Genesis 8
8
Mimbas na i luyud nga ikiyatunaw nat banwa
1Ta, ega nalipatan it Ampuꞌang Diyus si Noe baw muꞌsang mga kaꞌibaan ya duꞌut pagsasakayan nira ngayti. Aypaꞌ ka piyaꞌyep ya nay deres kat sagpaw it lugtaꞌ. Ta, nagpapuꞌun nat mebas-ebas na i danum, 2beken it mindek na i tumbud it danum baw timniꞌdaw nay uran. 3Magsisiging magkayaꞌmat nat mebas i danum seked it may sang gatus baw lima nang puluꞌ nga aldaw garing it nagpapuꞌun i uran. 4Bawnga, pagꞌabut it ikasang puluꞌ may pitung aldaw it ikapitung bulan, simnangrad na i pagsasakayan ngayti na Noe duꞌut esang bukid nga pagpangaranat Ararat. 5Sigi na nga ebas it danum. Naꞌbut i sang pulung bulan, uꞌnang aldaw it bulan, magkatandaꞌan na i mga siyagpawan it mga bukid.
6Ta, garing sikayti, iyan nagtaꞌlib nay epat nga puluꞌ pang aldaw, inabriyan na ni Noe i lalawagan nga binwat ya duꞌut pagsasakayan nira ngayti. 7Pagkaꞌabri ya, ipiyalayug yay sang batung manu-manuk nga ugak. Yanay binwat it ugak ngayti, layug-layug it magpasuliꞌ-suliꞌ, seked napra nay danum kat sagpaw it lugtaꞌ. 8Bawnga sunud sing ipiyalayug ni Noe, kalapatiꞌ, isaꞌun masiguru ya in napra na i danum. 9Temed ega pay magkaparagan it kalapatiꞌ ngayti nga mapakay ya nga mataꞌpunan. Aypaꞌ miyuliꞌ naga duꞌun it ki Noe nga duꞌut pagsasakayan ngayti, ka danum pang muꞌsay banwa. Magꞌabut i kalapatiꞌ ngayti, pagkayapen ni Noe. Ipiyasled ya siꞌ duꞌut pagsasakayan nira ngayti. 10Yapaꞌ siꞌ ipalayug ni Noe i kalapatiꞌ ngayti ka nakapitu. 11Apu-apun manay ipiyagꞌuliꞌ it kalapatiꞌ ngayti duꞌut ki Noe. Mabut may pagtatangagen ya na nga egenen nga daꞌun it olibo. Pagkalteg ni Noe kayti, naꞌrutan ya nga magkapra na i danum, ka pagtubuꞌan siꞌ it mga kayu. 12Minlat siꞌ si Noe it seked it kapitung aldaw, bawnga ipiyalayug ya siꞌ i kalapatiꞌ. Ta, ega na miyuliꞌ duꞌun it ki Noe.
13Iyan magꞌidad na si Noe it enem nga gatus baw sang taꞌun, uꞌnang bulan, intrada gasiꞌ it bulan, tinꞌugan nay muꞌsang sagpaw it lugtaꞌ. Rimbangan ni Noe i atep it pagsasakayan nira ngayti bawnga nanlawag-lawag. Ipabeyeng-beyeng yay mata ya, ega nay danum, natꞌugan nay lugtaꞌ. 14Ikadwang bulan, ikadwang puluꞌ may pitung aldaw, diminsen nay lugtaꞌ.
Nagbuwat si Noe it panalisi nga ipagpasalamat ya duꞌun it Ampuꞌang Diyus
15Iyan madesen na ngayti i lugtaꞌ, inaat nat Ampuꞌang Diyus si Noe. 16Maat ya, “Ta, manliꞌwan kamu nang muꞌsa. Lumampud kamu na magꞌasawa, baw mga anak mi, pati mga asawa nira. 17Ipaliꞌwan mu na gasiꞌ i muꞌsang maginawa nga kaꞌibaan mi asat siyakayan mi ngayan, manu-manuk baw ramu-ramu, pati mga magkambang i pamanaw, isaꞌun manganak-anak sirang muꞌsa, dumakel siꞌ i situt sinirungat langit.” 18Aypaꞌ egay beken, limnampud na na Noe nga muꞌsa, asawa ya, mga anak nira, pati mga asawat mga anak nira ngayti, namaglampud nang muꞌsa. 19Namagpanliꞌwan na gasiꞌ i muꞌsa ngayting mga ramu-ramu, pati mga magkambang i pamanaw, baw muꞌsang mga manu-manuk. Kada kalasi ngayti, nanliꞌwan na.
20Bawnga nagbuwat si Noe it papangantengan it ipagsamba duꞌun it AMPUꞌANG DIYUS. Pagkaꞌman ya, minsiꞌ kanya kat mga ramu-ramu baw manu-manuk nga mapakay nagang ipagsamba ka isiyalisi ya duꞌun it AMPUꞌANG DIYUS. Mga iti ngayti nga ipagpasalamat ya, inanteng ya duꞌun it papangantengan ngayti. 21Siyagyaan it AMPUꞌANG DIYUS nga inarek ya, bawnga maat it AMPUꞌANG DIYUS kat sadili ya, “Ega na sumpaan kut sumaꞌup i banwa sabap it kasalaꞌan it taw. Pagꞌuꞌrutan ku nga karaꞌe-raꞌetan i nakapnuꞌ it nakem it taw garing pat pagwaꞌwaꞌ ya. Temed ega na puuꞌun ku i muꞌsang maginawa nga subung it binwat ku ngaytu. 22Paꞌuꞌuma baw pakakayeg, panguran baw pangaldaw, aldawun baw delemen, mintras ega paꞌ naꞌbut i umur it banwa, sigi paꞌ i muꞌsa ngaytu.”
বর্তমানে নির্বাচিত:
Genesis 8: TBWONT
হাইলাইট
শেয়ার
কপি
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
