ŊwɑꞋnɛ-Gɑŋntúu Yɛ́su Kɛlístɔ 3
3
Pyɛ̂ lɔk lík-Yɛ́su ŋ́ɡɛ wɛcɔ́ ŋɡɑŋkẅíꞋlɛ fíitɛ
1Ɛ́ pɔ́ yɛcɔ́ mbɔ́tnjí, tɛ nɛm yɛ́tɑ́t ŋkɑ́ yi Pɑyúdɑ cɛꞋlɛ́nɛ Sɛ́ pɔ́ ŋ́kuꞋ. Pyɛ̂ pɔ́p Jɑ̂ŋ pʉʉ ŋ́ɡʉ ZʉꞋ-nɔŋpɔꞋ. 2Ɛ́ ɡɔ́ ḿbɔ́, mbɔ pɛ́ kɑ pɔ́ ńtíi wɛcɔ́ ŋɡɑŋkẅíꞋlɛ ńdɔk ńtɔ́ lɛ́Ꞌ tsʉʉ, ńtsẅíkŋɛ wɛ́ ntsupuꞋ ẅi pɛ́ fúŋnɛ ŋɡɔ: «Ntsundɑ́-mɛsuu» Pɑ́Ꞌ ɑ ɡʉ ńdɔɔ yúu mbɔ̌ pʉɔ pi pɔ́p lɛɛnɛ zúꞋu ŋ́ɡʉ tsɛt ZʉꞋ-nɔŋpɔꞋ. Ẅîwɑ́ ŋu pɔ́ ẅi pɛ́ kɑ ɡɔ́ ḿbí wɛ́ ɑ pɔ́ pɔ ŋɡɑŋkẅíꞋlɛ. 3A jʉ́ɔ Pyɛ̂ pɔ́p Jɑ̂ŋ pɔ́ ńdɛɛ ŋ́ɡʉ tsɛt ZʉꞋ-nɔŋpɔꞋ, ɑ lɔɔ ŋkɑ́p mbɔ̌ pɔ́p. 4Pyɛ̂ pɔ́p Jɑ̂ŋ tík mík nǔu wɛ́. Pyɛ̂ cú mbɔ̌ wɛ́ ŋɡɔ: «Líŋɛ wɛk.» 5ŊɡɑŋkẅíꞋlɛ niitɛ ńtík mík nǔu pɔ́p, ḿbɔ́ ḿbyɛ́p, ḿbɔ́ ŋ́kwɑŋɛ ŋɡɔ ɛ́ ɡʉ ŋ́ɡɛ ŋɡɔ́ku ɔɔ pɔ́p ɡɑ́ yúu mbɔ̌ wɛ́. 6Pyɛ̂ cú mbɔ̌ wɛ́ ŋɡɔ: «Ŋ kɑ́ ɡẅɛɛ sɑ̌ɑ ŋkɑ́p pɔ́, ŋ́kɛ́ mbɔɔ tʉ́n-ŋɡɔ̂l ɡẅɛɛ, lɑ́ yúu mi ŋ ɡẅɛɛnɛ, mɔ ŋ́ɡɑ́ mbɔ̌ ɡu. N cú nǔu lík-Yɛ́su Kɛlístɔ mɔ́ɔ-Nɑ̌zɑlɛt: Lɔ sɛ́ ńnɛn.» 7Ńcú pɔ́Ꞌɔ, ŋ́ɡẅɛɛ pɔ́ yɛ́ yi tʉʉ, ḿbɔ́ ḿbʉꞋ wɛ́, mɛku mɛ́ pɔ́p mɛlʉ̈ɔꞋ-mɛku mɛ́ ɡɔ́ɔ ńtɛntɛ. 8A lɔ sɛ́ ńtʉʉ, ńzɛ nɛnɛn. Pɔ́p ɡɑŋntúu-Yɛ́su tɛmtɛ ńdɛɛ ŋ́ɡʉ tsɛt ZʉꞋ-nɔŋpɔꞋ. A nɛn ŋ́kítɛ, ḿbɔ́ ŋ́ɡɛ́mtɛ Sɛ́. 9Lɑ́Ꞌ yi ɛ́ ḿbɔ́nɛ zúꞋu jʉ́ɔ pɑ́Ꞌ ɑ sɛ́ ńnɛn ḿbɛn ḿbɔ́ ŋ́ɡɛ́mtɛ Sɛ́. 10Pɔ́p niitɛ ńdíŋɛ ńjʉ́ɔ ɑ pɔ́ pɔ kwɑꞋ ŋɡɑŋkẅíꞋlɛ ẅi ɑ lɔ ńnɑ́ŋ ntsundɑ́-mɛsuu ńdɔ́ɔ yúu lɑ́, ɛ́ kʉꞋnɛ wɔ́p pɔ́p mɑɑ, mbíꞋ yúu mi ɛ́ ɡɛnɛ wɛ́.
Pyɛ̂ sɛ́ ńcú nu mbɔ̌ lɑ́Ꞌ tsɛt ZʉꞋ-nɔŋpɔꞋ
11Ndʉ́m ɛ̂wɑ́ kɛ́ ḿbɔɔ ḿbɔ́ ɛ́fú nɛjɔ́ŋ Pyɛ̂ pɔ́p Jɑ̂ŋ ŋ́kẅɛ́Ꞌlɛ pɔ́, lɑ́Ꞌ tsʉʉ pɔ́ mɑɑ, ńnɑ́ɑtɛ ńtɔ́ ńcúꞋlɛ nɛjɔ́ŋ pɔ́p ntsupuꞋ, ɛ́ pɔ́ yi pɛ́ kɑ pɔ́ ɛ́fúŋ nɛ́ «tɛtɑ́ɑ-Sɑlɛmɔ.» 12Pyɛ̂ jʉ́ɔ pɑ́Ꞌ pɔ́p sɛ́ ńcúꞋlɛ nɛjɔ́ŋ pɔ́p pɔ́Ꞌɔ, ńcú mbɔ̌ lɑ́Ꞌ ŋɡɔ: «Pʉɔ-Íslɑyɛ̂l, pʉʉ mɑɑ pɑ́Ꞌ ɑ fíitɛ́nɛ mbíꞋkʉ̈ɔ́? Pʉʉ sɛ́ ńdíŋɛ wɛ́k pɔ pɑ́Ꞌ ŋkɑ́ yi pɛk lɔk pɔ mɛk mɛtʉʉ kɛ pɔ mɛk mɛfɑꞋ nzʉʉ Sɛ́ lɑ́ ńdɔk ŋ́ɡɛ wɔ ŋu nɛn ntɛ́ kʉ̈ɔ́?» 13Ɛ́ pɔ́ pɔ ŋɡɔ Sɛ́-Ábɛlɛhɑ̂m, ḿbɔ́ Sɛ́-Ɛsɑk, mbɑ wɛ Yɑkɔ̂p, mbɔ Sɛ́-pɛmɑ̂ɑŋɡɑpnjẅɛt pɛkŋɛ, kɑ ɡɑ́nɛ nɛɡúꞋ mbɔ̌ ŋɡɑŋfɑꞋ wɛ Yɛ́su. Mbɔ pʉʉ kɑ fɛn wɛ́ mbɔ̌ pɑsɑ́Ꞌlɑ́Ꞌ, ḿmuŋɛ wɛ́ mbi Pilɑ́tu. Lɑ́, mbɔ ɑ kɑ ŋɑk ntsɑŋ Yɛ́su ɛ̂wɑ́ tɛ ńzɑ́p ŋɡɔ pɛ́ nɑ́ wɛ́. 14Pʉʉ kɑ muŋɛ ŋu ẅí Sɛ́ kɑ tsɔ́Ꞌnɛ, ɑ pɔ́ ndɑꞋ ŋu ẅí ɑ ndʉ́ŋndʉŋ, ḿbɛn ḿbúꞋ mbɔ́ mbɔ̌ pilɑ́tu ŋɡɔ ɑ nɑ́ njẅíŋu mbɔ̌ pʉʉ. 15Pʉʉ kɑ ɡɛ pɔ́Ꞌɔ, ńjẅí ŋu ẅi jʉ́ ɡɛnɛ lɑ pɛ́ pɔ́ ɡú. Lɑ́ Sɛ́ kɛ́ ńzẅíimɛ wɛ́ nǔu nɛvú tɛ pɛk jʉ́ɔ wɛ́ nɛ́ mík mɛ́k, pɛk sɛ́ ɛ́sɑ́Ꞌ ɛ́sẅíi wʉ́ʉ. 16Ɛ́ nǔu ŋkɔ̂ɔnɛ, pʉʉ sɛ́ ńjʉ́ɔ ŋɡɑŋ-kẅíꞋlɛ wɔ, ḿbɛn ḿbɔ́ ńjí wɛ́. Ɛ́ lɛɛ pɔ nǔu wɛk nɛzɑ́p tʉ́m nǔu Yɛ́su ɛ̂wɑ́ lɑ lík yɛ́ ɡɑ́ mɛtʉʉ mbɔ̌ wɛ́, ɑ lɔk ńdɔ sɛ́ ńtʉ́ʉ mbi pʉʉ. Ɛ́ lɛɛ pɔ nǔu nɛzɑ́p tʉ́m nǔu Yɛ́su lɑ ɑ fíitɛ pɑ́Ꞌ pʉʉ sɛ́ ńjʉ́ɔ lɑɑ.
17Pɔ́ɔpɛ́mɑ́ pɑ́ɑ, n tsuŋ ḿbɔ́ ńjí sʉ́Ꞌnɛ ŋɡɔ yúu pʉʉ pɛ́ pɛfɔɔ pʉ́ʉ kɑ ɡɛnɛ nǔu Yɛ́su kɑ lɔk ḿbɔ́ pɔ ɡʉʉnɛ. 18Lɑ Sɛ́ fú nǔu ŋ́ɡɛ nu yi ɑ kɑ zɑ́Ꞌnɛ njí ńdɔk ntsu-pɑcẅiŋkʉʉ pɛ́ pɛ́tsʉʉ ńcú ɛ́ puutɛ. Yîyɑ́ nu pɔ́ ŋɡɔ Nzɑ́Ꞌŋkʉ ẅí Sɛ́ kɑ kɑꞋnɛ kɑ pɔ́ ŋ́ɡʉ ńdɑ́Ꞌ ńjʉ́ɔ ŋɡʉ̈ɔ́Ꞌ. 19Pɔ́Ꞌɔ lɑ́, pʉʉ kɛ́ ŋ́kúp mɑt wʉʉ, ḿbɛ́m Yɛ́su Kɛlístɔ. Sɛ́ likŋɛ mɛnu kɛpɔŋ mʉ́ʉ. 20Ɛ́ lɛɛ pɔ́Ꞌɔ, Tsɑpʉɔ ɡɛ pʉʉ pɔ́ tsɛt mɔ́fíitɛ. A ɡɛ ńtúu Nzɑ́Ꞌŋkʉ ẅí ɑ kɑ zɑ́Ꞌnɛ njí ńtsɔ́Ꞌ wɛ́ ntɛ́ tú yʉ́ʉ, ɑ pɔ́ Yɛ́su. 21Ɛ́ nǔu ŋkɔ̂ɔnɛ Yɛ́su kɛ́ ŋ́ɡẅɛɛ pɔ nɛnɑ́ŋ tʉ́nɛ́pú. Tɛ ńdɑ́Ꞌ ŋ́kúu lɛ́Ꞌ yi Sɛ́ ɡʉ ńdɑ́Ꞌ ŋ́ɡɛ kʉ̈ɔ́ lɑ́ shɔtnɛ ńtsʉ́Ꞌ ḿbɔ́ pɔ yi fí. Pɑ́Ꞌ ɑ kɑ lɑ́Ꞌnɛ ńdɔk ntsu kwɑꞋ pɑcẅiŋkʉʉ pɛ́ pi ɑ kɑ tsɔ́Ꞌnɛ ńcú tɛ ntí sɑk. 22Mɔ̌sɛ̂ɛ kɑ zɛɛ ńcú ŋɡɔ: «Tsɑpʉɔ Sɛ́ wʉʉ ɡʉ ńdɑ́Ꞌ ńtúu wɛcɔ́ Ŋɡɛ́mndʉ̈ɔ́Ꞌ wɛ. A pɔ́ pɑ́Ꞌ mɔ, ńcẅɛt pɔ tsɛtsɛt pʉʉ. A lɑɑ ndɑꞋ ńcú ŋɡɔ pʉʉ ɡɛ ŋɡɔ́ku ɔɔ pʉʉ zúꞋ.» 23Ɛ́ ɡʉ nǔu ŋu ẅí ɑ kɛ́ lɑ́Ꞌ ńzúꞋ ntsu ẅîwɑ́ Ŋɡɛ́mdʉ̈ɔ́Ꞌ-Sɛ́ pɔ́, pɛ́ fú tsɛtsɛt pʉɔ pi Sɛ́ kɑ tsɔ́Ꞌnɛ, ńcẅɛɛtɛ wɛ́, ńjẅí wɛ́. 24Pɛŋɡɛ́mndʉ̈ɔ́Ꞌ-Sɛ́ pi pɔ́p kɑ cúnɛ nu tɛ ɛ́fú nǔu Sɑmîɛ, ŋ́kúu nǔu pinɛ pɔ́p kɑ pɑ́ɑtɛnɛ nzʉʉ yɛ pɛ́tsʉʉ, pɔ́p kɑ lɛꞋlɛ yɔ́p pɑ́Ꞌ mɔ mɛlɛ́Ꞌ ɡʉ ńdɑ́Ꞌ ḿbɔ́ pɔ́Ꞌɔ. 25Yúu mi Sɛ́ kɑ pɔ́ ńdɔk ntsu-pɛŋɡɛ́mndʉ̈ɔ́Ꞌ ŋ́kɑꞋ kɑ pɔ́ yʉ́ʉ. Kɑɑ Sɛ́ kɑ ɡwɑtnɛ pɔ́p Ábɛlɛhɑ̂m pɔ́ yʉ́ʉ ɡúu kɑɑ ɛ̂yɑ́ pɔ́ ŋɡɔ: «Mɔ ńdɑ́Ꞌ ńdɛɛ pɔ nǔu njẅɛt yu lɑ́ ńníꞋ mbɔ́tnɛ nǔu mɛtsɛ́nndɑ́ tsʉʉ mi ɛ́ ndǔ tsɛ́tsɑ́Ꞌ.» 26Ɛ́ yɛ́tɛ́ lɑ́ Sɛ́ kɑ ɡɔ́ ńtsɔ́Ꞌ ŋɡɑŋfɑꞋ wɛ́ ńtúu, ńzɛɛ ḿbiitɛ ntɛ́ pɔ tú yʉ́ʉ, ńtúu wɛ́ ŋɡɔ ɑ tɔ́ ńníꞋ mbɔ́tnɛ nǔu pʉʉ, ŋ́ɡɛ mbɑ wɔ̌ lɑ́ tsɛtsɛt pʉʉ mɛꞋ mɛfɑꞋ kɛpɔŋ.
বর্তমানে নির্বাচিত:
ŊwɑꞋnɛ-Gɑŋntúu Yɛ́su Kɛlístɔ 3: JGO
হাইলাইট
শেয়ার
কপি
Want to have your highlights saved across all your devices? Sign up or sign in
CABTAL, 2017
