Génesis 12
12
Abramta Tayta Dios promitishqan
1Juk junaqmi Abramta Tayta Dios kayno nirqan: <<Markaykita y ayluykita kachaykur aywakuy rikatsinäpaq kaq partiman.#Hech. 7.2-3; Heb. 11.8.
2<<Qampita miraqkunatami ali rikashaq tsaytsikaman mirar jatun nación rikakunanpaq.
Bendicionnïta qoptïmi pïmaypis respitashunkipaq.
Qampitami wakin runakunapis bendicionnïta chaskinqapaq.
3Bendisishuqnikikunataqa bendiciontami qoshaq.
Maldicionashuqnikikunataqa maldicionashaqmi.
Qam kaynikipami kay patsacho lapan casta runakunapis bendicionnïta chaskipäkunqa>>.#Hech. 3.25; Gál. 3.8.
4 Tayta Dios tsayno niptinmi sobrinun Lotwan Abram aywakurqan. Haránpita yarqunan witsan Abram kaykarqan qanchis chunka pitsqa (75) watayuqnami. 5Canaánman aywakurmi warmin Saraita, sobrinun Lotta y Haráncho tarishqan lapan ashmayninkunata pushakurqan. Tsaynöpis uywankunata qatikurkur y lapan imaykankunatapis apakurkurmi aywakurqan.
Canaánman chayaykurnami 6Siquem marka cercanyaq aywar Moripa sagrädu encina yöran nawpancho Abram tarqan. Tsay partichöqa cananeo runakunami taykarqan. 7Tsaycho taykaptinmi Tayta Dios yuriparkur Abramta kayno nirqan: <<Qampita miraqkunatami kay intëru jalqakunata y raqrakunata qoykushaqpaq>>.#Hech. 7.5.
Tsaycho yuripashqanpitami altarta Abram perqarqan Tayta Diosta manakur adorananpaq.
8Nirkurmi inti jeqamunan kaq lädu Bet-el tsimpan jalqaman aywakurqan. Tsaychömi toldunta ichitsir tarqan. Tsaychöpis juk altarta perqarkurmi Tayta Diosta manakur adorarqan. Tashqan kaqpita inti jeqanan kaq lädupami Bet-el marka karqan. Hai markanami kaykarqan inti jeqamunan kaq lädupa. 9Tsaypita cercaman cercaman witirmi aywarqan Neguevman chayashqanyaq.
Egiptucho Abram tashqan
10Taykashqan kaqcho pasaypa muchuy kaptinmi Egipto nacionman Abram aywakurqan tsaychöna tänanpaq. 11Egiptuman yaykuykarnami warmin Saraita kayno nirqan: <<Qamqa kuyaylapaq warmimi kanki. 12Tsaymi Egipto runakuna warmï kashqaykita musyaykur wanurkatsimar qamta warminpaq apakushunkipaq. 13Mana wanutsimänanpaq panï kashqaykita ninki>>.#Gén. 20.2; 26.7.
14Egiptuman Abram chayaykuptinmi tsay runakuna Saraita rikarqan kuyaylapaq kashqanta. 15Egiptucho Faraónpa mandäshiqnin runakunapis rikarqan Sarai kuyaylapaq kashqanta. Tsayno kuyaylapaq kashqanta wilaptinmi Faraónqa pushatsirqan palaciunman. 16Saraita palaciunman apashqanpitami Abramta qoykurqan uyshakunata, cabrakunata, wäkakunata, bürrukunata y camëllukunatapis. Tsaynömi qoykurqan ashmayninkunapaq olqutapis warmitapis.
17Tsayno kaptinpis Saraita apashqanpitami Faraónta y lapan aylunkunata fiyu qeshyawan Tayta Dios castigarqan. 18Tsaymi Abramta qayaykatsir Faraón kayno nirqan: <<¿Imanirtaq kaytaqa ruraykamashqanki? Sarai warmiki kaykaptinqa ¿imanirtaq mana wilamarqaykitsu? 19¿Imanirtaq <panïmi> nimarqayki? Tsayno niykämaptikiqa warmïpaq apaykarnaqa punurpis punümanchi karqan. Kanan jukla warmikita pushakurkur kaypita aywakuy>>.
20Tsayno nirmi Faraónqa soldädunkunata kacharqan Egiptupita Abramta qarqunanpaq. Tsaymi Egiptupita Abram aywakurqan warminta y imaykankunatapis apakurkur.
বর্তমানে নির্বাচিত:
Génesis 12: qvmB
হাইলাইট
শেয়ার
কপি
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
