Marcos 14

Ma kryuutspetyën, y'ookyën ets jyuukpyikyën ja Jesús

1Mäjtsk xëëw ënäty tyëkoy'äty ets ja ëmaayxyëëw tpaatëty, ko ja ja'ay tkaytyë ja tsajpkääky ka'apë levadura tmëëtëtyën, ënät ja teety wintsëntëjk ets ja tsajptëkotyëtë yaj'ijxpëjkpëtëjk t'ixtaaytyë ja ënëëmëtyä'äky wi'ix yajmatsëtyën ja Jesús ets tyaj'ooka'antë. 2Tääts aak ayi'iyë nyäy'ënanëtë:

Ka'ap y'oyëty ko jää nmajtsmëty xëëwjoty, jä'ä ko tsojk ja'ay xim yam pyëtë'ëktëty.

Ko tu'uk ja to'oxytyëjk tukutäämë'ëky ja pa'akxu'kpë nëë ja Jesús

3Tam ënäty ja Jesús Betania, ma ja Simón ja tyëjkën, mëti'ipë yajtijpën Simón pu'uts mëëtpë. Jam y'u'unyë ma ja kaaypyäjnën ko ja to'oxytyëjk tu'uk tmëmiiny ja poop tsaa apëjkën, yë'ë jap ja pa'akxu'kpë nëë janty tsowpë. Jä'äts ja to'oxytyëjk ojts tkupu'utu'uty ets tukutäämë'ky ja Jesús. 4Ënät jënaakën ja ja'ay jyoot'anpëjktë mëti'ipë ënäty jamëtyën ets y'ënantë:

¿Tii ko yë pa'akxu'kpë nëë nëkoo tyajwintëkoy? 5Nikë tëë jeexyë të tyimyajtooky tëkëëk mëko'px xëëw nitunyën ets jeexyë ëyoopëja'aytyëjk yajtukputëkëtë.

Ets ojts t'ojtë ja to'oxytyëjk.

6Ënät ja Jesús y'ënëmaayëtë:

Ixmatstë. ¿Tii ko xyajjotkëxtë? Ëjts oyës n'ixy mëti'ipë tyuunpyën mëët ëjts. 7Yë ëyoopëja'ay xëmë miits xymyëët'ata'antë, jyëkyejpy xypyutëkëtëty oyjyëna'ajëty; e ëjts ka'apës jeky xymyëët'ata'antë. 8Ya'atë to'oxytyëjk yë'ë të tuny mëti'ipë të myäyën tunëty, tëëjës xytyukkuutsy yë pa'akxu'kpë nëë ets jëtu'un nipëjktaakë koos naaxtëkëja'any. 9Tëy miits n'ënëëmëtë ko oy tyimmaajëty maa ënäty yajkajpxwä'kxyën ya'atë oy aaw oy ayuk, yajnikajpxëp näjyëtu'un ets mëj'äämpy nëjkx nyäxy ya'atë to'oxytyëjk mëët mëti'ipë të tunyën mëët ëjts.

Ko ja Judas nikäjpxy pën ja Jesús ets tkë'ëyäky

10Ënät ja Judas Iscariote tsyo'ony, tu'uk ja mëti'ipë mëët nyimajkmäjtskën ja Jesús ja y'ijxpëjkpëtëjk ets ojts tninëjkxy ja teety wintsëntëjk ets tkë'ëyäka'any ja Jesús. 11Ko jëtu'un tmëtoowtë ja teetywyintsënëty, ënät xyoontaktë ets y'ënantë ko tmo'oja'antë ja meeny may ja Judas. Tääts ja Judas ja winma'any t'ixtaay wi'ix tkë'ëyaka'anyën ja Jesús.

Ja Wintsën ja y'a'ux

12Mëtu'kxëëwpë ënäty ja xëëw tyunyë ko ja jutiis ja'ayëty ja tsajpkääky tkaytyë ka'apë ja levadura tmëëtëtyën; ko tyaj'ooktë ja kupixyny ëmaay xyëëwjoty. Ënät ja Jesús ja y'ijxpëjkpëtëjk tyajtëëwtë:

¿Maas ja ëmaayxyëëw a'ux nipëjktaakëtëty ets n'a'ux'ajtmëty?

13Tääts ja Jesús nimäjtsk ja y'ijxpëjkpë tkäjxtso'ony, ets t'ënëmaay:

Nëjkxtë jam mëj kajpnjotm, jam tu'uk ja ye'etyëjk xypyaata'antë mëti'ipë ja tsiiyë tyuknëëko'onëpën, yë'ëts mpanëjkxtëp, 14ets ma yë'ë tyëkën, jëtu'un ja kutëjk xy'ënëëmëtëty:

Yë'ë yë Wintsën yajtëëpy, ¿mëti'ipë tëkot myäjkpy ma ja y'ijxpëjktpëtëjk mëët y'a'ux'ata'anyën, ma yajmëjjawëja'anyën ja ëmaayxyëëw? 15Tääts tu'uk ja tëkot myajtuk'ixa'antë jap këjxy mëti'ipë apaatë ëwxijtpën. Japts miits ja a'ux xyaj'oyëtëty.

16Ënät ja y'ijxpëjkpëtëjk nimäjtskpë jyajtë mëj kajpnjotm. Jamts tjantytpyatë ijxtëm ënäty ja Jesús të tyuk'ëwa'anxëtën ets jam t'ijxkujkëtyë ja ëmaayxyëëw a'ux.

17Ko tsyu'ujënë, ënät ja Jesús mëët ja y'ijxpëjkpëtëjk jam jyajtë. 18Ko twinkuwä'tsëy ja kaaypyäjn ets kyääytyë, ënät ja Jesús y'ënäny:

Tëy miits n'ënëëmëtë ko tää yaa tu'uk nmëëtka'ayëm mëti'ipës xykyë'ëyakaanpën.

19Tääts ja y'ijxpëjkpëtëjk jyotmaytyëjkëtyë ets xim yam nyäyajtëëwëtë:

¿Ëjts jëtääjë?

20Ënät ja Jesús y'ëtsooy:

Yë'ë tu'uk ja nimajkmäjtskpë mëti'ipë nän jap ja tsyajpkääky y'amujëpën maas yë ntexyën. 21Jëtu'unës mëpaat njaty ijxtëm ja Tios ja y'aaw y'ayuk y'ënä'änyën, ëjts, naaxwiinyëtë ja'ay y'U'unk. Temë tääpë ja'ay mëti'ipës xykyë'ëyakaanpën, nikë oyxyëp të kyamëxu'unk'aty.

22Tam ënäty y'a'ux'atë, ko ja Jesús tnixajëy ja tsajpkääky ets ja Tios tmooy ja kukajpxën. Tääts ojts tujkwä'kxy ets tmooy ja y'ijxpëjkpëtëjk ets t'ënëmaay:

Kaytyë, ya'atë, ëjts yë ni'kx nkopk.

23Tääts tkoonë'ky tu'uk ja a'ukën ets tkukajpxëy ja Tios, ënät tmooy ja y'ijxpëjkpëtëjk ets ni'ëmukë t'uktëy. 24Jëtu'un ja Jesús ojts y'ënë'ëmxëtë:

Ëjts ya'atë ne'pny mëti'ipë tsunaanp xä'kxaanpën ets tyiytyëkëty ja käjpxytyu'unën mëti'ipë ja mayjyä'äy tyuk'oy'atëpën. 25Tëy miits n'ënëëmëtë, ka'apës n'ëk'uukanë ya'atë tsatym nyëë, ënätnëmës n'uukëty jatëkok ko ënäty jam nyajpaatyës ma Tios ja kyutujktaknën.

Ko ja Jesús tnikäjpxy ko ja Pedro kyuyu'utsa'anyë

26Ko t'ëëwtaaytyë tu'uk ja ëy, jam ojts nyëjkxtë ma Olivos kopkën. 27Jam ja Jesús ojts y'ënë'ëmxëtë:

Xy'ëxmatsantëpës miits ni'ëmukë, jä'ä ko jëtu'un ja Tios ja y'aaw y'ayuk y'ënä'äny: Nyaj'ookäämpyës ja kupixyny këwent'ajtpë ets ja kupixyny kyääkwa'kxta'aja'antë. 28E koos njuukpyëkëty jatëkok, jëwyiinës nnëjkxa'any jam Galilea ok ma miitsëtyën.

29Tääts ja Pedro t'ënëmaay ja Jesús:

Oy ni'ëmukë ja'ay tja'ëxmajtstëpë ja myëpëjkënëty, ëjts ka'apës mijts nijëna'a n'ëxmatsa'any.

30Ënät ja Jesús y'ënëmaayë:

Tëy mijts n'ënëëmë ko tyam koots, ka'anëm ënäty ja këtseynyë'aaw yaaxë'ëky mëmäjtsk okpë koos mijts tëkëëk ok xykyuyu'utsa'any.

31E ja Pedro ni'ikyë y'ënaan'ëtë'ëtsy:

Oyës ntimy'ookëty mëët mijts, nijëna'a mijts nkakuyu'utsy.

Aakjëtu'un ja myë''ijxpëjkpëtëjk y'ënantë.

Ko ja Jesús ja Tios tmëkäjpxy jam Getsemaní

32Tääts ojts nyëjkxtë ma ja it txëëwatyën Getsemaní. Jamts ja Jesús ja y'ijxpëjkpëtëjk t'ënëmaay:

Yaa u'unyëtë, wä'änës ja Tios nëjkx n'ëkja'amyetsy.

33Ojts twoownëjkxy ja Pedro, Santiago ets Juan. Tääts ja Jesús tyëjkëy moonpë tujkpë ets y'amutskëy, 34ënät t'ënëmaay ja y'ijxpëjkpëtëjk:

Këjxpës yë n'aaw njot mëët yë jotmay mëpaatëpës n'o'knë. Yaa miits wë'ëmtë ets juuky itë.

35Tääts ja Jesús ojts wäänë jyaak nëjkxy ets nyäkyoxtënaaytyakë, tyukpatyp ja wyinpok ja naax ets ja Tios t'amëtooy pën mëpaat'ajtp ets ka'ap y'ëyo'onpaatëty. 36Ets tmëkäjpxy ja Tios:

Mijts, Tios Teety, mijts winë myaj'o'oyëtyääpy. Këtii xyajkutukëty etsës n'ëyo'onpaatëty; je'eyëp ko ka'ap jyëtu'unëty ijxtëmës ëjts tii ntsokyën, yë'ë tunëp ijxtëm të xytyuknipëjktaakën.

37Tääts wyimpijty ma jam ja y'ijxpëjkpëtëjkëtyën, ets tuk'ijxpejty ko maatëp ënäty jam. Tääts t'ënëmaay ja Pedro:

Simón, ¿tëë mmaanaxyë, tii këtii mëtä'äky ets wijy m'itëtyë? 38Wijtë käjtë, ja'amyätstë yë Tios ets ka'ap ja ku'oypyë mnätyukmëmëta'akëtëty. Ënaanp ja aaw jot ets tunëty mëti'ipë Tios tsyojkpyën; je'eyëp ko ni'kx kopk, yë'ë atoonk apatk yajpatp.

39Tääts ja Jesús nyëjkxkojnëpë ets näjyëtu'un ja Tios tmëkajpxkojnëpë. 40Ko ojts wyimpity ma ja y'ijxpëjkpëtëjkën, maatëp jatëkok tpaty, jä'ä ko nëkoo ënäty mya'ajanëtë ets ka'ap tnijawëtë wi'ix y'ëtsowtëty. 41Mëtëkëëk'ok ojts wyimpity ets y'ënëmaayëtë:

¿Mjaakmaap mjaakpo'kxtëpë? Jäpaat të ma'atë, tëë ja nyixëëw tpaaty etsës nyajkë'ëyakëty ma ja pokyjyä'äyëtyën, ëjts, naaxwiinyëtë ja'ay ja y'U'unk. 42Pëtë'ëktë ets nja'amëty, tyaa ja ja'ay myiny mëti'ipës xykyë'ëyakaanpën.

Ko Jesús yajmatsy

43Tam ja Jesús ënäty jëtu'un y'ënä'äny ko ja Judas jyä'äjty, tu'ukpë, ma ja nimajkmäjtskpë ja y'ijxpëjkpëtëjkën. Yë'ë mëët jyä'äjty ja mayjyä'äy, tëypyujxn ets kepy myëmiintëp. Jä'ä ja teety wintsëntëjk käjxëtëp, tsajptëkotyëtë yaj'ijxpëjkpëtëjk ets ja mëjja'aytyëjkëty. 44Ja Judas tëë ënäty ja ijxpät tyäky, jëtu'un ënäty të y'ënä'äny:

Pënës ntsu'kxyp, yë'ë ënäty, yë'ëts mmatstëp ets xyajnëjkxtëty, mëk xymyatstëty.

45Ko Judas jam jyä'äjty, ënät twinkuwa'këy ja Jesús ets t'ënëmaay:

Wintsën.

Ets ojts tsu'kxy. 46Tääts ja Jesús yajknixajëy ets yajmajtsy.

47Tu'uk ja Jesús ja y'ijxpëjkpë ojts ja tyiypyujxn tjuuty ets ja teety wintsën ja tyuunpë tatskpujxtuty. 48Ënät ja Jesús ja ja'ay tyajtëëy:

¿Tii ko miits xynyimintës mëët yë tëypyujxn, mëët yë kepy tsaa ets xymyatsa'antës ijxtëm jeexyë tii mëj këjää të ntuuntëkoonyës? 49Jëpom të nyajpaaty mëët miitsëty ko nyaj'ijxpëktë ma ja mëjtsajptëjkën ets ka'ap miits të xymyatstës. Paaty jëtu'un tyam tyunyë jyätyë winë ets ja Tios ja y'aaw y'ayuk y'atëwëty.

50Ënät ni'ëmukë ja y'ijxpëjkpëtëjk y'ëxmajtsëtë ets kyäktë.

Ma tu'uk ja ëna'k yajmajtsyën ets ja wyit nikäktuty

51Jamts ënäty ja Jesús pyanëjkxyë tu'uk ja yä'äy ëna'k, poop wit wyit'ajtyp. 52Ojts yajmatsy ets ja wyit tukäktuty, ets niwa'ats ëxwa'ats kyeky.

Jesús yajpaaty ma ja mayjyä'äy ënäty të nyiye'eypyätën

53Tääts ja Jesús ojts tmënëjkxtë ma tu'uk ja teety wintsënën. Jamts ja teety wintsëntëjk nyiye'eypyäjtë mëët ja mëjja'aytyëjk ets ja tsajptëkotyëtë yaj'ijxpëjkpëtëjk. 54Jëkäm jëxkë'ëm ja Pedro tpanëjkxy ja Jesús koonëm timpyaja'ajty ma ja teety wintsën ja tyëja'awën. Jamts nyaaxwe'tsy ma ja ja'ay xyamtën mëët ja tsajptëjk këwent'ajtpë.

55Ja teety wintsënëty mëët ni'ëmukë ja tsajptëkotyëtë yajuntë'ajtpë yajxon tjanty'ixta'atë ja winma'any mëti'ipë yajtuku'ookëtëp ja Jesús. Ka'anëm ënäty tpaatë yajxon ja wa'kpäjn. 56Oy ja ja'ay kanaak tjani'antaakëtë ja Jesús, ka'ap ja y'ayuk oy wyinkëta'aktë. 57Ënät jënaakën pyëtë'ktë ets tni'ë'ënëtë ja Jesús oy kyajëtu'unëty, ets y'ëna'antë:

58Tëës nmëtoy ko y'ënä'äny:

Njijtë'ëkäämpyës yë mëjtsajptëjk mëti'ipë ja'ay të tkojtën ets tëkëëk xëëwës jatëkok nkoj'oyëjä'äny.

59Ja ë'ënën ka'ap tukjotkëta'aktë ijxtëm tjanikajpxtën.

60Ënät ja teety wintsën wya'kujkëy mayjyä'äyjoty, ets tyajtëëy ja Jesús:

¿Ka'ap m'ëtsoyë? ¿Tii ko yë ja'ay tëkatsy mni'ëënëty?

61Ja Jesús amonyë y'ity ets ka'ap tyim'ëtsoy. Ënät ja teety wintsën ojts tyajtëy:

¿Mijts mKristë, ja Kënu'kxy y'U'unkë?

62Tääts ja Jesús y'ëtsooy:

Jëtu'un, ëjts jëtu'un. Ets miitsëty m'ixantëp ja naaxwiinyëtë ja'ay ja y'u'unk ko jam nyaaxwäätsa'any ma Tios yë y'a'oykyë'ëjën, mëti'ipë Maaytyääyëpën winë, jam yootsjotm jamës ntsoona'any.

63Ënät ja teety wintsën ja wyit tkë'tsy a'äkë ets y'ënäny:

¿Tii njaaktimy'ëwxijtëmë? Ka'ap ja ë'ëmpë xë'ëpë may tsyokyë.

64Tëë xymyëtowtë ko tëë ja Tios tmëkajpxtëkoy, ¿wi'ix miitsëty m'ëna'antë?

Ënät ni'ëmukë y'ënantë ko pokymyëët yë'ë wä'än t'ooky.

65Tam jënaakën mëti'ipë ojts twinkutsujëtën ja Jesús, ojts näjyëtu'un twinkutsumëtë ets twintäjx tjëjptäjxtë ets tyajtëëwtë:

Nasjawë pën të mkoxyë.

E ja tsajptëjk këwent'ajtpë ojts wyinkox jyëjpkoxëtë.

Ko Pedro tkuyu'utsy ja Jesús

66Ja Pedro, jap ënäty tëja'p ko tu'uk ja to'oxytyëjk myiiny mëti'ipë ja teety wintsën tyuunpë'ajtypyën. 67Ko ja Pedro ojts yaj'ixy tam xyämy, ënät tu'ukyë wyin'ijxpetyë ets y'ënëmaayë:

Näjyëtu'un ijty mijts xypyajëtity yë nazaretëtë ja'ay, yë Jesús, ¿këtiijë?

68Tääts ja Pedro y'ëtsooy ko ka'ap:

Ka'apës nijawë pën mtijpy.

Tääts ye'epyëtsiimy jap tëja'p ma ja tëjk'aawën. Ënät ja këtseynyë'aaw mëtu'k'ok yaaxë'ky. 69Ja to'oxy'ëna'k mëtuunpë ojts jatëkok t'ixy ja Pedro ets tuk'ëwa'anëtyääy ja ja'ay:

Ya'atë ja'ay, yë'ë mëët jyëtity yë Jesús.

70E ja Pedro kä'äpyëm tkupëjky. Wäänë y'ijty tääts ja Pedro jatëkok ja ja'ay y'ënëmaayë:

Mijts ijty mëët mjëtity yë Jesús, mijts mgalileëtë ja'ay yë'ë; näjyëtu'un nkäjpxy ijxtëm yë'ë kyäjpxyën.

71Ënät ja Pedro mëktä'äky y'ënaantëky: Ëjts ka'apës tääpë ja'ay n'ixy'äty mëti'ipë mnikajpxtëpën.

72Jää ja këtseynyë'aaw ojts mëmäjtsk ok yaaxë'ëky. Ets ja Pedro tja'amyejtsy ko ja Jesús ënäty të y'ënë'ëmxëty: Naamka'anëm ënäty ja këtseynyë'aaw yaaxë'ëky mäjtsk'ok koos mijts tëkëëk ok xykyuyu'utyës. Ok ojts ni'ik nyätyukjotma'atyë ko ënäty jëtu'un të y'ëti'itsy, tääts tyëjkëy yaxpë.

বর্তমানে নির্বাচিত:

Marcos 14: QUETZMIXE

হাইলাইট

কপি