Mateo 16

Wersa yom i q'uelob i yejtal i p'ʌtʌlel Jesús

(Mc 8.11-13; Lc 12.54-56)

1Tsa' tiliyob fariseojob yic'ot saduceojob cha'añ mi' yilʌbeñob i pusic'al Jesús. Tsi' c'ajtibeyob cha'añ mi' pʌsbeñob i yejtal i p'ʌtʌlel ti panchan. 2Jesús tsi' jac'beyob: Che' woli ti bʌjlel q'uiñ mi la' wʌl: “Jamʌl pañimil ijc'ʌl come chʌchʌc i ye'bal panchan”. 3Ti sʌc'ajel mi la' wʌl: “Talix ja'al come chʌchʌquix i ye'bal panchan, añix tocal”. ¡Cha'chajp jax la' pusic'al, mi la' ña'tʌben isujmlel chuqui tac mi la' q'uel ti panchan, pero ma'añic mi la' ña'tan chuqui woli' yujtel wʌle! 4Jiñi jontolo' bʌ wiñicob x'ixicob but'ulo' bʌ ti' ts'i'lel woli' i wersa c'ajtiñob i q'uel i yejtal c p'ʌtʌlel;#Mt 12.39; Lc 11.29 pero ma'añic mi caj i yʌq'ueñtelob i q'uel, jiñi jach i yejtal c p'ʌtʌlel tsa' bʌ pʌsle ti' tojlel Jonás#Jon 3.4-5 jiñi x'alt'añ.

Tsi' cʌyʌyob, tsa' majli.

I levadura fariseojob

(Mc 8.14-21)

5Tsa' c'otiyob xcʌnt'añob i cha'añ ti junwejl ja', pero tsa' ñajʌyiyob i ch'ʌmob majlel caxlan waj. 6Jesús tsi' su'beyob:

—Chʌcʌ q'uele la' bʌ cha'añ i levadura jiñi fariseojob yic'ot saduceojob, —che'en.

7Tsa' caji i bajñel alob ti' pusic'al:

—Woli yʌl iliyi cha'añ ti' caj ma'añic tsa' lac ch'ʌmʌ tilel laj caxlan waj.

8Che' bʌ tsa'ix i ña'ta Jesús chuqui woli i ña'tañob, tsi' su'beyob:

—Wiñicob mach bʌ añic mi la' ñop ti pejtelel la' pusic'al, ¿chucoch woli la' cʌlʌx pejcan la' bʌ cha'añ ma'añic la' caxlan waj? 9¿Maxto añic woli la' ch'ʌmben isujm, mi c'ajalic to la' cha'añ jiñi jo'q'uejl caxlan waj tsa' bʌ i c'uxuyob jo'p'ejl mil wiñicob,#Mt 14.17-21 jayp'ejl chiquib tsa' la' loto i colojbal? 10¿Mi jiñic to jiñi wucq'uejl caxlan waj tsa' bʌ i c'uxuyob chʌmp'ejl mil wiñicob,#Mt 15.34-38 jayp'ejl colem chiquib tsa' la' lotbe i colojbal? 11¿Chucoch ma'añic mi' la' ch'ʌmben isujm, cha'añ mach wajic jiñi woli bʌ c ña'tan che' bʌ tsa' c su'beyetla cha'añ mi la' chʌcʌ q'uel la' bʌ cha'añ i levadura fariseojob yic'ot saduceojob? —Che'en Jesús.

12Che' jiñi tsi' ch'ʌmbeyob isujm cha'añ yom mi' chʌcʌ q'uelob i bʌ cha'añ i cʌntesa jiñi fariseojob yic'ot saduceojob, mach cha'añic jiñi levadura mu' bʌ i yotsʌntel ti caxlan waj.

Pedro tsi' su'bu cha'añ Cristo i yalobilʌch Dios

(Mc 8.27-30; Lc 9.18-21)

13Che' bʌ tsa' c'oti Jesús ya' ti' lum Cesarea am bʌ ti Filipo, tsi' c'ajtibeñob xcʌnt'añob i cha'añ:

—¿Majqui i Yalobil Wiñic mi' yʌlob jiñi wiñicob x'ixicob? —Che'en.

14Tsi' jac'ʌyob:

—Cha'tiquil uxtiquil mi' yʌlob cha'añ jatet Juan tsa' bʌ i yʌc'ʌ ch'ʌmja', yam bʌ mi' yʌlob cha'añ jatetʌch jiñi Elías,#16.14 Elías: X'alt'añ tsa' bʌ i mele i ye'tel ti' yumʌntel rey Acab (1 R 17.2). Jiñi judíojob woli i cha' pijtañob cha'añ mi' cha' tilel i tsictesan baqui ora mi ts'ʌctiyel i yorajlel i q'uiñilel lac Yum (Mal 4.5-6). Herodes tsi' lon ña'ta cha'añ jiñʌch Juan tsa' bʌ i yʌc'ʌ ch'ʌmja' (Mt 14.1-2; Mc 6.14-15; Lc 9.7-8). yam bʌ mi' yʌlob cha'añ jatetʌch jiñi Jeremías, yam bʌ mi' yʌlob cha'añ jatet juntiquil x'alt'añ.#Mt 14.1-2; Mc 6.14-15; Lc 9.7-8

15Jesús tsi' c'ajtibeyob:

—Ixcu jatetla, ¿Majquiyon mi la' wʌl? —Che'en.

16Simón Pedro tsi' jac'ʌ:

—Jatetʌch jiñi Cristo, jiñi yajcʌbil bʌ, i Yalobilet jiñi cuxul bʌ Dios,#Jn 6.68-69 —che'en.

17Jiñi cha'añ Jesús tsi' jac'ʌ:

—Tijicña a pusic'al Simón, i yalobilet bʌ Jonás, come mach tilemic ti wiñicob año' bʌ i bʌc'tal yic'ot i ch'ich'el a ña'tʌbal, cojach jiñi c Tat am bʌ ti panchan tsi' pʌsbeyet. 18Che' ja'el mic su'beñet jatetʌch jiñi Pedro, ti' pam ili xajlel#16.18 Xajlel: Mi mejlel ti pejcʌntel ti xajlel, Petros yom mi' yʌl xajlel (Mt 7.24-25); Jesús tsi' c'ʌñʌ ja'el jiñi i t'añ aramea “kefá” yom mi' yʌl Cefas (Jn 1.42; 1 Cor 1.12; Gl 2.9). mi caj c wa'chocon xñopt'añob c cha'añ; i p'ʌtʌlel jiñi chʌmel mach mejlic i jisañob. 19Jatet mi caj cʌq'ueñet i llavejlel i yumʌntel jiñi am bʌ ti panchan; pejtelel chuqui ma' cʌch wʌ' ti pañimil cʌchbil ja'el ya' ti panchan; pejtelel mu' bʌ a jit wʌ' ti pañimil, jitbil ja'el ya' ti panchan,#16.19 Q'uele Mt 18.18; Q'uele Jn 20.23. I llavejlel: I yejtal i p'ʌtʌlel jiñi xq'uel e'tel cha'añ mi' ñup' yic'ot cha'añ mi' jam, i tajol woli i taj ti t'añ Jesús jiñi am bʌ ti Is 22.15-25. Cʌchbil yic'ot Jitbil: Jiñʌch t'añ mu' bʌ i c'ʌñob jiñi xcʌntesajob ba ora añ majch woli I chocob loq'uel ti' tojlelob yic'ot che' añ majch woli I ch'ʌmob ti' wenta. —che'en Jesús.

20Jesús tsi' tiq'ui jiñi xcʌnt'añob i cha'añ, cha'añ ma'añic majqui mi' wis su'beñob mi juntiquilic cha'añ jiñi Jesús jiñʌch jiñi Cristo.

Jesús tsi' su'bu bajche' mi caj i tsʌnsʌntel

(Mc 8.31—9.1; Lc 9.22-27)

21Ti jim bʌ ora, Jesús tsa' caji i su'beñob jiñi xcʌnt'añob i cha'añ, cha'añ wersa mi caj i majlel ti Jerusalén cha'añ mi yu'bin ca'bʌl wocol ti' c'ʌb xñoxob año' bʌ i ye'tel, yic'ot ñuc bʌ motomajob yic'ot xts'ijbayajob; wersa mi caj i tsʌnsʌntel, pero mi' cha' cuxtʌyel ti yuxp'ejlel q'uiñ. 22Jiñi cha'añ Pedro tsa' caji i pʌy Jesús ti' bajñelil cha'añ mi' tic', tsi' yʌlʌ:

—C Yum, p'untan a bʌ. Mach che'ic mi caj a wujtel che' bajche' tsa' ujti a wʌl, —che'en.

23Jesús tsi' sutq'ui i bʌ, tsi' su'be Pedro:

—Tʌts'ʌ a bʌ ti' tojel c wut Satanás, jatet xmʌctayajet jach tic tojlel, come jatet ma'añic ma' ch'ʌmben isujm chuqui yom Dios, cojach ma' ña'tan chuqui yom wiñicob, —che'en.

24Jiñi cha'añ Jesús tsi' su'be jiñi xcʌnt'añob i cha'añ:

—Mi añ majqui yom i tsajcañon, la' i len cʌy pejtelel chuqui yom i bajñel pusic'al, la' i ch'ʌm i cruz, la' i tsajcañon.#Mt 10.38; Lc 14.27; 17.33; Jn 12.24-25 25Come majqui jach yom i bajñel cʌntan i cuxtʌlel mi caj i sʌt, pero jiñi mu' bʌ i yʌc' i cuxtʌlel cha'añ mi' tsajcañon mi caj i taj. 26Come ¿chuqui mi' taj wiñic, mu' bʌ i lon taj pejtelel chuqui yom ti pañimil, pero mi tsa' sajti i ch'ujlel? ¿Chuqui i chobejtʌbal mi mejlel i yʌq'ueñ i ch'ujlel? 27Come mi caj i tilel i Yalobil Wiñic ti' ñuclel i Tat yic'ot i yÁngelob. Mi caj i yʌq'ueñob i tojol wiñicob x'ixicob ti jujuntiquil cha'añ chuqui tac tsi' meleyob.#Sal 62.11-12; Pr 24.12; Jer 17.10; Ez 18.30; Rm 2.6 28Isujm mic su'beñetla: Lamital ili wʌ' bʌ añob la' quic'ot ma'añic mi caj i chʌmelob, jinto che' bʌ tsa'ix i q'ueleyob i Yalobil Wiñic che' mi' tilel ti' yumʌntel,#16.28 Añ ca'bʌl che' bajche' mi' loc'sʌbeñob isujmlel ili t'añ: (1) Cha'añ mi caj i cha' tilel lac Yum ti ora, cha'añ mu' toj caj i q'uelob tsi' ña'ta, che'ʌch tsi' ña'ta jiñi ñaxan bʌ xñopt'añob, (2) Jiñʌch i ñuclel Jesús tsa' bʌ i pʌsʌ che' ba ora tsa' tejchi loq'uel ba'añ chʌmeño' bʌ (Lc 24.26; Jn 12.23; 13.31-32; Hch 3.13; 3). Ba ora tsa' q'uextʌyi Jesús che' bajche' mi' yʌl ya' ti Mt 17.1-13. —che'en Jesús.

বর্তমানে নির্বাচিত:

Mateo 16: NTCH

হাইলাইট

কপি