Jɔn 14

Yeesu larawe o habɔteŋra bwara

1Yeesu berɔ ŋɔ, “He bɛ ɡel he bambile chɔɡ! Hɛ́ɛ yarada Korowii ásɛ dɛɛ yarada n ɡe.#1Pi 3:22 2Deene lɔ n Mɛɛ Korowii dem taeh. Dɛ ɡɛ laa a do aa, n fe aa he bee ŋɔ n dɛ la ka kwaa sobɔr cheɡ heyaa bela. 3Dɛ n kaa kwaa bɔr cheɡ heyaa bela aa, mɛɛ berɔɔ ba ásɛ dɛ ba kpɔ heyaa kaa bela maa lole, ásɛ bela maa so la, hé ɡe do bela. 4He jemɛ bela maa dɛ ba kaala la ŋwɛnɛ.”

Yeesuu ɛ ŋwɛnɛ dɛ kaa o Mɛɛ be

5Anee Tɔmas pɛɛro ŋɔ, “N Dɔɔ, aah yaa wola bela haa dɛ kaa jemɛ nɔ, ɛrɛɛ yaa ba wona jemɛ ŋwɛnɛ dɛ́ ba he be bela ɔ?”

6Belaa o chaŋo ŋɔ, “Menee ŋwɛnɛ, menee kasinteŋ, menee mkpa. Dɛ nomɛlbwa ɛɛ la n Mɛɛ la bee yaa, nemenɛ ó che n nɛ.#1Ti 2:5 7He fe jem mɛ kɛrɛdɛ naa, he fe jemɛ n Mɛɛ la ɡe. Taraken he jemɔ. Onee he na la.”

8Anee Felep ŋɔ, “N Dɔɔ, baɡle yaa he Mɛɛ la, ásɛ ya baah sɔɔh yaa.”

9Asɛ Yeesu chaŋe ŋɔ, “N ne haa lole le saŋ la bwa nɔ, amɔ he ta wone jem mɛ mɔɔ naa, Felep? Nomɛlbwa waa na mɛ la, dɛ n Mɛɛɛ o na la. Ɛrɛɛ he berɛ ŋɔ ń baɡle heyaa n Mɛɛ la nɔɔ? 10Haa yarada kɛŋɔ n ne n Mɛɛ la pɛo dɛ ɛ beŋkpoŋ, o joo mɛ n ɡe joo kɛɛ? N waa maa bol la bwa ta n ɡbabir be leɛ. N Mɛɛ laanee joo mɛ asɛ mɛɛ ɛ o toma. 11Hɛ́ɛ yarada mɛ kɛ maa ŋɔa ŋɔ, n jo n Mɛɛ asɛ o ɡe joo mɛ la. Dɛ ɡɛ laa ɡe aa, hé yarada mɛ n nyokpowe-ɛɛla la wa. 12Kasinteŋ, n dɛ ŋɔ he be ŋɔ, nomɛlbwa waa yarada mɛ la, wɛɛ ɛ n we-ɛɛla dɔŋa bwa soo siwii. Wɛɛ won dɛɛ ɛ anɔ la aa ɡwaa n kwaa nɔ kwaraa, dɛkalkɛ mɛɛ berɔɔ kaa n Mɛɛ be. 13Ásɛ komɛlbwa haa che n sɔn ta dɛ́ soŋe la, mɛɛ ɛo. Anɔ taa aa ba cheɡa ń lɛ jirima tɛ n Mɛɛ Korowii. 14Dɛ he cheɡɛ n sɔn ta soŋe komɛlbwa naa, mɛɛ ɛo.”

Yeesu baɡɛ nyoa o Domadɛɛɡe la wa

15Yeesu berɔ ŋɔ, “He dɛ nyin n wa aa, hɛ́ɛ dɛɛ teŋɛ n waa maa kpɔa tɛ heyaa la taa. 16Mɛɛ soŋe n Mɛɛ Korowiirii ó berɛ tɛ heyaa Habɔchekpaa ja wɛ́ɛ cha heya, dɛ́ soŋe dɛɛ tɛ heya, ásɛ he ne o so saŋ bɛlbwa. 17Korowii Domadɛɛɡe laanee. Wɛɛ ɡeloo he jemɛ Korowii kasinteŋ waa la. Nɛra baa dɔ harɛ nɔ ta ɡbo liire aa won yarada o Domadɛɛɡe wa, dɛkalkɛ baa won nao ásɛ dɛ jemɔ. Kɛ he te jemɔ, dɛkalkɛ o ne heyaa lole, asɛ o so he nɛ. 18N baa kaa laa, maa heyaa ta kɛ bilalbii, mɛɛ berɔɔ ba he be. 19A ka tama, nɛra baa dɔ harɛ nɔ ta ɡbo liire aa men na kpa, kɛ he te ɛɛ na mɛɛ. Maa dɔ mkpa nomanta, he ɡee dɔ mkpaa. 20Tɔpere la telaa, hɛɛ jemɔɔ kɛŋɔ n ne n Mɛɛ ɛ beŋkpoŋ, bɛl aa wola won daɡre o te o dɔŋ nɛ, ásɛ n ne he ɡe ɛ beŋkpoŋ ɡɛ tenten. 21Nomɛlbwa waa lɛ n waa maa kpɔa tɛ heyaa dɛɛ teŋɛ a ta la, onee dɛɛ nyin mɛ. Nomɛlbwa waa dɛ nyin mɛ la, n Mɛɛ la ɛɛ nyinuu, ásɛ n ɡe nyin naate, dɛ́ kpɔ n te baɡlo.”

22Belaa Judas#14:22 Judas Eskareɔt waa le Yeesu tɛ la laa. pɛɛro ŋɔ, “N Dɔɔ, ɛrɛɛ hɛɛ ba he te kpɔe baɡle ya ɡbosoo, asɛ dɛ ɡel nɛra baa dɔ harɛ nɔ ta ɡbo liire nɔɔ?”

23Asɛ Yeesu chaŋo ŋɔ, “Nomɛlbwa waa dɛ nyin mɛ la, wɛɛ dɛɛ teŋɛ n webaɡla la taa. N Mɛɛ ɛɛ nyinuu, n ne o bwa ba o be ya ne o so. 24Nomɛlbwa waa wola men nyin la, waa n webaɡla ta teŋɛ. Waa haa dɛ no nɔ ta n be leɛ, a bwa le n Mɛɛ waa tom mɛ la be.

25N ta aa lɔ he be nɔɔ mɛɛ bol ɡɛ waa nɔ he be. 26Korowii Domadɛɛɡe waa ɛ Habɔchekpaa la, onee n Mɛɛ ɛɛ ba toma ó che n sɔn ta ba dɛ ba baɡle heyaa wobɛlbwa, dɛɛ lii heyaa anɔ la bwa n fa aa bol he be la. 27Deŋnesɔɔhnaa n kpɔ dɛɛ tɛ heya, n ɡbabir deŋnesɔɔhnaa. Harɛ nɔ ta deŋnesɔɔhna laa, anomanta, he bɛ ɡel he bambile teŋe ásɛ hɛɛ ɔmɛ.

28N bol he be he no kɛŋɔ ‘Mɛɛ kaaloo ásɛ dɛ berɛ ba he be.’ Dɛ he fe dɛ nyin mɛ naa, he sie fe ɛɛ lɛo kɛŋɔ maa kaa n Mɛɛ be, dɛkalkɛ o ɡwaa mɛ. 29N pu sie dɛɛ bol he be mɔɔ a ba ɛ ɡɛ, ásɛ dɛ a ɛ ɡɛ naa, hé yarada mɛ. 30N ne haa won bol waa kohona kpa, dɛkalkɛ harɛ nɔ ta kooro dɛ ba. O ta kpeɡri bɛlbwa dɔe n nɛ, 31kɛ a chɛ kɛŋɔ harɛ nɔ ta nɛra bwa jemɛ kɛ n dɛ nyin n Mɛɛ la, a waa mɛɛ ɛ anɔ la bwa waa do mɛ ŋɔ ń ɛ la. Hé ir, yá le bonɔ.”

বর্তমানে নির্বাচিত:

Jɔn 14: mzw

হাইলাইট

কপি