Luk 17

1kɔ pa ka aŋkarande ŋɔŋ, Pə gbəli hɛ yi thambe ɛsabu ya kəpənthbəla ɛ der, kɛrɛ mɔnɛ ka ɔwuni ɔwe mə kȧrȧ yi! 2Pə tə yi kɔ fisa bepi a gbak kɔ ȧsar ȧgbɔlȧ ka kalim kɔŋ, a fitha kɔ ro baŋ pəthasi bepi ɔ yɔ ukin ka aŋlɔl aŋe ɔ pənthbəla. 3Naŋ-e, botnɛ nu; bepi ɔwɔnt a mu ɔ yɔ ahakɛ, ŋal kɔ; bepi ɔ thupi, tera kɔ ti. 4Ɔwa bepi ɔ yɔ mu ahakɛ ɛlɔkɔ tȧmthədɛrəŋ ta pali-e, ɔwa ɔ kȧl fəlɛ ro rɔmu ɛlɔkɔ tȧmthədɛrəŋ, ɔ pa, I thupi, mə yi tə kətera kɔ ti. 5Aŋsom aŋ pa ka ɔMarki, Bȧr kȧlanɛ kȧsu. 6Ka ɔMarki ɔ pa, Bepi nə ba kəlanɛ mɔ aluka ŋa amustard-e, nə tə pa ka aŋənt aŋe, Tusinɛ, mə tɛpnɛ ro baŋ, aŋ tə wop ȧrim ra mu. 7Wuni reke ka mu ɔwe ba ȧbɔy ɔwe mə kutha ro kɔr, thalɔm ɔwe mə tɔl təlɔmɛ, bepi ɔ wur ro kɔr, ɔ pa ro ŋɔŋ, Der thɔŋ, yirȧ ka kədi, 8mɔ te mɔtha pa, Bɛnɛnɛ ta kadi kȧmi, ɔwa senɛ sɔ kȧmȧ mə taka mi ara mə i di haŋ i po di, i mun. Kədarəŋ kati, mə tə di, ɔwa mə tə mun-i? 9Ɔ tə mɔmɔ ȧŋbɔy pəkasifɛ ɔ po yɔ ȧte a yamari kɔ-i? 10Ya pə yi sɔ naŋ, ma nə po yɔ ȧtȧy bɛ ȧte a yamari nu-e, pa gbo, Saŋ sə yi ɛbɔy ɛte wur ŋani, sə po gbo yɔ ȧte sə yi tə kəyɔ.

11Ma ɔ yi ro roŋ tə kəkɔ ro Yerusalɛm-e, ɔ thas ro Samaria yi ro Kalili. 12Ma ɔ wɔŋ ka kagbɔm kəlɔm-e, alaŋgba tɔfɔt aŋa ba arom aŋ gbanɛ kɔ, aŋ təmȧ ɔbɔli poŋ. 13kaŋ ŋata ȧsim taŋ gbanklo, aŋ pa, Yisɔs, Mariki, ba su ȧney. 14Ma ɔ nənk ŋa-e, ɔ pa ro ŋaŋ, Kɔnɛ nu nə kɔ tɔrinɛ ka aŋfode. Ɔwa mɔ mə aŋ kɔnɛ-e, aŋ sɔthɔ kəfethər. 15Ka ukin ka ŋaŋ ma ɔ nənk kəpa a po yenkəs kɔ-e, ɔ kȧlanɛ, ɔ thɔkəs Kuru rə rim rəbana, 16kɔ fumpɔ ka ȧtȧtək tɔŋ, ɔ mɔmɔ kɔ. Ɔwuni ɔwe ɔ yi uSamaria. 17Ka Yisɔsȧŋ ɔ pa, A fethər hɛ aŋtɔfɔt-i? Kɛrɛ aŋtamthərɛŋanlɛ reke aŋ yi-e? 18Wuni ɔ yi hɛ ɔwe kȧlanɛ tə kəsɔŋ Kuru yiki thambe ɔtik ɔwe-i? 19kɔ pa ro ŋɔŋ, Yokanɛ, kɔnɛ ro rɔmu. Kȧlanɛ ka mu kə po mu yenkəs.

20Ma aŋFarisi aŋ yif ȧŋlɔkɔ areke rȧbȧy ra Kuru rə tə der-e, ɔ lasia ŋa ɔ pa, Rȧbȧy ra Kuru rə de hɛ kȧmȧ a nənk ri. 21Aŋ gbəli hɛ pa, Kəli nɔ! Thalɔm, Kəli ro! kotȧy-e rȧbȧy ra Kuru rə yi kətɔŋ ka nu.

22Yisɔs ɔ pa ka aŋkarande, Mȧrey mə tə der ma nə yema nənk ŋin ŋa mȧrey ma ɔWan ka wuni, kɛrɛ nə gbəli hɛ nənk ŋi. 23Ɔwa a tə kanɛ nu, kəli nɔ; kəli ro. Ɔwa te nu kɔ, thalɔm te tȧŋ ŋa, 24ȧtesoma-e mɔ mə pə nakthinɛ ka ȧŋgbȧp ŋin ka ȧkuru, ɔwa pə gbɛntha ka ȧŋgbȧp alɔm; yaŋ sɔ ɔWan ka wuni mɔ yi ka ȧŋrey ŋɔŋ. 25Kɛrɛ ɔ ba ras kənakasi rə mȧtȧy məgbathi, ɔwa rȧkomra are rə tə kasi kɔ.

26Ɔwa mɔ mə pə sa yi ka mȧrey ma Noa-e, ya mə pə re yi sɔ ka mȧrey ma ɔWan ka wuni. 27Aŋfəm aŋ di, aŋ mun, aŋ nȧntȧ, aŋ baləs haŋ ȧŋrey gbeŋ aŋa Noa ɔ wɔŋ ka ȧŋbil, ɔwa ȧmȧnt məfɔl mə der mə dim ŋa bɛ. 28Ɔwa mɔ mə pə sa yi sɔ ka mȧrey ma Lot-əŋ; aŋ di, aŋ mun, aŋ wai, aŋ thila, aŋ tɛp, aŋ seth. 29Kɛrɛ ka ȧŋrey gbeŋ aŋa Lot-əŋ ɔ wur ro Sɔdɔm-e, kɔm ka məsar mənȧnt nə thor kəwur ro Kuru, nə dim ŋa bɛ. 30Ya pə tə yi sɔ ka ȧŋrey aŋa ɔWan ka wuni ɔ tɔrinɛ. 31Ka ȧŋrey ŋati, bepi wuni ɔ yi ka ȧŋseth rokɔm-e, ɔwa ɛyɛt yɔŋ ɛ yi ro seth rokor, ta ɔ te thor tə kəkera yi dɛr; ɔwa kɔnɔ ɔwe yi ro kɔr-e, ta ɔ te kȧlanɛ. 32Nanɛ ɔrani ka Lot-əŋ. 33Wuni o wuni ɔwe mə thɛns tə kəbɛnɛ aŋesəm ŋɔŋ ɔ tə dim ŋi; kɛrɛ wuni o wuni ɔwe mə dim ŋi ɔ tə kisis ŋi. 34I kanɛ nu, ka ratatək rati afəm aruni ŋarəŋ aŋ tə yi rə kəfənt kin; a tə gbasi ukin, a tə tey ɔlɔm. 35Afəm abom ŋarəŋ aŋ tə tɔ dɛr rɔkin; a tə gbasi ukin, a tə tey ɔlɔm. 36Afəm aruni ŋarəŋ aŋ tə yi ro kɔr; a tə gbasi ukin, a tə tey ɔlɔm. 37Aŋ yif kɔ, Mariki, reke-e? kɔ pa ro ŋaŋ, Ro kabel ɔ yi-e, rə ɛyiba mə aŋ thoŋklanɛ dɛr rɔkin.

বর্তমানে নির্বাচিত:

Luk 17: TMNNT

হাইলাইট

কপি