Génesis 13
13
Abramwan Lot rakikashqan
1Egiptupita Abram kutikushpanmi warminta pushakurkur y lapan imaykantapis apakurkur Neguevman chayarqan. Paywanmi aywarqan sobrinun Lotpis. 2Abram pasaypa rïcu runami karqan. Tsaymi qorinpis qellayninpis y uywankunapis atska karqan. 3Neguevpita aywakurnami patsakur patsakur Bet-elman Abram chayarqan. Tsaypitanami kutikurqan nawpata tashqan kaqman. Tsayqa karqan Bet-elpita Hai markaman aywanachömi. 4Tsaychömi altarta unay perqashqan kaqcho Tayta Diosta manakur adorarqan.
5Lotpis tiyun Abramnömi rïcu karqan. Paypapis uyshankuna, cabrankuna, wäkankuna y toldunkunapis atskami karqan. 6Tsaytsika uywankuna kaptinmi juk patsalacho ishkan tänanpaqqa mana ayparqantsu. 7Tsaymi Abrampa uywa mitsiqninkunawan Lotpa uywa mitsiqninkuna qewa janan pelyapäkuq. Tsay witsan cananeo runakuna y ferezeo runakunami tsaycho tarkaykarqan.
8Uywa mitsiqninkuna tsayno pelyaptinmi sobrinun Lotta Abram kayno nirqan: <<Tsay aylula kaykarqa ama chikinakushuntsu ni mitsikuqnintsipis ama pelyapäkutsuntsu. 9Rikashqaykinöpis kay parti jatunmi kaykan. Maynincho täkunaykipaqpis akrakuy. Janapa aywaptikiqa noqa urapami aywashaq. Urapa aywaptikiqa janapami noqa aywashaq>>.
10Tsayno niptinmi Lotqa Jordán mayu nawpan intëru pampakunata Zoar marka lädupa rikachakurqan. Tsay pampakunacho qewapis y yakupis atska kaptinmi Edén huertanöraq#Gén. 2.8-9. y Egiptunöraq karqan. Tsayno karqan Sodoma y Gomorra markakunata Tayta Dios manaraq ushakätsiptinmi. 11Tsawraqa mas ali kashqanta rikarmi Lotqa akrarqan Jordán mayu nawpan pampakunata. Tsaynöpami Abrampita rakikar aywakurqan inti jeqamunan lädupa. 12Abrammi itsanqa jinan Canaánlacho quëdakurqan. Lotqa Jordán mayu nawpancho kaq markakunaman aywar Sodoma marka cercanchömi tarqan. 13Sodomachöqa Tayta Diosta mana cäsukuq jutsasapa runakunalami tarqan.
14Lot aywakuptinna Abramta Tayta Dios kayno nirqan: <<Kay taykashqaykipita norti kaq lädupa, sur kaq lädupa, inti jeqamunan lädupa y inti jeqanan lädupa rikachakuy. 15Tsay rikashqayki partita lapantami qoykushayki. Imayyaqpis tsayqa kanqa qampaq y qampita miraqkunapaqmi.#Hech. 7.5. 16Yanapaptïmi qampita miraqkuna atskaman miranqapaq. Tsaymi paykunaqa aquyshano yupaytapis mana atipaypaq kanqapaq. 17Ayway intërupa rikapakamuy. Lapan rikashqayki kaqtaqa qamtami qoykushaykipaq>>.
18 Tayta Dios tsayno niptinmi lapan imaykankunatapis apakurkur Hebrón marka cercanman Abram aywakurqan. Tsaychömi karqan atska encina yörakuna. Tsay munti karqan Mamre runapami. Tsaycho tarnami altarta Abram perqarqan Tayta Diosta adorar manakunanpaq.
বর্তমানে নির্বাচিত:
Génesis 13: qvmB
হাইলাইট
শেয়ার
কপি
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
