मरकुस 8

चार हजार मणूआं जो खुआणा

1तिन्हा रोज्जां बिच फिरी जां बड्डी भीड़ जमा होई, अते तिन्हा का किच्‍छ खाणे जो नी बचेया थिया, तां यीशु ने चेल्‍लेयां जो सद्दी करी तिन्हा जो बोल्लेया, 2“मेरे जो इस भीड़ पर तरस आया करदा है, किजोकी ए त्रै रोजां का बराबर मेरे कने हिन, अते अवे इन्हा का किच्‍छ भी खाणे जो नी है। 3जे मैं इन्हा लोक्कां जो भूखा घरे भेजी देयां, तां रस्ते बिच थकी करी बेहोश होई जाणा। किजोकी इन्हा बिच का किच्‍छ तां दुर का आये रे हिन।” 4चेल्‍लेयां ने यीशु जो जवाब दित्तेया, “इत्ते बियाबान बिच इन्नी रोट्टी कोई कुदेका लियाये की ए रजी जाण?” 5यीशु ने चेल्‍लेयां जो पूच्छेया, “तुसां का किन्नी रोट्टी हिन?” चेल्‍लेयां ने बोल्लेया, “सत्त!” 6तां यीशु ने मणूआं जो जमीन पर बैणे रा हुकम दित्तेया, ते सत्त रोटियां लेई अते परमेश्वर रा धन्यवाद करी के तोड़ी, ते अपणे चेल्‍लेयां जो दिदें गे कि चेल्‍ले लोक्कां जो दिदें जाण, ते तिन्हा मणूआं बिच बंड्डी दित्ती 7तिन्हेरा का थोड़ी करी हल्की मच्छियाँ भी थियां, यीशु ने परमेश्वर रा धन्यवाद करी के तिन्हा जो भी मणूआं रे बडंणे रा हुकम दित्तेया। 8से मणू खाई करी रजी गे ते चेल्‍लेयां ने बचे रे टुकड़ेयां कने सत्त भरे रे टोकरे चुक्के 9से मणू चार हजार रे करीब थिये, तां यीशु ने उन्हा जो खाणे रे बाद घरे भेजी दित्तेया, 10ते से झट अपणे चेल्‍लेयां कने किस्ती पर चढ़ी करी दलमनूता जिले जो चली गे।

फरीसियां रा स्वर्ग री निशानी री मांग करणा

11जां फरीसी लोक्कां ने सूणेया कि यीशु दलमनूता जिले का हटी आई रे हिन, तां से आई करी तिन्हा कने बैह्स करणा लग्गे। तिन्हा ने यीशु जो फसाणे तांइ तिन्हा का स्वर्गीय चमत्कार री मांग कित्ती ताकि जाणी सकण कि से सच अंदर परमेश्वर रे भेज्जे रे हिन या नी। 12यीशु ने तिन्हेरे विश्वास री कमी का दुखी होई करी बोल्लेया, “इस पीढ़ी रे मणू किजो चिन्ह-चमत्कार तोपेया करदे? मैं तुसा जो सच बोलदा कि इस पीढ़ी रे मणूआं जो कोई चिन्ह-चमत्कार नी दित्ती जाणी।” 13अते से तिन्हा जो छड्डी करी फिरी किस्ती पर चढ़ी करी गलीली समुन्द्र रे पार चली गे।

फरीसियां ते हेरोदेस रा खमीर

14चेल्‍ले सारेयां जोग्गी रोट्टी लाणा भूली गेरे थिये पर किस्ती बिच तिन्हेरे का इक्क ही रोट्टी थी। 15यीशु ने अपणे चेल्‍लेयां जो तिन्हा लोक्कां री गलत शिक्षा का बची रैह्णे तांइ इय्यां समजाया, “दिख्खो, फरीसी ते हेरोदेस रे समुह रे लोक्कां री तराक्क का सावधान रेयो।” 16चेल्‍ले अप्पु-मिते सोच-विचार करी के बोलणा लग्गे, “असां का तां ना रे बराबर रोट्टी है।” 17यीशु जाणदे थिये कि चेल्‍ले अप्पु मिते कै गल्ल बात हिन करेया करदे। यीशु ने चेल्‍लेयां जो बोल्लेया, “तुसी किजो अप्पु-मिते सोच्चेया हिन करदे कि असा का रोट्टी नी है? कै हल्ले तिकर नी समजदे? कै तुसा रा मन कठोर होई गे रा है? 18कै तुम्हारी हाख्खियां हुन्दे भी नी दिखदे, अते कान्न हुन्दे भी नी सूणदे? कै तुसा जो किच्‍छ भी चेत्ता नी है?” 19कि जां मैं पांज हजार लोक्कां जो पांज रोट्टियां कने रजाया थिया ते तुसा बचे रे रोट्टियां कने किन्ने टोकरे भरी के चुक्के थिये? चेल्‍लेयां ने बोल्लेया, “बारा टोकरियां।” 20“ते जां मैं चार हजार लोक्कां तांइ सत्त रोटियां थी तां तुसा बचे रे रोट्टियां कने किन्ने टोकरे भरी के चुक्के थिये?” तिन्हा ने उन्हा जो बोल्लेया, “सत्त टोकरे।” 21यीशु उन्हा जो बोल्लेया, “क्‍या तुसा हल्ले तांइ नी भी समजे?”

बैतसैदा बिच इक्क अन्ने जो ठीक करणा

22यीशु ते तिन्हेरे चेल्‍ले बैतसैदा रे कस्बे बिच आये, अते किच्‍छ मणू इक्क अन्ने मणू जो तिन्हा का लेई आया अते तिन्हेरे छन्दे कित्ते कि तिसजो छुई करी ठीक करी दैण। 23यीशु तिस अन्ने मणू रा हत्थ पकड़ी करी ग्रां का बाहर लेई आये, अते तिसेरी हाख्खियां पर अपणा थूक्की लाई करी तिस पर हत्थ रख्खे, अते तिसजो पूच्छेया, “क्‍या तू अवे किच्‍छ दिख्खी सकदा?” 24तिन्ने हाख्खियां चुकी करी बोल्लेया, “मेरे जो मणू लिबदे हिन से चलदे बूट्टेयां साई लिबेया करदे हिन।” 25तां यीशु ने दुबारा तिस अन्ने मणू री हाख्खी पर हत्थ रखे, अते अन्ने मणू ने ध्यान कने दिख्खेया। ते से मणू ठीक होई गेया, ते तिस मणू जो सब किच्‍छ साफ-साफ दिसणा लग्गेया। 26यीशु ने ए बोल्ली करी तिस मणू जो घरे भेज्जेया, “घरे हटदे बेल्ले इस कस्बे का होई करी मत जांदा।”

पतरस रा यीशु जो मसीह यीशु मनणा

27यीशु अते तिन्हेरे चेल्‍ले कैसरिया फिलिप्पी रे कस्बे रे नेड़े रे किच्‍छ ग्रां बिच गे; रस्ते बिच तिन्हा ने अपणे चेल्‍लेयां का पूच्छेया, “मणू मेरे जो कै मनदे?” 28चेल्‍लेयां ने जवाब दित्तेया, “किच्‍छ तुसा जो यूहन्ना बपतिस्मा दैणे वाला समजदे, पर किच्‍छ ए समजदे तुसा एलिय्याह हिन, पर किच्‍छ मणू ए भी समजदे कि तुसा भविष्यद्वक्ता बिच का कोई इक्क हिन।” 29यीशु ने चेल्‍लेयां जो पूच्छेया, “पर तुसा मेरे जो कै मनदे? पतरस ने तिन्हा जो जवाब दित्तेया, तुसा मसीह हिन।” 30तां यीशु ने चेल्‍लेयां जो समझाई करी बोल्लेया, कि मेरे बारे बिच ए कुसकी कने मत बोलदे।

अपणे मरणे रे बारे बिच यीशु री भविष्यवाणी

31तां यीशु अपणे चेल्‍लेयां जो सिखाणा लग्गे कि मणू रे पुत्तर, जे मैं ही है जरुरी है कि बड़े दुख झेल्ले, ते यहूदी मणूआं रे बुजुर्ग लोक, बड्डे पुरोत्तां, अते शास्त्रि तिसजो तुच्छ समजी करी के मारी दैण, अते से तिज्जे रोज्जे जिन्दा होई जाए। 32यीशु ने ए गल्ल तिन्हा जो साफ-साफ बोल्ली दित्ती। पर तिन्हेरे ए गल्ल बोलणे पर पतरस तिन्हा जो अलग लै जाई करी बकणे लग्गेया। 33पर यीशु ने मुड़ी करी अपणे चेल्‍लेयां पास्से दिख्खेया, अते पतरस जो झिड़की करी बोल्लेया, से शैतान, मेरे सामणे का दुर होई जा; “तू परमेश्वर री गल्लां पर नी, पर मणूआं री गलां पर मन लांदा।”

यीशु रे पीच्छे चलणे रा मतलब

34यीशु ने अपणे चेल्‍लेयां समेत भीड़ जो अप्पु का सद्दी करी बोल्लेया, “जे कोई मेरा चेल्ला बणने तांइ मेरे पीछे आणा चाह्‍ंदा, से अपणे आप्पे का इन्कार करे ते दुख री सुली चुकी करी मेरे पीछे होई लैण।” 35किजोकी जे कोई अपणी जिन्दगी बचाणा चाह्‍ंगा, तिसने तिसजो खोई दैणा, पर जे कोई मेरे वजह कने अते मेरे सुब बसेख तांइ अपणे प्राण खोगां, तिसजो स्वर्ग बिच हमेसा री जिन्दगी मिलणी। 36ते जे अगर तुसा सारी दुनिया जो हासिल करी लेयो पर स्वर्ग बिच हमेसा री जिन्दगी ही ना पाओ, तां तुसा जो कै फायदा? 37मणू अपणे प्राण रे बदले कै देई सकदा? 38जे कोई इस व्यभिचारी ते पाप्पी जुग बिच मेरे ते मेरे सुब बसेख का शर्मसार हुंदा, तां मणू रे पुत्तर ने भी, जे मैं ही है, तिन्हा लोक्कां का तिस दिन शर्मसार होणा जां मैं अपणे स्वर्गीय पिता री महिमा बिच अपणे पवित्र स्वर्गदूतां कने हटणा।

বর্তমানে নির্বাচিত:

मरकुस 8: CDHNT

হাইলাইট

কপি