Psalmyn 50
50
MORNING PRAYER.
PSAL. 50.
Deus deorum.
1Ta’n Chiarn, dy-jarroo yn Jee smoo niartal, er loayrt:
as er choyrt eam da’n seihll veih irree seose ny greïney gys y gholl sheese echey.
2Magh ass Sion ta Jee er hoilshaghey eh hene:
ayns aalid firrinagh.
3Hig y Jee ain, as cha bee eh ny-host:
hed aile roishyn nee toyrt mow, as bee dorrin niartal er ny ghoostey seose mygeayrt-y-mysh.
4Nee eh geamagh er ny niaughyn veih’n yrjid:
as er y theihll, dy vod eh briwnys e phobble.
5Chaggle-jee my nooghyn cooidjagh hyms:
ad shen ta er n’yannoo conaant rhym lesh oural;
6As nee ny niaughyn fockley magh e chairys:
son Jee hene yn Briw.
7Clasht, O my phobble, as nee’ms loayrt:
nee’ms mee hene feanish y ymmyrkey dt’oï, O Israel; son mish Jee, dy-jarroo yn Jee ayds.
8Cha der-yms oghsan dhyt son dty ourallyn, ny son dty hebballyn-losht:
son nagh row ad kinjagh kiongoyrt rhym.
9Cha jean-ym soiagh jeh dow erbee ass dty hie:
ny goar-yrryn ass dty woaillee.
10Son lhiam’s ta ooilley maase ny keilley:
as myrgeddin ta’n ollagh er thousane cronk.
11Shione dou ooilley ny eeanlee t’er ny sleïtyn:
as ta maase feïe yn vagher ayns my hilley.
12My ta mee accryssagh, cha ninsh-ym dhyts:
son ta’n slane seihll lhiam’s, as ooilley ny t’ayn.
13Vel oo smooinaghtyn dy nee-ym feill teirroo:
as dy niu-ym fuill goair?
14Cheb yn oural dy hoyrt-booise gys Jee:
as eeck dty vreearaghyn dasyn smoo Ard;
15As eïe orryms ayns traa dy heaghyn:
myr shen nee’ms geaishtagh rhyt, as nee oo mish y voylley.
16Agh rish ny mee-chrauee dooyrt Jee:
Cre hon t’ow preacheil my leighyn, as goaill my chonaant ayns dty veeall;
17Fakin dy vel dwoaie ayd er lhiasaghey-bea:
as t’ow er hilgey my ghoan cheu-dty-chooyloo.
18Tra honnick oo maarliagh, va dt’aigney lesh:
as t’ow er ghoaill ayrn mâroosyn ta brishey poosey.
19T’ow er choyrt reamys da dty veeall dy loayrt olkys:
as lesh dty hengey t’ow er hoiaghey magh molteyraght.
20Hoie oo, as loayr oo noi dty vraar:
dy-jarroo, as t’ow er choyrt scammylt da mac dty vayrey.
21Ny reddyn shoh t’ow er n’yannoo, as chumm mish my hengey; as heill oo dy-olkyssagh dy row mish eer dty lheid hene:
agh ver-yms oghsan dhyt, as soie-ym kiongoyrt rhyt ny reddyn t’ow er n’yannoo.
22O smooinee-jee er shoh, shiuish ta jarrood Jee:
er aggle dy raip-ym shiu ersooyl, as nagh bee unnane erbee dy livrey shiu.
23Quoi-erbee ta chebbal dou booise as moylley, t’eh cur onnor dou:
as dasyn, ta reill e ymmyrkey dy cair, soilshee-yms saualtys Yee.
বর্তমানে নির্বাচিত:
Psalmyn 50: PS1765
হাইলাইট
শেয়ার
কপি
Want to have your highlights saved across all your devices? Sign up or sign in
maintained by the British and Foreign Bible Society