केया, किजोकी से असा रे बिच रा नी है।” 39यीशु ने बोल्लेया, “तिसजो मत ठाको किजोकी कोई भी जे मेरे नां कने चमत्कार रे कम्म करदा से बाद बिच मेरे बारे अंदर बुरा नी बोल्ली सकदा, 40किजोकी जे असा रे खिलाफ नी हिन, से असा पास्से हिन। 41जे कोई तुसा जो मसीह रे चेल्‍ले होणे री वजह इक्क गलास भी पाणी पियाये तां मैं तुसा कने सच बोलदा कि से अपणा ईनाम कुसी भी तरिके कने नी खोई सकदा।”

ठोक्कर री वजह बणना

42“जे कोई मेरे पर विश्वास करणे वाले कुसकी छोटे का छोटे जो भी गलत रस्ते पर पाए, तिसेरे तांइ ए खरा होणा कि इक्क बड्डा चक्की रा बट्टा तिसेरे गले बिच लटकाई करी तिसजो समुन्द्र बिच सूटी दित्तेया जाये। 43जे तेरे हत्थ तेरे पाप करणे री वजह बणदे, तां तिन्हा जो बड्डी दे किजोकी टुण्डा होई करी स्वर्ग बिच हमेसा री जिन्दगी जो पाणा दोई हत्थ हुंदे होए नरक री आग्ग बिच पैणे का खरा है जे कदी भी नी बुझणी। 44(ते ना जित्ते कीड़ा मरदा ते ना तित्ते आग्ग बुझदी)। 45जे तेरा पैर तेरे तांइ पाप करणे री वजह बणे तां तिन्हा जो बड्डी दे किजोकी लट्टा होई करी स्वर्ग बिच हमेसा री जिन्दगी जो पाणा, दोनो पैर हुदें होये नरक री आग्ग बिच पैणे का खरा है। 46(जित्ते ना तिन्हेरा कीड़ा मरदा ते ना तित्ते आग्ग बुझदी)। 47जे तेरी आख्खियां पाप करणी री वजह बणे तां तिन्हा जो कड्डी दे किजोकी टीणा होई करी परमेश्वर रे राज बिच आणा, तेरे तांइ इसका खरा है कि दोन्नों हाख्खियां हुंदे भी तू नरक बिच पाया जाए। 48जित्ते तिन्हेरा कीड़ा नी मरदा अते आग्ग नी बुझदी। 49जिय्यां कुर्बानी जो शुद्व करणे तांइ तिस पर लूण पाया जादां, तिय्यां ही परमेश्वर असा जो शुद्व करणे तांइ असा जो मुसीबतां का गुजरणे दिंदा। 50लूण खरा है, पर जे लूण रा सुआद बिगड़ी जाओ, तां तिसजो कुस चीज कने लूणका बणाई सकदे? तुसा बिच लूण री खासियत होणा चाएदी ते अप्पु मिते भाईचारे कने रेयो।”

বর্তমানে নির্বাচিত:

मरकुस 9: CDHNT

হাইলাইট

কপি