Jɔn 13
13
Yeesu sarame o habɔteŋra nakpale
1Aa ka tama ba di Galekaa Tɔpejen la, dɛ Yeesu jemɔ kɛŋɔ tɔpere telo kɛ ó le harɛ nɔ ta dɛ́ berɛ kaa o Mɛɛ be. Dɛ o dɛ nyin o nɛra baa teŋɛ o nɛɛ harɛ nɔ ta la kɛrɛdɛ dɛ ka tonɛ.
2O ne o habɔteŋra aa lɔ tiɡ ta jɔmɔra la, Bɔnsam tɔ sie kpɔ liichɔɡa ba do Seemɔn Eskareɔt bie Judas bini kɛŋɔ ó le Yeesu tɛ. 3Dɛ Yeesu te jemɔ kɛŋɔ wobɛlbwa kpeɡrii o Mɛɛ Korowii kpɔ tɛo, asɛ dɛ berɛ jemɛ kɛŋɔ ɡɛ waa le o be ba la, ɡɛɛ o berɛ dɛɛ ba o be kaala. 4Belaa o ir kondikwaa la ta, dɛ foo o batakaare, dɛ kpɔ bwarabwaa mile chara,#Mat 20:28 5asɛ dɛ fuɡe nee do kon bini, dɛ pa mun kpɔ dɛɛ sarame o habɔteŋra la nakpale, asɛ dɛ kpɔ bwarabwaa waa kpɔa mile chara la dɛɛ feera.
6Waa baa tel Seemɔn Pita be la, anee Seemɔn Pita pɛɛro ŋɔ, “N Dɔɔ, n nakpalee hɛɛ ba sarama aa?”
7Anee Yeesu chaŋo ŋɔ, “Haa n waa maa dɛ ɛ nɔ mun jemɛ taraken mɔɔ. A habɔɔ hɛɛ ba jema.”
8Asɛ o berɛ ŋɔ, “Akai! Maa sɛh he sarame n nakpale bwa.”
Belaa Yeesu ŋɔ, “Dɛ he ta ɡelɛ n sarame he nakpale aa, amɔ n ne he toole wobɛlbwa bini kpa.”
9Anee o berɛ ŋɔ, “N Dɔɔ, amɔ dɛ ɡɛɛ te naa, bɛ n nakpale ɡbo sarame ɔ. Den sarame n nɔɔra ne n nyu bwa ja.”
10Anee Yeesu ŋɔ, “Nɛn waa sɔ nee la, dɛ nakpale laa o ba sarame aa, waa berɛ sɔ nee kpa, dɛkalkɛ doŋa toole o nɛ. Anomanta, doŋa toole he bɛlbwa nɛ, nemenɛ he bini beŋkpoŋ.” 11Dɛ Yeesu te jemɛ naate waa dɛ nyin ó leo tɛ. A waa o tɔ sie ŋɔ doŋa toole ba bɛlbwa nɛ, nemenɛ ba bini beŋkpoŋ la.
12Waa sarame ba bwa nakpale tonɛ la, o berɔ kpɔ o batakaare la do dɛ berɛ ka so o soŋnibɔr, asɛ dɛ bɔɔ ba ŋɔ, “He jemɛ waa aa bala asɛ n ɛ heyaa ɡɛ nɔ naa? 13He dɛ yer mɛ he dɔɔ kɛɛ he nomoa aa, aŋwɛnɛ taa, dɛkalkɛ ɡɛɛ a do. 14Too, taraken he dɔɔ kɛɛ he nomoa aa sarame he nakpale nɔ, ɡɛɛ a chɛ kɛŋɔ hé ɡe ɛɛ sarame dɔŋa kwa. 15Anɔ maa ɛa nɔ chɔ le dɛ tɛ heya, hé nyiŋa dɛ́ ɡee ɛ a dɔŋa. 16Kasinteŋ, n dɛ ŋɔ he be, yom ta o dɔɔ ɡwaalɛ, torome ɡe ta nɛn waa tomɔ ɡwaalɛ. 17Dɛ he jemɛ ɡɛ waa nɔ dɛɛ ɛa ɡe te naa, hɛɛ na somee.
18He bwa waa laa mɛɛ bol, dɛkalkɛŋɔ n jemɛ banɔ la maa lee ba. Anɔ ɡelɔ waa baa chwera Korowii Tɔn bini la ɛ kasinteŋ kɛŋɔ, ‘N dansom n ne waa pɛ nɔn di kondikwaa la, onee ɛɛ mɛ dɔm.’#Yel 41:9
19N pu sie dɛɛ baɡle heyaa mɔɔ ásɛ dɛ ɡɛ waa nɔ baa ba naa, he jemɛ dɛ́ yarada kɛ menee Kristo la. 20Kasinteŋ, n dɛ ŋɔ he be, nomɛlbwa maa tomɔ ásɛ he lɛo la, dɛ menee he lɛ. Gɛɛ nomɛlbwa waa lɛɛ mɛ la ɡe, dɛ naate waa tom mɛ laanee o lɛ.”#Mat 10:40-42
Yeesu bol o lee dɛ́ tɛ wa
(Mat 26:20-25; Mak 14:17-21; Luk 22:21-23)
21Yeesu aa bol ɡɛ waa nɔ tonɛ la, o bambile chɔɡɔ kohona, o ta wobɛlbwa kpɔe sɔɔh ba kpa, dɛ ŋɔ, “Kasinteŋ, n dɛ ŋɔ he be, he bini bɛlee dɛ́ lee mɛ tɛ.”
22O habɔteŋra la ta wone jemɛ naate waa dɛ bol o wa, dɛ nyiŋi dɔŋa sie. 23Dɛ ba bini bɛl Yeesu aa dɛ nyinu kohona la soɡo kpaɡɔ. 24Belaa Seemɔn Pita lɔ sie o be ŋɔ ó bɔɔro ó baɡle ba bini bɛl la waa ŋɔa.
25Anee o kpɔ o te pɛl Yeesu dɛ bɔɔro ŋɔ, “N Dɔɔ, ya bini umee yɔ?”
26Asɛ o chaŋe ŋɔ, “Nɛn maa dɛ ba paanoo kpɔe li dɔr tɛo la, onee dɛ́ lee mɛ tɛ.” Belaa o kpɔ paanoo li dɔr dɛ kpɔ do Seemɔn Eskareɔt bie Judas nɔn ta. 27Waa tɛr nɔn dɛ lɛ paanoo la, Bɔnsam den ba so o nɛ. Asɛ Yeesu ŋɔ o be ŋɔ, “Ir ka ɛ waa haa dɛ ba ɛɛ la warane.” 28Nɛra baa soɡa ja o nɛɛ tiɡ ta bela la ta waa waa bola la mun noɛ. 29Dɛ Judasee chɔ ba suuɡa bwa nyoa. Anomanta, dɛ ba bini bane dɛ lii kɛ Yeesu ken dɛ ŋɔ o be ŋɔ ó ka nyin tɔpejen la kondikwa. Dɛ ɡɛ laa ɡe aa, amɔ o ken ŋɔ ó ka tɛ nyaara suuɡa. 30Judas aa lɛ paanoo la dɛ di tonɛ la, o den le ba be bela kaa. Dɛ jwaanaa.
Yeesu bol ɡɛ Pita aa le o habɔɔ
31Waa kaala la, Yeesu ŋɔ ba be ŋɔ, “Korowii tɛ Men Nɛn Bie la jirima name, ásɛ a che n nɛɛ o ɡe dɔ jirima. 32Dɛ a cheɡɛ n nɛɛ Korowii dɔ jirima aa, aa che o nɛɛ ń ɡe dɔ jirima, dɛ́ dɔa taraken.
33N bii, maa he be bonɔɔ biɡri bɛlbwa. Hɛɛ baa nyin n bɔree. Gɛ maa bol Juu tena nomonome be laanee mɛɛ bol he be la. Anee kɛŋɔ haa won ba bela maa dɛ kaa la.#Jɔn 7:34
34N dɛ do heyaa wefala ta. Anee kɛŋɔ, hɛ́ɛ nyin dɔŋa. Gɛ maa nyin heyaa la, ɡɛɛ chɛ kɛŋɔ he ɡe ɛɛ nyin dɔŋa.#1Jɔ 3:23 35Dɛ he dɛ nyin dɔŋa aa, aa ɡeloo nɛra bwa jemɛ kpela kɛŋɔ he ɛ n habɔteŋra.”
Pita tɔɔh ŋɔ waa Yeesu jemɛ
(Mat 26:31-35; Mak 14:27-31; Luk 22:31-34)
36Anee Seemɔn Pita pɛɛro ŋɔ, “N Dɔɔ, leperaa hɛɛ kaalɔ?” Asɛ Yeesu chaŋe ŋɔ, “Taraken nɔ, haa won teŋɛ n nɛɛ la bela maa dɛ kaa nɔ, kɛ he ta ɛɛ ba ti mɛɛ.”
37Belaa o pɛɛro ja ŋɔ, “N Dɔɔ, ɛrɛ waa maa wola won teŋɛ he nɛɛ taraken ɔ? Dɛ seo kwaraa yaa, mɛɛ koh he waa sewɛ.”
38Anee Yeesu berɛ bɔɔ ŋɔ, “Kpelaa kɛŋɔ hɛɛ won koh n waa sewaa? Kasinteŋ, n dɛ ŋɔ he be, jabal loɡle ne sii dɛ he tɔɔh kera atoro ŋɔ haa men jemɛ kwaraa.”#Jɔn 18:25-27
বর্তমানে নির্বাচিত:
Jɔn 13: mzw
হাইলাইট
শেয়ার
কপি
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
