ŊwɑꞋnɛ-Gɑŋntúu Yɛ́su Kɛlístɔ 2
2
Zẅikŋɛ-Sɛ́ tɔ́ nǔu pɑpɛ́m Yɛ́su
1Lɛ́Ꞌ-ndínɑ yi pɛ́ fúŋnɛ ŋɡɔ Pɑŋntɛkɔ̂t#2.1 Pɑŋtɛkɔ̂t: Ndíinɑ-lɔk yúu-Pɑyúdɑ. Ndíinɑ-Pɑskɑ lɛɛ ɛ́ ɡɛ lɛ́Ꞌ mɛ́ɡɛ́mɛ́ntɑɑ. ɡɛ ńtɔ́, pɑpɛ́m Yɛ́su cúꞋlɛ tɑ́Ꞌ zʉꞋ pɛ́tsʉʉ ndɑ́. 2Pɛ́ nɑ́ŋ tɛ ńzúꞋ zʉꞋ fú tʉ́nɛ́pú ńzɛ nɛnʉꞋnɛ, ńnʉꞋnɛ pɑ́Ꞌ ŋkɑ́ yi ntʉʉ fɛ́m sɛ́ ńdɛɛ lɑ́, ńnʉꞋnɛ nʉꞋnɛ́nɛ tɛ ńjʉ́ ndɑ́ yi pɔ́p kɑ nɑ́ŋnɛ zúꞋu. 3Pɔ́p jʉ́ɔ yɛcɔ́ yúu cẅɛt, ḿbɔ́ pɑ́Ꞌ lʉ́m-múk lɑ́, ɛ́sɑ́ɑnɛ ńtʉ́ʉ nǔu mbɑ wɔ̌ lɑ́ tsɛtsɛt pɔ́p. 4Zẅikŋɛ-Lɛ́ɛnɛ́nɛ jʉ́ wɔ́p pɛ́tsʉʉ. Pɔ́p zɛ nɛsẅíŋɛ mɛsẅíŋɛ-mɛlɑ́Ꞌ ndɛꞋ, ɛ́sẅíi pɑ́Ꞌ Zẅikŋɛ Lɛ́ɛnɛ́nɛ ɡɑ́nɛ mɛtʉʉ ŋɡɔ pɔ́p sẅiŋɛ pɔ́Ꞌɔ.
5Ɛ́ ɡɔ́ ḿbɔ́, pɑyúdɑ pinɛ pɔ́p ɡɛnɛ mɛkuꞋ-Sɛ́, fú tsɛt mɛŋɡɔŋ tsʉʉ pɔ́ ńnɑ́ŋ Yɛlúsɑlɛm. 6Pɔ́p zúꞋ pɑ́Ꞌ zʉꞋ nʉꞋnɛ́nɛ pɔ́Ꞌɔ, ńnɑ́ɑtɛ ńtɔ́ ńcúꞋlɛ tɛ ḿbɔ́ pɔ kɑ́tɛ. Ɛ́ pɔ́ ŋ́kʉꞋnɛ wɔ̌lɑ́, ɑ zúꞋ pɑpɛ́m Yɛ́su lɔk pɔ kwɑꞋ sẅiŋɛ yɔ́p lɑ́Ꞌ yi ɑ fúnɛ nɛ́ zúꞋu ńcú nu. 7Ɛ́ pɔ́ ŋ́kʉꞋnɛ wɔ́p pɔ́p nɛn ḿbɔ́ sɑŋtɛ mík ńcú ŋɡɔ: «Pʉɔ pinɛ pɔ́p sẅiŋɛ́nɛ lɑɑ kɑ́ pɔ́ pɔ pʉɔ-Ŋɡɑlilɛɛ tsʉʉ pɔ́ ɔɔ? 8Ɛ́ pɛn ŋ́ɡɛ ŋɡɔ́ku wɔ̌ lɑ́ nǔu pɛkŋɛ tsʉ́Ꞌ ńzúꞋ, pɔ́p sẅiŋɛ pɔ kwɑꞋ sẅiŋɛ-lɑ́Ꞌ yɛ? 9Pʉɔ pinɛ pɔ́p fúnɛ Pɑ́ltɛ mbɑ pɛ́ Mɛdɛs, ŋ́ɡɛ pɛ́ Ɛlɑm tsɛtsɛt pɛkŋɛ zɑꞋnɛ. Mbɑ pʉɔ pinɛ pɔ́p nɑ́ŋnɛ Mɛzɔpɔtɑmîi ŋ́ɡɛ pi pɔ́p Judɛ̂. Pʉɔ-Kɑpɑdɔs mbɑ pʉɔ-Pɔ̂ŋ ŋ́ɡɛ pʉɔ nǔu pɑk-ŋɡɔŋ Azîi pɔ́ pɔ sɛ́. 10Pɑfú Filíjîi pɔ́p Pɑnfílî pɔ́p Ɛɡíptɔ, pɑfú Silɛ̂nɛ nǔu pɑk-ŋɡɔŋ-Líbîi, pɑfú Lɔ́mɑ mbɔ́ ńnɑ́ŋ zɑ́Ꞌnɛ pɔ́ pɔ sɛ́. 11Pɔ́p pɑyúdɑ pi pɔ́p lɛ́nɛ nǔu mɛlɛ́Ꞌ mɔnɛ. Pɛcɔ́ pʉɔ tsɛtsɛt pɛkŋɛ pɔ́ pɑyúdɑ píŋɡup, pɛcɔ́ pɔ́ pʉɔ pi pɔ́p kɑ pɛ́mnɛ nu-Sɛ́-pɑyúdɑ. Kɛ́ tʉ́ʉ pɑfú Kɛlɛ̂t pɔ́p Alɑ́bîi. Ɛ́ ɡɛ ŋɡɔ́ku pɛkŋɛ pɛtsʉʉ zúꞋ kwɑꞋ nǔu mɛsẅíŋɛ mɛkŋɛ mi ɛ́ mɛntɛ́ mɛntɛ́, pɑ́Ꞌ pʉɔ pɔnɛ cúnɛ pɑ́Ꞌ mɛfɑꞋ-Sɛ́ ɡúꞋnɛ pɔ́Ꞌɔ?» 12Ɛ́ puu ŋ́kʉꞋnɛ wɔ́p tɛꞋ. Pɔ́p kwɑŋɛ ḿbɛ́t kɛ́ mɛkŋɛ, ńtsʉ́Ꞌ shɔtnɛ ḿbíkŋɛ tsɛtsɛt pɔ́p pɔ ŋɡɔ: «Yɔ nu lɔk ńcú ŋɡɔ kʉ̈ɔ́?» 13Lɑ́ pɛcɔ́ pʉɔ pɔ́ ŋ́ɡwɛ pɑpɛ́m Yɛ́su ɛ̂pɑ́ ɡwɛnɛ, ńcú ŋɡɔ: «Tɛ pʉɔ pɔ́nɛ kɑ́ pɑ́ mɛluꞋ pɔ́ ɔɔ?»
Pyɛ̂ sɛ́ ńcú nu mbɔ̌ lɑ́Ꞌ
14Pyɛ̂ pɔ́p ɡɑŋntúu ntsɔ̌pmɔꞋ ɡɔ́ɔ ŋ́kɛ́ ńdɔ sɛ́. Pyɛ̂ lɔk kwɑꞋ ŋɡi tɛnnɛ ńcú mbɔ̌ lɑ́Ꞌ ŋɡɔ: «Pʉʉ pɑyúdɑ, tɛ mbɑ pʉɔ tsʉʉ pinɛ pɔ́p Yɛlúsɑlɛm lɔ́Ꞌnɛ, pʉʉ zẅíꞋlɛ, mɔ ɛ́sẅíi wʉ́ʉ nɛ́ yúu mi ɛ́ yɛ́tɛ́.» 15Pʉɔ pɔnɛ kɑ́ pɑ́ mɛluꞋ pɑ́Ꞌ pʉʉ kwɑŋɛ́nɛ lɑ́ pɔ́. Yɔ zɛɛ ḿbɛ́t ḿbɔ́ pɔ nɛm yɛ́nɛ́pfúꞋu mbɑꞋmbɑꞋɑ́#2.15 Mbɑ nɛm nɛɡɛ́m ẅi pɛ́ ɡɛ ɡúŋ nɛtʉ́ʉ zúꞋu zɛɛ ḿbɛ́t kɛ́ kuꞋ.. 16Nu yi Juɛ̂l, Ŋɡɛ́mdʉ̈ɔ́Ꞌ-Sɛ́ kɑ zɑ́Ꞌnɛ njí ńcú pɑꞋnɛ ńdɔk ḿbuutɛ.
17A kɑ cú ŋɡɔ Sɛ́ cú ŋɡɔ:
«Ndẅiknzʉʉ lɛ́Ꞌ ɡʉ ńdɑ́Ꞌ ḿbɔ́ ŋ́kuꞋ,
n níꞋ Zẅikŋɛ yɑ́ɑ nǔu ŋumɛsɔŋ tsʉʉ;
mbɔ́ŋkʉ̈ɔ́ pʉ́ʉ pɛ́ mbɛ́ɛnɛ mbɑ pɛ́ pɑŋɡɛ́ ɡʉ ńdɑ́Ꞌ ńtsʉ́Ꞌ pɑcẅiŋkʉʉ pɑ́ɑ.
Mɔ ŋ́ɡɛ ŋ́ŋíɛꞋ mík-ŋɡwɑsuu yʉ́ʉ pɔ́p jʉ́ɔ mɛyúu mɑ́ɑ tsɛt njʉɔ,
pɛlwɛn pʉɔ pinɛ pɔ́p tsɛtsɛt pʉʉ jʉ́ɔ mɛnu mɑ́ɑ tsɛt njʉɔ.»
18Ɔ́ɔŋ, mɔ ŋ́ɡɛ ńtɑ́ɑ nǔu mîmɑ́ mɛlɛ́Ꞌ,
ŋ́ɡɛ Zẅikŋɛ yɑ́ɑ kúu nǔu pʉɔ pɔ́p kɔŋnɛ wɑ́ɑ pɛ́ mbɛ́ɛnɛ mbɑ pɛ́ pɑŋɡɛ́.
Pɔ́p tsʉ́Ꞌ pɑcẅiŋkʉʉ pɑ́ɑ.
19Mɔ ńdɑ́Ꞌ ŋ́ɡɛ ndɑɑkɑ́jʉ́ɔ nu cẅɛt tʉ́nɛ́pú.
Mɛnu mɑ̌ɑmɑɑnɛ cẅɛt ndǔ tsɛ́tsɑ́Ꞌ.
Pɛ́ jʉ́ɔ mɛci, ńjʉ́ɔ múk, ńjʉ́ɔ pɑ́Ꞌ ndíndí lɑ́ɑmɛ́nɛ,
20Lɛ́Ꞌlɑ́Ꞌ-Tsɑpʉɔ ɡʉ ńdɑ́Ꞌ ŋ́ɡɔ ńtɔ́, lík-mɔ́nɛm zɛɛ ɛ́shɔtnɛ ɛ́sʉ́ʉ, lík-sɑŋ shɔtnɛ ḿbɑŋ pɑ́Ꞌ mɛci lɑ́.
Yîyɑ́ lɛ́Ꞌlɑ́Ꞌ ɡʉ ńdɑ́Ꞌ ḿbɔ́ kwɑꞋ lɛ́Ꞌ-nu,
ɛ́ pɔ́ lɛ́Ꞌ yi Sɛ́ ńnyɛt yúu mi ɑ yɛ́tɛ́.
21Ɛ́ ŋ́kɛ́ ḿbɔ́ pɔ́Ꞌɔ, pʉɔ tsʉʉ pinɛ pɔ́p kíinɛ ɛ́fúŋ Tsɑpʉɔ, pɔ́p luk.
22Pyɛ̂ pɛn ńcú ŋɡɔ: «Pɑíslɑyɛ̂l, pʉʉ tík mɛtúutɛ́ mʉ́ʉ ńzúꞋ nu yɔ yí mɔ ńcú lɑɑnɛ. Yɛ́su mɔ́ɔ-Nɑ̌zɑlɛt, ɑ pɑꞋnɛ ḿbɔ́ ŋu ẅí Sɛ́ kɑ tsuŋnɛ ńnyɛt mbɔ̌ pʉʉ ŋɡɔ jʉ́ kɑ túunɛ wɛ́. A kɑ lɔk pɑ́Ꞌ ɑ kɑ lɛɛnɛ nǔu wɛ́ ŋ́ɡɛ mɛnu mɑ̌ɑmɑɑnɛ tsɛtsɛt pʉʉ, ŋ́ɡɛ ndɑɑkɑ́jʉ́ɔ, ḿbɛn ńnyɛt wʉ́ʉ nɛ́ mɛlii-mɛnu ntɛ́ nɛ́ ntɛ́. Tɛ pʉʉ tsuŋ ḿbɔ́ ńjí. 23Yɔ ŋu ẅí pɛ́ kɑ níꞋnɛ mbɔ̌ pʉʉ, ɛ́ pɔ́ pɔ pɑ́Ꞌ Sɛ́ kɑ lɑ́Ꞌnɛ ŋ́kwɑŋɛ ńzɑ́p. Pʉʉ kɑ kɛ́ ŋ́ɡɛ pɑkɛ́ji Sɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ńjẅí wɛ́. 24Lɑ́ Sɛ́ kɑ kíɛꞋ mɛŋkʉ-nɛvú nǔu wɛ́, ńzẅíimɛ wɛ́ mbíꞋŋɡɔ ɑ kɑ zɛɛ ńtɛn pɑ́Ꞌ ɛ́ lɑɑ ḿbɔ́ nɛvú kúꞋlɛ wɛ́ ndɑ́tsɑ́ŋ. 25Pʉʉ zɛɛ ńzúꞋ nu yi fɔɔ-Ndɑvît kɑ cúnɛ ntɛ́ wɛ́, ɑ kɑ cú ŋɡɔ:
Mɔ ḿbɔ́ ńjʉ́ɔ Tsɑpʉɔ, ɑ pɔ́ mbi mɔ ŋ́kɑ́ tsʉʉ,
ɑ pɔ́ nǔu ɡúŋ pɔ́ yɑ́ɑ yi tʉʉ, ḿbɔ́ ńtɔ́ɔtɛ wɑ́ɑ, nɛpɔ́ yi tʉ́m yɑ́ɑ kíi ḿvukŋɛ pɔ́.
26Ɛ́ yɛ́tɛ́ lɑ́ tʉ́m yɑ́ɑ nɑ́ŋ ńtsɑ́ɑtɛ, ŋɡi tsɑ́ɑtɛ zɛɛ ńcẅɛt ntsu mɔ.
N dɑɑ ńzɛɛ ḿpfú pfúnɛ, mbɔ pfú yɑ́ɑ ɡʉ ńnɔɔ ḿbɔ́ ḿbyɛ́p wú Sɛ́ pyɛ́pnɛ,
27mbíꞋŋɡɔ ɛ́ lɑɑ ḿbɔ́ ɔ pɔɔ mɛꞋ wɑ́ɑ lɑ́Ꞌ-pɛpfú pɔ́,
ḿbɛn ŋ́kɛ́ mbɔɔ pɛ́m ŋɡɔ ŋu ẅí ɔ kɑ tsɔ́Ꞌnɛ wɛ́ lʉ̈ɔ́ tsɛt nɛshi pɔ́.
28Ɔ kɑ nyɛt wɑ́ɑ nɛ́ mɛsɛ̂ndúŋ mi mɔ ńdɛɛ nǔu lɑ ńduk.
Mɔ ŋ́ɡɛ ńtɔ́ ḿbɔ́ zʉꞋ yí ɔ zúꞋu, nu pɔŋ wɑ́ɑ. N tsɑ́ɑtɛ tɛꞋ.»
29Pyɛ̂ pɛn ńcú ŋɡɔ: «Pɔ́ɔpɛ́mɑ́ pɑ́ɑ, pʉʉ pɛ́m ŋɡɔ ɛ sɑ́ɑnɛ sɑ́ɑnɛ́nɛ ɛ́sẅíi wʉ́ʉ nɛ́ nu nǔu mɑ̂ɑŋɡɑpnjẅɛt wɛkŋɛ fɔɔ Ndɑvît. A kɑ pfú, pɛ́ tẅíi wɛ́ lɑ́ nɛshi nɛ́ kɛ ḿbɔ́ pɔ lɑ́Ꞌ zɑꞋnɛ tɛ ŋ́kúu lɔ́Ꞌnɛ pɔ́ ɔɔ! 30Lɑ́ ɑ m̄bɔ́ Ŋɡɛ́mdʉ̈ɔ́Ꞌ-Sɛ́, ḿbɛn ḿbɔ́ ńjí nu yí Sɛ́ kɑ kɑꞋnɛ mbɔ̌ wɛ́ tɛ ŋ́kɑɑ ŋɡɔ jʉ́ Sɛ́ ɡʉnɛ ńdɑ́Ꞌ ŋ́ɡɛ, mɔ́ɔ ẅi ɑ cẅɛtnɛ nǔu njẅɛt yɛ nɑ́ŋnɛ nǔu kɔꞋ-nɛfɔɔ nɛ́. 31Ɛ́ m̄bɔ́ pɔ́Ꞌɔ, mbɔ fɔɔ-Ndɑvît zɑ́Ꞌ njí ńjí ŋɡɔ Nzɑ́Ꞌŋkʉ ɡʉ ńdɑ́Ꞌ ńzẅíimɛ nǔu nɛvú. Ɛ́ yɛ́tɛ́ lɑ́ ɑ kɑ cú nu yi ɛ fúnɛ nɛcú lɑɑ nǔu Nzɑ́Ꞌŋkʉ ŋɡɔ Sɛ́ ŋkɑɑ ḿbɔ́ ŋ́ɡʉ ḿmɛꞋ wɛ́, ɑ ɡɔ́ŋ lɑ́Ꞌ-pɛpfú pɔ́, ḿbɛn ŋ́kɛ́ mbɔɔ pɛ́m ŋɡɔ ɑ lʉ̈ɔ́ tsɛt nɛshi pɔ́. 32Nzɑ́Ꞌŋkʉ ɑ Yɛ́su. Sɛ́ kɑ zẅíimɛ wɛ́ nǔu nɛvú, pɛk wɔ pɛtsʉʉ sɛ́ ɛ́sẅíi yɔ nu, ɛ́ pɔ́ nu yí pɛk kɑ jʉ́ɔnɛ. 33Sɛ́ kɑ ɡɛ, ɑ kɔ́Ꞌ tɛ ńnɑ́ŋ nǔu ɡúŋ pɔ́ yɛ́ yi tʉʉ. Ɛ́ ŋkɔ̂ɔnɛ pɑ́Ꞌɑ, mbɔ Tɑ́t wɛ́ Sɛ́ cɔ́kŋɛ Zẅikŋɛ Lɛ́ɛnɛ́nɛ mbɔ̌ wɛ́, ɛ́ pɔ́ pɑ́Ꞌ jʉ́ Sɛ́ kɑ kɑꞋnɛ. Yúu mi pʉʉ zúꞋnɛ ḿbɛn ńjʉ́ɔ lɑ́ɑ, ɛ́ Zẅikŋɛ Lɛ́ɛnɛ́nɛ ɛ̂yɑ́ yi Yɛ́su tswɛtnɛ nǔu pʉɔ pɛ́. 34Fɔɔ Ndɑvît kɛ́ mbɔɔ tʉ́nɛ́pú kɔ́Ꞌ. Lɑ́ ŋ́kɛ́ ńcú nu ntɛ́ Nzɑ́Ꞌŋkʉ ŋɡɔ: Tsɑpʉɔ Sɛ́ cú mbɔ̌ wɑɑ Tsɑpʉɔ ŋɡɔ: Tɔ́ ńnɑ́ŋ nǔu ɡúŋ-pɔ́ yɑ́ɑ yi tʉʉ. 35ŃzẅíꞋlɛ n dɔk ɡɑŋmbuu pú, ŋ́ɡɛ ntíknɛ-mɛku mú».
36Pɔ́Ꞌɔ lɑ́, ŋɡɔŋ njẅɛtndɑ́-Íslɑyɛ̂l, pʉʉ ɡẅɛɛ nɛtsuŋ ńjí sʉ́Ꞌnɛ ŋɡɔ, Yɛ́su ẅí pʉʉ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́, ɑ jʉ́ ẅi Sɛ́ kɑ lɔknɛ wɛ́ ŋ́ɡɛ Tsɑpʉɔ, ḿbɛn ńdɔk wɛ́ ŋ́ɡɛ Nzɑ́Ꞌŋkʉ ẅi Sɛ́ kɑ kɑꞋnɛ.
37Pʉɔ zúꞋ yɔ sẅiŋɛ, ɛ́ puu ŋ́kʉꞋnɛ wɔ́p tɛꞋ. Pɔ́p píkŋɛ Pyɛ̂ pɔ́p pɛcɔ́ ɡɑŋntúu ŋɡɔ: «Pɔ́ɔpɛ́mɑ́, tɛ pɛk ɡʉ ŋ́ɡɛ ŋɡɔ́ku?» 38Pyɛ̂ pʉ̈ɔt mbɔ̌ pɔ́p ŋɡɔ: «Pʉʉ kúpmɛ mɑt. Wɛ́t ŋu lɑ́ nǔu pʉʉ pɛ́m pɛ́ nuꞋ wɛ́ ŋki nǔu lík-Yɛ́su Kɛlístɔ. Nɛpɔ́ yi Sɛ́ ɡʉ ńdikŋɛ mɛnu kɛpɔŋ mɛ́ ŋ́ɡɑ́ mbɔ̌ wɛ́. Sɛ́ ɡɔ́ɔ ŋ́kɛ́ ŋ́ɡɑ́ Zẅikŋɛ Lɛ́ɛnɛ́nɛ mbɔ̌ pʉʉ. 39MbíꞋŋɡɔ yúu mi Sɛ́ kɑ kɑꞋnɛ, ɑ kɑ pɔ́ ŋ́kɑꞋ mbɔ̌ pʉʉ, mbɑ mbɔ̌ mbɔ́ŋkʉ̈ɔ́ pʉ́ʉ. A kɑ pɔ́ ŋ́kɑꞋ mbɑ mbɔ̌ pʉɔ pinɛ pɔ́p nɑ́ŋnɛ ŋɡɑ sɛsɑ, ŋɡɔŋ pʉɔ tsʉʉ pi Tsɑpʉɔ Sɛ́ wɛkŋɛ ɡʉ ŋ́ɡɛ ɛ́fúŋ wɔ́p nɛtsʉ́Ꞌ pʉɔ pɛ́.»
40Pyɛ̂ kɑ pɛn ńtsuŋ ńcú nu mbɔ̌ pɔ́p nɛlɔk ɛ́sẅíi wɔ́p nɛ́ yúu mi ɑ sɛ́ ńjí nǔu Yɛ́su, ḿbɔ́ ńníꞋ mɛtʉʉ mɔ́p ńcú ŋɡɔ: «Pʉʉ fú tsɛtsɛt pʉɔ pinɛ pɔ́p ndǔ mbí ŋkɔ̂ɔnɛ pi pɔ́p kɑ fɑɑnɛ sɛ̂ndúŋ ńcẅɛt ńjí ŋɡɔ pʉʉ ɡʉ ńduk.» 41Pʉɔ tɛ ńzɑ́ɑ kɑ zúꞋ nu yí Pyɛ̂ cúnɛ, ḿbɛ́m, pɛ́ nuꞋ wɔ́p ŋki. Pɛ́ kɑ nuꞋ pʉɔ ŋki lɛ́Ꞌ ɛ̂yɑ́ tɛ mbɔ ɛ́ pɔ́ yúu ntsɑ́Ꞌ yɛ́tɑ́t. Pɔ́p kẅiꞋ tsɛtsɛt pɑpɛ́m Yɛ́su.
Nɛnɑ́ŋ-pʉɔ-Yɛ́su
42Pɑpɛ́m Yɛ́su kɑ pɔ́ ńtɔ́ ŋkɑ́ tsʉʉ kɛ́ tẅí, ɡɑŋntúu pɔ́ ńzíꞋ wɔ́p nɛ́ nu-Sɛ́, ḿbɔ́ ńtɛmtɛ ńnɑ́ŋ pɑ́Ꞌ pɔ́ɔpɛ́mɑ́ lɑ́, ḿbuutɛ ŋ́kwɛ́t yúu#2.42 Ḿbuutɛ ŋ́kwɛ́t yúu: Mbɔ ɛ́ pɔ́ yújʉ́ Lɛ́ɛnɛ́nɛ kɛ mbɑ mɛjʉ́ pɛ́ tɛmtɛnɛ ńjʉ́.. Ḿbɛn ńcúꞋlɛ ńcɛꞋlɛ Sɛ́. 43Sɛ́ kɑ pɔ́ ńdɔk ɡɑŋntúu ŋ́ɡɛ mɛnu mɑ̌ɑmɑɑnɛ mbɑ mɛŋkʉꞋnɛ mɛnu. Pʉɔ tsʉʉ jʉ́ɔ pɔ́Ꞌɔ, ŋ́ɡɑ́ mɛkuꞋ Sɛ́. 44Pɑpɛ́m nu-Yɛ́su tsʉʉ kɑ ɡẅɛɛ pɔ tɑ́Ꞌ tʉ́m, ńtɛmtɛ yúu pɔ́p tɛmtɛnɛ. 45Pɔ́p kɑ pɔ́ ɛ́fɛn mɛtsɛ́tsɑ́Ꞌ mɔ́p mbɑ yúu tʉʉndɛn yɔ́p, ńdɔk ŋkɑ́p ńtɔ́ pɛ́ ɡɑptɛ ŋ́ɡɑ́ yɛ mbɑ wɔ̌lɑ́ pɔ pɑ́Ꞌ ɛ́ ɡʉ ŋ́kuꞋ nǔu yɛ́ nu. 46Ɛ́ kɑ pɔ́ ŋɡɔŋ lɛ́Ꞌ tsʉʉ, nɛlɛɛmɛ wɔp pɔ́ ŋɡɔ pɔ́p cúꞋlɛ ZʉꞋ-nɔŋpɔꞋ. Pɔ́p kúu mɛndɑ́ ḿbɔ́tnɛ ŋ́kwɛ́t yúu, ńjʉ́ yúupɛjʉ́ pɔ nɛ́ tsɑ́ɑtɛ. Mbɑ wɔ̌lɑ́ ɡẅɛɛ pɔ tʉ́m sʉ́Ꞌnɛ. 47Pɔ́p kɑ pɔ́ ŋ́ɡúꞋlɛ Sɛ́ tɛꞋ. Lɑ́Ꞌ tsʉʉ kɔŋ yɔ́p ntɛ́ nɛnɑ́ŋ. Ɛ́ pɔ́ lɛ́Ꞌ tsʉʉ, Tsɑpʉɔ pɔ́ ńdɔk pʉɔ pi ɑ ɡɛnɛ pɔ́p luk, ńdɔk ŋ́kẅiꞋ nɔɔ yɔ́p.
বর্তমানে নির্বাচিত:
ŊwɑꞋnɛ-Gɑŋntúu Yɛ́su Kɛlístɔ 2: JGO
হাইলাইট
শেয়ার
কপি
Want to have your highlights saved across all your devices? Sign up or sign in
CABTAL, 2017
