Psalmyn 49
49
PSAL. 49.
Audite hæc, omnes.
1O clasht-jee rish shoh, ooilley shiuish phobble:
gow-jee baght jeh lesh nyn gleayshyn ooilley shiuish ta baghey ’sy theihll.
2Ard as injil, berchagh as boght:
dagh unnane ry-cheïley.
3Loayree my veeall jeh creenaght:
as nee my chree smooinaghtyn er tushtey.
4Cromm-ym my chleaysh gys y coraa-dorraghey:
as nee’m soilshaghey my ghlare dowin er y chlaasagh.
5Cre hon yinnin aggle y ghoaill ayns ny laghyn dy olkys:
tra ta olkys my vonnyn cruinnaghey mee mygeayrt.
6Ta paart ta cur nyn marrant gys nyn gooid:
as boggyssagh ayns earroo nyn merchys.
7Agh cha vod dooinney erbee e vraar y livrey:
ny bargane y yannoo rish Jee er y hon.
8Son haink eh gys ny smoo dy chionnaghey nyn anmeenyn:
myr shen dy nhegin da shen y aagail voish er son dy-bragh;
9Ga dy beagh eh foddey bio:
as gyn yn oaie y akin.
10Son t’eh fakin dy vel deiney creeney neesht geddyn vaaish as cherraghtyn cooidjagh:
chammah as ta’n sleih neu-chreeney as ommijagh, as faagail nyn merchys da feallagh elley.
11As foast t’ad sheiltyn dy jean ny thieyn oc farraghtyn son dy-bragh:
as dy bee ny ynnydyn-vaghee oc er-mayrn veih sheeloghe gys sheeloghe; as t’ad genmys ny baljyn oc lurg nyn ennym hene.
12Ny-yeih, cha jean dooinney tannaghtyn foddey ayns ooashley:
fakin dy vod eh ve er ny hoyllaghey gys y maase ta cherraghtyn; shoh’n raad oc.
13Shoh’n ommijys oc:
as ta nyn sluight moylley yn raa oc.
14T’ad lhie ’syn oaie myr kirree, ta’n baase caigney orroo, as bee reill ec y sleih cairal harrystoo ’sy voghrey:
hed yn aalid oc mow ayns yn oaie ass ny cummallyn oc.
15Agh nee Jee m’annym y livrey veih pooar yn oaie:
son nee eh m'y ghoaill huggey hene.
16Ny gow aggle, ga dy bee fer er ny yannoo berchagh:
ny my ta gloyr e hie er ny vishaghey;
17Son cha der eh lesh veg ersooyl mârish tra t’eh geddyn vaaish:
cha-moo nee e stayd vooar geiyrt er.
18Son choud’s v’eh bio, yeeagh eh er hene dy ve dooinney maynrey:
as choud’s t’ow jannoo dy-mie dhyt hene, loayree deiney dy-mie jeed.
19Eiyree eshyn er sheeloghe e ayraghyn:
as cha jean eh dy-bragh soilshey y akin.
20Dooinney ta ayns ooashley as fegooish tushtey:
t’eh er ny hoyllaghey gys ny beïyn ta cherraghtyn.
বর্তমানে নির্বাচিত:
Psalmyn 49: PS1765
হাইলাইট
শেয়ার
কপি
Want to have your highlights saved across all your devices? Sign up or sign in
maintained by the British and Foreign Bible Society