Luk 16

1kɔ pa sɔ ka aŋkarande ŋɔŋ, Uyola ulɔm ɔ yi ɔwe ba ȧbɔy. Aŋlɔm aŋ gbanthir kɔ ro rɔŋɔŋ kəpa ɔ ləsər ɛyɛt yɔŋ. 2kɔ tela kɔ, ɔ pa ro ŋɔŋ, Ko apa aŋe aŋa i təl ta ȧtȧ mu-e? Yirka ɛyɛt ɛ mi kȧmȧ mə tɔri mi amɔlɔ mati, ȧtesoma-e mə gbəli hɛ sɔ yi ȧbɔy a mi. 3Ȧŋbɔy ɔ pa ka ȧŋmerȧ ŋɔŋ, To mə i yɔ thɔŋ-e, ma ɔmarki ɔ nɔy mapanth ma mi-e? I ba hɛ afɔsɔ tə kəgbus; i ba məlap tə kəthola. 4I tȧrȧ ȧte mə i yɔ-e, kȧmȧ, bepi a wurɔ mi ka rȧbɔy-e, aŋfəm aŋ tə malanɛ mi ka ɛseth yaŋ. 5Ɔwa ma ɔ tela ukin o kin ɔwe ba tə kəram ɔmarki kɔŋ-e ɔ pa ka ɔtɔtɔkɔ, Mɔlɔ mə ba kəram ɔmarki ka mi-a? 6Ɔ pa, Mȧro mɔlɔ ma ɛthuntha kɛmɛ kin. Kɔ pa ro ŋɔŋ, Gbasi ȧŋreka a mu, mə yirȧ lɛmp mə gbal təgba tərəŋ tɔfɔt. 7Ɔ pa ka ulɔm, Munɔ mɔlɔ mə ba kərȧm-a? kɔ pa, Pəla mɔlɔ ma ɛthuntha kɛmɛ kin. Kɔ pa ro ŋɔŋ, Gbasi ȧŋreka a mu, mə gbal təgba tanlɛ. 8Ka ɔmarki kɔŋ ɔ korikori ȧŋbɔy ŋɔŋ ukənə pəkasifɛ ɔ yɔ kətemp; kotȧy-e aŋwuth ŋa ȧdȧru aŋ yi atempi kətɔŋ ka ŋaŋ pəthasi aŋwuth ŋa ȧŋmothȧ. 9Ka i pa ro nu, Sekəranɛ nu rəyathki yi rayola rəkansoŋ, kȧmȧ bepi rə poŋ-e, a tə malanɛ nu ka ɛseth ya thəbana. 10Kɛrɛ ɔwe yi ubɔthi lanɛ ka ɔthan ɔ yi ubɔthi lanɛ ka ɔgbȧthi; ɔwa kɔnɔ ɔwe yi ukənə ka ɔthan ɔ yi ukənə ka ɔgbȧthi. 11Tiyȧŋ bepi nə yi hɛ abɔthi lanɛ ka rəyola rəkansoŋ-e, kanɛ gbəli lanɛ nu ka ȧte yi tateŋ-e? 12Ɔwa bepi nə yi hɛ abɔthi lanɛ ka ȧte wuni lɔm ɔ ba-e, kanɛ mə sɔŋ nu ȧtȧ nu gbeŋ-e? 13Abɔy o bɔy ɔ gbəli hɛ yɔna amarki ŋarəŋ, kotȧy-e tha ɔ gbɛŋa ɔkin, ɔ bɔthər ɔlɔm; thalɔm ɔ tə wopnɛ ɔkin, ɔ tə fəŋfsir ɔlɔm. Nə gbəli hɛ bȧtho Kuru yi rəyola. 14AŋFarisi sɔ aŋ təl mȧtȧy ame bɛ; ɔwa maŋ yi afəm aŋa bɔthər akala aŋ sel kɔ. 15kɔ pa ro ŋaŋ, Naŋ nə yema yɔ kȧmȧ afəm aŋ nənk nu alompi kɛrɛ Kuru ɔ tȧrȧ ɛmerȧ ɛ nu, kotȧy-e ȧte aŋfəm mə aŋ wop mɔ tȧy təbana tə yi təfarkɛ rodi ka Kuru. 16Ȧŋthɔ yi aŋnabi aŋ yi haŋ ka ȧŋlɔkɔ ŋa Yɔn. Kətəp ka ȧŋlɔkɔ ŋati a taməs rȧbȧy ra Kuru, ɔwa wuni o wuni ɔ wɔŋ ri rə afɔsɔ. 17Kɛrɛ pə tha yi ȧfɔy tȧy ta ȧkuru yi ȧŋthɔf kəpoŋ pəthasi tȧy təlɔl tin ta aŋthɔ tə kədinɛ. 18Wuni o wuni ɔwe mə ter ɔrani kɔŋ, ɔ kȧl nȧntȧ ulɔm, ɔ yɔ kərəp; ɔwa ɔwe mə nȧntȧ ukin ɔwe ɔwos kɔŋ ɔ ter-e, ɔ yɔ kərəp.

19Ɔwa uyola ulɔm ɔ yi ri ɔwe wɔŋ ɛlopra ɛfinɔ, ɔ di ɛyɛt ɛtȧk ȧrey o rei. 20Ɔwa a bot umɔnɛ ulɔm ɔwe mə a bont Lasarus ka kadare kɔŋ, ɔ la təsam, 21ɔ fela tə kəsɔthɔ ara mə fumpɔ ka aŋthebəl ŋa ɔyola; hali ɛtən aŋ der aŋ thȧməs tȧsam tɔŋ. 22Ka pə re yi ɔwuni mɔnɛ ɔ fi, ɔwa aŋmȧleka aŋ kera kɔ ka aŋkəpət ŋa Ebraham. Ɔwa ɔyola sɔ ɔ fi, ka a maŋk kɔ. 23Ma ɔ yi ka anakasi ro kərəfi-e, ɔ lakthi ɛfɔr yɔŋ, kȧmȧ ɔ nənk Ebraham ɔbɔli poŋ yi Lasarus ka aŋkəpət ŋɔŋ. 24kɔ tela ɔ pa, Pa Ebraham, ba mi ȧney, som Lasarus kȧmȧ ɔ məth aŋsəl ŋɔŋ rə mȧnt, ɔ thɔfsəl ramer ra mi, kotȧy-e i nakasi ɔbana ka anant nəmara ane. 25Kɛrɛ Ebraham ɔ pa, Wan kȧmi, kala ȧmerȧ kəpa munɔ mə po sɔthɔ ɛyɛt ɛ mu ɛfinɔ ma mə yi ka ȧdȧru, ɔwa Lasarus ɔ sɔthɔ yɛt ɛləs; ka-ake mən ɔ sɔthɔ kəbɛfəth, ɔwa munɔ mə nakasi. 26Pəthas ȧte, kətɔŋ ka mu yi saŋ a po bot akaŋ abana kȧmȧ ŋaŋ aŋa yema wur nɔ tə kəfəsi ro nu aŋ gbəli hɛ; ɔwa kȧmȧ ŋaŋ ri aŋ te gbəli fəsi ro rɔsu. 27kɔ pa, Pa, ɔmari mu, som Lasarus ka ȧŋseth ŋa ɔkas kȧmi, 28ȧtesoma-e i ba awɔnt aruni tamath kȧmȧ ɔ seri ta ȧtaŋ, kȧmȧ aŋ te der ka ɔdɛr ɔbaŋ ɔwe. 29Ebraham ɔ pa ro ŋɔŋ, Aŋ ba Mosisȧŋ yi aŋnabi. Ta aŋ təlȧ ŋa. 30kɔ pa, Pa Ebraham, yi thahɔ, kɛrɛ bepi wuni kin ɔ wur ka aŋfi-e, ɔ maŋ ŋa, aŋ tə thupi. 31kɔ pa ro ŋɔŋ, Bepi aŋ selɔ hɛ tə kətəla Mosisȧŋ yi aŋnabi-e, aŋ selɔ hɛ hali wuni kin ɔ yokanɛ ka aŋfi.

বর্তমানে নির্বাচিত:

Luk 16: TMNNT

হাইলাইট

কপি