मरकुस 4
4
बेजा बाह्णे वाले रा उदाहरण
(मत्ती 13:1-9; लूक. 8:4-8)
1फेरी यीसू गलील समुद्रा रे बाढे उपदेस देंदा लग्या: होर एह्ड़ी बडी भीड़ तेस वाले कठी हुई गयी होर से समुद्रा पर रखिरी एक किस्ती पर चढ़ी किन्हें बैठी गया, होर सारी भीड़ जमीना पर समुद्रा रे बाढे खड़ीरी रही। 2होर से तिन्हा जो उदाहरणा मन्झ बौह्त सारी गल्ला स्खान्दा लग्या, होर आपणे उपदेसा मन्झ तिन्हा किन्हें बोल्या, 3“सुणां! एक किसान बेजा बाह्णे रे कठे डोर्हीया जो गया। 4होर बेजा बाह्णे रे टैमा कुछ बेजा पैंडे रे बाढे पये होर चिड़ुऐ आई किन्हें से बेजा चुगी लया। 5होर कुछ बेजा पात्थरा वाली जमीना पर पया जेथी तिन्हा जो पूरा माटा नी मिल्या, होर नरम माटे मिलणे री वजहा ले स्यों छोड़े ई जम्मी गये। 6होर जेबे सूरज निकल्या, ता स्यों फुख्ही गये, होर जड़ नी पकड़णने री वजहा ले स्यों सुक्की गये। 7होर कुछ बेजा ता झाकड़ा मन्झ पया, होर झाकड़ बढ़ी किन्हें स्यों दबाई दिते, होर फली नी पाए। 8पर कुछ बेजा बांकी जमीना पर पया; होर स्यों जम्मे, होर बढ़ी किन्हें बौह्त फले; होर कोई तीह गुणा, कोई साठ गुणा होर कोई सौ गुणा फले।” 9होर यीसूए बोल्या, “जो मेरी गल्ला सुणदा लगीरा से बड़े ध्याना किन्हें सुणें।”
उदाहरणा रा मकसद
(मत्ती 13:10-17; लूक. 8:9-10)
10जेबे यीसू कल्हा रही गया, ता तेसरे साथिये होर बारा चेले तेस ले इन्हा उदाहरणा रे बारे मन्झ पूछेया। 11यीसूए तिन्हा किन्हें बोल्या, “तुस्सा जो ता परमेसरा रे राजा रे भेदा री समझ दितीरी, पर परमेसरा रे राज्या रे बाहरवाले रे कठे सब गल्ला उदाहरणा मन्झ हुंहाँ ईं। 12इधी कठे कि,
जो हांऊँ करहा स्यों देख्हा ऐं, पर नी देख्दे, होर जो हांऊँ बोल्हा,
स्यों सुणहां ता जरुर ऐं, पर नी समझ्दे,
एह्ड़ा नी हो कि स्यों पाप करणा छाडी दे, होर परमेसरा वखा जो वापस आये होर तिन्हारे पाप माफ किते जाए।”#4:12 यसा. 6:9-10, यिर्म. 5:21
बेजे बाह्णे वाले उदाहरणा रा मतलब
(मत्ती 13:18-23; लूक. 8:11-15)
13फेरी यीसूए तिन्हा किन्हें बोल्या, “क्या तुस्से ये उदाहरण नी समझ्दे? ता फेरी होर बाकी सभ उदाहरण किहाँ समझणे? 14किसान परमेसरा रे बचना जो सुनाणे वाले साहीं आं। 15कुछ लोक तेस बेजे साहीं ऐं जेह्ड़े पैंडे रे बाढे पहूंआं ऐं, यूं स्यों माह्णुं ऐं कि, जेबे स्यों बचन सुणहां ऐं, ता सैताने झटपट आई किन्हें बचना जो तिन्हा मन्झ बाहिरा था, से चकी किन्हें लई जाहाँ। 16कुछ लोक तेस बेजे साहीं ऐं जेह्ड़े गट्टे वाली जमीना पर पहूंआं ऐं; यूं स्यों माह्णुं ऐं, जो परमेसरा रे बचना जो सुणी किन्हें झटपट खुसी किन्हें मन्हां ऐं। 17पर आपणे अंदर जड़ नी पकड़णने री वजहा ले स्यों थोह्ड़े ही ध्याड़े विस्वास रख्हा ऐं; एता ले बाद जेबे बचना री वजहा ले तिन्हा पर क्लेस होर दुःख हुंहाँ, ता स्यों बचना पर विस्वास करणा छाडी देहां ऐं। 18कुछ लोक तेस बेजे साहीं ऐं जेह्ड़े झाकड़ा मन्झ पहूंआं ऐं, यूं स्यों माह्णुं ऐं, जिन्हें जे परमेसरा रा बचन सुणेया। 19होर संसारा री चिन्ता, पैसे रा धोखा, होर चीजा रा लालचा तिन्हा मन्झ स्माई किन्हें बचना जो बढ़ने ले रोकी देहां, होर स्यों परमेसरा री इच्छा पर नी चली पांदे। 20होर कुछ लोक तेस बेजे साहीं ऐं जेह्ड़े बढ़िया जमीना मन्झ पहूंआं ऐं, यूं स्यों माह्णुं ऐं, जो परमेसरा रे बचना जो सुणी किन्हें मनी लैहां ऐं होर परमेसरा री इच्छा रे मताबक करहा ऐं, यूं तेस फसला साहीं ऐं जो तीह गुणा, साठ गुणा, होर सौ गुणा फल ल्याहूहाँ ऐं।”
दिऊये रा उदाहरण
(लूक. 8:16-18)
21होर यीसूए तिन्हा किन्हें बोल्या, “कोई भी दिऊये जो भ्खाई किन्हें तेता जो मांजे या टोकरी रे थाले नी रखदा, एता रे बजाय दिऊये जो दीवटा पर रख्हा ऐं, ताकि तेता रा प्रयासा हर जगहा फैल्ही जाये 22क्यूंकि हर एक चीज़ जेह्ड़ी छुपिरी, से जाहिर हुई जाणी; होर हर एक रहस्य, प्रयासे मन्झ आऊंणा।” 23“जो मेरी गल्ला सुणदा लगीरा, से बड़े ध्याना किन्हें सुणें।”
24फेरी यीसूए तिन्हा किन्हें बोल्या, “चतन्न रैहया कि, तुस्से क्या सुणहां ऐं?” जेस नापा किन्हें तुस्से नाप्हा ऐं, तेस ई नापा किन्हें तुस्सा रे कठे भी नाप्या जाणा, होर तुस्सा जो ज्यादा दितेया जाणा। 25क्यूंकि जेह्ड़े मेरी गल्ला जो सुणे, तिन्हा जो ज्यादा समझ आऊणीं; पर जेह्ड़े लोक नी सुणदे लगिरे तिन्हा वाले जो भी समझ हाई; से तिन्हा ले लई लिती जाणी।
जम्मणे वाले बेजे रा उदाहरण
26फेरी तिन्हें बोल्या, “परमेसरा रा राज एह्ड़ा आ, जिहां किसान जमीना पर बेजा खिंडहा, 27होर राती ध्याड़ी से आपणे कामा मन्झ लगिरा रैहया, होर बेजा साउगी-साउगी जम्दा होर बधदा गया होर तेस जो पता नी चलेया कि ये सभ किहाँ हुएआ। 28धरती आपणे आपा ले फल ल्याऊहाँ ईं पैहले टियूऐ, फेरी नाजा री सीरी होर फेरी सीरी मन्झ कणका रा त्यार दाणा। 29पर जेबे फसल पक्की जाहीं, ता किसान आपणे लोका जो झटपट दराटी लईया भेज्हा, क्यूंकि कटाई रा टैम नेडे आई गईरा।”#4:29 योए. 3:13
राई रे दाणे रा उदाहरण
(मत्ती 13:31,32; लूक. 13:18,19)
30फेरी यीसूए बोल्या, “आस्से परमेसरा रे राजा री तुलणा केस किन्हें करहे, होर केस उदाहरणा किन्हें तेसरा ब्खान करहे? 31से राई रे दाणे साहीं आं; कि जेबे तेस जो जमीना मन्झ बाह्या जाहाँ ता धरती पर सब बेजे मन्झा ले से सभी ले छोटा हुंहाँ। 32पर जेबे तेस जो बाह्या जाहाँ, ता जम्मी किन्हें से सभी छोटे बूटे ले भी बडा हुई जाहाँ, होर तेसरी एह्ड़े बडे पांगे निकल्हा ऐं कि, आसमाना रे चिड़ु तेता री छाऊँआ मन्झ बसेरा करी सक्हा ऐं।”
33होर से लोका जो एस तरीके रे बौह्त सारे उदाहरण देई-देई किन्हें तिन्हारी समझा रे मताबक परमेसरा रा बचन सुणाहां था। 34होर यीसू हमेसा उदाहरण देई तिन्हा किन्हें बोल्हा था; पर कल्हे जे से आपणे चेले जो सब उदाहरण रा मतलब दस्हा था।
आंधी रा सांत करणा
(मत्ती 8:23-27; लूक. 8:22-25)
35तेस ई ध्याड़े जेबे सांझ हुई, ता यीसूए तिन्हा किन्हें बोल्या की, “आऊआ, आस्से गलील समुद्रा रे दूजे बाढे वखा जो चल्हा ऐं।” 36होर तिन्हें भीड़ छाडी दितेया चेले किस्तिया पर चढ़ी गये जेता पर यीसू बैठीरा था होर स्यों तेस जो आपणे साउगी लेई गये। होर तिन्हा साउगी होर भी किस्तिया थी। 37तेबे एक बडा तूफान आया, होर लैहरा किस्तिया पर टकरान्दी लगी, होर किस्ती पाणी किन्हें भहर्रदी लगी। 38होर यीसू आपु किस्ती री पीछे री गद्दी पर सया करहा था; तेबे चेले तेस जो जगाई किन्हें बोल्या, “हे गुरु, क्या तुजो चिन्ता नी ई कि, आस्से डूबी किन्हें मरणे वाले ऐं?”
39तेबे यीसूए उठी किन्हें तूफान प्रुआचेया, होर लैहरा जो बोल्या, “सांत रह, रुकी जा!” होर तूफान रुकी गया होर समुद्र सांत हुई गया।
40होर यीसूए तिन्हा किन्हें बोल्या, “तुस्से किधियो डरहा ऐं? क्या हल्ली बी तुस्सा जो विस्वास नी आ?”
41होर स्यों बौह्त ई डरी गईरे थे होर तिन्हें आपु मन्झ बोल्दे लगे, “ये कुणहां कि, तूफान होर पाणी री लैहरा भी एसरा हुक्म मन्हां ऐं?”
বর্তমানে নির্বাচিত:
मरकुस 4: MJLNT
হাইলাইট
শেয়ার
কপি
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
