Marcos 13

Ko ja Jesús tnikäjpxy ko ja mëjtsajptëjk kyutëkoyä'äny

1Tso'omp ënäty ja Jesús ma ja mëjtsajptëjkën, ënät ja y'ijxpëjkpë tu'uk y'ënëmaayë:

Wintsën, ix xiipë tsaa ets tëjk janty oyëty.

2Tääts ja Jesús y'ëtsooy:

¿M'ijxyp ko myëjëty ets y'oyëtyë? Nitu'kjënu'unën ya'atë tsaa kyawë'ëma'any, tu'kë'ëyë jyijta'aja'any.

Ijxpäjtën ko ënäty ja naaxwiinyëtë kyëxanë

3Ënät ojts nyëjkxtë jam ma Olivo kopkën ma nyäwyin'ijxpetyën mëët ja tsajptëjk, jam ojts yë Jesús nyaaxweetsy ets ja Pedro, Santiagë, Juan ets ja Andrés tyajtëëwtë:

4Jëna'a nëjkx jëtu'un jyäty kyëpety, ets tii ijxwë'ëmën nëjkx yaj'ixy ko ënäty jëtu'un jyata'any.

5Tääts ja Jesús y'ëtsooy:

Näkyëwent'atëtë, ijxkëm pën mwin'ëënëtë. 6Nimay ja ja'ay nëjkx myintë etsës xy'atuunnaxa'antë ets y'ëna'ana'antë: Ëjts yë Kristë, ets may ja ja'ay nëjkx twin'ëëntë.

7Ko miits xymyëtoy'atëty ko tsip tyunyë ets tyuna'anyë, këtii mtsë'ëkëtëty. Kopkpëky ko jëtu'un tyunëtëty jyatëtëty. E ka'anëm ënäty tnapaaty ets naaxwiinyëtë kyëxëty. 8Nëjkxëp ja ja'ay xim yam tsyiptuntë, naax kajpn nyänyipëtë'ëkëtëty mëj mutsk. Minaanp ja mëj ujx xii yaa, minaanp ja yuu. Ya'atë yë'ë jëtu'un ënäty tyuktso'ontäkpy ja ëyo'on.

9Yajxon mnäkyëwent'atëtëty, jä'ä ko myajkë'ëyakantëp miits ma kutuunkëtyën ets nëjkx myajwoptë tsajptëkoty. Myajmënëjkxantëp ma ja yajkutujkpëtëjkën ets ma wintsëntëjkëtyën mëët ëjtskyëjxm, jëtu'un ënäty miits xyajnikëxë'ëktë ma yë'ëjëtyën koos të mymyëpëktë. 10Ets yajkajpxwa'kxëp jëyëjp ja oy aaw oy ayuk ka'anëm ënäty kyukëxë ja naaxwiinyëtë. 11Ets këtii maytyëty mtajtëty ko ënäty myajtukwinkuwowëtë ja kutuunktëjk. Jëtu'un m'ëna'antëty wi'ix ënäty ja Kënu'kxymyëkajtën jää myaj'ayukpaatëtën, ka'ap nëjkx myiitsëty mkajpxtë, Kënu'kxymyëkajtën nëjkx myajkajpxëtë. 12Nimay ja ja'ay tu'kmëkä'äxpë nyäkyë'ëyaka'anëtë ets y'ooktëty. May ja u'unkteety, u'unktaak ja y'u'unk y'ëna'k nëjkx tmëtsipëktë ets tkë'ëyaktë. Näyjyëtu'un ja u'unk ëna'k ja tyaak tyeety nëjkx tmëtsipëktë ets tyaj'ooktë. 13M'aakmëtsip'atëtëp ja ja'ay koos ënäty ëjts xymyëpëktë, e mëti'ipë ta'tspëky tënääpyën, yë'ë nitso'okaanp.

14Ko xy'ixtëty ja ëxëëkpë ma ka'ap pyaat'atyën. Pën ya'atë noky kyäjpxypën wä'än tja'akyukë, wä'än ja ja'ay tkä'äktë mëti'ipë tsënaaytyëpën jam Judea nyaaxjotm ets nyëjkxtëty tunjot kopkjotm. 15Pën ënäty të pyety tyëjkëjxm jä'ä xëëw, ka'ap tyëkëty tyëkotm ets tii tyajpëtsëma'anëty; 16ets pën ënäty jam kyamjotm, ka'ap y'ëkwinpijnëty ma ja wyit ënäty të t'ëxmatsyën. 17Yë'ë tëy ja to'oxytyëjk yajpa'ëyoowtëp mëti'ipë ënäty u'unk nyëkëjxm'ajtëpën ets mëti'ipë yaj'u'unktsi'tstëpën jä'ä xëëw. 18Ja'amyätstë ets amëtowtë ja Tios këtiipë jëtu'un jyatëty kyëpätëty jää it ma ënäty tyityk'atyën, 19jä'ä ko jää nëjkx ja mëj ëyo'on tyunyë jyätyë mëti'ipë ka'anëm yaj'ixynyëm, mëti'ipë ni wintiinëm jëtu'un kyajaty kyakëpetyën maju'unëm ja Tios tyajtso'ntä'äkyën yë naaxwiinyëtë ets nijëna'a jatëkok nëjkx jëtu'un kya'ëkjajnë. 20Ets ko ja Wintsën jeexyë tka''akajpxtuky ja ëyo'on, ka'ap jeexyë pën ja nitsokën tpaaty; tëë ja Wintsën tyaj'akony ja ëyo'on jä'äkyëjxm ko jam jyuuky'atë ja ja'ay mëti'ipë të twin'ixyën.

21Ko pën m'ënë'ëmxëtëty: Ixtë, tyaa ja Kristë, ëkë ko myaj'ënëëmëtëty: Ixtë, xim jä'ä, ka'ap xymyëpëktëty. 22Jä'ä ko minantëp mëti'ipë nätyijanëtëp Kristë ets mëti'ipë nätyijanëtëp Tios käjpxynyajxpë, yaj'ixëtëp näjyëtu'un ja ijxpäjtën ets mëj'ajtën, ets yë'ëpaat yajwin'ëëna'any mëti'ipë ja Tios të wyin'ixyën. 23Näkyëwent'atëtë miits, tëë n'ëwaanëtë jëwyiin jëyëjp.

Wi'ix wyimpita'anyën ja Kristë

24Ko ënäty ja ëyo'on jotmay të nyäxy, ënät ja xëëw wyinkootsëja'any ets ka'ap ja po'o y'ana'any, 25ka'ajaanp ja matsa'a tsajpwinm ets yu'kxaanp ja mëk'ajtën jam tsajpkëjxm. 26Tääts ja ja'ay t'ixtëty koos yootsjoty ënäty nminy mëët ja mëk'ajtën ets ja mëj'ajt oyajtën. 27Yë'ë kyäxäämpy ja anklëstëjk ets ja ja'ay twoowmujkta'ajëty mëti'ipës të nwinwitsyën tu'ktsajp'akëtä'äky, mapaat yë naaxwiinyëtë tsyo'ontä'äkyën ets mapaat yë tsajp jyëjpkëxyën.

28Ja'aykyukëtë ya'atë higo kepy yë nyimëtyä'äky: Ko ja higo kepy ja xye'enty y'u'unk'aty ets ja y'ääy pyëtsimy, jëtu'un xynyijawëtë ko tsojk ja anpë myina'any. 29Näyjyëtu'un ko xy'ixtëty ko tyunëtëty jyatëtëty mëti'ipës të nkäjpxyën, jëtu'un xynyijawëtëty ko tim wiinkoonp ja naaxwiinyëtë ja'ay ja y'U'unk. 30Tëy miits n'ënëëmëtë, ko tunan jatanëp jëtu'un naamka'anëm ënäty ja ja'ay y'o'kta'atë mëti'ipë jää tyam juuky'ajtëpën. 31Këxaanp naxaanp yë naax tsajp, e yë n'aaw n'ayukës nijëna'a kyakëxa'any kyanaxa'any.

32Ka'ap pën nijawë tii xëëw tii mëtëy jëtu'un jyata'any, ni ja anklëstëjk tsajpjotmëpë ets ni ëjts nkanijawë; Tios Teety tu'uk nyija'ap.

33E näjyëjp'ixëtë miits xëmë ets ja'amyätstë ja Tios, jä'ä ko ka'ap xynyijawëtë jëna'ajës nwinpita'any. 34Jëtu'un ijxtëm tu'uk ja ye'etyëjkën mëti'ipë jëkäm nëjkxpën. Ko tsyoony, y'ëne'empy ja tyuunpë ets tuunkmooytyä'äy ja tyuunpëtëjk ets t'ënëëmë ja tëjk ijxpë ets tkëwent'atëty. 35Näyjyëtu'un miitsëty, xëmë mjëjp'ixtëty, jä'ä ko ka'ap xynyijawëtë jëna'a jya'ta'any ja wintsën mëti'ipë kutëjk'ajtpën; ajotkumonë nëjkx jyä'ty: Wä'än ux jajmony, ëkë tsu'um, ëkë tsu'umnaxy, ëkë tsajp'okpu'uy. 36Ka'ap tii nija'awën jëna'a nëjkx jyä'ty. Ajotkumonë myina'any ma ënäty të mmaanaxtën. 37Mëti'ipë miits yam ntuk'ëwa'anëtëpën, nän tëëjës yë ja'ay ntuk'ëwa'anëtya'atë: Juuky itë.

বর্তমানে নির্বাচিত:

Marcos 13: QUETZMIXE

হাইলাইট

কপি